ចាប់ពីដើមឆ្នាំ២០២៤ជប៉ុនគ្រោងបាញ់ផ្កាយរណបរាដាចំននួន៥០គ្រឿងក្នុងពេលដែលនាយករដ្ឋប្រកាសបង្កើតកញ្ចប់ថវិការយោធា
19-January-2026 / ព័ត៌មានអន្តរជាតិ
ប្រទេសជប៉ុន៖ នាយករដ្ឋមន្ត្រីជប៉ុន លោក ហ្វូមីអុ គីស៊ីដា (Fumio Kishida) បានប្រាប់គណៈរដ្ឋមន្ត្រីរបស់លោកពីការ បង្កើនកញ្ចប់ថវិកាយោធាឱ្យដល់ ២ភាគរយ នៃផលិតផលនៅក្នុងស្រុកសរុប ឬ GDP នៅឆ្នាំ២០២៧ ចំពោះមុខការកើនឡើងឥទ្ធិពលចិន និងការរីកចម្រើនទៅមុខនៃសមត្ថភាព យោធាកូរ៉េខាងជើង។
ទីភ្នាក់ងារសារព័ត៌មាន AFP នៅថ្ងៃអង្គារ ទី២៩ ខែវិច្ឆិកា ឆ្នាំ២០២២បានឲ្យដឹងថាលោក គីស៊ីដា បានប្រកាសពីផែនការខាងលើប្រាប់រដ្ឋមន្ត្រីការពារជាតិ និងរដ្ឋមន្ត្រីហិរញ្ញវត្ថុរបស់លោក កាលពីថ្ងៃចន្ទដើមសប្ដាហ៍នេះ ក្នុងគ្រាដែល ជប៉ុន កំពុងត្រួតពិនិត្យឡើងវិញនូវយុទ្ធសាស្ត្រការពារជាតិ និងសន្តិសុខរបស់ខ្លួន ដើម្បីដោះស្រាយបញ្ហាប្រឈមនានា ក្នុងនោះរួមមានការកើនឡើង ឥទ្ធិពលចិន ការគំរាមកំហែងពីកូរ៉េខាងជើង និងការផ្លាស់ប្ដូរស្ថានភាពភូមិសាស្ត្រនយោបាយ ក្រោយសង្គ្រាមឈ្លានពានរបស់រុស្ស៉ីនៅអ៊ុយក្រែន។
កាលពីខែសីហាកន្លងទៅ ក្រសួងការពារជាតិជប៉ុន បានដាក់សំណើស្នើសុំកញ្ចប់ថវិកាយោធា ៤០ពាន់លានដុល្លារ ប៉ុន្តែ ទំហំទឹកប្រាក់នេះមិនទាន់ សម្រេចជាផ្លូវការនៅឡើយទេ រហូតដល់រដ្ឋាភិបាលទីក្រុងតូក្យូ ធ្វើបច្ចុប្បន្នភាពលើគោលនយោបាយការពារជាតិជាច្រើនជាមុនសិន។ ជុំវិញកញ្ចប់ ថវិកាយោធានេះដែរ ថ្លែងប្រាប់អ្នកសារព័ត៌មាន នៅថ្ងៃចន្ទសប្ដាហ៍នេះ ក្រោយជំនួបជាមួយលោក គីស៊ីដា រដ្ឋមន្ត្រីការពារជាតិជប៉ុន លោក យ៉ាស៊ុកាហ្សូ ហាម៉ាដា (Yasukazu Hamada) បានបញ្ជាក់ថារដ្ឋាភិបាលជប៉ុននឹងបង្កើនកញ្ចប់ថវិកាយោធា និងការចំណាយផ្សេងៗទៀត ឱ្យដល់ ២ភាគរយ នៃ GDP នៅឆ្នាំ២០២៧។
ប្រភពSputnikបានឲ្យដឹងថាជប៉ុនគ្រោងនឹងចាប់ផ្តើមបង្កើតអង្គភាពមួយដែលបាញ់បង្ហោះផ្កាយរណបចំនួន៥០គ្រឿងចាប់ពីថ្ងៃទី១ ខែមេសា ឆ្នាំ២០២៤ ដល់ថ្ងៃទី៣១ ខែមីនា ឆ្នាំ ២០២៥ក្នុងគោលបំណងដើម្បីត្រួតពិនិត្យគោលដៅយោធានិងចលនារបស់ពួកគេពីរយៈកម្ពស់ទាបក្នុងរយៈពេល ២ ឆ្នាំ ។សារពត៍មានជប៉ុនបានឲ្យដឹងថា៖ផ្កាយរណបទាំងនោះ មានផ្កាយរណបអុបទិក និងរ៉ាដាខ្នាតតូច ដែលមានសមត្ថភាពថតរូប និងវីដេអូគុណភាពខ្ពស់នៃផ្ទៃផែនដីក្នុងអាកាសធាតុល្អនៅពេលថ្ងៃខណៈដែលផ្កាយរណបរ៉ាដា មានសមត្ថភាពខ្ពស់ក្នុងការចាប់យករូបភាព ទីតាំងវីដេអូ ដោយមិនខ្វល់ជាមួយអាកាសធាតុ ឬពេលវេលាឡើយ ។
បន្ថែមពីនេះ ក្រសួងការពារជាតិជប៉ុន គ្រោងនឹងបង្កើតបណ្តាញមួយទៀត សម្រាប់ការរកឃើញអាវុធល្បឿនលឿនជាងសំឡេងដែលផលិតដោយរុស្ស៊ី និងចិន ប៉ុន្តែនឹងដាក់សាកល្បងក្នុងអំឡុងឆ្នាំ ២០២៧ ខាងមុខ ដោយសារតែការផលិតឧបករណ៍ចាប់សញ្ញាអ៊ីនហ្វ្រា ត្រូវចំណាយពេលយូរ ។កាលពីដើមខែវិច្ឆិកា ទីភ្នាក់ងារសារព័ត៌មានជប៉ុនបានរាយការណ៍ថា ជប៉ុនគ្រោងនឹងបញ្ចេញនាវាពិឃាត ២ គ្រឿងទៀត ដែលបំពាក់ដោយប្រព័ន្ធស្ទាក់ចាប់មីស៊ីលផ្លោង Aegis ដែលផលិតដោយសហរដ្ឋអាមេរិក ដើម្បីបង្កើនប្រតិបត្តិការការពារ ។
គួរបញ្ជាក់ថា កញ្ចប់ថវិកាយោធារបស់ជប៉ុន ក្នុងរយៈពេលរាប់ទសវត្សរ៍មកនេះ មានកម្រិតត្រឹម ១ភាគរយ ឬតិចជាងនេះនៃ GDP តែប៉ុណ្ណោះ។ ប៉ុន្តែ ការកើនឡើងឥទ្ធិពលចិន ការគំរាមកំហែងពីកូរ៉េខាងជើង រួមទាំងសង្គ្រាមឈ្លានពានរបស់រុស្ស៉ីនៅអ៊ុយក្រែន បានជំរុញឱ្យរដ្ឋាភិបាលរបស់លោក គីស៊ីដា ដាក់ចេញផែនការបង្កើនកញ្ចប់ថវិកាយោធា ហើយតួលេខ ២ភាគរយគឺជាកម្រិតនៃកញ្ចប់ថវិកាយោធាស្ដង់ដារដែលបក្សសម្ព័ន្ធយោធា NATO តម្រូវលើបណ្ដាប្រទេសជាសមាជិករបស់ខ្លួន៕
