សម្តេចតេជោ៖គណបក្សផ្សេងលោកគង់គាំនិងកូនគង់បូរ៉ាធើឲ្យស្រួលប្រយត្ន័អត់មិនបាន!
កំពង់ចាម ៖ ក្នុងពិធីបើកការដ្ឋានពង្រីកកំណាត់ផ្លូវជាតិពីស្គន់ ទៅក្រុងកំពង់ចាម នៅព្រឹកថ្ងៃចន្ទ ទី០៩ ខែមករា ឆ្នាំ២០២៣ សម្តេចតេជោ ហ៊ុន សែនប្រធានគណបក្សប្រជាជនកម្ពុជានិងជា នាយករដ្ឋមន្ត្រី បានព្រមានគណបក្សប្រឆាំងមួយចំនួន ដែលបន្តវាយប្រហារមកលើគណបក្សប្រជាជនកម្ពុជា ដូចជាការចោទប្រកាន់ថាជាចោរលួចសន្លឹកឆ្នោតជាដើម។ សម្តេចបញ្ជាក់ដូច្នេះថា៖ «តើអ្នកចង់ប្រែក្លាយខ្លួនជាសត្រូវរបស់គណបក្សប្រជាជន ឬយ៉ាងណា? បើអ្នកចង់ឈ្នះឆ្នោត អ្នកគ្រាន់តែឃោសនាពីនយោបាយរបស់អ្នកទៅបានទេ ចាំបាច់អីអ្នកមកវាយប្រហារគណបក្សប្រជាជន អ្នកលក់ទំនិញរបស់អ្នកអួតពីទំនិញរបស់អ្នកទៅ»។
មុននឹងមានការព្រមាននេះ សម្តេចតេជោឲ្យដឹងថាសម្តេច បានទទួលនូវការបញ្ជូនភស្តុតាងពីមនុស្សរបស់សម្តេច ចេញពីកិច្ចប្រជុំរបស់គណបក្សប្រឆាំង នៅក្នុងខេត្តសៀមរាប និងខេត្តកំពង់ចាម ដោយសម្តេចអះអាងថា មនុស្សទាំងនោះ មិនពេញចិត្តនឹងការឃោសនាបែបនេះឡើយ។
សម្តេចបន្តថា៖ «ខ្ញុំចង់សួរអ្នកវិញថា ជម្រើសមានតែពីរទេ គឺទី១៖ គឺប្រើផ្លូវច្បាប់ និងមួយទៀតគឺប្រើដំបងតែម្តង តើអ្នកយកមួយណាពីរនេះ អាហ្នឹងអ្នកនិយាយឱ្យច្បាស់ ខ្ញុំសូមព្រមានចំពោះអ្នក ពួកខ្ញុំមិនទុកឱ្យពួកអ្នកចោទថាជាចោរមួយជីវិតទេ ខ្ញុំសូមជម្រាបជូន ត្រូវតែបញ្ចប់វប្បធម៌ ឡាំប៉ាក្រោយការបោះឆ្នោត»។សម្តេចតេជោ ហ៊ុន សែន ក៏បានបានព្រមានចាត់វិធានការលើ លោក គង់ គាំ ដែលបានយកវេទិកានានា វាយប្រហារលើគណបក្សប្រជាជនកម្ពុជា។ សម្តេចតេជោ បានលើកឡើងថា គណបក្សប្រឆាំង នៅពេលដែលឃោសនា តែងតែវាយប្រហារលើគណបក្សកាន់អំណាច ហើយក្នុងចំណោមនោះ ក៏មានលោក គង់ គាំ។
សម្តេចបានស្នើលោក គង់ គាំ ធ្វើនយោបាយតាមរបៀបដោះស្រាយបញ្ហារបស់ខ្លួន ដោយកុំយកគណបក្សប្រជាជនធ្វើជារបៀបវារៈ នៃការវាយប្រហារ។
សម្តេចតេជោ ហ៊ុន សែន ក៏បានព្រមានប្តឹងយកផ្ទះរបស់ លោក គង់ គាំ ផងដែរ។ សម្តេចបានបញ្ជាក់ថា ផ្ទះនេះគឺជាអតីតទ្រព្យសម្បត្តិរបស់ក្រសួងការបរទេស ដែលអតីតកាល លោក គង់ គាំ ត្រឡប់ធ្វើអគ្គរដ្ឋទូតនៅទីក្រុងហាណូយវិញ បានដណ្តើមយកផ្ទះនោះ។ ទោះជាយ៉ាងណា សម្តេចអះអាងថា សម្តេចនៅតែយោគយល់ដោយសារតែលោក គង់ គាំ ធ្លាប់នៅជាមួយគ្នា។ សម្តេចចាត់ទុកថា នេះជាការដាស់តឿន លោក គង់ គាំ កុំឲ្យព្រហើនពេក។
ក្រៅពីការព្រមានសម្តេចតេជោ ហ៊ុន សែន ប្រធានគណបក្សប្រជាជនកម្ពុជា បានថ្លែងសារដាស់តឿនលោក គង់ បូរ៉ា ដែលជាអនុរដ្ឋលេខាធិការក្រសួងមហាផ្ទៃ និងជាមន្ត្រីគណបក្សប្រជាជនកម្ពុជា ត្រូវបម្រើបក្សឲ្យត្រឹមត្រូវ ពោលគឺកុំឆ្លៀតបម្រើបក្សប្រឆាំងឲ្យសោះ។ «គង់ បូរ៉ា ដែលចូលមកគណបក្សប្រជាជន។ គង់ បូរ៉ា ត្រូវធ្វើឲ្យស្រួល! ឥឡូវ ជាអនុរដ្ឋលេខាធិការ ក្រសួងមហាផ្ទៃផង។ បើមកគណបក្សប្រជាជន ត្រូវបម្រើគណបក្សប្រជាជន មិនអាចបម្រើឲ្យគណបក្សប្អូនរបស់ខ្លួនបានទេ។ អាហ្នឹង ខ្ញុំសូមរំលឹកទៅ គង់ បូរ៉ា ចំឈ្មោះ ដែលជាកូនរបស់ គង់ គាំ។ គង់ គាំ ជាអ្នកប្រឆាំង ឯកូនជាអ្នកចុះចូល។ ឡាន ដែលគង់ បូរ៉ា ជិះហ្នឹងណា ខ្ញុំទិញឲ្យ ដោយសារឃើញថា ធ្វើការជាមួយខ្ញុំតាំងពីតូច… ។ គង់ បូរ៉ា ធ្វើឲ្យត្រឹមត្រូវ»។
ការព្រមានរបសើសម្តេចហ៊ុនសែនមិនមែនគ្រាន់តែនិយាយចោលនោះទេជាក់ស្តែងកន្លងមកនេះលោក សុន ឆ័យ អនុប្រធានគណបក្សភ្លើងទៀន ដែលត្រូវបានរងបណ្តឹងហើយត្រូវបានតុលាការបង្គាប់ឲ្យសងជំងឺចិត្តទៅគណបក្សប្រជាជនកម្ពុជាប្រមាណជា១លានដុល្លារក្នុងបទបរិហាកេរ្តិ៍ ។សម្រាប់លោក សុន ឆ័យវិញរឿងបានចាត់ទុករឿងក្តីក្តាំរបស់លោកមិនមែនគ្រាន់តែជារឿងបុគ្គលក្នុងនាមលោកជាអ្នកនយោបាយក្រៅរដ្ឋាភិបាលនោះទេ។ ក៏ប៉ុន្តែគឺជាក្តីក្តាំដែលឆ្លុះបញ្ចាំងអំពីការបោះឆ្នោតនៅកម្ពុជា ដែលលោកបានអះអាងថា មិនមានភាពសេរីភាព យុត្តិធម៌។ បើតាមលោក សុន ឆ័យ សំណុំរឿងរបស់លោក ត្រូវបានឃ្លាំមើលពីបណ្តាសហគមន៍អន្តរជាតិ និងរួមទាំងបណ្តាទូតប្រចាំនៅកម្ពុជា ដើម្បីឈានឆ្ពោះទៅរកការបោះឆ្នោតថ្នាក់ជាតិឆ្នាំ២០២៣ ដែលមានអាចទទួលយកបានពីគ្រប់ភាគីពាក់ព័ន្ធ។ថ្មីៗនេះប្រធានក្រុមមេធាវីរាជរដ្ឋាភិបាលកម្ពុជា លោក គី តិច បាន នាំយកថវិកាជិត ៥ម៉ឺនដុល្លាររបស់លោក ហេង សំរិន ប្រធានរដ្ឋសភា ដែលបានពីសំណងជំងឺចិត្តចំពោះការប្តឹងសហស្ថាបនិកគណបក្សសង្គ្រោះជាតិ លោក សម រង្ស៉ី ទៅប្រគល់ជូនមន្ទីរពេទ្យគន្ធបុប្ផា កាលពីរសៀលថ្ងៃទី៧ ខែមករា ឆ្នាំ២០២៣។
ប្រភពដដែលបន្តថា ចំណែក ថវិការបស់លោកនាយករដ្ឋមន្ត្រី និងជាប្រធានគណបក្សប្រជាជនកម្ពុជា លោក ហ៊ុន សែន ចំនួនជិត១លានដុល្លារ(៧៧៥ ១៧២,៧១) ដែលទទួលបានសំណងពីលោក សម រង្ស៊ី ត្រូវបានប្រគល់ជូនក្រុមមេធាវីស្ម័គ្រចិត្ត ទុកក្នុងកញ្ចប់ថវិកា សម្រាប់ប្រតិបត្តិការការពារក្តីជូនស្ត្រីងាយរងគ្រោះ និងមានជីវភាពទន់ខ្សោយ ។រីឯ ថវិកា ដែលជាចំណែករបស់លោក ស ខេង ចំនួនជិត ៤០ម៉ឺនដុល្លារសហរដ្ឋអាមេរិក(៣៨៧ ៥៨៦,៣៥) ដែលទទួលបានសំណងពីលោក សម រង្ស៊ី ត្រូវបានចាត់ចែងប្រគល់សម្រាប់ការសាងសង់សាលារៀន និងមណ្ឌលកុមារកំព្រា តាមបណ្តាមូលដ្ឋាន ខេត្ត ខណៈថវិកាចំនួនជាង៤៣ម៉ឺនដុល្លារ (៤៣៤ ៩៩២,៧៥) និងថវិកាចំនួនជិត៦ពាន់ដុល្លារ(៥ ៧៩៩,៩០) ត្រូវបានដាក់ជូនជាថវិកាជាតិ ។
ទាក់ទងរឿងលក់ផ្ទះនិងជាទីស្នាក់ការអតីតគណបក្សសង្គ្រោះជាតិយកលុយសងដើមបណ្តឹងនេះប្រធានគណបក្សឆន្ទៈខ្មែរ លោក គង់ ម៉ូនីកាដែលរត់ចូលជាមួយគណបក្សភ្លើងទៀន បានប្រាបើកាសែតថា តុលាការសម្រេចរឹបអូសទ្រព្យសម្បត្តិលោក សម រង្ស៊ី លក់ឡៃឡុង សងជំងឺចិត្តទៅថ្នាក់ដឹកនាំកំពូលៗរបស់គណបក្សកាន់អំណាច ហើយត្រូវបានតំណាងពួកគេ យកទៅប្រគល់ជូនមន្ទីរពេទ្យ និងសាងសង់សាលារៀនជាដើមនោះ ជាការគំរាមកំហែងដល់អ្នកនយោបាយផ្សេងទៀត។ ការធ្វើបែបនេះ លោកថា ផ្ទុយពីគោលការណ៍ប្រជាធិតេយ្យសេរីពហុបក្ស ច្បាប់រដ្ឋធម្មនុញ្ញ និងធ្វើឱ្យបែកបាក់ជាតិ។លោកថា៖ «ជានយោបាយបែបប្រជាភិថុត ជានយោបាយផ្ចាញ់ផ្ចាល់គ្នាតាមរយៈយកប្រព័ន្ធតុលាការដែលមិនយុត្តិធម៌ មកធ្វើការគំរាមកំហែងដល់អ្នកដែលមានទស្សនផ្ទុយ មកធ្វើការគាបសង្កត់ដល់អ្នកនយោបាយប្រឆាំងនៅកម្ពុជា ហើយខ្ញុំមិនគាំទ្រយុទ្ធសាស្ត្រនយោបាយបែបនេះទេ ព្រោះវាធ្វើឱ្យមានការការបែកបាក់គ្នាកាន់តែខ្លាំងរវាងអ្នកនយោបាយខ្មែរ និងខ្មែរ ហើយសុំឱ្យអ្នកនយោបាយងាកមកប្រកួតប្រជែងគ្នាដោយស្មើភាពវិញ ទើបធ្វើឱ្យពលរដ្ឋរីករាយសប្បាយចិត្ត»។
លោក អ៊ូ ច័ន្ទរ័ត្នអនុប្រធានគណបក្សកែទម្រង់កម្ពុជាដែលបរាជ័យក្នុងការបោះឆ្នោតឈុំសង្កាត់ក៏មានទស្សនៈដូចលោកគង់មុនីដែរ ថា ការសម្រេចរបស់តុលាការរឹបអូសទ្រព្យសម្បត្តិរបស់លោក សម រង្ស៊ី លក់ឡៃឡុង និងផ្តល់សំណងដល់បក្សកាន់អំណាចច្រើនលើសលុបបែបនេះ ជារឿងអយុត្តិធម៌ ពីព្រោះសំណុំរឿងលោក សម រង្ស៊ី កើតចេញពីរឿងនយោបាយតែប៉ុណ្ណោះ ។លោក អ៊ូ ច័ន្ទរ័ត្ន មានប្រសាសន៍បន្ថែមថា ការធ្វើនយោបាយបែបនេះ ជាសារគំរាមកំហែងដល់អ្នកនយោបាយបក្សក្រៅរដ្ឋាភិ បាល និងធ្វើឱ្យពលរដ្ឋអស់ជំនឿលើប្រព័ន្ធយុត្តិធម៌នៅកម្ពុជាថែមទៀត។លោកថា៖ «មិនមែនមានតែខ្ញុំទេ ធ្វើឱ្យអ្នកនយោបាយទូទៅមានការព្រួយបារម្ភពីសុវត្ថិភាព បើសិនជាបង្កើតវប្បធម៌ប្តឹងផ្តល់បែបហ្នឹង។ រឿងបទបរិហាក្តេរិ៍ វាធ្វើឱ្យមនុស្សលែងហ៊ាននិយាយ បើអ្នកនយោបាយលែងហ៊ាននិយាយហើយមិនដឹងថាប្រទេសហ្នឹងគោរពគោលការណ៍ប្រជាធិបតេយ្យ គោរពសិទ្ធិមនុស្សរបៀបម៉េច? ហើយអ្នកនយោបាយទៅការពារផលប្រយោជន៍ប្រជាពលរដ្ឋ និងការពារផលប្រយោជន៍ជាតិរបៀបម៉េចទេ?»។
