ជប៉ុនបញ្ចេញប្រេងពីឃ្លាំងបម្រុង ដើម្បីដោះស្រាយវិបត្តិថាមពលដែលកំពុងកើតមាន

ជប៉ុន៖ នៅថ្ងៃព្រហស្បតិ៍ទី២៦មីនារដ្ឋាភិបាលជប៉ុន បានសម្រេចចិត្តជាផ្លូវការក្នុងការបញ្ចេញប្រេងចេញពីឃ្លាំងបម្រុងយុទ្ធសាស្ត្រជាតិរបស់ខ្លួន ដើម្បីដោះស្រាយវិបត្តិថាមពលដែលកំពុងកើតមាន។   

ទីភ្នាក់ងារពត៍មានបារាំងAFPបានឲ្យដឹងថាអ្នកនាំពាក្យរដ្ឋាភិបាលជប៉ុន លោក មីណូរុ គីហារ៉ា (Minoru Kihara) បញ្ជាក់ថា ការផ្ទេរប្រេងពីពាក់កណ្តាលនៃស្ថានីយបម្រុង ទៅឱ្យក្រុមហ៊ុនចម្រាញ់ប្រេងចំនួន ៤ បានចាប់ផ្ដើមតាមការគ្រោងទុក។ ក្នុងនោះ មន្ត្រីម្នាក់នៃក្រសួងសេដ្ឋកិច្ច ពាណិជ្ជកម្ម និងឧស្សាហកម្ម បានប្រាប់ទីភ្នាក់ងារសារព័ត៌មាន AFP ថា «ការបញ្ចេញប្រេងពីឃ្លាំងបម្រុងជាតិ បានចាប់ផ្ដើមនៅម៉ោង ១០:៥៩ ព្រឹក ទៅឱ្យក្រុមហ៊ុនចម្រាញ់ប្រេង» ។

មូលហេតុចម្បងនៃវិបត្តិថាមពលនេះ គឺបណ្ដាលមកពីការបិទច្រកសមុទ្រ ហ័រមូស (Hormuz) ដោយប្រទេសអ៊ីរ៉ង់ បន្ទាប់ពីមានការវាយប្រហារពីសំណាក់សហរដ្ឋអាម៉េរិក និងអ៊ីស្រាអ៊ែល។ ច្រកសមុទ្រនេះ គឺជាសរសៃឈាមសេដ្ឋកិច្ចដ៏សំខាន់បំផុត ដែលដឹកជញ្ជូនប្រេង និងឧស្ម័នមួយភាគប្រាំនៃពិភពលោក ហើយការបិទផ្លូវទឹកនេះ បានធ្វើឱ្យខ្សែច្រវាក់ផ្គត់ផ្គង់ថាមពលសកលត្រូវរាំងស្ទះ ។

ជប៉ុនគឺជាប្រទេសដែលរងគ្រោះខ្លាំងជាងគេ ដោយសារតែខ្លួនត្រូវនាំចូលប្រេងរហូតដល់ទៅ ៩០% ពីតំបន់មជ្ឈិមបូព៌ា។ បច្ចុប្បន្ន មាននាវាពាក់ព័ន្ធនឹងជប៉ុនជិត ៥០ គ្រឿង រួមទាំងនាវិកផងដែរ កំពុងជាប់គាំងមិនអាចធ្វើដំណើរចេញពីឈូងសមុទ្រពែក្សបាន ដែលបង្កជាក្ដីបារម្ភយ៉ាងខ្លាំងដល់សមាគមម្ចាស់នាវា និងវិស័យឧស្សាហកម្មទាំងមូលនៅក្នុងប្រទេស ។

ដើម្បីឆ្លើយតបនឹងស្ថានភាពអាសន្ននេះ ទីក្រុងតូក្យូបានដាក់ចេញនូវផែនការបញ្ចេញប្រេងបម្រុងទាំងផ្នែករដ្ឋ និងឯកជនក្នុងបរិមាណដ៏ច្រើន។ ក្នុងនោះ ប្រេងបម្រុងរបស់រដ្ឋសម្រាប់ប្រើប្រាស់រយៈពេលមួយខែ និងប្រេងបម្រុងវិស័យឯកជនសម្រាប់រយៈពេល ១៥ ថ្ងៃ ត្រូវបានបញ្ចេញជាបន្តបន្ទាប់ ដើម្បីជួយសម្រួលដល់តម្រូវការចាំបាច់ក្នុងគ្រាដ៏លំបាកនេះ ។

នាយករដ្ឋមន្ត្រីជប៉ុន លោកស្រី សាណែ តាកាអ៊ិឈិ (Sanae Takaichi) ក៏បានស្វែងរកកិច្ចសហការពីអន្តរជាតិផងដែរ។ ទីភ្នាក់ងារថាមពលអន្តរជាតិ (IEA) បានបញ្ជាក់ពីការត្រៀមខ្លួនរួចជាស្រេចក្នុងការអនុញ្ញាតឱ្យបញ្ចេញប្រេងបម្រុងបន្ថែមទៀត ប្រសិនបើសង្រ្គាមនៅមជ្ឈិមបូព៌ានៅតែបន្តអូសបន្លាយ ដែលអាចធ្វើឱ្យប៉ះពាល់ដល់សន្តិសុខថាមពលសកលយូរអង្វែង ។តាមប្រភពពីតមានខ្លះបានឲ្យដឹងថាប្រទេសអ៉ីរង់បានប្រកាសបើកឲ្យនាវាដឹកប្រេងជប់ូនឆ្លងកាត់ច្រកសមុទ្ទហរម៉ុសដោយមិនប៉ះពាល់តែមិនទាន់ឃើញថានាវាដឹកប្រឹងជប៉ុនបានឆ្លងកាត់នោះទេ។