អ៊ុយក្រែនត្រៀមខ្លួនជាស្រេច ដើម្បីចរចាសន្តិភាព ប៉ុន្តែមិនមែនដើម្បីចុះចាញ់ឡើយ
11-February-2026 / ព័ត៌មានអន្តរជាតិ
អ៊ុយក្រែន៖នៅថ្ងៃព្រហស្បតិ៍ទី២៤ខែមេសាឆ្នាំ២០២៥ រុស្ស៊ី បានបើកការវាយប្រហារលើរដ្ឋធានីកៀវ នៃប្រទេសអ៊ុយក្រែនយ៉ាងសាហាវ បណ្តាលឲ្យមនុស្សចំនួន៩នាក់ស្លាប់ និង៦៣នាក់ទៀតរងរបួស។BBC,បានឲ្យដឹងថា ការបាញ់ស្រោចនេះបង្កជាអគ្គិភ័យនៅទីតាំងចំនួន៦កន្លែង និងកម្ទេចអគារនានា ធ្វើឲ្យបំណែកថ្មបាក់សង្កត់លើមនុស្ស ខណៈអភិបាលក្រុងកៀវលោក Vitali Klitschko បញ្ជាក់ថា មានកុមារចំនួន៦នាក់ ស្ថិតក្នុងចំណោមមនុស្សរងរបួស ហើយត្រូវបញ្ជូនទៅកាន់មន្ទីរពេទ្យ។ក្រសួងមហាផ្ទៃអ៊ុយក្រែនក៏ បានឲ្យដឹងថា ទីក្រុង Sumy, Kharkiv និង Zhytomyr ក៏ត្រូវវាយប្រហារដែរ គ្រាន់តែរដ្ឋធានី កៀវ រងគ្រោះខ្លាំងជាងគេ។
សូមជម្រាបថា ការវាយប្រហារនេះកើតឡើងភ្លាមៗក្រោយពេលប្រមុខសេតវិមាន ដូណាល់ ត្រាំ ស្តីបន្ទោសនិងចោទប្រកាន់ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី ជាសាធារណៈថា បានធ្វើឲ្យខូចដល់កិច្ចចរចាសន្តិភាព ព្រោះតែការបដិសេធទទួលស្គាល់តំបន់គ្រីមៀថាជារបស់រុស្ស៊ីផងដែរ។មិនត្រឹមប៉ុណ្ណឹង លោក ត្រាំ ថែមទាំងព្រមានទៀតថា អ៊ុយក្រែន អាចបាត់ប្រទេសទាំងមូលតែម្តង បើលោក ហ្សេលេនស្គី នៅតែរឹងទទឹងមិនព្រមចូលតុចរចាជាមួយរុស្ស៊ីទេនោះ។
ពាក់ព័ន្ធនឹងការប្រកាសមិនទទួលស្គាល់គ្រីមៀជារបស់រុស្ស៊ី ពីសំណាក់លោក ហ្សេលេនស្គី នោះ លោក ត្រាំ បានប្រតិកម្មខ្លាំងៗថា «សេចក្តីថ្លែងការណ៍នេះ គឺមានគ្រោះថ្នាក់ខ្លាំងណាស់ចំពោះការចរចាសន្តិភាពជាមួយរុស្ស៊ី ទាំងដែលគ្រីមៀបានបាត់បង់ប៉ុន្មានឆ្នាំមកហើយ។ មេដឹកនាំអ៊ុយក្រែន ប្រហែលចង់អូសបន្លាយជម្លោះឲ្យកាន់តែយូរ»។សម្រាប់ប្រទេសប៉ូឡូញវិញ បានប្រញាប់ប្រញាល់ចល័តយន្តហោះចម្បាំង ដើម្បីធានាសុវត្ថិភាពដែនអាកាសរបស់ខ្លួន បន្ទាប់ពីរុស្ស៊ី បើកការវាយប្រហារលើភាគខាងលិចប្រទេសអ៊ុយក្រែន ដែលស្ថិតនៅកៀកព្រំដែនរបស់ខ្លួន។
បញ្ជាការដ្ឋានប្រតិបត្តិការកងទ័ពអាកាសប៉ូឡូញ ដែលបង្ហោះលើបណ្តាញសង្គម X នៅថ្ងៃព្រហស្បតិ៍ទី២៤ខែមេសាឆ្នាំ២០២៥ថា «ដោយសារតែសកម្មភាពដែនអាកាស រយៈចម្ងាយឆ្ងាយរបស់សហព័ន្ធរុស្ស៊ី ដែលកំពុងបើកការវាយប្រហារលើទីតាំងនៅភាគខាងលិចប្រទេសអ៊ុយក្រែននោះ យន្តហោះប៉ូឡូញ និងសម្ព័ន្ធមិត្ត បានចាប់ផ្តើមប្រតិបត្តិការនៅក្នុងដែនអាកាសប៉ូឡូញ»។
ប្រធានាធិបតីអាមេរិក លោក ដូណាល់ ត្រាំវិញ នៅថ្ងៃព្រហស្បតិ៍នេះ បានធ្វើការរិះគន់ដោយផ្ទាល់ និងកម្រមួយទៅលើប្រធានាធិបតីរុស្ស៊ី លោក វ្ល៉ាឌីមៀ ពូទីន បន្ទាប់ពីមានការវាយប្រហារដោយមីស៊ីល និងដ្រូនរបស់រុស្ស៊ីទៅលើរដ្ឋធានីកៀវរបស់អ៊ុយក្រែន ដោយលោក ត្រាំ បានសរសេរថា «វ្ល៉ាឌីមៀ ឈប់!» (Vladimir, stop!)។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី២៤ ខែមេសា ឆ្នាំ២០២៥។
នៅក្នុងសារបង្ហោះលើបណ្តាញសង្គម លោក ត្រាំ បានសរសេរថា «ខ្ញុំមិនសប្បាយចិត្តនឹងការវាយប្រហាររបស់រុស្ស៊ីលើកៀវទេ។ វាជាទង្វើដែលមិនចាំបាច់ ហើយកើតឡើងនៅពេលមិនសមរម្យបំផុត»។ នេះគឺជាការស្តីបន្ទោសដ៏កម្រមួយពីលោក ត្រាំ ទៅលើលោក ពូទីន។
ការរិះគន់លើលោក ពូទីននេះ បានកើតឡើងមួយថ្ងៃបន្ទាប់ពីលោក ត្រាំ បានរិះគន់ប្រធានាធិបតីអ៊ុយក្រែន លោក Volodymyr Zelenskyy ចំពោះការបញ្ជាក់ពីជំហរមិនទទួលស្គាល់ការកាន់កាប់តំបន់គ្រីមៀដោយរុស្ស៊ី។
ការផ្លាស់ប្តូរវោហាសាស្ត្ររបស់លោក ត្រាំ ដោយរិះគន់ទាំងលោក Zelenskyy និងលោក ពូទីន ក្នុងរយៈពេលពីរថ្ងៃជាប់គ្នា កំពុងបន្ថែមភាពមិនច្បាស់លាស់ដល់កិច្ចខិតខំប្រឹងប្រែងការទូតដ៏ស្មុគស្មាញ ដើម្បីបញ្ចប់សង្គ្រាមនៅអ៊ុយក្រែន។
សូមបញ្ជាក់ថា កាលពីថ្ងៃពុធ ទី២៣ ខែមេសា ឧបនាយករដ្ឋមន្ត្រីអ៊ុយក្រែន លោកស្រី យូលៀស្វីរីដិនកូ(Yulia Svyrydenko) បាននិយាយថា អ៊ុយក្រែនត្រៀមខ្លួនរួចរាល់ ដើម្បីចរចាសន្តិភាព ប៉ុន្តែមិនមែនដើម្បីចុះចាញ់នោះឡើយ ។ ទីភ្នាក់ងារព័ត៌មាន Reutersបានឲ្យដឹងថាលោកស្រី Svyrydenko បានបង្ហោះសារយ៉ាងដូច្នេះថា «កិច្ចព្រមព្រៀងនឹងមិនអាចកើតមានឡើយ ប្រសិនបើវាផ្តល់ឱ្យរុស្ស៉ីនូវមូលដ្ឋានគ្រឹះរឹងមាំ ដើម្បីប្រមូលផ្តុំកម្លាំងឡើងវិញ រួចត្រឡប់មកសាជាថ្មី ជាមួយហិង្សាកាន់តែខ្លាំង។ ប្រជាជនរបស់យើង នឹងមិនទទួលយកដាច់ខាត ចំពោះជម្លោះដែលត្រូវបានផ្អាក តែបន្លំធ្វើជាសន្តិភាព»។ លោកស្រីបានបន្តថា បទឈប់បាញ់ពេញលេញមួយ ទាំងតាមផ្លូវគោក ផ្លូវអាកាស និងផ្លូវទឹក គឺជាជំហានដំបូង ដែលចាំបាច់បំផុត។
កាលពីថ្ងៃពុធ ទី២៣ ខែមេសា រដ្ឋមន្ត្រីការបរទេសនៃប្រទេសអ៊ុយក្រែន បាននិយាយថា អ៊ុយក្រែននៅតែបន្តប្តេជ្ញាធ្វើការជាមួយសហរដ្ឋអាមេរិក ក្នុងគោលដៅឆ្ពោះទៅរកទីបញ្ចប់សម្រាប់សង្គ្រាមឈ្លានពានរបស់រុស្ស៉ី។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។កាលពីថ្ងៃអង្គារ លោក ហ្សេលេនស្គី ប្រធានាធិបតីអ៊ុយក្រែនបានរំលឹកឡើងវិញថា អ៊ុយក្រែននឹងមិនប្រគល់គ្រីមៀទៅឱ្យរុស្ស៉ី ដែលបានដណ្តើមកាន់កាប់ឧបទ្វីបនោះ នៅក្នុងឆ្នាំ ២០១៤ និងជាទង្វើដែលត្រូវបានថ្កោលទោសដោយអន្តរជាតិ ជាដាច់ខាត។
មានការកត់សម្គាល់ថាគ្មានទេការប្រកាសបង្ហាញជាផ្លូវការនូវផែនការសន្តិភាពសម្រាប់អ៊ុយក្រែននិងរុស្ស៊ី ប៉ុន្តែបណ្តាញសារព័ត៌មានជាច្រើនបានចុះផ្សាយយ៉ាងព្រោងព្រាតអំពីខ្លឹមសារដែលអាចមាននៅក្នុងផែនការសន្តិភាពស្នើឡើងដោយរដ្ឋបាលអាមេរិក។បើតាមកាសែតWashington Post សហរដ្ឋអាមេរិកស្នើឱ្យទទួលស្គាល់ដែនដីគ្រីមេ ជាទឹកដីរុស្ស៊ី ដូចការទាមទាររបស់លោកប្រធានាធិបតីរុស្ស៊ីពូទីន។ ហើយបន្ថែមពីលើនេះទៀត ដែនដីភាគខាងកើតអ៊ុយក្រែនដែលស្ថិតក្រោមការគ្រប់គ្រងរបស់យោធារុស្ស៊ីទៅហើយ ដូចជា តំបន់Donetsk Kherson និងZaporijjia ក៏នឹងត្រូវក្លាយជារបស់រុស្ស៊ីដែរ។ នេះបើតាមបណ្តាញព័ត៌មានអនឡាញ Axios ដោយសង្កត់ធ្ងន់ថា ដើម្បីឆ្លើយតបទៅនឹងការទាមទារដ៏ចម្បងមួយទៀតរបស់លោកពូទីន សហរដ្ឋអាមេរិកព្រមសន្យានៅក្នុងផែនការសន្តិភាព មិនឱ្យអ៊ុយក្រែនក្លាយជាសមាជិកអង្គការអូតង់ទេ។ តែអាចមានលទ្ធភាពត្រឹមចូលជាសមាជិកសហភាពអឺរ៉ុប។
Financial Times អះអាងថាលោកពូទីនបានទាមទារពីរចំណុចនេះ កាលពីដើមខែមេសា ក្នុងជំនួបជាមួយបេសកកជនអាមេរិក Steve Witkoff ដោយសន្យាបញ្ឈប់សកម្មភាពឈ្លានពាននិងបង្កកព្រំដែនរុស្ស៊ីត្រឹមខ្សែបន្ទាត់សមរភូមិបច្ចុប្បន្ន ជាថ្នូរ។ទាក់ទងនឹងការរក្សាសន្តិសុខវិញ បណ្តាញAxiosសរសេរថា សហរដ្ឋអាមេរិកស្នើធានាសុវត្ថិភាពឱ្យអ៊ុយក្រែន តាមរយៈការបង្កើតក្រុមការពារដ៏ធំរឹងមាំ បែបក្រុមAd Hoc ដែលមានការចូលរួមពី ប្រទេសអឺរ៉ុបនិងប្រទេសមិនមែនអឺរ៉ុប ប៉ុន្តែគ្មានការលម្អិតអំពីដំណើរការរបស់ក្រុមនេះទេ និងមិនដូចការទាមទាររបស់អ៊ុយក្រែន ដែលតម្រូវឱ្យមានទាហានអាមេរិកចូលការពារដែរ។
យោងតាមវ៉ាស៊ីនតោនប៉ុស្តិ៍ កិច្ចព្រមព្រៀងអាមេរិកមានចារអំពីគម្រោងដកទណ្ឌកម្មចេញពីរុស្ស៊ី នាពេលអនាគត។ ឯអ៊ុយក្រែននឹងទទួលបានសំណងជំងឺចិត្ត ព្រមទាំងជំនួយសម្រាប់ស្តារប្រទេសឡើងវិញ ដោយគ្មានបញ្ជាក់អំពីនរណាជាម្ចាស់ផ្តល់ហិរញ្ញប្បទានទេ។ កិច្ចព្រមព្រៀងធ្វើពាណិជ្ជកម្មរ៉ែអ៊ុយក្រែន ក៏មានចែងក្នុងផែនការសន្តិភាពដែរ។ នេះបើតាមបណ្តាញAxiosដដែល ដែលបញ្ជាក់ថា លោកប្រធានាធិបតីអ៊ុយក្រែន ហ្សេឡេនស្គី ប្រឆាំងនឹងគំនិតរបស់លោកត្រាំដែលចង់ទុកមជ្ឈមណ្ឌលនុយក្លេអ៊ែរZaporijjiaឱ្យនៅជារបស់រុស្ស៊ី តែស្ថិតក្រោមអធិការកិច្ចអាមេរិក។
ការផ្សព្វផ្សាយព័ត៌មានជុំវិញផែនការសន្តិភាពអាមេរិកនេះធ្លាក់មក ក្រោយពីអនុប្រធានាធិបតីអាមេរិក JD Vance បានគំរាមបែបដាក់ឱសានវាទថា សហរដ្ឋអាមេរិកបានរៀបចំផែនការសន្តិភាពដែលមានពន្យល់យ៉ាងលម្អិតពីអ្វីដែលរុស្ស៊ីនិងអ៊ុយក្រែនត្រូវធ្វើដើម្បីអាចសម្រេចកិច្ចព្រមព្រៀងសន្តិភាព។ ប្រទេសពាក់ព័ន្ធទាំងពីរត្រូវព្រមទទួលយកសំណើសន្តិភាព ដោយចាំបាច់ត្រូវហ៊ានធ្វើសម្បទាននិងដោះដូរទឹកដីគ្នា បើពុំនោះទេ គឺអាមេរិកជាអ្នកដកខ្លួនចេញ។ នេះជាពាក្យដែលចេញពីបបូរមាត់អនុប្រធានាធិបតីអាមេរិក នៅថ្ងៃពុធទី២៣មេសា ពីប្រទេសឥណ្ឌា។សូមរំលឹកថា អ៊ុយក្រែននិងសម្ព័ន្ធមិត្តអឺរ៉ុបធ្លាប់ទាមទារយកពុំចែកដែនដីដូចមុនឆ្នាំ២០១៤ តែរដ្ឋមន្ត្រីការពារជាតិអាមេរិក Pete Hegseth ថាជារឿងដែលមិនអាចត្រលប់បានវិញទេ៕
