អារ៉ាប៊ីសាអ៊ូឌីតផ្តល់សារទៅប៉ាគីស្ថាន «កុំបារម្ភអី ! អារ៉ាប៊ីសាអ៊ូឌីតនឹងគាំទ្រសេដ្ឋកិច្ចប៉ាគីស្ថានយ៉ាងពេញទំហឹងជាមួយនូវការវិនិយោគ»

រីយ៉ាដ៖ព្រះអង្គម្ចាស់ មហាំម៉ាត់ ពិន សាល់ម៉ាន នាយករដ្ឋមន្ត្រីអារ៉ាប៊ីសាអ៊ូឌីត បានផ្ញើសារមួយបញ្ជាក់ពីការគាំទ្រផ្នែកហិរញ្ញវត្ថុដ៏សំខាន់ដល់ប្រទេសប៉ាគីស្ថាន ក្នុងទម្រង់ជាប្រាក់បញ្ញើ ការវិនិយោគ និងការសងបំណុល ។ 

សារនេះឆ្លុះបញ្ចាំងពីការប្តេជ្ញាចិត្តរបស់ព្រះរាជាណាចក្រអារ៉ាប៊ីសាអ៊ូឌីតក្នុងការគាំទ្រស្ថិរភាពសេដ្ឋកិច្ចប៉ាគីស្ថាន យ៉ាងពេញទំហឹង ។គួររម្លឹកថា កាលពីប៉ុន្មានថ្ងៃមុន ព្រះអង្គម្ចាស់ បញ្ជូនរដ្ឋមន្ត្រីក្រសួងហិរញ្ញវត្ថុអារ៉ាប៊ីសាអ៊ូឌីត សៀស្ខ Mohammed bin Abdullah Al-Jadaan ទៅកាន់ប្រទេសប៉ាគីស្ថាន ក្នុងគោលបំណង ដើម្បីផ្តល់ឱ្យថ្នាក់ដឹកនាំប៉ាគីស្ថាននូវការធានាយ៉ាងមុតមាំថា អារ៉ាប៊ីសាអ៊ូឌីតនឹងបោះជំហានទៅមុខ ដើម្បីដោះស្រាយភាពខ្វះខាតណាមួយដែលអាចកើតឡើងចំពោះសេដ្ឋកិច្ចប៉ាគីស្ថាន មិនថាទាក់ទងនឹងទុនបម្រុងប្តូរប្រាក់បរទេស ប្រេង គម្រោង ការវិនិយោគ ការសងបំណុលខាងក្រៅ នោះទេ ។

យោងតាមការចុះផ្សាយនៅលើគេហទំព័រ TRTWorld នៅថ្ងៃទី១៣ ខែមេសា ឆ្នាំ២០២៦ នេះ រដ្ឋមន្ត្រីហិរញ្ញវត្ថុប៉ាគីស្ថាន លោក Muhammad Aurangzeb បញ្ជាក់កាលពីល្ងាចថ្ងៃអង្គារ ថា អារ៉ាប៊ីសាអ៊ូឌីតបានយល់ព្រមផ្តល់ជំនួយហិរញ្ញវត្ថុចំនួន ៣ពាន់លានដុល្លារដល់ទីក្រុងឥស្លាម៉ាបាដ ដើម្បីបញ្ចៀសភាពតានតឹងលើទុនបម្រុងបរទេស ចំពេលមានកាតព្វកិច្ចសងបំណុលដល់ប្រទេសអារ៉ាប់រួម ។

សារព័ត៌មាន Anadolu រាយការណ៍កាលពីសប្តាហ៍មុនថា អារ៉ាប៊ីសាអ៊ូឌីត និងប្រទេសកាតា នឹងផ្តល់ជំនួយហិរញ្ញវត្ថុចំនួន ៥ពាន់លានដុល្លារដល់ប៉ាគីស្ថាន ដែលអាចឱ្យទីក្រុងឥស្លាម៉ាបាដ បញ្ចៀសភាពតានតឹងលើទុនបំរុងបរទេសទន់ខ្សោយរបស់ប្រទេសនេះ ខណៈពេលដែលធ្វើការទូទាត់ខាងក្រៅនៅខែមិថុនា ៕