នាយករដ្ឋមន្ត្រីគុយនិងកម្ពុជាធ្វើជាអធិបតីក្នុងពិធីចុះហត្ថលេខាបង្កើនកិច្ចសហប្រតិបត្តិការទ្វេភាគីបន្ថែមលើវិស័យកីឡា អប់រំ និងវប្បធម៌
11-February-2026 / ផ្សេងៗ
ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជានឹង លោក ម៉ានូអែល ម៉ារ៉េរ៉ូ គ្រុស នាយករដ្ឋមន្ត្រី នៃសាធារណរដ្ឋគុយបា បានធ្វើជាអធិបតីភាពក្នុងពិធីចុះហត្ថលេខាទៅលើកិច្ចព្រមព្រៀងបង្កើនកិច្ចសហប្រតិបត្តិការទ្វេភាគីបន្ថែមទៀតលើវិស័យកីឡា អប់រំ និងវប្បធម៌ នាល្ងាចថ្ងៃទី៤ ខែតុលា ឆ្នាំ២០២២ នៅវិមានសន្តិភាព។ក្នុងពិធីចុះហត្ថលេខា ទីមួយ ដោយលោកបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា នៃព្រះរាជាណាចក្រកម្ពុជា និងលោក Osvaldo Vento Montiller ប្រធានវិទ្យាស្ថានជាតិអប់រំកាយ និងកីឡា នៃសាធារណរដ្ឋគុយបា ចុះហត្ថលេខាលើកិច្ចព្រមព្រៀងសហប្រតិបត្តិការលើវិស័យវប្បធម៌ និងកីឡា។
ពិធីចុះហត្ថលេខាទីពីរ ដោយលោក Rodrigo Malmierca Díaz រដ្ឋមន្ត្រីក្រសួងពាណិជ្ជកម្ម និងវិនិយោគបរទេស នៃសាធារណរដ្ឋគុយបា និងលោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជា ចុះហត្ថលេខាលើកម្មវិធីកិច្ចសហប្រតិបត្តិការ និងការផ្លាស់ប្តូរវប្បធម៌រវាងក្រសួងវប្បធម៌ និងវិចិត្រសិល្បៈនៃព្រះរាជាណាចក្រកម្ពុជា និងក្រសួងវប្បធម៌នៃសាធារណរដ្ឋគុយបា សំរាប់រយៈពេលពីឆ្នាំ ២០២២-២០២៧។
លោក ម៉ានូអែល ម៉ារ៉េរ៉ូ គ្រុស នាយករដ្ឋមន្ត្រីគុយបា បានដឹកនាំគណៈប្រតិភូជាន់ខ្ពស់មកដល់ប្រទេសកម្ពុជា នៅម៉ោងជាង១៖៣០នាទីរសៀល ថ្ងៃទី០៤ ខែតុលា ឆ្នាំ២០២២នេះ ដើម្បីបំពេញទស្សនកិច្ចផ្លូវការរយៈពេល៣ថ្ងៃ ដើម្បីពង្រឹង និងពង្រីកទំនាក់ទំនង និងកិច្ចសហប្រតិបត្តិការទ្វេភាគីតបតាមការអញ្ជើញរបស់ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាពេលសម្តេចទៅធ្វើទស្សនកិច្ចនៅប្រទេសគុយបាកាលពីចុងខែកញ្ញាដែលក្នុងឱកាសនោះសម្តេចតេជោបានប្រកាសផ្តលជំនួយជាអង្ករដល់គុយបាជាច្រើនតោន។
លោក អ៊ាង សុផល្លែត ជំនួយការផ្ទាល់របស់ សម្តេចតេជោ ហ៊ុន សែន បានបញ្ជាក់ប្រាប់ក្រុមអ្នកសារព័ត៌មានថា ក្នុងជំនួបនេះ លោកនាយករដ្ឋមន្ត្រីគុយបា បានថ្លែងអំណរគុណចំពោះការទទួលបដិសណ្ឋាកិច្ចដ៏កក់ក្តៅរបស់កម្ពុជា ចំពោះទស្សនកិច្ចរបស់លោក។លោកថា លោកនាយករដ្ឋមន្ត្រីបានជម្រាបអំពីស្ថានភាពទូទៅ នៅប្រទេសគុយបា ដែលរួមមានគ្រប់គ្រងជំងឺកូវីដ១៩ និងសេដ្ឋកិច្ចនៅគុយបា ហើយលោកបានសម្តែងនូវឆន្ទៈ ក្នុងការពង្រឹង និងពង្រីកទំនាក់ទំនង និងកិច្ចសហប្រតិបត្តិការរវាងប្រទេសទាំងពីរឱ្យកាន់តែខ្លាំងឡើង ដោយឈរលើមូលដ្ឋានទំនាក់ទំនងដែលមានស្រាប់ ជំរុញការអនុវត្តនូវរាល់អនុស្សារណៈដែលបានចុះហត្ថលេខាហើយ ដែលក្នុងនោះមានវិស័យអប់រំ សុខាភិបាល វិស័យវប្បធម៌ និងវិស័យដទៃទៀត
សម្តេចបានឯកភាពទៅនឹងអ្វីដែលបានលើកឡើងដោយ នាយករដ្ឋមន្ត្រីគុយបា ហើយសម្តេចក៏វាយតម្លៃខ្ពស់ចំពោះ កិច្ចប្រឹងប្រែង និងជោគជ័យដែលគុយបា បានទទួល នោះគឺការផលិតវ៉ាក់សាំង។
លោក អ៊ាង សុផល្លែត បានបញ្ជាក់ថា «សម្តេចតេជោ បានស្នើសុំឱ្យគុយបា ពិនិត្យពិចារណាជំរុញកិច្ចសហប្រតិបត្តិការជាមួយកម្ពុជាយើងជាពិសេសលើវិស័យសុខាភិបាលនេះ និងវិស័យដទៃទៀត ដែលជារួមមានទាំងវិស័យកីឡា វិនិយោគ និងវិស័យព័ត៌មានជាដើម»។
សម្រាប់រយៈពេល៦២ឆ្នាំ នៃទំនាក់ទំនងរវាងកម្ពុជានិងគុយបា សម្តេចតេជោ ហ៊ុន សែនថា «ខ្ញ៉ំបានរួមចំណែកពង្រឹងពង្រីកទំនាក់ទំនងនេះអស់រយៈពេល៤៣ឆ្នាំ(១៩៧-២០២២)គឺស្មើនឹង២/៣ នៃការធ្វើដំណើរទាំងមូល»។សម្តេចក៏បានអរគុណប្រជាជនគុយបាដែលបានជួយដល់ប្រជាជនកម្ពុជា ក្នុងពេលដែលយើងជួបការលំបាកបំផុតក្រោយការដួលរលំរបបប្រល័យពូជសាសន៍ប៉ុល ពត។
