សប្បាយក្លាយជាទុក្ខស្លាប់ជាង១០០នាក់ព្រោះជាន់គ្នានៅកូរ៉េក្នុងថ្ងៃបុណ្យខ្មោចអឺរ៉ុបប្រធានាធិបតីប្រកាសកាន់ទុក្ខនាយករដ្ឋមន្ត្រីចេញលុយធ្វើបុណ្យ
21-September-2026 / ព័ត៌មានអន្តរជាតិ
កូរ៉េខាងត្បូង៖ក្រុមមន្ត្រីសង្គ្រោះបន្ទាន់់របស់ប្រទេសកូរ៉េខាងត្បូងបានថ្លែងប្រាប់ដល់ទីភ្នាក់ងារព័ត៌មានរ៉យទ័រថា គេបានរកឃើញសាកសពមនុស្សបន្តទៀត ដែលគិតរហូតមកដល់ម៉ោងនេះ តួលេខអ្នកស្លាប់បានកើនឡើងដល់ ១៥៣នាក់ហើយ នៅក្នុងហេតុការណ៍ផ្អើលរត់ជាន់គ្នានៅក្នុងឱកាសនៃការប្រារព្ធពិធីបុណ្យសាសនា(Halloween)មួយក្នុងរដ្ឋធានីសេអ៊ូលដែលភាគច្រើនជាយុវជន។
មនុស្ស១០៣នាក់បានរងរបួសក្នុងឧបទ្ទវហេតុនោះ។ជនបរទេស២២នាក់បានស្លាប់ ក្នុងនោះមានជនជាតិចិន៤នាក់ ជនជាតិអ៊ីរ៉ង់៤នាក់ជនជាតិរុស្ស៊ី៣នាក់ និងពលរដ្ឋមកពីសហរដ្ឋអាមេរិក បារាំង អូស្ត្រាលី វៀតណាម អ៊ូសបេគីស្ថាន ន័រវេស កាហ្សាក់ស្ថាន ស្រីលង្កា និងប្រទេសថៃឡង់ និងអូទ្រីស។អ្នកស្លាប់ភាគច្រើនជាស្ត្រី ហើយយ៉ាងហោចណាស់៩៧នាក់ក្នុងចំណោមពួកគេ។ អ្នកជំនាញនិយាយថាស្ត្រីរងផលប៉ះពាល់ច្រើនព្រោះរាងកាយតូចជាងបុរស។ សំលៀកបំពាក់ Halloween ដ៏សំពីងសំពោង ដាក់សម្ពាធកាន់តែខ្លាំងលើពួកគេ។នេះជាព្រឹត្តិការណ៍បុណ្យខ្មោចអឺរ៉ុប( Halloween )ដំបូងគេនៅទីក្រុងសេអ៊ូល ដែលអាជ្ញាធរបើឲ្យមានការជួបជុំបន្ទាប់ពីត្រូវបានលុបចោលការរឹតបន្តឹងដោយសារCovid-19 ។
មនុស្សប្រមាណ១០ម៉ឺននាក់បានសម្រុកទៅផ្លូវ Itaewon នៅល្ងាចថ្ងៃទី២៩ ខែតុលា។ ប្រធានាធិបតីកូរ៉េខាងត្បូង Yoon Suk-yeol បានប្រកាសកាន់ទុក្ខជាតិចាប់ពីថ្ងៃទី ៣០ខែតុលាដល់ថ្ងៃទី០៥ ខែវិច្ឆិកា។ លោកបានហៅការរត់ជាន់គ្នានេះថាជាគ្រោះមហន្តរាយដែលមិនគួរកើតឡើងជាពិសេសនៅកណ្តាលទីក្រុងសេអ៊ូល។ការរត់ជាន់គ្នានេះគឺជាសោកនាដកម្មដ៏អាក្រក់បំផុតនៅក្នុងប្រទេសកូរ៉េខាងត្បូងចាប់តាំងពីការលិចសាឡាង Sewol នៅក្នុងឆ្នាំ ២០១៤ដែលបានសម្លាប់មនុស្សចំនួន៣០៤ នាក់ ដែលភាគច្រើនជាសិស្សវិទ្យាល័យ។យោងតាមYonhapមានហ្វូងមនុស្សដ៏ច្រើនកុះករបាននាំគ្នាចូលរួមអបអរឱកាសពិធី បុណ្យខ្មោច ឬហៅថា (Halloween) បែបផែនសាសនា នៅកណ្តាលទីក្រុងសេអ៊ូនៃសង្កាត់ Itaewon ជាតំបន់មជ្ឈមណ្ឌលកម្សាន្តដ៏ពេញនិយមសម្រាប់ពលរដ្ឋនៅក្នុងតំបន់ ក៏ដូចជាក្រុមភ្ញៀវទេសចរបរទេស។
គេនៅមិនទាន់ដឹងអំពីមូលហេតុច្បាស់លាស់ដែលនាំឲ្យមានការផ្អើលរត់ជាន់គ្នាកើតឡើងនៅឡើយទេ ប៉ុន្តែបើតាមប្រភពពីក្រុមអ្នករស់នៅក្នុងតំបន់បានបញ្ជាក់ឲ្យដឹងដែរថា មានមនុស្សជាច្រើនចាប់ផ្តើមមានអាការៈថប់ៗផ្លូវដង្ហើមនៅពេលដែលកំពុងធើ្វដំណើរតាមដងផ្លូវដែលមានហ្វូងមនុស្សដ៏ច្រើនកកកុញ។នាយករដ្ឋមន្ត្រីកូរ៉េខាងត្បូង លោក ហាន ឌុកស៊ូ (Han Duck-soo) នៅថ្ងៃអាទិត្យ បាននិយាយថា ខាងរដ្ឋាភិបាលនឹងផ្តល់ការគាំទ្រ ក៏ដូចជាថវិកាឧបត្ថម្ភ សម្រាប់គ្រួសារជនរងគ្រោះ ដែលបានបាត់បង់ជីវិត និងរងរបួស ក្នុងហេតុការណ៍មនុស្សច្រើនកកកុញខ្លាំងរហូតជាន់គ្នា កំលុងពិធីបុណ្យ Halloween នៅឯទីក្រុងសេអ៊ូល កាលពីយប់ថ្ងៃសៅរ៍កន្លងទៅ។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នៅថ្ងៃអាទិត្យ ទី៣០ ខែតុលា ឆ្នាំ២០២២។
លោក ហាន បាននិយាយដូច្នេះថា «រដ្ឋាភិបាលកូរ៉េខាងត្បូងនឹងដាក់ដំណើរការ ក្រុមការងារមួយសម្រាប់គាំទ្រ ដល់ការរៀបចំបុណ្យសព សម្រាប់អ្នកស្លាប់ ហើយនឹងឆ្លើយតបយ៉ាងពេញលេញ ចំពោះការព្យាបាលអ្នកដែលរងរបួស ខណៈការងារនេះនឹងប្រព្រឹត្តទៅ អមជាមួយក្រសួងសុខាភិបាលនិងសុខុមាលភាព។ មិនតែប៉ុណ្ណោះ ក៏នឹងមានការផ្តល់ការព្យាបាលផ្លូវចិត្ត សម្រាប់គ្រួសារសព និងអ្នកទទួលរងរបួស ផងដែរ»។អាជ្ញាធរ កូរ៉េខាងត្បូងបាន បន្ដឲ្យដឹងថា ខ្លួនកំពុង បើកការស៊ើបអង្កេតដើម្បីស្វែងរកមូលហេតុ ពិតប្រាកដ ដែលបណ្តាលឲ្យមានឧបទ្ទវហេតុ ដ៏អាក្រក់នេះកើតឡើងដែលបើតាមប្រភពផ្សេងៗនិយាយថាក្នុងកម្មវិធីមនេះមានប៉ូលិសប្រមាណតែ២០០នាក់ប៉ុណ្ណោះដាក់ពង្រាយនៅទីនោះ៕
