ទ្រាំមិនបានករណីយ៍លោក ឆូ សម្បត្តិ មេឃុំព្រែកប្ញស្សី លក់ដីលក់បឹងមេភូមិពាមស្ដី រាយការណ៍ជូនសម្តេចតេជោ!
21-September-2026 / ព័ត៌មានជាតិ
ភ្នំពេញ ៖ លោក សៅ សុវណ្ណ មេភូមិពាមស្ដីដែលធ្វើការងារ៤០ឆ្នាំមកហើយនោះបានធ្វើលិខិតមួយ គោរពរាយការណ៍ជូនសម្តេចតេជោ ហ៊ុន សែន នាយករដ្ឋមន្ត្រីនិងជាប្រធានគណបក្រប្រជាជនកម្ពុជាអំពីករណីយ៍ដែលលោកមេឃុំព្រែកឬស្ស៊ីស្រុកល្វាឯមខេត្តកណ្តាលធ្វើការងារអត្តនោម័យត្តលក់ដីលក់បឹងនិងផ្តល់សេវាជូនប្រជាពលរដ្ឋមិនបានល្អ។
យោងតាមលិខិត្តបានបង្ហាញថា៖ខ្ញុំបាទឈ្មោះ សៅ សុវណ្ណ ភេទប្រុស អាយុ៧១ឆ្នាំ មានតួនាទីជាមេភូមិពាមស្ដី និងមានមុខងារក្នុងបក្ស ជាប្រធានសាខាបក្សភូមិពាមស្ពឺ ឃុំព្រែកឬស្សី ស្រុកល្វាឯម ខេត្តកណ្តាល។ លេខទូរស័ព្ទ 011 906895 ខ្ញុំបាទធ្វើជាមេភូមិ អស់រយៈពេល៤០ឆ្នាំមកហើយ ហើយដោយក្តីព្រួយបារម្ភ ពីការបាត់បង់សម្លេងឆ្នោត ព្រោះតែការប្រព្រឹត្តរបស់លោក ធូ សម្បត្តិ កំពុងធ្វើឲ្យប្រជាពលរដ្ឋក្នុងមូលដ្ឋានអស់ជំនឿជឿជាក់។
ខ្ញុំបាទឈ្មោះ សៅ សុវណ្ណ សូមគោរពរាយការណ៍ឲ្យបានជ្រាបថា ឃុំព្រែកប្ញស្សី មានចំនួន៥ភូមិ ស្ថិតក្នុង ស្រុកល្វាឯម ខេត្តកណ្តាល។ ក្រុមប្រឹក្សា មានចំនួន៧អាសនៈ ប៉ុន្តែត្រូវបាត់បង់អស់ចំនួន២អាសនៈ (អស់សមាជិកគាំទ្រចំនួន ១២៧៥នាក់) ក៏ព្រោះតែប្រជាពលរដ្ឋអស់ជំនឿ ដោយសារតែលោក ធូ សម្បត្តិ ជាមេឃុំ បានប្រព្រឹត្តរឿងមិនគប្បីជាច្រើន។
លោកមេភូមិបញ្ជាក់ថា៖ ខ្ញុំបាទ សៅ សុវណ្ណ សូមរៀបរាប់ពីដំណើររឿងមួយចំនួន របស់លោក ធូ សម្បត្តិ មានដូចជា៖ ការប្រព្រឹត្តិអំពើពុករលួយ ឃុបឃិតគ្នា ចុះហត្ថលេខាលក់ដីជាតិ (ដីរដ្ឋ) គឺលក់ដី បាតព្រែក និងដីបាតទន្លេតូច ជាច្រើនហិកតា ដែលមានប្រវែងជាមួយគីឡូម៉ែត្រឲ្យទៅឈ្មួញ។*ចំណុចមួយទៀត គឺការផ្តល់សេវាសាធារណៈ ជូនដល់ប្រជាពលរដ្ឋ ក៏មានការយឺតយ៉ាវ និងមិនបានទូលំទូលាយ ដូចជាការបញ្ជាក់លិខិតអាពាហ៍ពិពាហ៍ ពី២ ទៅ៣ជើង ទើបលោក ធូ សម្បត្តិ ដែលជាមេឃុំ ព្រែកឬស្សី ចុះហត្ថលេខាឲ្យ ហើយចំពោះការធ្វើលិខិតបញ្ជាក់កំណើត ជូនប្រជាពលរដ្ឋវិញ គឺមានការតឹងតែង និងលំបាកខ្លាំង។
លោក ធូ សម្បត្តិ តែងតែប្រើសិទ្ធិអំណាចជាមេឃុំ ធ្វើអ្វីស្រេចតែអំពើចិត្តខ្លួនឯង មិនមានការ ពិភាក្សាជាមួយក្រុមប្រឹក្សាឃុំនោះទេ ច្រើនតែអត្តនោម័តិតែម្នាក់ឯង ធ្វើឲ្យផ្ទៃក្នុងបក្សរង្គោះរង្គើរ។អត្តចរិត លោក ឆូ សម្បត្តិ ឆេវឆាវ ច្រើតែជឿតាមការញុះញង់ របស់សកម្មជនបក្សប្រឆាំង ហើយមកនិយាយគៀបសង្កត់ និងវ៉ៃប្រហារគ្នាឯង ដែលជាមន្ត្រីភូមិ ក្រុមប្រឹក្សាឃុំ នៅចំពោះមុខសមាសភាពបក្សប្រឆាំង ដោយបច្ចុប្បន្ន ធ្វើឲ្យផ្ទៃក្នុងល្អក់កករ និងធ្វើឲ្យសមាជិកបក្សអសកម្ម។
ម្យ៉ាងទៀតលោកមេឃុំរូបនេះ បានផ្ដល់ដីសម្បទានរបស់ភូមិ ទុកសម្រាប់ចែកជូនសមាជិកបក្សក្រីក្រ គ្រាន់បានសង់លំនៅដ្ឋាន ឲ្យទៅសកម្មជនបក្សប្រឆាំង ធ្វើផ្ទះតាមចិត្ត។ មិនដឹងថា លោកមេឃុំរូបនេះ ទទួលលុយបានប៉ុន្មានទេ បានជាហ៊ានធ្វើបែបនេះ ដែលទង្វើរនេះ ធ្វើឲ្យបាត់បង់សន្លឹកឆ្នោត និងការគាំទ្រថែមទៀតផង។គ្រប់ករណីដែលលោក ធូ សម្បត្តិ មេឃុំព្រែកឬស្សី បានប្រព្រឹត្តខាងលើនេះ ធ្វើឲ្យខ្ញុំ ព្រមទាំងប្រជាពលរដ្ឋមានក្តីបារម្ភយ៉ាងខ្លាំង អាចថាការបោះឆ្នោតថ្នាក់ជាតិខាងមុខ ធ្វើឲ្យបាត់បង់សន្លឹកឆ្នោត យ៉ាងច្រើនថែមទៀត បន្ទាប់ពីការបោះឆ្នោតឃុំ-សង្កាត់ ព្រោះតែលោកមេឃុំរូបនេះ ធ្វើឲ្យប្រជាពលរដ្ឋក្នុងមូលដ្ឋានអស់ជំនឿ ហើយលោកមេឃុំរូបនេះ តែងតែធ្វើឲ្យប្រជាពលរដ្ឋថ្នាំងថ្នាក់ ស្អប់ អាចស្អប់ដល់បក្សកាន់តែច្រើន។
សម្តេចអគ្គមហាសេបតីតេជោ ហ៊ុន សែន ជាទីគោរព ដោយខ្ញុំបាទមានការព្រួយបារម្មណ៍ ខ្លាចចាញ់បក្សប្រឆាំង ទើបខ្ញុំបាទប្រថុយបោះសន្ទូចរំលងថ្នាក់ស្រុក-ខេត្ត គោរពរាយការណ៍ជូនសម្ដច។ សូមសម្តេចតេជោ មេត្តាជ្រាប និងជួយមានវិធានការ លើសភាពការនេះផង។អង្គភាពយើងមិនអាចទាក់ទងសុំការបកស្រាយពីលោកមេឃុំព្រែកឬស្សីលោកធូសម្បត្តិដើម្បីបកស្រាយបានទេដោយមិនមានលេខទាក់ទង។តែចាំមើលមើតើករណិយ៍មួយនេះមានការរកយុតតិធម៍ជូនបក្សនិងប្រជាពលរដ្ឋក្នុងឃុំដូចលោកមេភូមិបានស្នើសុំបានដែរឬអត់?៕
