វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 549 នាក់
ម្សិលមិញ 6501 នាក់
សរុប 13949104 នាក់
សហរដ្ឋអាម៉េរិក អារ៉ាប៊ីសាអូឌីត៖ អ្នកប្រឹក្សាសេដ្ឋកិច្ចអារ៉ាប៊ីសាអូឌីតម្នាក់ នៅថ្ងៃពុធ សប្តាហ៍នេះ បានលើកឡើងថា ប្រតិកម្មរបស់ប្រធានាធិបតីអាម៉េរិកចំពោះអង្គការ OPEC+ ចំពោះការសម្រេចកាត់បន្ថយផលិតកម្មប្រេង គឺមិនសមហេតុផលនោះទេ ។ទីប្រឹក្សាផ្នែកសេដ្ឋកិច្ច និងហិរញ្ញវត្ថុ លោក ម៉ាជីដ អាល់ស៊ូវៃ បានលើកឡើងថា វាគឺ "ជាផលប្រយោជន៍ក្នុងទីផ្សារ" ដើម្បីកំណត់ទៅលើផលិតកម្មប្រេងនៅពេលនេះ ។ លោកបានលើកឡើងបន្តថា សមាជិក (OPEC) ទាំងអស់ ក៏បានយល់ព្រមហើយ ទៅលើការសម្រេចចិត្តនេះ ហើយការកើនឡើងតម្លៃប្រេងជាបន្តបន្ទាប់ គឺជាលទ្ធផលចំពោះការផ្គត់ផ្គង់ និងតម្រូវការ ។ លោកក៏បានបន្ថែមផងដែរថា សេតវិមាន ឆ្លើយតបដោយកំហឹងនោះ ក៏ព្រោះតែ អាម៉េរិក និង អឺរ៉ុប បរាជ័យក្នុងការគ្រប់គ្រងអតិផរណា ។
ប្រធានាធិបតី ចូ បៃដិន កាលពីថ្ងៃអង្គារ កន្លងទៅនេះ បានប្រកាសថានឹងមាន "ផលវិបាក" សម្រាប់ទំនាក់ទំនងរវាងសហរដ្ឋអាម៉េរិកជាមួយនឹងអារ៉ាប៊ីសាអូឌីត បន្ទាប់ពីការសម្រេចចិត្តនេះ ។ លោក បៃដិន បានប្រកាសបែបនេះ មួយថ្ងៃបន្ទាប់ពីសមាជិកព្រឹទ្ធសភាប្រជាធិបតេយ្យដ៏មានឥទ្ធិពលលោក Bob Menendez ជាប្រធានគណៈកម្មាធិការទំនាក់ទំនងការបរទេសព្រឹទ្ធសភា បានលើកឡើងថា សហរដ្ឋអាម៉េរិកត្រូវតែបង្កកជាបន្ទាន់ចំពោះកិច្ចសហប្រតិបត្តិការទាំងអស់ជាមួយនឹងអារ៉ាប៊ីសាអូឌីត រួមទាំងការលក់អាវុធផងដែរ។ក្រុមមន្ត្រីរបស់អាម៉េរិក បានព្យាយាមបញ្ចុះបញ្ចូលយ៉ាងអត់ធ្មត់ក្នុងគោលបំណងចង់ឱ្យអារ៉ាប៊ីសាអូឌីត ជាដៃគូដ៏ធំបំផុតរបស់ខ្លួន បោះបង់ចោលគំនិតកាត់បន្ថយផលិតកម្មប្រេង ប៉ុន្តែទោះជាយ៉ាងណាក៏ដោយ ក៏ព្រះអង្គម្ចាស់ Mohammed bin Salman នៃអារ៉ាប៊ីសាអូឌីត មិនបានរំសាយព្រះពិរោធនោះឡើយ .
រដ្ឋមន្ត្រីការបរទេសអាម៉េរិក លោក Antony Blinken បានលើកឡើងថា ទីក្រុងវ៉ាស៊ីនតោន បានបញ្ជាក់យ៉ាងច្បាស់ដល់បណ្តាប្រទេសផលិតប្រេង ចំពោះតម្រូវការផ្គត់ផ្គង់ថាមពល និងដើម្បីបំពេញតម្រូវការ បន្ទាប់ពីអង្គការនាំចេញប្រេងឬហៅកាត់ថា (OPEC) បានសម្រេចកាត់បន្ថយផលិតកម្មប្រេងក្នុងទំហំធំបំផុតក្នុងរយៈពេលប៉ុន្មានឆ្នាំកន្លងមកនេះ។សហរដ្ឋអាម៉េរិកកំពុងខិតខំជម្រុញឱ្យអង្គការនាំចេញប្រេង (OPEC) និងជាសម្ព័ន្ធមិត្តរបស់ខ្លួនផងនោះ មិនឱ្យកាត់បន្ថយទិន្នផលនោះឡើយ ក៏ព្រោះតែ ខណៈនេះ សហរដ្ឋអាម៉េរិកខ្លួនឯង កំពុងតែព្យាយាមខ្លាំងក្នុងការរក្សាតម្លៃថាមពល ដែលរំខានដោយសារតែការឈ្លានពានពីសំណាក់ប្រទេសរុស្ស៊ីទៅលើប្រទេសអ៊ុយក្រែន។អំឡុងដំណើរទស្សនកិច្ចនៅប្រទេសឈីលី លោក Blinken បានថ្លែងនៅក្នុងសន្និសីទសារព័ត៌មានមួយថា "អ្វីដែលយើងបាននិយាយយ៉ាងច្បាស់ គឺតម្រូវការផ្គត់ផ្គង់ថាមពល ដើម្បីបំពេញតម្រូវការនានា។ លោកបានបន្តទៀតថា "យើងកំពុងធ្វើការជារៀងរាល់ថ្ងៃឱ្យអស់ពីសមត្ថភាព ដើម្បីធានាថាថាមពលនៅតែមាននៅលើទីផ្សារ ខណៈតម្លៃត្រូវតែស្ថិតនៅចំនួនទាបមួយអាចទទួលយកបានទាំងអស់គ្នា ។
កាលពីថ្ងៃពុធ ទី៥ ខែតុលានេះ ឃើញថាតម្លៃប្រេងបានកើនឡើង ហើយការកើនឡើងនៅប៉ុន្មានថ្ងៃថ្មីៗនេះ គឺដោយសារតែអង្គការនាំចេញប្រេង OPEC បានឯកភាពទៅលើការកាត់បន្ថយផលិតកម្មដ៏ក្រាស់ក្រែលបំផុតរបស់ខ្លួន ចាប់តាំងពីជំងឺរាតត្បាតកូវីដ១៩ កាលពីឆ្នាំ២០២០ បង្កឱ្យមានភាពតឹងតែងនៅក្នុងទីផ្សារប្រេង ។ ក្រោយកាត់បន្ថយផលិតកម្មប្រេងប្រមាណជា ២ លានបារ៉ែលក្នុងមួយថ្ងៃ ចេញពីអង្គការ OPEC វានឹងអាចបង្កឱ្យតម្លៃប្រេងដែលបានធ្លាក់ចុះមកប្រហែល ពី១២០ដុល្លារអាម៉េរិក មកនៅត្រឹមតែ ៩០ដុល្លារអាម៉េរិកកាលពីបីខែមុន នឹងមានការកើនឡើងវិញ ។
លោក Fiona Cincotta អ្នកវិភាគសន្ទស្សន៍ទីផ្សារហិរញ្ញវត្ថុជាន់ខ្ពស់មកពីទីភ្នាក់ងារ City Index បានឱ្យដឹងថា តម្លៃប្រេងរំពឹងថា នឹងបន្តហក់ឡើងនៅក្នុងសប្តាហ៍នេះ បន្ទាប់ពី OPEC កាត់បន្ថយផលិតកម្ម។ ដោយលោកបានបន្ថែមថា វានឹងមិនមានផលប៉ះពាល់ធ្ងន់ធ្ងរនោះទេ ប្រសិនបើសមាជិកក្នុងអង្គការ OPEC ខ្លះអាចសម្រេចបានផលិតកម្មទៅតាមកូតារបស់ពួកគេបាន ។
កាលពីខែសីហា កន្លងទៅ អង្គការ OPEC បានខកខានទៅលើគោលដៅផលិតរបស់ខ្លួនដែលមានទំហំប្រហែល ៣.៥៨ លានបារ៉ែលក្នុងមួយថ្ងៃ ដោយសារតែប្រទេសមួយចំនួនសម្រេចផលិតកម្មបានទៅតាមកូតាដែលមានស្រាប់របស់ពួកគេ។ បន្ថែមលើសពីទៅទៀត លោក ចច លីន (Jorge Leon) អ្នកវិភាគមកពីក្រុមហ៊ុន រ៉ាយស្តាដ អ៊ែនើជី (Rystad Energy) បានមានប្រសាសន៍ថា "យើងជឿជាក់ថា គោលដៅទិន្នផលថ្មី ភាគច្រើននឹងត្រូវបានគាំទ្រដោយបណ្តាប្រទេសមជ្ឈិមបូព៌ា ដែលដឹកនាំដោយអារ៉ាប៊ីសាអូឌីត អារ៉ាប់រួម និងគុយវ៉ែត" ។
គួរបញ្ជាក់ដែរថា ប្រភពដែលដឹងរឿងនេះ បានបង្ហើបប្រាប់ទីភ្នាក់ងារព័ត៌មានរ៉យទ័រថា សហរដ្ឋអាម៉េរិកកំពុងដាក់សម្ពាធលើអង្គការនាំចេញប្រេង OPEC ឱ្យជៀសវាងការកាត់បន្ថយផលិតកម្មប្រេងក្នុងទំហំធំបែបនេះ ស្របពេលដែលប្រធានាធិបតីអាម៉េរិក កំពុងព្យាយាមរិះរកវិធីដើម្បីទប់ស្កាត់កំណើនតម្លៃប្រេងសាំងនៅសហរដ្ឋអាម៉េរិក មុនការបោះឆ្នោតសភា នៅថ្ងៃទី៨ ខែវិច្ឆិកាខាងមុខ៕
សហរដ្ឋអាម៉េរិកបាននិយាយថា ការសម្រេចចិត្តរបស់អង្គការ OPEC+ ដឹកនាំដោយអារ៉ាប៊ីសាអូឌីតដើម្បីកាត់បន្ថយការផលិតប្រេងចំនួនពីរលានបារ៉ែលក្នុងមួយថ្ងៃជាការគាំទ្រដ៏ធំសម្រាប់លោកពូទីននៅមុនការហាមឃាត់ប្រេងរបស់អឺរ៉ុប និងបង្ហាញថា អង្គការនេះកំពុងគាំទ្រខាងរុស្ស៊ី។អ្នកនាំពាក្យសេតវិមាន នាង ការីន ហ្សង់ព្យែរ (Karine Jean-Pierre) បានពណ៌នាការសម្រេចចិត្តនេះថាជា “កំហុស” ហើយនិយាយថា វាជា “ការយល់ខុស”។