វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4974 នាក់
ម្សិលមិញ 4292 នាក់
សរុប 14114673 នាក់
ញូយ៉ក៖កិច្ចប្រជុំមហាសន្និបាតអង្គការសហប្រជាជាតិលើកទី ៧២ កាលពីថ្ងៃចន្ទកន្លងទៅនេះបានចេញសេចក្ដីសម្រេចរួមគ្នាថ្មីមួយតម្រូវឱ្យប្រទេសរុស្ស៊ីត្រូវទទួលខុសត្រូវចំពោះសកម្មភាពរបស់ខ្លួននៅក្នុងប្រទេសអ៊ុយក្រែន ដោយត្រូវធើ្វការផ្តល់សំណងសម្រាប់ការខូចខាតដែលខ្លួនបានប្រព្រឹត្តនៅក្នុងប្រទេសមួយនេះ។
សេចក្ដីសម្រេចដែលទទួលបានគាំទ្រដោយសមាជិកចំនួន ៩៤ នៅក្នុងចំណោមសមាជិក ១៩៣បានចាត់ទុកសកម្មភាពយោធារបស់រុស្ស៊ីនៅក្នុងប្រទសអ៊ុយក្រែនគឺជារឿងបំពានទៅនឹងច្បាប់អន្តរជាតិ ដែលបណ្ដាលឱ្យមានអ្នកស្លាប់និងរងបួសជាច្រើនសែននាក់ ហើយនិងបង្កការខូចខាតយ៉ាងធ្ងន់ធ្ងរទៅលើហេដ្ឋារចនាសម្ព័ន្ធនៅក្នុងប្រទេស។ លោកអគ្គរដ្ឋទូតអ៊ុយក្រែនប្រចាំនៅអង្គការសហប្រជាជាតិ លោក Sergiy Kyslytsya ចាត់ទុកសេចក្ដីសម្រេចរួមរបស់ អ.ស.ប ខាងលើនេះជាសមិទ្ធផលដ៏សំខាន់ថ្មីមួយទៀតសម្រាប់អ៊ុយក្រែន និងចូលរួមក្នុងការដាក់សម្ពាធបន្ថែមទៀតទៅលើរដ្ឋាភិបាលរុស្ស៊ី ឱ្យបញ្ចប់សកម្មភាពវាយប្រហារដោយមិនរើសមុខរបស់ខ្លួនទៅលើទីតាំងជាហេដ្ឋារចនាសម្ព័ន្ធស៊ីវិលរបស់អ៊ុយក្រែន ដោយរាប់បញ្ជូនទាំងរោងចក្រ អគារលំនៅដ្ឋាន ស្ថានីយថាមពល ហើយនិងមន្ទីរពេទ្យជាដើម។
លោក Kyslytsya បានបន្ដថា "អ៊ុយក្រែនត្រូវប្រឈមនឹងភារកិច្ចដ៏ធំមហិមានៅក្នុងការកសាងប្រទេសជាតិរបស់ខ្លួនឡើងវិញ នៅក្រោយពីសង្គ្រាម ហើយអ្វីដែលសំខាន់ជាងនេះទៀតនោះគឺយុត្តិធម៌សម្រាប់ជនរងគ្រោះដែលបានស្លាប់ដោយសារតែអំពើឈ្លានពានមួយនេះ ដែលប្រទេសរុស្ស៊ីគឺជាអ្នកទទួលខុសចំពោះសោកនាដកម្មដែលខ្លួនជាអ្នកបង្កឡើង.។ជាក់ស្តែងរូបភាពវីដេអូមួយដែលថតដោយឧបករណ៍ដ្រូន ត្រូវបានគេយកមកផ្សព្វផ្សាយកាលពីថ្ងៃចន្ទ ទី ១៤ ខែវិច្ឆិកាកន្លងទៅ ដោយបង្ហាញអំពីទិដ្ឋភាពខូចខាតនៅឯស្ថានីយទូរទស្សន៍ជាតិក្នុងទីក្រុង Kherson ភាគខាងត្បូងប្រទេសអ៊ុយក្រែន ក្រោយពីត្រូវបានរំដោះចេញពីការគ្រប់គ្រងរបស់យោធារុស្ស៊ីកាលពីពេលថ្មីៗនេះ។
ក្រៅតែពីស្ថានីយទូរទស្សន៍រដ្ឋខាងលើនេះ ទាហានរុស្ស៊ីក៏បានបង្កការខូចខាតយ៉ាងធ្ងន់ធ្ងរផងដែរទៅលើទីតាំងដែលជាហេដ្ឋារចនាសម្ព័ន្ធថាមពល ដែលចាំបាច់សម្រាប់រដូវរងា។អាជ្ញាធរអ៊ុយក្រែនក្នុងតំបន់ Kherson បានថ្លែងឱ្យដឹងថា ក្រុមការងារអ្នកបច្ចេកទេសរបស់ខ្លួនកំពុងប្រញប់ប្រញាល់ធើ្វការជួសជុលនិងស្តារហេដ្ឋារចនាសម្ព័ន្ធថាមពលសំខាន់ៗក្នុងទីក្រុងឡើងវិញ សម្រាប់បំរើដល់ការរស់នៅរបស់ពលរដ្ឋឱ្យបានមុនការមកដល់រដូវរងាក្នុងពេលខាងមុខ។ លោកប្រធានាធិបតីអ៊ុយក្រែន Volodymyr Zelenskiyក៏បានអញ្ជើញចុះមកត្រួតពិនិត្យលើស្ថានភាពរស់នៅរបស់ពលរដ្ឋនៅក្នុងទីក្រុង Kherson ដោយផ្ទាល់ផងដែរ ហើយនិងបានសម្តែងការគោរពនិងកោតសរសើរយ៉ាងក្រៃលែងចំពោះការខិតខំរបស់យោធាអ៊ុយក្រែនក្នុងការវាយរំដោះយកតំបន់ Kherson ពីទាហានរុស្ស៊ីមកវិញ៕ ប្រភព៖ Reuters