ឈ្មួញដាក់រំសេវផ្ទុះរញ្ជួយផ្ទៃបឹងតាមោកបង្កការភ័យខ្លាចដល់ប្រជាពលរដ្ឋ?
04-September-2023 / ព័ត៌មានជាតិ
ភ្នំពេញ៖ពលរដ្ឋរស់នៅតំបន់បឹងទំនប់កប់ស្រូវ រាជធានីភ្នំពេញ អំពាវនាវទៅអាជ្ញាធរមានសមត្តកិច្ចជួយ ចាត់វិធានការលើក្រុមឈ្មួញដែលដាក់គ្រាប់បំផ្ទុះយកអាចម៍ដីលក់ បង្កការភ័យខ្លាចដល់ពលរដ្ឋ ។
គណនីហ្វេសប៊ុក ឈ្មោះ «Pov Khy» ដែលបានបង្ហោះនូវវីដេអូឃ្លីបកាលពីថ្ងៃសៅរិ៍ម្សិលមិញ ដែលមានរយៈពេលជាង៣នាទី ដោយភ្ជាប់ចំណងជើងថា «រំជួយដីនៅបឹងកប់ស្រូវ» ។ ក្នុងហ្វេសប៊ុកនោះ បានលើកឡើងថា មួយរយៈនេះ មានក្រុមឈ្មួញរកស៊ីមួយចំនួន បានយកគ្រាប់បំផ្ទុះជាញឹកញាប់នៅចំកណ្ដាលបឹងកប់ស្រូវ ដែលជាកន្លែងរណ្ដៅដី ដើម្បីយកអាចម៍ដីទៅលក់ ។
ម្ចាស់ហ្វេសប៊ុកបានអំពាវនាវទៅអាជ្ញាធរគ្រប់លំដាប់ថ្នាក់ ជាពិសេសអាជ្ញាធរសង្កាត់គោករកា និងអាជ្ញាធរខណ្ឌព្រែកព្នៅ ចុះស្រាវជ្រាវនិងចាត់វិធានការលើឈ្មួញដែលដាក់គ្រាប់បំផ្ទុះយកអាចម៍ដីលក់ នាំឱ្យរញ្ជួយដី ហើយអាចប៉ះពាល់លំនៅឋានពលរដ្ឋនៅក្បែរនោះជាដើម៖ «ទាន់សភាពការមិនទាន់អី សូមអាជ្ញាធរគ្រប់លំដាប់ថ្នាក់ ជួយចាត់វិធានការលើឈ្មួញនៅទំបន់កប់ស្រូវហ្នឹងផង ហើយជាពិសេសទំនប់កប់ស្រូវក៏ប្រេះដែរ បើគ្រាប់បំផ្ទុះដំបូងគេដាក់ល្មមៗទេ ឥឡូវគេដាក់ធំទៅៗ ផ្ទះថ្មយោគដូចរញ្ជួយផែនដីអញ្ចឹង»។លោកថ្លែងបន្តថា៖ «សូមប្តឹងដល់អាជ្ញាធរមូលដ្ឋានសង្កាត់ ខណ្ឌ និងក្រុង បើឃើញវីដេអូនេះ ជួយពិនិត្យបឹងកប់ស្រូវនេះផង គាត់កាយដីដល់ក្បាលប្រែតទៅវាអស់ដីកាយ អញ្ចឹងវាដាក់គ្រាប់រំសេវបំផ្ទុះម្តងៗ មួយថ្ងៃ៣,៤,៥គ្រាប់ រង្គើផ្ទះនៅអត់បាន ហើយរង្គើកញ្ចក់ចង់ធ្លាក់ចេញពីបង្អួចទៅទៀត» ។
សូមបញ្ជាក់ថានៅទីនោះរណ្តៅដីដ៏ធំមហាសាលមួយត្រូវបាគេដឹងថាជារបស់លោកឧកញ៉ា ញឹក ផន ហៅតាកៅដែលជាឈ្មួញជួញអាចម៍ដីនិងឈូសឆាយព្រៃយកដីដ័ល្បីម្នាក់ បានកំពុងតែជីកលុងដល់ក្បាលប្រេតលើផ្ទៃបឹងតាមោក និងដាក់គ្រឿងបំផ្ទុះជារៀងរាល់ថ្ងៃបណ្តាលអោយរញ្ជួយដី រង្គើផ្ទះ ប្រេះស្រាំបង្កអោយមានការក្តៅក្រហាយពីអ្នកភូមិ ជុំវិញទទួចស្នើរសុំដល់អាជ្ញាធរ និងក្រសួង,មន្ទីរជំនាញមេត្តាមានវិធានការណ៍ទប់ស្កាត់។
ទាក់ទងនិងការដាក់គ្រឿងបំផ្ទុះយកអាចម៍ដីបង្កអោយរញ្ជួយ និងប្រេះផ្ទះនេះ ប្រជាពលរដ្ឋ នៅក្នុងភូមិកប់ស្រូវធំ និងភូមិកប់ស្រូវតូច ព្រមទាំងភូមិមួយចំនួនទៀតក្បែរនោះបានមានប្រតិកម្មយ៉ាងខ្លាំង និងបានបង្ហោះនៅក្នុងបណ្តាញសង្គមជាបន្តបន្ទាប់ដើម្បី ទទួចស្នើសុំដល់អាជ្ញាធរគ្រប់ជាន់ថ្នាក់ក៏ដូចជាក្រសួងពាក់ព័ន្ធ មេត្តាមានវិធានការទប់ស្កាត់។ លោកពូម្នាក់ ដែលរស់នៅលក់ដូរតាមផ្លូវទំនប់កប់ស្រូវ បានអោយដឹងថា ជាច្រើនខែមកហើយ ដែល រណ្តៅ ដី របស់លោក ឧកញ៉ាញឹក ផន ហៅតាកៅ បានដាក់គ្រឿងផ្ទុះយកថ្មហើយ ដឹកចេញទៅជារៀងរាល់ថ្ងៃ។
តាមព័ត៌មានអោយដឹងថា រណ្តៅនេះបានដំណើរកាលជីកកកាយយកដីរយះពេល ប្រមាណ៥ទៅ៦ឆ្នាំ មកហើយ ដោយកាយដីលប់ផ្ទៃទឹកបឹងវាតទីជីកយកដី។នៅក្នុងការជីកនោះមុនដំបូង ត្រូវគេអះអាងថា ក្រោមច្បាប់ អនុញ្ញាតដើម្បីជីកយកដីទៅចាក់លប់អភិវឌ្ឍនដីលោកឧកញ៉ាលីយ៉ុងផាត់ដែលស្ថិតនៅខាងកើតស្ពានព្រែកព្នៅ តែតាកៅ បានជីកយកទៅលក់ចាក់នៅតំបន់នានានៅក្បែរនោះ។លុះក្រោយមក រដ្ឋាភិបាល ក៍បានប្រគល់ដីបឹងតាមោក ទៅអោយក្រុមហ៊ុន ឯកជន និងអង្គភាពរដ្ឋអភិវឌ្ឍ បានធ្វើអោយអាជីវកម្មជីកដីរបស់តាកៅកាន់តែកាកបកដោយជីកដីលុងដីបឹង មានជម្រៅប្រមាណ៣០ទៅ៤០ម៉ែត្រ (ដល់ក្បាលប្រេត) ដែលរណ្តៅនោះមានទំហំប្រមាណ៤០០ហិកតា លាតសន្ធឹងតាមមហាវិថីឈ្នះឈ្នះប្រមាណ២គីម៉ែត្រនិងចូលទៅផ្ទៃបឹង ប្រមាណ២គីឡូម៉ែត្រ(នេះបើតាមការវាស់កុងទ័រម៉ូតូនាពេលកន្លងមក)។
ជុំវិញការវាតទីជីកដីបឹងដែលមានជម្រៅជ្រៅនេះគេពុំដឹងថា លោកឧកញ៉ា ញឹក ផនហៅតាកៅ ទទួលសិទ្ធិ បានដីបឹងប៉ុន្មានហិតតា ពីរដ្ឋាភិបាលឡើយដើម្បីជីក ?។ចំណែកការជីកលុងដល់ក្បាលប្រេតទៀតសោធ មិនដឹងថា មានច្បាប់ឯណាអោយជីកជ្រៅបែបនោះទេ ?។មិនតែប៉ុណ្ណោះ ពេលជិតដល់ថ្ម ហើយ បានដាក់ម្សៅតេអិនតេ បំផ្ទុះបំបែកយកថ្មបង្កអោយប៉ះពាល់ដល់ផ្ទះប្រជាពលរដ្ឋ ក្នុងចម្ងាយប្រមាណជាង១ គីឡូម៉ែត្រ។មិនទាន់ឃើញមានប្រតិកម្មពី លោក ធឹម សំអាន អភិបាលខណ្ឌព្រែកព្នៅ និងអ្នកនាំពាក្យអ្នកនាំពាក្យស្នងការដ្ឋាននគរបាលរាជធានីភ្នំពេញ លោក សាន សុខសីហា នៅឡើយទេ?។
សូមបញ្ជាក់ថាផ្ទៃបឹងតាមោក ឬបឹងកប់ស្រូវ មានផ្ទៃដីសរុប៣ ២៣៩ហិកតា ជាអាងស្ដុកទឹកកខ្វក់ និងរំដោះទឹកចេញពីរាជធានីភ្នំពេញ ហើយបឹងមួយនេះ ត្រូវបានរដ្ឋាភិបាលចេញអនុក្រឹត្យកាលពីដើមខែកុម្ភៈ ឆ្នាំ២០១៦ ដោយកំណត់យកបឹងធម្មជាតិមួយនេះជាសម្បតិ្តសាធារណៈរបស់រដ្ឋ។បើយោងតាមអនុក្រឹត្យរបស់រដ្ឋាភិបាល ដែលបានចេញជាបន្តបន្ទាប់ចាប់តាំងពីឆ្នាំ២០១៨ ដល់ចុងខែធ្នូ ឆ្នាំ២០២១ ផ្ទៃបឹងតាមោក សរុបជាង២ ០០០ហិកតាហើយ ត្រូវបានរដ្ឋាភិបាលកាត់ឬដោះដូរទៅឱ្យស្ថាប័នរដ្ឋ ក្រុមហ៊ុនឯកជន និងបុគ្គលឯកជនមួយចំនួនដែលគេដឹងថាជាអ្នកមានលុយមានអំណាច សម្រាប់សាងសង់អគារ និងហេដ្ឋារចនាសម្ព័ន្ធផ្សេងៗ ព្រមទាំងធ្វើជាកម្មសិទ្ធិផ្ទាល់ខ្លួន ជាដើម៕
