បារាំងនិងអាល្លឺម៉ង់សន្យាថានឹងបន្តជួយអ៊ុយក្រែនបើទោះបីមិនទាន់ឲ្យរថក្រោះ
21-September-2026 / ព័ត៌មានអន្តរជាតិ
បារាំង៖ ប្រធានាធិបតីបារាំងលោក Emmanuel Macron បាននិយាយកាលពីថ្ងៃអាទិត្យ ទី២២ ខែមករាកន្លងទៅនេះថា ប្រទេសរបស់លោកនឹងមិនច្រានចោលនូវលទ្ធភាពក្នុងការបញ្ជូនរថក្រោះប្រយុទ្ធប្រភេទLeclercទៅឱ្យអ៊ុយក្រែនក្នុងពេលដែលចំបាច់ណាមួយនៅថ្ងៃខាងមុខនោះទេ ។ ថ្លែងនៅក្នុងសន្និសីទសារព័ត៌មានមួយបន្ទាប់ពីកិច្ចប្រជុំរំលឹកខួបទី ៦០ឆ្នាំ នៃសន្ធិសញ្ញាមិត្តភាពរវាងបារាំងអាឡឺម៉ង់ ជាមួយនិងលោកអធិការបតីអាឡឺម៉ង់ Olaf Scholz នៅឯទីក្រុងប៉ារីស លោក Macro បានបញ្ជាក់ថា ការផ្តល់នូវសព្វាវុធធុនធ្ងន់ទៅឱ្យអ៊ុយក្រែនដើម្បីប្រើប្រាស់ប្រឆាំងទៅនឹងរុស្ស៊ីគឺជារឿងដ៏រសើបនិងគ្រោះថ្នាក់បំផុតមួយ ដែលនឹងអាចធើ្វបញ្ហាសង្គ្រាមរុស្ស៊ីនិងអ៊ុយក្រែនកាន់តែរីករាលដាលខ្លាំងថែមទៀត។
មេដឹកនាំបារាំងរូបនេះបានបន្ដថា រដ្ឋាភិបាលរបស់លោកនឹងមិនបំបាត់ចោលនូវលទ្ធភាពក្នុងការបញ្ចូនរថក្រោះរបស់ខ្លួនទៅជួយអ៊ុយក្រែននោះទេ ប្រសិនបើមានការផ្តល់ឱ្យនោះ នឹងមិនធើ្វឱ្យបញ្ហាសង្គ្រាមមួយនេះកាន់តែអាក្រក់ឡើង និងនៅពេលដែលមានការចូលរួមពីក្រុមប្រទេសដែលជាសម្ព័ន្ធមិត្តធំៗ ដូចជាសហរដ្ឋអាម៉េរិក អាឡឺម៉ង់និងចក្រភពអង់គ្លេសជាដើម។ដោយឡែកមន្ត្រីគណៈប្រតិភូជាន់ខ្ពស់អាឡឺម៉ង់វិញក៏បានលើកឡើងកាលពីថ្ងៃអាទិត្យ ទី២២ ខែមករាដែរថា រដ្ឋាភិបាលអាឡឺម៉ង់នឹងមិនជំទាស់ទៅនិងបំណងរបស់ប្រទេសប៉ូឡូញក្នុងការបញ្ចូនរថក្រោះប្រយុទ្ធប្រភេទ Leopard 2 ដែលផលិតដោយប្រទេសអាឡឺម៉ង់ទៅឱ្យយោធាអ៊ុយក្រែននោះឡើយ។
នៅក្នុងកិច្ចសម្ភាសន៍មួយជាមួយនឹងភ្នាក់ងារសារព័ត៌មានបារាំង (LCI) លោកស្រីរដ្ឋមន្ត្រីការបរទេសអាឡឺម៉ង់ Annalena Baerbock បានបញ្ជាក់ថា រដ្ឋាភិបាលប៉ូឡូញនៅមិនទាន់ដាក់សំណើជាផ្លូវការណាមួយមកកាន់អាឡឺម៉ង់ពាក់ព័ន្ធទៅនឹងបំណងក្នុងការបញ្ចូនរថក្រោះ Leopard 2 របស់ខ្លួនទៅឱ្យប្រទេសអ៊ុយក្រែននៅឡើយទេ។លោកស្រី Annalena Baerbock បានថ្លែងទទួលស្គាល់អំពីសារៈសំខាន់នៃស្ថានការណ៍យោធានៅក្នុងប្រទេសអ៊ុយក្រែនពេលបច្ចុប្បន្នដែលជំរុញឱ្យក្រុមប្រទេសសម្ព័ន្ធមិត្តចង់ឱ្យមានការផ្តល់ជាគ្រឿងសព្វាវុធធុនធ្ងន់សម្រាប់ជួយទៅដល់រដ្ឋាភិបាលទីក្រុងគីវដើម្បីប្រយុទ្ធការពារខ្លួនពីការបន្ដឈ្លានពានរបស់រុស្ស៊ី និងជាអ្វីដែលរដ្ឋាភិបាលអាឡឺម៉ង់កំពុងតែខិតខំពិភាក្សាគ្នាយ៉ាងយកចិត្តទុកដាក់ជាមួយនឹងបណ្ដាប្រទេសជាដៃគូសំខាន់ៗដូចជា សហរដ្ឋអាម៉េរិក បារាំង និងចក្រភពអង់គ្លេសដើម្បីស្វែងរកការឯកភាពគ្នាមួយដែលនឹងធានាដល់ការរក្សាសន្ដិភាពនិងស្ថេរភាពនៅក្នុងតំបន់អឺរ៉ុបនៅថ្ងៃខាងមុខ និងចៀសវាងការធើ្វឱ្យបញ្ហាសង្គ្រាមរុស្ស៊ីនិងអ៊ុយក្រែនកាន់តែរីករាលដាលធំថែមទៀត។
គួរបញ្ជាក់ថា ប៉ូឡូញ រួមជាមួយនឹងហ្វាំងឡង់ ធ្លាប់បានលើកឡើងអំពីគម្រោងចង់បញ្ជូនរថក្រោះជាច្រើនគ្រឿងទៅឲ្យអ៊ុយក្រែនដោយមិនខ្លាចចិត្តរុស្ស៊ីឡើយ។ ក៏ប៉ុន្តែ រថក្រោះទាំងនេះ ជារថក្រោះដែលទិញពីអាល្លឺម៉ង់ ដូច្នេះ ប៉ូឡូញ ក៏ដូចជាហ្វាំងឡង់ដែរ ត្រូវការជាចាំបាច់នូវការឯកភាពពីសំណាក់រដ្ឋាភិបាលអាល្លឺម៉ង់ជាមុន ទើបអាចបញ្ជូនរថក្រោះទាំងនេះបន្តទៅឲ្យអ៊ុយក្រែនបាន។គិតរហូតមកទល់នឹងពេលនេះ លោកអូឡាហ្វ ស្ហុលស៍ តែងតែប្រកាន់នូវជំហរមួយថា អាល្លឺម៉ង់នឹងមិនធ្វើអ្វីតែឯងនោះទេ គឺចាំបាច់ត្រូវតែធ្វើរួមគ្នាជាមួយប្រទេសសម្ព័ន្ធមិត្តផ្សេងទៀត។ ជាពិសេស អាល្លឺម៉ង់ចង់ឲ្យអាមេរិកបញ្ជូនរថក្រោះធុន M1 Abrams ទៅឲ្យអ៊ុយក្រែនដែរ ទើបអាល្លឺម៉ង់សុខចិត្តបញ្ជូនរថក្រោះ ធុន Leopard របស់ខ្លួនទៅជាមួយគ្នា។
ការសម្រេចអនុញ្ញាត ឬមិនអនុញ្ញាតឲ្យបញ្ជូនរថក្រោះអាល្លឺម៉ង់ទៅឲ្យអ៊ុយក្រែន គឺជាសិទ្ធិអំណាចរបស់លោកអូឡាហ្វ ស្ហុលស៍ ដែលជាប្រមុខរដ្ឋាភិបាល។ ក៏ប៉ុន្តែ ការលើកឡើងជាសាធារណៈរបស់លោកស្រី អាណាឡេណា ប៊ែរបុក អាចជាតម្រុយមួយនៃជំហរចម្រូងចម្រាសគ្នា នៅក្នុងចំណោមរដ្ឋាភិបាលអាល្លឺម៉ង់ ហើយវាអាចជាសម្ពាធមួយបន្ថែមទៀត ទៅលើលោកអូឡាហ្វ ស្ហុលស៍ ពីព្រោះថា លោកស្រី អាណាឡេណា ប៊ែរបុក មកពីគណបក្សដ៏សំខាន់មួយ ដែលមានសំឡេងច្រើនលំដាប់ទីពីរ នៅក្នុងចំណោមគណបក្សទាំងបី នៅក្នុងរដ្ឋាភិបាលចម្រុះ ដឹកនាំដោយអូឡាហ្វ ស្ហុលស៍ បច្ចុប្បន្ន។
មេដឹកនាំនៃប្រទេសសម្ព័ន្ធមិត្តទាំងពីរបានប្តេជ្ញាថានឹងបន្ដជួយដល់អ៊ុយក្រែនរហូតដល់ទីបញ្ចប់ ដើម្បីជាការរួមចំណែកគាំពារទៅលើគោលការណ៍ច្បាប់អន្តរជាតិ ក៏ដូចជាអនាគតរបស់សហភាពអឺរ៉ុបទាំងមូលចេញពីការគំរាមគំហែងរបស់ក្រុមជនផ្ដាច់ការ។ ហើយជំនួយទាំងនោះទៀតសោត គឺនឹងត្រូវផ្តោតទៅលើវិស័យយោធារួមនិងសេដ្ឋកិច្ច ដើម្បីជួយឱ្យអ៊ុយក្រែនអាចមានលទ្ធភាពការពារខ្លួន រួមនិងការកសាងប្រទេសជាតិឡើងវិញនៅថ្ងៃខាងមុខ៕ប្រភព៖ Reuters Connectប្រភព៖ AP
