មេដឹកនាំប៉ូឡូញ បារាំង អង់គ្លេស និង NATO ត្រៀមជួបពិភាក្សាគ្នាពីបញ្ហាសង្គ្រាមអ៊ុយក្រែន
07-November-2024 / ព័ត៌មានអន្តរជាតិ
ប៉ូឡូញ៖ នាយករដ្ឋមន្ត្រីប៉ូឡូញ លោក Donald Tusk បានឱ្យដឹងថា លោកនឹងជួបប្រធានាធិបតីបារាំង នាយករដ្ឋមន្ត្រីអង់គ្លេស ប្រមុខអង្គការណាតូ មេដឹកនាំនៃប្រទេសអឺរ៉ុបខាងជើង (Nordic) ក៏ដូចជាប្រទេសក្នុងតំបន់បាល់ទិក នាពេលឆាប់ៗនេះ ដើម្បីពិភាក្សាអំពីកិច្ចសហប្រតិបត្តិការឆ្លងអាត្លង់ទិក និងសង្គ្រាមនៅអ៊ុយក្រែន។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃសៅរ៍ ទី៩ ខែវិច្ឆិកា ឆ្នាំ ២០២៤។
លោក Tusk និយាយថា មិនបាច់សង្ស័យទេអំពីទិដ្ឋភាពនយោបាយថ្មីនេះ ថាជាបញ្ហាប្រឈមដ៏ធ្ងន់ធ្ងរសម្រាប់មនុស្សគ្រប់គ្នា ជាពិសេសនៅក្នុងបរិបទនៃការបញ្ចប់សង្គ្រាមរុស្ស៉ី-អ៊ុយក្រែន ដែលជាលទ្ធផលនៃកិច្ចព្រមព្រៀងរវាងប្រធានាធិបតីរុស្ស៉ី និងប្រធានាធិបតីអាមេរិកថ្មី។ ប៉ុន្មានថ្ងៃខាងមុខទៀត យើងនឹងសម្របសម្រួលកិច្ចសហប្រតិបត្តិការស៉ីជម្រៅ ជាមួយបណ្តាប្រទេសមានទស្សនស្រដៀងគ្នាលើស្ថានភាពភូមិសាស្ត្រនយោបាយ និងឆ្លងអាត្លង់ទិកនៅអ៊ុយក្រែន។តាមលោក Tusk ប្រធានាធិបតីបារាំង លោក Emmanuel Macron ប្រមុខអង្គការណាតូ លោក Mark Rutte នឹងមកធ្វើទស្សនកិច្ចនៅទីក្រុង Warsaw ហើយត្រូវជួបគ្នាជាមួយនាយករដ្ឋមន្ត្រីអង់គ្លេស លោក Keir Starmer ទាំងនៅទីក្រុង Warsaw ឬនៅទីក្រុងឡុងដ៍។ លោក Tusk ក៏នឹងជួបមេដឹកនាំ Nordic និង Baltic នៅឯទីក្រុង Stockholm ប្រទេសស៊ុយអែតផងដែរ។
សូមបញ្ជាក់ថាប្រធានាធិបតីបារាំង លោក Emmanuel Macron និងអធិការបតីអាល្លឺម៉ង់ លោក Olaf Scholz កាលពីថ្ងៃពុធនេះបានជួបប្រជុំគ្នាជាបន្ទាន់ តាមរយៈការសន្ទនាតាមទូរស័ព្ទ ដើម្បីពិភាក្សាអំពីផលជះ នៃការវិលត្រឡប់របស់លោក ដូណាល់ ត្រាំ មកកាន់តំណែងប្រធានាធិបតីអាមេរិក។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters នាថ្ងៃពុធ ទី៦ ខែវិច្ឆិកា ឆ្នាំ២០២៤។មេដឹកនាំទាំងពីរ បានសន្យាថានឹងធ្វើការរួមគ្នាយ៉ាងជិតស្និទ្ធ ដើម្បីពង្រឹងសហភាពអឺរ៉ុប និងការពារផលប្រយោជន៍របស់អឺរ៉ុប ក្នុងបរិបទថ្មីនេះ។លោក Macron បានសរសេរនៅលើបណ្តាញសង្គម X ថា «ប្រទេសទាំងពីរនឹងខិតខំប្រឹងប្រែង ដើម្បីពង្រឹងឯកភាព និងអធិបតេយ្យភាពរបស់អឺរ៉ុប ក៏ដូចជាការពារផលប្រយោជន៍ និងគុណតម្លៃរបស់អឺរ៉ុប ក្នុងកិច្ចសហប្រតិបត្តិការជាមួយសហរដ្ឋអាមេរិក»។
គួរបញ្ជាក់ថា ការវិលត្រឡប់របស់លោក ត្រាំ មកកាន់តំណែងប្រធានាធិបតីអាមេរិក បានបង្កើតការប្រុងប្រយ័ត្ន និងការព្រួយបារម្ភក្នុងចំណោមមេដឹកនាំអឺរ៉ុប ដែលធ្លាប់មានទំនាក់ទំនងមិនល្អជាមួយលោកកាលពីអាណត្តិមុន។ មេដឹកនាំទាំងនោះកំពុងតែរៀបចំយុទ្ធសាស្ត្រ ដើម្បីឆ្លើយតបទៅនឹងបញ្ហាប្រឈមថ្មីៗ និងការពារផលប្រយោជន៍របស់សហភាពអឺរ៉ុប។ផ្ទុយពីការព្រួយបារម្ភខាងលើកាលពីថ្ងៃសុក្រសប្តាហ៍នេះ នាយករដ្ឋមន្ត្រីហុងគ្រី លោក Viktor Orban បានទទូចឱ្យក្រុមប្រទេសអឺរ៉ុបដូចគ្នា ទទួលស្គាល់ថា ការជាប់ឆ្នោតរបស់លោក ដូណាល់ ត្រាំ ជាប្រធានាធិបតីអាមេរិកថ្មី នឹងផ្លាស់ប្តូរស្ថានការណ៍យ៉ាងខ្លាំង ពាក់ព័ន្ធនឹងសង្គ្រាមរបស់រុស្ស៉ីនៅអ៊ុយក្រែន ហើយយល់ព្រមងាកចេញពីសង្គ្រាម ដើម្បីឆ្ពោះទៅរកសន្តិភាពវិញ។ នេះបើតាមការចេញផ្សាយដោយទីភ្នាក់ងារព័ត៌មាន AFP។
ថ្លែងទៅកាន់ក្រុមមេដឹកនាំនៃបណ្តាប្រទេសសហភាពអឺរ៉ុប នៅឯទីក្រុង Budapest លោក Orban បានលើកឡើងថា ការវិលត្រឡប់មកវិញសាជាថ្មីរបស់លោក ត្រាំ ដែលជាបុគ្គលស្អប់ខ្ពើមសង្គ្រាម នឹងបង្កើតស្ថានការណ៍ថ្មីមួយ សម្រាប់អឺរ៉ុប រួមទាំងភាពស្រពេចស្រពិល ចំពោះការគាំទ្ររបស់សហរដ្ឋអាមេរិក សម្រាប់ទីក្រុងកៀវ។ លោកនាយករដ្ឋមន្ត្រីហុងគ្រី ដែលផ្ទុយពីមេដឹកនាំអឺរ៉ុបដទៃទៀត បានព្យាយាមជំរុញឱ្យមានបទឈប់បាញ់ឆាប់រហ័ស សម្រាប់សង្គ្រាមនៅអ៊ុយក្រែន។ លោក Orban និយាយថា «ការឆ្លើយតបរបស់អឺរ៉ុប គួរតែច្បាស់ហើយ គឺចូរនាំគ្នាសម្របខ្លួនជាបន្ទាន់ ហើយផ្លាស់ប្តូរពីសង្គ្រាម ទៅរកសន្តិភាពវិញ»។
កាលពីថ្ងៃព្រហស្បតិ៍ ក្រោយកិច្ចពិភាក្សាជាមួយក្រុមមេដឹកនាំអឺរ៉ុប ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បាននិយាយថា ការអំពាវនាវរកបទឈប់បាញ់ ដោយពុំមានការធានាសន្តិសុខសម្រាប់ទីក្រុងកៀវ គឺជាទង្វើដ៏គ្រោះថ្នាក់ និងខ្វះការទទួលខុសត្រូវ។ ក្នុងសេចក្តីថ្លែងការណ៍រួម កាលពីថ្ងៃសុក្រ ប្រធានាធិបតីបារាំង លោក Emmanuel Macron និងនាយករដ្ឋមន្ត្រីប៉ូឡូញ លោក Donald Tusk បានបញ្ជាក់ជាថ្មី នូវការប្តេជ្ញារបស់ពួកគេ ដើម្បីផ្តល់ការគាំទ្រឥតងាករេ សម្រាប់ប្រទេសនិងប្រជាជនអ៊ុយក្រែន ដើម្បីទប់ទល់ការឈ្លានពានរបស់រុស្ស៉ី។
គួរបញ្ជាក់ថា យ៉ាងណាមិញ សម្រាប់លោក Orban គឺលោកនាយករដ្ឋមន្ត្រីហុងគ្រី មើលឃើញថា ការរួបរួមជាធ្លុងមួយរបស់អឺរ៉ុប ស្តីពីវិបត្តិសង្គ្រាមអ៊ុយក្រែន គឺហាក់កំពុងចាប់ផ្តើម បង្ហាញស្នាមប្រេះហើយ។ ទោះជាបែបនេះក្តី នាយករដ្ឋមន្ត្រីស៊ុយអែត លោក Ulf Kristersson បានអះអាងថា បើតាមការយល់ឃើញរបស់លោកផ្ទាល់ គឺវាមិនដូច្នោះឡើយ ដោយកម្រិតនៃការគាំទ្រសម្រាប់អ៊ុយក្រែន គ្មានការប្រែប្រួលនោះទេ។
លោក Volodymyr Zelensky កាលពីថ្ងៃទី៧ខែវិច្ឆិកាបាននិយាយថា វានឹង «មិនអាចទទួលយកបានទេ» សម្រាប់អ៊ុយក្រែន និងអឺរ៉ុបក្នុងការផ្តល់សម្បទានឲ្យវិមានក្រឹមឡាំង ដើម្បីបញ្ឈប់ការឈ្លានពានរបស់រុស្ស៊ីទៅលើអ៊ុយក្រែន បន្ទាប់ពីទីក្រុងមូស្គូបានទាមទារឲ្យលោកខាងលិចចូលរួមក្នុងកិច្ចចរចាដោយផ្ទាល់ស្តីពីការបញ្ចប់សង្គ្រាម។ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានទាមទារឲ្យអ៊ុយក្រែន ប្រគល់ទឹកដីបន្ថែមទៀតនៅភាគខាងកើត និងខាងត្បូង ដើម្បីជាលក្ខខណ្ឌនៃកិច្ចចរចាសន្តិភាព ខណៈទីក្រុងកៀវបានច្រានចោលម្តងហើយម្តងទៀត ដោយមិនព្រមលះបង់ទឹកដីជាថ្នូរនឹងសន្តិភាពឡើយ។អ៊ុយក្រែន និងប្រទេសជាច្រើននៅលោកខាងលិច បារម្ភថា ដំណោះស្រាយណាមួយដែលផ្គាប់ចិត្តលោក ពូទីន នឹងធ្វើឲ្យមេដឹកនាំវិមានក្រឹមឡាំងរូបនេះកាន់តែមានអំនួត និងនាំឲ្យមានការឈ្លានពានកាន់តែខ្លាំង។
ថ្លែងទៅកាន់មេដឹកនាំអឺរ៉ុបក្នុងកិច្ចប្រជុំកំពូលមួយនៅប្រទេសហុងគ្រី លោក Zelensky បានស្តីបន្ទោសចំពោះអ្នកដែលកំពុងដាក់សម្ពាធឲ្យលោកធ្វើតាមការទាមទារមួយចំនួនរបស់លោក ពូទីន។
លោកក៏បានចោទប្រកាន់មេដឹកនាំអឺរ៉ុបមួយចំនួនផងដែរ ដោយមិនបានបញ្ជាក់ឈ្មោះ ថាបានជំរុញយ៉ាងខ្លាំងឲ្យអ៊ុយក្រែនសម្របសម្រួល។លោក Zelensky បាននិយាយថា៖ «យើងត្រូវការអាវុធឲ្យបានគ្រប់គ្រាន់ មិនមែនការគាំទ្រក្នុងការចរចាទេ។ ការឱបក្រសោបគ្នាជាមួយ ពូទីន នឹងមិនអាចជួយបានទេ។ អ្នកខ្លះបានឱបក្រសោបគាត់អស់រយៈពេល ២០ឆ្នាំមកហើយ ហើយអ្វីៗកាន់តែអាក្រក់ទៅៗ»។
ប្រធានាធិបតីអ៊ុយក្រែន កំពុងតែព្យាយាមបង្កើនសម្ពាធលើសម្ព័ន្ធមិត្តរបស់ខ្លួន សម្រាប់ការគាំទ្របន្ថែមទៀតក្នុងការប្រយុទ្ធប្រឆាំងនឹងក្រុងមូស្គូ បន្ទាប់ពីជ័យជម្នះរបស់លោក ដូណាល់ ត្រាំ ក្នុងការបោះឆ្នោតប្រធានាធិបតីសហរដ្ឋអាមេរិកនៅសប្តាហ៍នេះ។ជាការកត់សម្គាល់ លោក ត្រាំ កន្លងមកធ្លាប់បានប្រកាសថា លោកអាចបញ្ចប់សង្គ្រាមរុស្ស៊ី-អ៊ុយក្រែនក្នុងរយៈពេលត្រឹម២៤ម៉ោងប៉ុណ្ណោះ ក្រោយឈ្នះការបោះឆ្នោត ហើយបានរិះគន់ម្តងហើយម្តងទៀតពីជំនួយអាមេរិកដល់ទីក្រុងកៀវ។
ការវិលត្រលប់មកកាន់តំណែងជាប្រធានាធិបតីអាមេរិក របស់លោក ដូណាល់ត្រាំ អាចនឹងធ្វើឱ្យភូមិសាស្ត្រនយោបាយពិភពលោកក្រឡាប់ចាក់ជាថ្មី។ តើការព្រួយបារម្ភនេះមានមូលដ្ឋានត្រឹមត្រូវដែរឬទេ? អាមេរិកជាមហាអំណាចដ៏មានឥទ្ធិពល និងមិនអាចខ្វះបានលើឆាកអន្តរជាតិ។ ចំណែក លោកដូណាល់ត្រាំ នៅរាល់គ្រប់សុន្ទរកថា បានប្រកាសផ្តាច់ប្រពៃណីរំពឹងលើអាមេរិក ដើម្បីការពារប្រយោជន៍ជាតិជាដំបូង ក្រោមផ្លាក America First។ ប៉ុន្តែលោកដូណាល់ ត្រាំ ជឿជាក់លើខ្លួនឯងថាលោកមានឥទ្ធិពលលើគ្រប់ហេតុការណ៍នៅលើពិភពលោកដែលគ្មាននរណាធ្វើបាន។
លោកជាស្រាយបញ្ហា មិនមែនសហរដ្ឋអាមេរិកទេ។ ហេតុដូច្នេះហើយទើបបានគេបារម្ភនឹងនយោបាយការបរទេសរបស់លោកដូណាល់ត្រាំ តាំងពីសំណុំរឿងអ៊ុយក្រែន ដើមបូព៌ា ចិន អឺរ៉ុប ពាណិជ្ជកម្ម អូតង់ ...នៅក្នុងសំណុំរឿងអ៊ុយក្រែន ជោគជ័យរបស់លោកដូណាល់ត្រាំបានក្តិចក្តីសង្ឃឹមរបស់អ៊ុយក្រែន។ លោកហ្សេឡេស្គី បានអបអរលោកត្រាំភ្លាម ដោយសង្ឃឹមថាអនាគតប្រធានាធិបតីថ្មីនឹងស្វែងរកសន្តិភាពដ៏ត្រឹមត្រូវ មានសមធម៌សម្រាប់អ៊ុយក្រែន។ លោកត្រាំបានបញ្ជាក់យ៉ាងច្បាស់អំពីចេតនាបញ្ចប់សង្គ្រាម ឱ្យបានឆាប់រហ័សបំផុត តែបានសន្យាដដែលៗថានឹងលុបចោលជំនួយហិរញ្ញវត្ថុនិងយោធាដល់អ៊ុយក្រែន។ លោកត្រាំបានទូរស័ព្ទជជែកដោយផ្ទាល់ជាមួយលោកពូទីន កាលពីថ្មីៗនេះ ហើយប្រកាសថាអាចដោះស្រាយវិបត្តិបានយ៉ាងលឿន ដោយការចរចាត្រូវផ្តោតលើដីដែលរុស្ស៊ីចូលទន្ទ្រាញកាន់កាប់បាន ហើយបិទទ្វារទាំងស្រុងមិនឱ្យអ៊ុយក្រែនចូលជាសមាជិកអូតង់ទេ។
អាមេរិកនឹងព្រលែងសមាជិកអូតង់ ណាដែលមិនចូលរួមបង់វិភាគទានទ្រទ្រង់វិស័យយោធាក្នុងកំរិត២%។ លោកដូណាល់ត្រាំ បានប្រកាសហើយ ថា អាមេរិកក្រោមរដ្ឋបាលត្រាំ នឹងមានកងទ័ពប្រចាំការនៅអឺរ៉ុបតិចជាងមុន ហើយអឺរ៉ុបត្រូវចាយលុយច្រើនជាងមុន។អាមេរិកប្រឈមនឹងចិនលើគ្រប់វិស័យ បច្ចេកវិទ្យា ពាណិជ្ជកម្ម ឧស្សាហកម្ម យោធា និងភូមិសាស្ត្រនយោបាយ។ ក្នុងអាណត្តិលើកមុន លោកត្រាំបានធ្វើសង្គ្រាមពាណិជ្ជកម្មជាមួយចិនយ៉ាងពេញទំហឹងហើយ ហើយរនាំងពន្ធគយនឹងត្រលប់មកវិញ និងទំនងកាន់តែខ្លាំងលើមុនទៀតនៅអាណត្តិថ្មីនេះ។ លោកត្រាំចង់ផ្តាច់ឱ្យបានលក្ខន្តិកៈចិនជារដ្ឋអនុគ្រោះ ដែលចូលជាធរមានតាំងពីចិនក្លាយជាសមាជិកអង្គការពាណិជ្ជកម្មពិភពលោកមក។ អនាគតប្រធានាធិបតអាមេរិកថ្មី បានប្រកាសធ្វើសង្គ្រាមពាណិជ្ជកម្មដោយដំឡើងពន្ធគយ១០ទៅ២០%លើគ្រប់ផលិតផលនាំចូលទាំងអស់ រាប់ទាំងផលិតផលមកពីអឺរ៉ុបផង និងដល់៦០% សម្រាប់ការនាំចូលមកពីចិន ឬដល់១០០%ផលិតផលចិនមួយចំនួនផង។
