រុស្ស៊ីកំពុងរៀបចំប្រតិបត្តិការសឹកថ្មីមួយដើម្បីរំលឹកដល់ថ្ងៃនៃការចាប់ផ្តើមសង្គ្រាមនិងគម្រាមអ៊ីស្រាអែលបើហ៊ានជួយអ៊ុយក្រែន
11-March-2026 / ព័ត៌មានអន្តរជាតិ
អ៊ុយក្រែន៖ រដ្ឋមន្ត្រីការពារជាតិអ៊ុយក្រែន កាលពីពេលថ្មីៗនេះ បាននិយាយថា រុស្ស៊ីកំពុងត្រៀមខ្លួនបើកការវាយប្រហារទ្រង់ទ្រាយធំថ្មីមួយទៀត នៅថ្ងៃទី ២៤ ខែកុម្ភៈ ដោយមានទិសដៅចេញពីទិសខាងជើងឆ្លងកាត់តាមប្រទេសបេឡារុស្ស ដើម្បីអាចចូលមកដល់ទីក្រុងគៀវបានយ៉ាងឆាប់រហ័ស ជាការរំលឹកខួបរយៈពេល ១ឆ្នាំនៃប្រតិបត្តិការយោធាពិសេសនៅក្នុងប្រទេសអ៊ុយក្រែន ។
មន្ត្រីការពារជាតិអ៊ុយក្រែនបានបន្តរៀបរាប់ថា រុស្ស៊ីបានប្រមូលផ្តុំកម្លាំងទ័ពប្រមាណជា ៥០ម៉ឺននាក់សម្រាប់ប្រតិបត្តិការសឹកនេះ និងបង្កជាក្តីកង្វល់មួយចំនួនថាកងកម្លាំងយោធាពីប្រទេសបេឡារុស្សអាចនឹងចូលរួមគាំទ្រដោយផ្ទាល់ផងដែរ ស្របពេលកងទ័ពនៃប្រទេសសម្ព័ន្ធមិត្តទាំងពីរ (បេឡារុស្ស-រុស្ស៊ី) ធ្លាប់ធើ្វសមយុទ្ធយោធារួមគ្នាជាច្រើនលើកច្រើនសារក្នុងរយៈប៉ុន្មានខែចុងក្រោយនេះ ។មានការកត់សម្គាល់ថាសន្ទុះនៃការវាយប្រហារដោយយោធារុស្ស៊ីបានថមថយចុះគួរឱ្យកត់សម្គាល់ក្នុងរយៈពេលជាច្រើនខែមកនេះ បន្ទាប់ពីអ៊ុយក្រែនវាយដណ្ដើមកាន់កាប់ទីក្រុង Kherson ត្រឡប់មកវិញ ។
ទាក់ទងនិងការវាយប្រហារនេះដែរអភិបាលក្រុងក្រាម៉ាតុស( Kramatorsk )ស្ថិតនៅភាគខាងកើតប្រទេសអ៊ុយក្រែន បានអះអាងថា យ៉ាងហោចណាស់មនុស្សចំនួន២នាក់បានស្លាប់ និង៧នាក់ផ្សេងទៀតរងរបួសក្នុងហេតុការណ៍វាយប្រហារដោយគ្រាប់មីស៊ីលរបស់រុស្ស៊ីទៅលើអគារស្នាក់នៅមួយកន្លែង កាលពីរាត្រីថ្ងៃពុធទី១កម្ភៈសប្តាហ៍នេះ ។តាមរយៈទិដ្ឋភាពនៅក្នុងខ្សែអាត់វីដេអូមួយ ត្រូវបានគេបង្ហោះចែកចាយដំបូងនៅលើប្រព័ន្ធសារអេឡិចត្រូនិក Telegram របស់លោកប្រធានាធិបតី Zelenskiy ដោយបានបង្ហាញពីទំហំនៃការខូចខាត និងវត្តមានរបស់ក្រុមអ្នកជួយសង្គ្រោះជាច្រើននាក់នៅឯកន្លែងកើតហេតុ។
វាជាករណីវាយប្រហារថ្មីចុងក្រោយមួយទៀតដោយរុស្ស៊ីទៅលើទីតាំងអគារស្នាក់នៅរបស់ពលរដ្ឋអ៊ុយក្រែន បន្ទាប់ពីបង្កការវាយប្រហារដ៏អាក្រក់មួយនៅក្នុងទីក្រុង Dnipro កាលពីពាក់កណ្ដាលខែមករា ដោយបណ្ដាលឱ្យជនស៊ីវិលចំនួន៤៤នាក់បានស្លាប់។ទាក់ទងនិងការផ្តល់ជំនួយយោដល់អ៊ុយក្រែននាយករដ្ឋមន្ត្រីអុីស្រាអែលលោក Benjamin Netanyahu បានបញ្ជាក់ នៅថ្ងៃទី២ខែកុម្ភៈនេះ បានប្រកាសនៅក្នុងបទសម្ភាសន៍ជាមួយបណ្តាញព័ត៌មាន CNN ថា «អ៊ីស្រាអែលអាចនឹងផ្តល់អាវុធដល់អ៊ុយក្រែន។
ទាក់ទងនិងជំនួយដ៏មានឥទ្ធិពលដែលអ៊ុក្រែនចង់បានដើម្បីការពារការវាយប្រហារពីរុស្ស៊ីនេះដែរទីភ្នាក់ងារសារព័ត៌មានAFP នៅថ្ងៃព្រហស្បតិ៍ ទី២ ខែកុម្ភៈ ឆ្នាំ២០២៣បានផ្សាយថា រុស្ស៉ីនៅថ្ងៃ១ ខែកុម្ភៈ បានព្រមានអ៊ីស្រាអែលប្រឆាំងនឹងការផ្គត់ផ្គង់អាវុធទៅឱ្យអ៊ុយក្រែន ។ឆ្លើយតបទៅនឹងការអត្ថាធិប្បាយរបស់លោកណេតាន់យ៉ាហ៊ូ អ្នកនាំពាក្យក្រសួងការបរទេសរុស្ស៉ី លោកស្រី ម៉ារៀ ហ្សាខារ៉ូវ៉ា (Maria Zakharova) បានគូសបញ្ជាក់ដូច្នេះថា «បណ្ដាប្រទេសដែលផ្ដល់អាវុធឱ្យអ៊ុយក្រែនគួរតែយល់ថាយើងនឹងចាត់ទុកអាវុធទាំងនេះ ជាគោលដៅស្របច្បាប់សម្រាប់កងកម្លាំងប្រដាប់អាវុធរុស្ស៉ី…»។ លោកស្រី ហ្សាខារ៉ូវ៉ា បន្ថែមថា ការបន្តបញ្ជូនអាវុធបន្ថែមនឹងមានតែធ្វើឱ្យសង្គ្រាមកាន់តែរាលដាលធំឡើង ដែលមនុស្សគ្រប់គ្នាគួរតែដឹងពីរឿងមួយនេះ។អ៊ុយក្រែនក៏ធ្លាប់បានទទូចស្នើសុំអាវុធជាពិសេសគឺប្រព័ន្ធការពារដែនអាកាសពីអ៊ីស្រាអែលជាច្រើនលើកដែរ តែមិនបានចម្លើយតបជាវិជ្ជមាននោះទេ មកទល់នឹងពេលនេះ។ប្រភព៖ Reuters ៖ BBC News
