ស៊ុយអែតដែលសកម្មជួយខាងសិទ្ធមនុស្សនិងប្រជាធិបតេត្យប្រកាសបិទស្ថានទូតពីស្រុកខ្មែរក្រសួងការបរទេសប្រតិកម្ម!?
16-September-2024 / ផ្សេងៗ
ភ្នំពេញ៖បន្ទាប់ពីបានប្រកាសបើកឡើងវិញនៅឆ្នាំ២០១០ស្ថានទូតស៊ុយអែតប្រចាំទីក្រុងភ្នំពេញបានប្រកាសពីការបិទទ្វារជាស្ថាពរចាប់ពីថ្ងៃទី៣០ ខែកញ្ញា ឆ្នាំ២០២៤ នេះតទៅដោយទុកឲ្យ ស្ថានទូតស៊ុយអែតប្រចាំទីក្រុងបាងកកជាអ្នកបន្តតំណាងឲ្យប្រទេសស៊ុយអែតនៅកម្ពុជា។
ទំព័រហ្វេសប៊ុកស្ថានទូតស៊ុយអែតប្រចាំក្រុងភ្នំពេញបានឲ្យដឹងថា៖ចាប់តាំងពីថ្ងៃទី១៦ ខែសីហាមក ការគ្រប់គ្រងការគាំទ្រដល់កម្ពុជាដោយយោងទៅតាមយុទ្ធសាស្ត្រតំបន់សម្រាប់កិច្ចសហប្រតិបត្តិការអភិវឌ្ឍន៍ជាមួយអាស៊ី និងប៉ាស៊ីហ្វិកត្រូវបានផ្ទេរទៅឲ្យអង្គការសហប្រតិបត្តិការអន្តរជាតិអភិវឌ្ឍន៍ស៊ុយអែត(Sida) ក្នុងទីក្រុងស្តុកខុល។ទោះជាយ៉ាងណា ស្ថានកុងស៊ុលស៊ុយអែតប្រចាំទីក្រុងភ្នំពេញនឹងបន្តបើក និងផ្តល់សេវាការទូតមូលដ្ឋានសម្រាប់ពលរដ្ឋស៊ុយអែតនៅកម្ពុជាដដែល។ ស្ថានទូតស៊ុយអែតបញ្ជាក់ថាការបិទការិយាល័យតំណាងនេះក៏មានន័យស្មើនឹងបិទទំព័រហ្វេសប៊ុករបស់ខ្លួនដែរ។
កាលពីខែវិច្ឆិកា ឆ្នាំ២០២០ ស្ថានទូតស៊ុយអែតប្រចាំកម្ពុជាបានប្រកាសថា ស្ថានទូតខ្លួននឹងត្រូវបិទនៅដំណាច់ឆ្នាំ ២០២១។ តាមប្រទេសស៊ុយអែត ការផ្លាស់ប្តូរទាំងនេះជាផ្នែកមួយនៃការសម្របខ្លួនទៅតាមស្ថានភាពជាក់ស្តែងនៃអង្គការចាត់តាំងរបស់ខ្លួននៅឯបរទេស និងថា នេះជាដំណើរការផ្លាស់ប្តូរដោយទៀងទាត់មួយដែលពេលខ្លះ ស៊ុយអែតបើក ឬបិទស្ថានទូត និងស្ថានកុងស៊ុលរបស់ខ្លួនស្របតាមតម្រូវការជាក់ស្តែង។តែការដែលស្ថានទូតស៊ុយអែតពន្យារពេលបិទរហូតមកដល់ឆ្នាំ២០២៤នេះ ត្រូវបានគេមើលឃើញថា ទំនងជាពាក់ព័ន្ធទៅនឹងការបង្ហើយកិច្ចការសេសសល់មួយចំនួនដែលទើបបញ្ចប់ទាំងស្រុងនៅខែកញ្ញា ឆ្នាំ២០២៤នេះ។ សូមបញ្ជាក់ថា កន្លងមកការបិទស្ថានទូតស៊ុយអែតនៅកម្ពុជានេះធ្លាប់មានភាពចម្រូងចម្រាសមតិគ្នារវាងអ្នកវិភាគនានា និងមន្ត្រីរដ្ឋាភិបាលកម្ពុជាជុំវិញការភ្ជាប់ទៅនឹងការគោរពសិទ្ធិមនុស្ស និងលទ្ធិប្រជាធិបតេយ្យនៅកម្ពុជា។
ដោយសាររសើបករណីយ៍ខាងលើនេះ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ នៅថ្ងៃទី១៦ ខែកញ្ញា ឆ្នាំ២០២៤នេះ បានចេញសេចក្តីបំភ្លឺ ជុំវិញការបិទការិយាល័យស្ថានទូតស៊ុយអែត (Sweden Section Office) នៅរាជធានីភ្នំពេញ។អ្នកនាំពាក្យក្រសួងការបរទេសឲ្យដឹងថា កាលពីខែមីនា ឆ្នាំ២០២៤ ក្រសួងការបរទេសស៊ុយអែត បានជូនដំណឹង ក្រសួងការបរទេស និង សហប្រតិបត្តិការអន្តរជាតិកម្ពុជា អំពីការបិទការិយាល័យស្ថានទូតស៊ុយអែត (Sweden Section Office) នៅរាជធានីភ្នំពេញ ចាប់ពីថ្ងៃទី៣០ ខែកញ្ញា ឆ្នាំ២០២៤ និងបានបញ្ជាក់ថា រដ្ឋាភិបាលស៊ុយអែតបានសម្រេចដូចខាងលើ ក្រោមហេតុផលនៃការរៀបចំឡើងវិញ នូវចំណុចអាទិភាព (Reprioritizations) ដោយសារត្រូវផ្តល់អាទិភាពលើការអភិវឌ្ឍន៍ សេដ្ឋកិច្ច សន្តិភាព និងសន្តិសុខ នៅតំបន់ជិតខាងខ្លួន ដើម្បីឆ្លើយតបនឹងការប្រែប្រួលបរិបទពិភពលោក បន្ទាប់ពីការផ្ទុះសង្គ្រាមរុស្ស៊ី-អ៊ុយក្រែន។
ជាមួយគ្នានេះ អ្នកនាំពាក្យក្រសួងការបរទេស និងសហប្រតិបត្តិការ អន្តរជាតិ សូមប្រកាសទាត់ចោល នូវរាល់ការប៉ុនប៉ងធ្វើការបកស្រាយ ករណីការបិទការិយាល័យស្ថានទូតស៊ុយអែត (Sweden Section Office) នៅរាជធានីភ្នំពេញ សម្រាប់បម្រើឱ្យគោលដៅ នយោបាយ។គួររម្លឹកថា ប្រទេសស៊ុយអែតដែលជាប្រទេសមួយក្នុងសហគមន៍អឺរ៉ុបដែរមានទំនាក់ទំនងការទូតជាផ្លូវការជាមួយកម្ពុជានៅក្នុងឆ្នាំ១៩៦១ តែបានបិទនៅក្នុងសម័យខ្មែរក្រហម។ បន្ទាប់មកនៅក្នុងឆ្នាំ២០១០ ប្រទេសស៊ុយអែតបានបើកដំណើរការស្ថានទូតរបស់ខ្លួនឡើងវិញនៅក្នុងទីក្រុងភ្នំពេញដោរធ្វើសកម្មភាពជាច្រើនក្នុងកសាងនិងលើកកំពស់លិទ្ធិប្រជាធិនបតេយ្យនៅកម្ពុជា៕
