ប្រធានាធិបតីស្រីលង្ការត់ចេញពីផ្ទះគេចពិហ្វូងបាតុករ
03-April-2024 / ព័ត៌មានជាតិ
ស្រីលង្កា៖ នៅថ្ងៃសៅរ៍ ទី៩ ខែកក្កដានេះ ប្រជាពលរដ្ឋស្រីលង្ការាប់ពាន់នាក់ បានសម្រុកចូលទៅកាន់លំនៅដ្ឋានរបស់លោកប្រធានាធិបតីស្រីលង្កា ក្នុងរដ្ឋធានីកូឡុំបូ ប្រមាណជា ១០ម៉ឺននាក់ កំពុងប្រមូលផ្តុំគ្នានៅខាងក្រៅ ក្នុងគោលបំណងទទូចឱ្យប្រធានាធិបតី Gotabaya Rajapaksa លាលែងចេញពីតំណែង ក្រោយពីអសមត្ថភាពក្នុងការដោះស្រាយវិបត្តិសេដ្ឋកិច្ចរបស់ប្រទេសជាតិមិនអាចដំណើរការបានល្អប្រសើរនោះ។
យោងតាមការឱ្យដឹងពីមន្ទីរពេទ្យជាតិក្នុងប្រទេសស្រីលង្កា (NHSL) បញ្ជាក់ថា យ៉ាងហោចណាស់ មនុស្ស៣១នាក់ រួមនឹងមន្ត្រីនគរបាល ២រូប រងរបួស អំឡុងព្រឹត្តិការណ៍តវ៉ាកើតឡើង ដោយពួកគេទាំងអស់គ្នា កំពុងទទួលការព្យាបាលនៅឯមន្ទីរពេទ្យ។ មន្ត្រីសមត្ថកិច្ច បញ្ជាក់បន្ថែមទៀតថា ជនរងគ្រោះរបួសស្នាមក្នុងអំឡុងព្រឹត្តិការណ៍ប៉ះទង្គិចគ្នាជាមួយនឹងកងនគរបាល ត្រូវគេរកឃើញថាមាន ២នាក់ កំពុងស្ថិតក្នុងស្ថានភាពរបួសធ្ងន់ធ្ងរ។ក្នុងហេតុការណ៍នេះ លោកប្រធានាធិបតី មិននៅកន្លែងនោះទេ ដោយបានគេចខ្លួនទៅកន្លែងផ្សេងរួចទៅហើយ។
នៅថ្ងៃសុក្រម្សិលមិញ ប៉ូលិសបានប្រកាសដាក់បម្រាមគោចរ ដើម្បីទប់ស្កាត់គម្រោងធ្វើបាតុកម្មប្រឆាំងរដ្ឋាភិបាល នៅរដ្ឋធានីកូឡុំប៊ូ។ ប៉ុន្តែ បម្រាមគោចររបស់ប៉ូលិសត្រូវលុបចោលទៅវិញ នៅបន្ទាប់ពី បក្សប្រឆាំង សកម្មជនការពារសិទ្ធិមនុស្ស និងចៅក្រមព្រមានដាក់ពាក្យប្តឹងមេប៉ូលិសស្រីលង្កា។ ប្រជាជនស្រីលង្កាទៀតសោតបានផ្គើនបម្រាមគោចររបស់រដ្ឋាភិបាល ដោយបានចាប់បង្ខំឲ្យរថភ្លើងដឹកពួកគេទៅធ្វើបាតុកម្មនៅទីក្រុងកូឡុំបូ។ នៅថ្ងៃសៅរ៍ ទូរទស្សន៍ស្រីលង្កាបានបង្ហាញបាតុកររាប់ពាន់នាក់រុញ បំប៉ើងរបាំងរនាំងរបស់ប៉ូលិស ដើម្បីសម្រុកចូលក្នុងក្រសួងហិរញ្ញវត្ថុ។
អាជ្ញាធរស្រីលង្កាបានប្រកាសពង្រាយទាហាន និងប៉ូលិស ជិត ២ម៉ឺននាក់ ដើម្បី ធានារក្សាសន្តិសុខឲ្យប្រធានាធិបតី លោកហ្គោតាបាយ៉ា រ៉ាយ៉ាប៉ាក់សេ ដែលក្រុមបាតុករទាមទារឲ្យចុះចេញពីតំណែង ក្នុងបទចោទប្រកាន់ថា ជាអ្នកទទួលខុសត្រូវលើវិបត្តិសេដ្ឋកិច្ច វិបត្តិទំនិញឡើងថ្លៃ និងការខ្វះខាតប្រេងប្រើប្រាស់ នៅក្នុងប្រទេស។
តាមប្រភពកងទ័ពស្រីលង្កាដែលដកស្រង់សំដី ដោយទីភ្នាក់ងារព័ត៌មានបារាំង AFP លោកប្រធានាធិបតីហ្គោតាបាយ៉ា រ៉ាយ៉ាប៉ាក់សេ ត្រូវបានជម្លៀសចេញពីគេហដ្ឋាន ទៅកាន់កន្លែងមានសុវត្ថិភាព តាំងពីថ្ងៃសុក្រ បន្ទាប់ពី ក្រុមបាតុករបានប្រកាសលើកគ្នាសម្រុកចូលគេហដ្ឋានរបស់ប្រធានាធិបតី នៅចុងសប្តាហ៍នេះ។
ប្រធានាធិបតីស្រីលង្កា នៅថ្ងៃពុធម្សិលមិញ បានឱ្យដឹងថា រូបលោកបានជំរុញដល់មេដឹកនាំរុស្ស៊ី លោក វ្លាឌីមៀរ ពូទីន ឱ្យជួយប្រទេសរបស់ខ្លួនតាមរយៈការនាំចូលប្រេងឥន្ធនៈ ខណៈដែលប្រទេសនេះបច្ចុប្បន្នកំពុងតែប្រឈមនឹងវិបត្តិសេដ្ឋកិច្ចដ៏ធ្ងន់ធ្ងរបំផុត។ នេះបើតាមការចុះផ្សាយដោយទីភ្នាក់ងារសារព័ត៌មាន Reuters។ថ្លែងតាមរយៈបណ្ដាញសង្គម ធ្វីតធ័រ (Twitter) លោកប្រធានាធិបតី ហ្កូតាបាយ៉ា រ៉ាចាប៉ាកសា (Gotabaya Rajapaksa) បានបន្តថា រូបលោកបានផ្ញើសារទៅកាន់លោក វ្លាឌីមៀរ ពូទីន ដោយបានស្នើសុំការគាំទ្រឥណទានពីប្រទេសរុស្ស៊ី ក្នុងការនាំចូលប្រេងឥន្ធនៈមកកាន់ប្រទេសរបស់ខ្លួន។
តាមសេចក្តីថ្លែងការណ៍ របស់រដ្ឋាភិបាល នាយករដ្ឋមន្ត្រីថ្មីរបស់ស្រីលង្កា ដែលកំពុងស្ថិតក្រោមការយាមការពារសុវត្ថិភាពរបស់កងទ័ពបានកោះប្រជុំបន្ទាន់គណៈរដ្ឋមន្ត្រី និងទាមទារឲ្យសភាបើកការប្រជុំបន្ទាន់ដែរ នៅថ្ងៃសៅរ៍នេះ ដើម្បីរកដំណោះស្រាយដ៏បានឆាប់បំផុត សម្រាប់វិបត្តិលើកនេះ។ខ្វះទុនបម្រុងអន្តរជាតិ ដោយសារការគ្រប់គ្រងមិនល្អ និងការបាត់បង់ចំណូលពីខាងទេសចរណ៍ដោយសារវិបត្តិកូវីដ ស្រីលង្កាបានធ្លាក់ខ្លួនក្នុងវិបត្តិប្រាក់បំណុល លែងមានលុយសម្រាប់ទិញនាំចូលថ្នាំ ស្បៀងអាហារ និងប្រេង។ ការខ្វះខាតប្រភពសំខាន់សម្រាប់ទ្រទ្រង់ជីវភាពប្រចាំថ្ងៃ បូកផ្សំនឹងការកើនឡើងនៃកម្រិតអតិផរណា (រហូតដល់៥៤%) បានទៅដុតរោលធ្វើឲ្យប្រជាជនស្រីលង្កាផ្ទុះកំហឹង ធ្វើបាតុកម្មប្រឆាំងរដ្ឋាភិបាល ដោយលែងខ្លាចការបង្ក្រាបរបស់ប៉ូលិស៕
