វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1705 នាក់
ម្សិលមិញ 6501 នាក់
សរុប 13950260 នាក់
វៀតណាម៖ នៅថ្ងៃអង្គារ៍ទី២៧កញ្ញា វៀតណាមបានអំពាវនាវឱ្យប្រជាជនបន្ថែមទៀត ជម្លៀសខ្លួនទៅកាន់ទីសុវត្ថិភាព ស្របពេលដែលព្យុះទីហ្វុង ណូរូ (Noru) កំពុងតែកើនឡើងកម្លាំង ហើយសំដៅមកប្រទេសអាស៉ីអាគ្នេយ៍មួយនេះ បន្ទាប់ពីវាបានសម្លាប់មនុស្ស យ៉ាងហោច៨នាក់ និងបង្កការជន់លិចពាសពេញ ប្រទេសហ្វីលីពីន។ នេះបើតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃអង្គារ ទី២៧ ខែកញ្ញា ឆ្នាំ២០២២។
ទីភ្នាក់ងារឧតុនិយមវៀតណាម បានឱ្យដឹងថា នៅត្រឹមព្រឹកថ្ងៃអង្គារនេះ កម្លាំងខ្យល់របស់ព្យុះ Noru បានឈានដល់ល្បឿនចន្លោះខ្ទង់ ១៣៤-១៤៩គីឡូម៉ែត្រក្នុងមួយម៉ោង ហើយនៅវេលាយប់ថ្ងៃដដែល ល្បឿនខ្យល់អាចនឹងកើនដល់ ១៨០គីឡូម៉ែត្រក្នុងមួយម៉ោង។ បើយោងតាមការព្យាករ ព្យុះ Noru នឹងបោកបក់មកដល់វៀតណាម នៅក្នុងថ្ងៃពុធសប្តាហ៍នេះ មុនពេលវាថយចុះឥទ្ធិពលទៅវិញ រួចបន្តឆ្ពោះទៅរកប្រទេសថៃ។
ចាប់ពីថ្ងៃអង្គារនេះ អាជ្ញាធរអាកាសចរណ៍វៀតណាម បានសម្រេចបិទអាកាសយានដ្ឋានចំនួន៩ នៅទូទាំងប្រទេស ជាហេតុនាំឱ្យ ជើងហោះហើរក្នុងស្រុកនិងក្រៅស្រុករាប់រយជើង ត្រូវបានលុបចោល។ កងទ័ពវៀតណាមប្រមាណ២៧០,០០០នាក់ ក៏ត្រូវបានដាក់ឱ្យនៅប្រុងជើងការ សម្រាប់ប្រតិបត្តិការជួយសង្គ្រោះផងដែរ។ បើតាមទីភ្នាក់ងារឧតុនិយមវៀតណាម តំបន់ដែលនឹងរងការវាយប្រហារខ្លាំង គឺខេត្តនៅភាគកណ្តាលប្រទេស រួមមានក្វាងងៃ (Quang Ngai) ហើយនិងខេត្តក្វាងណាំ (Quang Nam) ជាទីដែលមនុស្សជាង ១៣៣,០០០នាក់ ត្រូវបានជម្លៀសខ្លួន។
សូមបញ្ជាក់ដែរថា៖ទីភ្នាក់ងារព័ត៌មាន Reutersបានដកស្រង់សម្តីលោក Daniel Fernando អភិបាលខេត្ត Bulacan នៃប្រទេសហ្វីលីពីនដែលបាននិយាយថាយ៉ាងហោចណាស់មានអ្នកជួយសង្គ្រោះចំនួន៥នាក់នៅក្នុងស្រុកនេះត្រូវបានសម្លាប់ដោយព្យុះNoru។Bulacanគឺជាតំបន់មួយក្នុងចំណោមតំបន់ដែលរងគ្រោះខ្លាំងបំផុតដោយព្យុះនេះ នៅកន្លែងជាច្រើនទឹកមានជម្រៅដល់ចង្កេះ ខណៈដែលមនុស្សមួយចំនួនត្រូវឡើងទៅលើដំបូលដើម្បីជៀសវាងទឹកជំនន់។នៅក្នុងខេត្ត Quezon អភិបាលខេត្ត Helan Tan បាននិយាយថា “ផ្ទះជាច្រើនបានរងការខូចខាត ។
ប៉ុន្តែផ្លូវនៅតែអាចដើរបានហើយមិនមានការរអិលបាក់ដីទេ។អាជ្ញាធរមូលដ្ឋានបានចាប់ផ្តើមការងារសម្អាតនិងជួសជុលក្រោយលទ្ធផលព្យុះ។ព្យុះNoru បានបោកបក់នៅរដ្ឋធានីម៉ានីល និងខេត្តភាគខាងជើងនៃប្រទេសហ្វីលីពីនកាលពីចុងសប្តាហ៍។ នៅពេលដែលវាបានបោកបក់មក ព្យុះNoru បានចុះខ្សោយ។ ប៉ុន្តែខ្យល់នៅតែរក្សាល្បឿន១៧៥គីឡូម៉ែត្រក្នុងមួយម៉ោង និងខ្យល់ខ្លាំងរហូតដល់២៩០គីឡូម៉ែត្រក្នុងមួយម៉ោង។ប្រធានាធិបតីហ្វីលីពីនលោក Ferdinand Marcos បានបញ្ជាឱ្យបិទទីភ្នាក់ងាររដ្ឋាភិបាល សាលារៀន ផ្សារហ៊ុន។ លោកMarcosបាននិយាយនៅក្នុងសន្និសីទសារព័ត៌មានមួយកាលពីថ្ងៃទី២៦ខែកញ្ញាដោយសំដៅទៅលើមនុស្ស៧៤,០០០នាក់ដែលត្រូវជម្លៀសទៅកាន់កន្លែងនានាមុនពេលព្យុះ”យើងអាចសម្រាកបានលុះត្រាតែអ្នកជម្លៀសភាគច្រើនត្រឡប់ទៅផ្ទះវិញ” ។
នាយកដ្ឋានឧតុនិយមហ្វីលីពីនបានព្រមានថា ភ្លៀងធ្លាក់ខ្លាំងអាចបណ្តាលឱ្យមានទឹកជំនន់ធ្ងន់ធ្ងរនៅក្នុងតំបន់ដែលរងផលប៉ះពាល់ បណ្តាលឱ្យមានការបាក់ដីនិងការខូចខាតដល់ដំណាំ។ ទោះជាយ៉ាងណាមកដល់ព្រឹកនេះមិនមានសញ្ញានៃខ្យល់ព្យុះដែលបង្កឱ្យមានការខូចខាតទ្រង់ទ្រាយធំនោះទេ។ជារៀងរាល់ឆ្នាំ ហ្វីលីពីនជួបព្យុះកំណាចប្រហែល២០ជាមធ្យម។ ក្នុងឆ្នាំ២០១៣ព្យុះHaiyan ដែលជាព្យុះស៊ីក្លូនដ៏ខ្លាំងបំផុតមិនធ្លាប់មានដែលបានកត់ត្រាបានសម្លាប់មនុស្ស៦,៣០០នៅទីនេះ៕Reuters