វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 790 នាក់
ម្សិលមិញ 6677 នាក់
សរុប 14148366 នាក់
ភ្នំពេញ៖ កាលពីថ្ងៃទី២៨ ខែកុម្ភៈ ឆ្នាំ២០២៤ មានការផ្សព្វផ្សាយព័ត៌មានតាមបណ្តាញសង្គមជាច្រើនពីបុរសម្នាក់កើតទុកមិនសុខចិត្តថា ខ្លួនមិនបានទទួលទានគ្រឿងស្រវឹង បែរជាមន្ត្រីជំនាញចរាចរណ៍ធ្វើតេស្តឲ្យផ្លុំ៣ដងទើបរកឃើញលទ្ធផលជាតិស្រវឹង ០.៣៣mg/L ហើយផាកពិន័យប្រាក់ ៤០ម៉ឺនរៀល នៅខណ្ឌព្រែកព្នៅកាលពីយប់ថ្ងៃទី២៦ ខែកុម្ភៈ ឆ្នាំ២០២៤ និងថែមទាំងចោទប្រកាន់មន្ត្រីជំនាញអនុវត្តច្បាប់ថា បានកែច្នៃម៉ាស៊ីនតេស្តជាតិស្រវឹង ដើម្បីផាកពិន័យយកប្រាក់គាត់!។
ករណីនេះ លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ ក៏បានបញ្ជាទៅលោកឧត្តមសេនីយ៍ទោ ហម វ៉ាន់ថា ស្នងការរង ទទួលដឹកនាំពង្រឹងការងារអធិការដ្ឋាននគរបាលខណ្ឌព្រែកព្នៅ និងលោកវរសេនីយ៍ឯក សុខ ហេង អធិការនគរបាលខណ្ឌព្រែកព្នៅ ដើម្បីធ្វើស្រាវជ្រាវលើករណីនេះជាបន្ទាន់។
នៅរសៀលថ្ងៃទី២៨ ខែកុម្ភៈ ឆ្នាំ២០២៤ សមត្ថកិច្ចក៏បានកោះហៅអ្នកបើករថយន្តម៉ាក LEXUS RX330 ពណ៌ស ពាក់ផ្លាកលេខ ភ្នំពេញ 2AY-9617 ឈ្មោះ ខេង សុជាតិ ភេទប្រុស អាយុ ៣៨ឆ្នាំ ចូលមកសួរនាំនៅកន្លែងធ្វើការរបស់សមត្ថកិច្ចខណ្ឌព្រែកព្នៅ។ សមត្ថកិច្ច ក៏បានពន្យល់ពីការប្រើប្រាស់ម៉ាស៊ីនធ្វើតេស្តជាតិស្រវឹងដោយម៉ាស៊ីននោះផលិតនៅក្នុងប្រទេសអូស្ត្រាលី ត្រូវបានដាក់ឱ្យប្រើប្រាស់តាមផ្លូវច្បាប់និងមានការត្រួតពិនិត្យបច្ចេកទេសស្តង់ដាត្រឹមត្រូវដោយ ទទួលស្គាល់តាមរបៀបរបបស្តង់ដាប្រតិបត្តិ (standard operation procedure) ហៅកាត់ (SOP) ដោយមន្ត្រីអ្នកអនុវត្តច្បាប់នៅគោលដៅ មិនអាចកែច្នៃម៉ាស៊ីនធ្វើតេស្តជាតិស្រវឹងនេះបានឡើយ។
សម្ត្តកិច្ចថាម៉ាស៊ីននេះត្រូវបានក្រសួងមហាផ្ទៃអនុញ្ញាតឱ្យប្រើប្រាស់ជាផ្លូវការទូទាំងប្រទេសសម្រាប់ធ្វើតេស្តជាតិស្រវឹង ហើយជាទូទៅម៉ាស៊ីននេះបើធ្វើតេស្តឃើញលទ្ធផលជាតិស្រវឹងគឺឃើញ ហើយបើគ្មានជាតិស្រវឹងគឺគ្មាន។ មិនតែប៉ុណ្ណោះបណ្តាប្រទេសមួយចំនួននៅលើពិភពលោកក៏គេប្រើប្រាស់ម៉ាស៊ីននេះផងដែរ។ អ្វីដែលជាការអនុវត្តច្បាប់ចរាចរណ៍ផ្លូវគោក និងពិនិត្យជាតិស្រវឹងនៅរយៈពេលជាង១ខែមកនេះដែលសមត្ថកិច្ចចុះអនុវត្តតាមបទបញ្ជារបស់ប្រមុខរាជរដ្ឋាភិបាលកម្ពុជា ក្នុងយុទ្ធនាការចុះអនុវត្តច្បាប់ចរាចរណ៍ផ្លូវគោក និងពិនិត្យជាតិស្រវឹង គឺមិនមានបាតុភាពតវ៉ារបស់ប្រជាពលរដ្ឋអ្នកធ្វើតេស្តរកឃើញជាតិស្រវឹងទៅលើការប្រើប្រាស់ម៉ាស៊ីនធ្វើតេស្តជាតិស្រវឹងនេះទេ។
ក្នុងករណីសមត្តកិច្ចបានបានណែនាំឈ្មោះ ខេង សុជាតិ អ្នកបើករថយន្ត LEXUS RX330 ដោយមិនត្រូវសម្ភាសន៍ជាមួយអ្នកសារព័ត៌មានចោទប្រកាន់គ្មានមូលដ្ឋាន បង្កប៉ះពាល់ កិត្តិយសអង្គភាព និងមន្ត្រីសមត្ថកិច្ចអនុវត្តច្បាប់ និងថែមទាំងធ្វើឱ្យបាត់បង់ជំនឿរបស់ប្រជាពលរដ្ឋមកលើសមត្ថកិច្ចដែលកំពុងបំពេញភារកិច្ចអនុវត្តច្បាប់ដើម្បីកាត់បន្ថយអត្រាគ្រោះថ្នាក់ចរាចរណ៍នៅក្នុងរាជធានីភ្នំពេញ។ដោយគ្មានសង្ឃឹមថាមានស្ថាបន័ជំនាញណាអាចជួយបានទីបំផុតឈ្មោះ ខេង សុជាតិ អ្នកបើករថយន្ត LEXUS RX330ក៏បានសុខចិត្តផ្តិតមេដៃសុំរួចខ្លួនសិនទៅ។