វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 67 នាក់
ម្សិលមិញ 3717 នាក់
សរុប 14148400 នាក់
ប្រទេសអ៊ុយក្រែន ៖អ៊ុយក្រែនបានច្រានចោលព័ត៌មានថា ប្រទេសនេះបានព្រមព្រៀងលើបទឈប់បាញ់គ្នាជាមួយរុស្ស៊ី។ ប្រធានាធិបតីអ៊ុយក្រែនកាលពីថ្ងៃទី ២១ខែឧសភា បានបញ្ជាក់ពីគោលជំហរ ថា នឹងមិនទទួលយកការបន្ធូរបន្ថយណាមួយប៉ះពាល់ដល់ផលប្រយោជន៍ប្រទេសជាតិនោះឡើយ។
ទីភ្នាក់ងារសារព័ត៌មាន Reuters នៅថ្ងៃអាទិត្យទី២២ ខែឧសភា ឆ្នាំ២០២២នេះ បានផ្សាយថា អ៊ុយក្រែនបានច្រានចោលបទឈប់បាញ់ ឬការផ្ដល់សម្បទានណាមួយដល់ទីក្រុងមូស្គូ ខណៈដែលទាហានរុស្ស៉ីកំពុងបង្កើនការវាយលុកនៅក្នុងតំបន់ ដុនបាស់ ស្ថិតនៅភាគខាងកើតនៃប្រទេស និងបញ្ឈប់ការផ្គត់ផ្គង់ឧស្ម័នដល់ហ្វាំងឡង់ ក្រោយបដិសេធបង់ថ្លៃទិញឧស្ម័នជាប្រាក់រូប្លិ៍។ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គីក្នុងសុន្ទរកថាមួយកាលពីថ្ងៃសៅរ៍ចុងសប្ដាហ៍នេះ, បានទទួលស្គាល់ថា ស្ថានភាពនៅក្នុងតំបន់ដុនបាស់ គឺពិតជាលំបាកជាទីបំផុត ដោយទាហានរុស្ស៉ីកំពុងវាយប្រហារលើទីតាំងជាច្រើនកន្លែងនៅក្នុងទីក្រុងSloviansk និងទីក្រុង Sievierodonetsk។ ប៉ុន្តែ បើតាមលោកហ្សេលេនស្គី ទាហានអ៊ុយក្រែនក៏កំពុងវាយទប់ទល់យ៉ាងខ្លាំងក្លាចំពោះការវាយប្រហារពីសំណាក់ទាហានរុស្ស៉ីផងដែរ។ទីប្រឹក្សារបស់លោក ហ្សេលេនស្គី គឺលោក មីខៃឡូ ប៉ូដូលីយ៉ាក់ (Mykhailo Podolyak) ក៏បានអះអាងនៅក្នុងកិច្ចសម្ភាសន៍ជាមួយទីភ្នាក់ងារសារព័ត៌មាន Reuters ថា អ៊ុយក្រែននឹងមិនទទួលយកបទឈប់បាញ់ឬកិច្ចព្រមព្រៀងណាមួយជាមួយរុស្ស៉ី ដែលមានជាប់ពាក់ព័ន្ធនឹងការបោះបង់ចោល ឬធ្វើសម្បទានទឹកដីនោះទេ។
រុស្ស៉ីបានប្រកាសជ័យជម្នះទាំងស្រុងហើយលើរោងចក្រដែកថែប អាហ្សូវស្តាល់ (Azovstal) នៅក្នុងទីក្រុង ម៉ារីយូប៉ូល (Mariupol) បន្ទាប់ពីក្រុមចុងក្រោយនៃអ្នកប្រយុទ្ធរបស់អ៊ុយក្រែន បានទម្លាក់អាវុធចុះចាញ់។ ក្រសួងការពារជាតិរុស្ស៉ី បានឱ្យដឹងថា ទីក្រុង Mariupol ហើយនិងរោងចក្រដែកថែប Azovstal ត្រូវ «រំដោះបានទាំងស្រុង» បន្ទាប់ពី ក្រុមអ្នកប្រយុទ្ធអ៊ុយក្រែនចំនួន ៥៣១នាក់ចុងក្រោយបានទម្លាក់អាវុធចុះចាញ់ កាលពីថ្ងៃសុក្រសប្តាហ៍នេះ។ ក្រោយការក្តោបក្តាប់បានទីក្រុងម៉ារីយូប៉ូល ទាហានរុស្ស៊ីកំពុងបន្តបង្កើនការវាយប្រហារលើផ្ទាំងស៊ីបផ្សេងទៀត ពិសេសនៅតំបន់ដុនបាស់ស្ថិតប៉ែកខាងកើតអ៊ុយក្រែន។
សូមបញ្ជាក់ថា៖បន្ទាប់ពីកិច្ចចរចារវាងរុស្ស៊ី និងអ៊ុយក្រែនក្រោមការរៀបចំរបស់ប្រទេសតួកគីជាប់គាំង ប្រទេសអ៊ីតាលីបានស្នើទៅកាន់អង្គការសហប្រជាជាតិនូវផែនការសន្តិភាពមួយដើម្បីបញ្ចប់វិបត្តិនៅអ៊ុយក្រែន។ ផែនការសន្តិភាពនេះត្រូវបានប្រមុខការទូតអ៊ីតាលីលោក ល្វីយី ឌីម៉ាយ៉ូប្រាប់នៅក្នុងកិច្ចប្រជុំថ្នាក់រដ្ឋមន្ត្រីការបរទេសនៃក្រុមប្រឹក្សាអឺរ៉ុបនាថ្ងៃសុក្រ ទី២០ ឧសភា។ តាមលោក ល្វីយី ឌីម៉ាយ៉ូ សំណើផែនការសន្តិភាពនេះត្រូវបានលោកនិយាយជាមួយអគ្គលេខាធិការអង្គការសហប្រជាជាតិលោកអង់តូនីញ៉ូ ហ្គូទែរស៍កាលពី ២ថ្ងៃមុន។ ផែនការសន្តិភាពនេះ ប្រមុខការទូតអ៊ីតាលីចង់បង្កើត « ក្រុមសម្របសម្រួលអន្តរជាតិ » ដែលចូលរួមដោយអង្គការអន្តរជាតិ ដូចជាអង្គការសហប្រជាជាតិ សហភាពអឺរ៉ុប និងអង្គការដើម្បីសន្តិសុខ និងកិច្ចសហប្រតិបត្តិការអឺរ៉ុប។
លោក ល្វីយី ឌីម៉ាយ៉ូបានពន្យល់ថា « ក្រុមសម្របសម្រួលអន្តរជាតិ » នឹងធ្វើការងារមួយជំហានម្តងៗដោយចាប់ផ្តើមពីបទឈប់បាញ់តាមតំបន់ ការជម្លៀសជនស៊ីវិល លទ្ធភាពនៃការបើកច្រកផ្លូវមនុស្សធម៌ដោយមានការធានាសន្តិសុខ ឈានទៅរកបទឈប់បាញ់ទូទៅ និងឈានទៅរកសន្តិភាពយូរអង្វែងជាមួយនឹងការមានកិច្ចព្រមព្រៀងសន្តិភាពពិតប្រាកដ។ មានចំណុចសំខាន់ចំនួន ៤ នៅក្នុងសំណើរបស់អ៊ីតាលី ទី១ បទឈប់បាញ់ និងការគ្មានកងទ័ពទល់មុខគ្នានៅតាមព្រំដែនអ៊ុយក្រែន រុស្ស៊ី ទី២ អព្យាក្រឹតភាពរបស់អ៊ុយក្រែន និងបញ្ចូលអ៊ុយក្រែនជាសមាជិកអឺរ៉ុប តែមិនឲ្យចូលអូតង់ ទី៣ កិច្ចព្រមព្រៀងទ្វេភាគីរុស្ស៊ី អ៊ុយក្រែនទាក់ទងនឹងតំបន់គ្រីមេ និងតំបន់ដុនបាស់ និងទី៤ កិច្ចព្រមព្រៀងពហុភាគីស្តីពីសន្តិភាព និងសន្តិសុខនៅអឺរ៉ុប។
សម្រាប់លោកប្រធានាធិបតីអ៊ុយក្រែន Volodymyr Zelensky វិញកាលពីថ្ងៃសៅរ៍ទី២១ឧសភាបានប៉ាន់ប្រមាណថា កងកម្លាំងប្រដាប់អាវុធជាតិរបស់ខ្លួន មានចំនួន៧០ម៉ឺន( ៧០០,០០០) ឯណោះ។លោក Zelenskyy បានប្រាប់ប៉ុស្តិ៍ទូរទស្សន៍ Ukraina 24 ថា “យើងមានមនុស្ស ៧០០,០០០ នាក់នៅថ្ងៃនេះ ហើយអ្នកអាចមើលឃើញលទ្ធផល នៃកិច្ចខិតខំប្រឹងប្រែង ដែលធ្វើឡើងដោយ ៧០០,០០០ ដែលកំពុងប្រយុទ្ធ” ។លោកប្រធាំនាធិបតីអ៊ុយក្រែនបាននិយាយថា អ៊ុយក្រែនមានបុគ្គលិកយោធាតិចជាង ៣០០,០០០នាក់ រួមទាំងទាហានត្រៀមប្រយុទ្ធចំនួន ១២០,០០០ នាក់ មុនពេលរុស្ស៊ីចាប់ផ្ដើមប្រតិបត្តិការយោធានៅក្នុងខែកុម្ភៈ។ លោកក៏បានចុះហត្ថលេខាលើក្រឹត្យមួយនៅដើមឆ្នាំ ២០២២ ដើម្បីបង្កើនចំនួនរបស់ពួកគេ យ៉ាងហោចណាស់ ១០០,០០០ នាក់បន្ថែម។
ទន្តឹមនិងការតម្លើងសម្លេងនេះពីប្រធានាធិបតីអ៊ុយក្រែនដែរពីប្រទេសកូរ៉េខាងត្បូងប្រធានាធិបតីអាមេរិក លោក Joe Biden កាលពីថ្ងៃសៅរ៍ទី២១ឧសភាបានចុះហត្ថលេខាលើច្បាប់មួយ ដើម្បីផ្តល់ជំនួយបន្ថែមចំនួន ៤០ ពាន់លានដុល្លារ សម្រាប់អ៊ុយក្រែន ខណៈដែលការឈ្លានពានរបស់រុស្ស៊ីនៅតែបន្ត។កញ្ចប់ជំនួយសម្រាប់អ៊ុយក្រែនរួមមានការផ្ដល់អាវុធ និងជំនួយសេដ្ឋកិច្ច ព្រមទាំងជំនួយមនុស្សធម៌ផងដែរ។ យ៉ាងណាមិញ ច្បាប់នេះត្រូវបានអនុម័តដោយព្រឹទ្ធសភាកាលពីថ្ងៃព្រហស្បតិ៍ បន្ទាប់ពីការចាកចេញរបស់លោក Biden ពីកូរ៉េខាងត្បូង។កាសែត The New York Times និយាយថា វិធានការនេះ រួមជាមួយនឹងជំនួយចំនួន ១៣.៦ ពាន់លានដុល្លារក្នុងខែមីនា ស្មើនឹងកញ្ចប់ជំនួយបរទេសដ៏ធំបំផុត ដែលអនុម័តដោយសភា ក្នុងរយៈពេលយ៉ាងហោចណាស់ពីរទសវត្សរ៍។