វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1318 នាក់
ម្សិលមិញ 6677 នាក់
សរុប 14148894 នាក់
អាមេរិកកម្ពុជា៖រដ្ឋអាជ្ញាអាមេរិកបានអះអាងថាក្រសួងយុត្តិធម៌អាមេរិកមានភស្តុតាងជាវីដេអូចំពោះការចោទប្រកាន់មន្ត្រីក្រសួងកសិកម្ម នៅក្នុងសំណុំរឿងជួញដូរសត្វស្វាក្តាម ពីកម្ពុជាដែលគេចាត់ទុកថា ជាសត្វកម្រជិតផុតពូជ។ ការអះអាងរបស់រដ្ឋអាជ្ញា ធ្វើឡើងនៅក្រោយពេលដែលស្ថានទូតកម្ពុជាប្រចាំអាមេរិក បានស្នើសុំឲ្យលោក គ្រី មគ្គផល នៅក្រៅពន្ធនាគារ នាខណៈដែលមន្ត្រីក្រសួងកសិកម្មរូបនេះ កំពុងស្ថិតនៅមណ្ឌលឃុំឃាំង Metropolitan នៅទីក្រុងញូយ៉ក។
នៅក្នុងលិខិតទៅកាន់តុលាការ លោក Watts Fitzgerald ដែលរដ្ឋអាជ្ញា បានអះអាងថា លោក គ្រី មគ្គផល ប្រធាននាយកដ្ឋានសត្វព្រៃនិងជីវចម្រុះនៃរដ្ឋបាលព្រៃឈើមិនត្រឹមតែចោទប្រកាន់ឲ្យជាប់ពន្ធនាគាររយៈពេលវែងប៉ុណ្ណោះទេ តែអាមេរិកក៏មានភស្តុតាងយ៉ាងរឹងមាំដើម្បីប្រឆាំងនឹងលោក គ្រី មគ្គផលផងដែរ។ បើតាមលិខិត គឺអាជ្ញាធរអាមេរិក មានភស្តុតាងជាវីដេអូ ដើម្បីចោទលោកគ្រីម៉ះផលនៅក្នុងបទល្មើសជួញដូរសត្វស្វាក្តាម។ នៅក្នុងសវនាការដែលស្នើសុំឲ្យលោក គ្រី ម៉ះផល នៅក្រៅឃុំកាលពីថ្ងៃទី០៥ធ្នូ លោក Ian McGinley មេធាវីការពារមន្ត្រីកសិកម្ម បានជំទាស់ទៅនឹងភស្តុតាងដែលចោទប្រកាន់មកលើលោក គ្រី មគ្គផល។ លោក McGinley ចាត់ទុកថាភស្តុតាងដែលបានយកមកចោទប្រកាន់នោះ បានកើតឡើងនៅឆ្នាំ២០២០ ហើយបើពិតជាដូច្នេះមែន នោះអាជ្ញាធរអាមេរិកនឹងចោទប្រកាន់ក្នុងពេលភ្លាមៗ។
គួរបញ្ជាក់ថា ក្រសួងយុត្តិធម៌អាមេរិក បានចាប់ខ្លួនមន្ត្រីកសិកម្មមួយរូប កាលពីថ្ងៃទី១៦វិច្ឆិកា ក្នុងបទល្មើសជួញដូរសត្វព្រៃ។ មានភស្តុតាងដាក់បន្ទុកចំនួន៣១ ដូចយ៉ាងប្រតិបត្តិការហិរញ្ញវត្ថុ និងការដឹកជញ្ជូនសត្វស្វារាប់រយក្បាលក្រោមឯកសារក្លែងបន្លំ ទៅកាន់រដ្ឋផ្លរីដា និងរដ្ឋតិចសាស់ ប្រទេសអាមេរិក និងទៅកាន់ក្រុមហ៊ុនឯកជនស្រាវជ្រាវផ្នែកជីវសាស្ត្រឈ្មោះ «Vanny Bio Research» របស់ជនជាតិហុងកុង ក្នុងខេត្តពោធិ៍សាត់ ប្រទេសកម្ពុជា។ នេះបើតាមការបញ្ជាក់របស់ក្រសួងយុត្តិធម៌អាមេរិក។សេចក្តីរាយការណ៍បានឲ្យដឹងថាតាមរយៈក្រុមហ៊ុនកម្ពុជាបាននាំស្វាប្រមាណ៧ម៉ឺនក្បាលចូលទៅអាមេរិកដែលមានតម្លៃជាង២០០លានដុល្លារអាមេរិក។
សម្រាប់ក្រសួងកសិកម្មកម្ពុជាវិញបានចាត់ទុកថា ការចោទប្រកាន់និងឈានទៅចាប់ខ្លួនមន្ត្រីក្រសួងកសិកម្ម គឺជារឿងដែលហួសចិត្ត ដ្បិតលោក គ្រី មគ្គផល ទៅអាមេរិកដើម្បីចូលរួមកិច្ចប្រជុំផ្លូវការ ដើម្បីការពារសត្វនិងរុក្ខាជាតិជិតផុតពូជ។ លោក ឌិត ទីណា ដែលជារដ្ឋមន្ត្រីក្រសួងកសិកម្ម បានអះអាងថា ស្វាដែលអាមេរិកយល់ថាជាសត្វកម្រនោះ គឺគេស្គាល់យ៉ាងទូលំទូលាយសម្រាប់ប្រជាជនកម្ពុជាថាជាស្វាវត្តភ្នំ ហើយសូម្បីតែស្វាវត្តភ្នំ ក៏មិនត្រូវបាននាំចេញដែរ។ តុលាការអាមេរិកកំពុងដំណើរការក្តីរត់ពន្ធសត្វស្វាក្តាមខុសច្បាប់ជាចង្កោមនេះ លើជនជាប់ចោទសរុបចំនួន ៨នាក់ ដែលក្នុងនោះមាន២នាក់ជាមន្ត្រីកម្ពុជា និង៦នាក់ទៀតជាម្ចាស់និងបុគ្គលិកជាន់ខ្ពស់របស់ «Vanny Bio Research» ដែលជាស្ថាប័ននាំចេញឬផ្គត់ផ្គង់ថនិកសត្វផ្តាច់មុខសម្រាប់ការស្រាវជ្រាវផ្នែកជីវសាស្ត្រ៕