ឧត្ដមក្រុមប្រឹក្សា​នៃ អង្គចៅក្រម​បើក​អង្គប្រជុំ​ លើក​ទី​៣៥​នៅ​ថ្ងៃទី​១១​ឧសភា​ក្រោម​ព្រះរាជា​ធិ​តី​ព្រះមហាក្សត្រ​

​ភ្នំពេញ​៖ ឧ​ត្ត​ម​ក្រុមប្រឹក្សា​នៃ​អង្គចៅក្រម នឹង​បើក​សម័យប្រជុំ​ឧ​ត្ត​ម​ក្រុមប្រឹក្សា​នៃ​អង្គចៅក្រម លើក​ទី​៣៥ នៅ​ថ្ងៃទី​១១ ខែឧសភា ឆ្នាំ​២០២២ វេលា​ម៉ោង ១០:០០​នាទី​ព្រឹក នៅ​ព្រះបរមរាជវាំង ក្រោម​ព្រះរាជាធិបតីភាព​ដ៏​ខ្ពង់ខ្ពស់ ព្រះករុណា​ជា​អ​ម្ចាស់ជីវិតលើត្បូង ព្រះមហាក្សត្រ នៃ​ព្រះរាជាណាចក្រ​កម្ពុជា ជាទីគោរព​សក្ការៈ​ដ៏​ខ្ពង់ខ្ពស់​បំផុត ព្រះប្រធាន​ឧ​ត្ត​ម​ក្រុមប្រឹក្សា​នៃ​អង្គចៅក្រម ដើម្បី​ពិនិត្យ សម្រេច និង​ពិគ្រោះ​យោបល់ លើ​របៀបវារៈ​ចំនួន ៨​។​នេះ​បើ​យោងតាម​សេចក្តីប្រកាស​ព័ត៌មាន​របស់ អគ្គលេខាធិការដ្ឋាន នៃ​ឧ​ត្ត​ម​ក្រុមប្រឹក្សា​នៃ​អង្គចៅក្រម នៅ​ថ្ងៃទី​១០ ខែឧសភា ឆ្នាំ​២០២២​។ 

​យោងតាម​សេចក្តីប្រកាស​ព័ត៌មាន បាន​ឲ្យ​ដឹង​ពី របៀបវារៈ​ចំនួន​៧ ដែល​ត្រូវ​សម្រេច​ក្នុង​អង្គប្រជុំ​៖​របៀបវារៈ​ទី​១៖ ពិនិត្យ និង​សម្រេច លើ​សេចក្ដីសម្រេច​របស់​ក្រុមប្រឹក្សាវិន័យ​នៃ​ឧ​ត្ត​ម​ក្រុមប្រឹក្សា នៃ​អង្គចៅក្រម​។

​របៀបវារៈ​ទី​២៖ ពិនិត្យ និង​សម្រេច អំពី​ការផ្ទេរ និង​តែងតាំង​ចៅក្រម​មួយចំនួន​។​របៀបវារៈ​ទី​៣៖ ពិគ្រោះ​យោបល់​លើ​សំណើ​ផ្ទេរ និង​តែងតាំង​ព្រះរាជអាជ្ញា ព្រះរាជអាជ្ញារង​មួយចំនួន តាម​សំណើ​របស់​រដ្ឋមន្ត្រីក្រសួង​យុត្តិធម៌​។​របៀបវារៈ​ទី​៤៖ ពិនិត្យ និង​សម្រេច បោះឆ្នោត​ជ្រើសតាំង​សមាជិក ១​រូប នៃ​ក្រុមប្រឹក្សាធម្មនុញ្ញ​។​របៀបវារៈ​ទី​៥៖ ពិនិត្យ និង​ផ្តល់យោបល់ អំពី​ការស្នើ​ដំឡើង​ថ្នាក់ ឋានន្តរស័ក្តិ តាម​វេន​អតីតភាព តាម​កម្រិត​សញ្ញាបត្រ និង​និយ័តកម្ម​ឋានន្តរស័ក្តិ ចំពោះ​ចៅក្រម និង​ព្រះរាជអាជ្ញា​។

​របៀបវារៈ​ទី​៦៖ ពិនិត្យ និង​សម្រេច អំពី​ការបន្ត​ការងារ​របស់​អគ្គ​ព្រះរាជអាជ្ញារង ១​រូប នៃ​មហាអយ្យការ អម​តុលាការ​កំពូល ដែលមាន​អាយុ​ចាប់ពី ៦៥​ឆ្នាំ​។​របៀបវារៈ​ទី​៧៖ ពិនិត្យ និង​សម្រេច លើ​សំណើសុំ​អនុញ្ញាត​ច្បាប់​ទៅ​បន្ត​ការសិក្សា របស់​ចៅក្រម ១​រូប នៃ​សាលាដំបូង​ខេត្តស្ទឹងត្រែង។

​