សម្តេចតេជោហ៊ុនសែនផ្តល់កាដូលើកទឹកចិត្តប្រជាពលរដ្ឋដែលទៅរស់នៅភូមិរុនតាឯក
សៀមរាប៖ នៅព្រឹកថ្ងៃទី១៣ ខែកញ្ញា ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា បានអញ្ជើញជួបសំណេះសំណាលជាមួយប្រជាពលរដ្ឋ ដែលបានស្ម័គ្រចិត្តរើលំនៅឋាន និងសំណង់ផ្សេងៗចេញពីតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរាទៅនៅភូមិរុនតាឯក ស្ថិតក្នុងស្រុកបន្ទាយស្រីខេត្តសៀមរាបដែលជាទីតាំងដែលរាជរដ្ឋាភិបាលផ្តល់ដីជូនពលរដ្ឋជាថ្នូរ ។ សម្តេចតេជោ ហ៊ុន សែន អរគុណប្រជាពលរដ្ឋ ដែលព្រមរុះរើសំណង់ចេញពីតំបន់រមណីយដ្ឋានអង្គរ និងអរគុណលោកឧបនាយករដ្ឋមន្ត្រី ជា សុផារ៉ា សម្រាប់ការដឹកនាំការងាររុះរើសំណង់។
សម្តេចតេជោ ហ៊ុន សែន បានបញ្ជាក់ថា ការងាររៀបចំសណ្តាប់ធ្នាប់នៅអង្គរ មិនអាចអង្គុយបក់ផ្សែងទៀតទេ ដែលអាចនាំឱ្យបាត់បង់ប្រយោជន៍ធំសម្រាប់ជាតិ និងប្រជាជន។ តើសម្តេចឈឺក្បាលធ្វើអ្វីក្នុងការរៀបចំសណ្តាប់ធ្នាប់នៅតំបន់រមណីយដ្ឋាន បើមិនមានភាពចាំបាច់ទេនោះ?។សម្តេចតេជោ ហ៊ុន សែន បានរំលឹកថា ព្រះបរមរតនកោដ្ឋ បានផ្តួចផ្តើមព្រះបញ្ញាញាណដោយផ្ទាល់ក្នុងការស្នើដាក់តំបន់រមណីយដ្ឋានអង្គរក្នុងបញ្ជីសម្បត្តិបេតិកភណ្ឌពិភពលោក ហើយសម្តេចបានបង្ហាញការគាំទ្រទាំងស្រុង។
សម្តេចតេជោ ហ៊ុន សែន បានរំលឹកថា នៅពេលនោះ លោក សឺន សាន បានឆ្លៀតឱកាសកេងចំណេញនយោបាយសឹក ដោយស្នើឱ្យដកកងទ័ពទាំងអស់ចេញពីតំបន់អង្គរ។ ប៉ុន្តែសម្តេចបានចង្អុលមុខ និងបដិសេធភ្លាមចំពោះគំនិតរបស់លោក សឺន សាន។សម្តេចតេជោ ហ៊ុន សែន បានថ្លែងថា ខេត្តសៀមរាប បញ្ចប់ការការវាយគ្នានៅឆ្នាំ១៩៩៣។ សម្តេចតេជោ ហ៊ុន សែន បានថ្លែងថា តំបន់រមណីយដ្ឋានអង្គរពេលដាក់ចូលបញ្ជីសម្បត្តិបេតិកភណ្ឌពិភពលោកនៅឆ្នាំ១៩៩២ហើយនោះ ត្រូវតែអនុវត្តន៍តាមលក្ខន្តិកៈទាំងឡាយកំណត់ដោយអង្គការយូណេស្កូ។សម្តេចតេជោ ហ៊ុន សែន បានថ្លែងថា មានសម្បត្តិបេតកិភណ្ឌពិភពលោកច្រើនណាស់ រួមទាំងនៅប្រទេសអាល្លឺម៉ង់ផង ត្រូវបានដកចេញពីបញ្ជីសម្បត្តិបេតិកភណ្ឌពិភពលោក ព្រោះតែបាត់បង់លក្ខណៈសម្បត្តិកំណត់ដោយអង្គការយូណេស្កូ។
សម្តេចតេជោ ហ៊ុន សែន ណែនាំឱ្យត្រៀមដីជាគោលនយោបាយ ដើម្បីចែកឱ្យកូនៗពលរដ្ឋព្រមរើសំណង់ចេញពីតំបន់រមណីយដ្ឋានអង្គរ នៅពេលបែកគ្រួសារ។ សម្តេចតេជោ ហ៊ុន សែន បានថ្លែងថា សម្រាប់ប្រជាពលរដ្ឋ បានប្រែពីមានលំនៅឋានមិនស្របច្បាប់ មកជាមានលំនៅឋានស្របច្បាប់។សម្តេចតេជោហ៊ុនសែនណែនាំឱ្យកងទ័ពឱ្យជួយដឹកជញ្ជូនសម្ភារៈប្រជាពលរដ្ឋរុះរើពីតំបន់រមណីយដ្ឋានអង្គរ មកកាន់ភូមិធម្មជាតិរុនតាឯក។
សម្រាប់ការរើរុះនេះដែរ សម្តេចតេជោ ហ៊ុន សែន ឧបត្ថម្ភដល់ប្រជាពលរដ្ឋព្រមរុះរើសំណង់ទាំង ១,១១៧គ្រួ រួមមានអង្ករ ៥០គីឡូក្រាម មី ៦កេសតូច ត្រីខ ១កេសធំ ថវិកា ២០ម៉ឺនរៀល និងឧបត្ថម្ភថវិកាសម្រាប់ការរុះរើផ្ទះ ១លានរៀល។ សម្តេចតេជោ ហ៊ុន សែន ប្រកាសឧបត្ថម្ភស័ង្កសីជូនពលរដ្ឋមួយគ្រួសារ ៣០សន្លឹក។សម្តេចតេជោ ហ៊ុន សែន ប្រកាសផ្តល់បណ្ណក្រីក្រ និងស្ត្រីមានផ្ទៃពោះ ជូនដល់ពលរដ្ឋទាំងអស់ ដែលយល់ព្រមផ្លាស់ប្តូរលំនៅពីតំបន់រមណីយដ្ឋានអង្គរ មកកាន់ភូមិធម្មជាតិរុនតាឯក។ សម្តេចតេជោ ហ៊ុន សែន ណែនាំឱ្យរដ្ឋមន្ត្រីសង្គមកិច្ច ចាត់ចែងរៀបចំបណ្ណក្រីក្រ និងបណ្ណស្ត្រីមានផ្ទៃពោះ ជូនពលរដ្ឋទាំងអស់ ដែលយល់ព្រមផ្លាស់ប្តូរលំនៅពីតំបន់រមណីយដ្ឋានអង្គរ មកកាន់ភូមិធម្មជាតិរុនតាឯក។
សម្តេចតេជោ ហ៊ុន សែន ប្រកាសផ្តល់សុពលភាព ១០ឆ្នាំ សម្រាប់បណ្ណក្រីក្រ និងបណ្ណស្ត្រីមានផ្ទៃពោះ សម្រាប់ពលរដ្ឋយល់ព្រមផ្លាស់ប្តូរលំនៅពីតំបន់រមណីយដ្ឋានអង្គរ មកកាន់ភូមិធម្មជាតិរុនតាឯក។សម្តេចតេជោ ហ៊ុន សែន សម្រេចផ្តល់ថវិកា ២០ម៉ឺនរៀលក្នុងមួយគ្រួសារ សម្រាប់សាងសង់បង្គន់អនាម័យតាមផ្ទះរបស់ប្រជាពលរដ្ឋ។
សម្តេចតេជោ ហ៊ុន សែន ណែនាំឱ្យចាក់កៅស៊ូផ្លូវចូលមកកាន់ភូមិធម្មជាតិរុនតាឯក។ សម្តេចតេជោ ហ៊ុន សែន ណែនាំឱ្យសាងសង់ហេដ្ឋារចនាសម្ព័ន្ធផ្លូវក្នុងភូមិធម្មជាតិរុនតាឯក ដែលមានប្រវែងសរុប ១៤០គីឡូម៉ែត្រ។ បច្ចុប្បន្នសាងសង់បាន ១៨គីឡូម៉ែត្រហើយ។សម្តេចតេជោ ហ៊ុន សែន ណែនាំឱ្យលោកទេសរដ្ឋមន្ត្រី ចម ប្រសិទ្ធ តប្រព័ន្ធទឹកស្អាតជូនពលរដ្ឋភូមិធម្មជាតិរុនតាឯក ចំណាយប្រមាណ ៣លានដុល្លារអាមេរិក។ សម្តេចតេជោ ហ៊ុន សែន ណែនាំឱ្យអគ្គិសនីកម្ពុជារៀបចំតបណ្តាញអគ្គិសនីចូលភូមិធម្មជាតិរុនតាឯក។
សម្តេចតេជោហ៊ុនសែនណែនាំឱ្យអគ្គិសនីកម្ពុជារៀបចំតបណ្តាញអគ្គិសនីចូលភូមិធម្មជាតិរុនតាឯក។ សម្តេចតេជោ ហ៊ុន សែន ណែនាំឱ្យបង្កើតសាលារៀនពីកម្រិតបឋម ដល់វិទ្យាល័យ នៅភូមិធម្មជាតិរុនតាឯក។សម្តេចតេជោ ហ៊ុន សែន សម្រេចផ្តល់អគារសម្រាប់គ្រូស្នាក់នៅ ១ខ្នង ២ជាន់ ២០បន្ទប់ នៅភូមិធម្មជាតិរុនតាឯក។សម្តេចតេជោ ហ៊ុន សែន ណែនាំឱ្យសាងសង់ផ្សារនៅភូមិធម្មជាតិរុនតាឯក។សម្តេចតេជោ ស្នើដល់គ្រឹះស្ថានមីក្រូហិរញ្ញវត្ថុ ផ្តល់ប្រាក់កម្ចីជាមួយអត្រាការប្រាក់ទាបជូនពលរដ្ឋរស់នៅភូមិធម្មជាតិរុនតាឯក។
សម្តេចតេជោ ហ៊ុន សែន ស្នើដល់បក្សនយោបាយកុំប្រើរឿងដោះស្រាយបញ្ហានៅតំបន់រមណីយដ្ឋានអង្គរ ដើម្បីកេងចំណេញផ្នែកនយោបាយ ព្រោះជាតម្រូវការរបស់ជាតិ។ សម្តេចថ្លែងថា ការចាត់ចែងរបស់សម្តេចនាពេលនេះ គឺជាការដោះស្រាយបញ្ហារបស់ជាតិ មិនមែនដើម្បីនយោបាយនោះឡើយ។សម្តេចតេជោ ហ៊ុន សែន បានថ្លែងថា ពលរដ្ឋយល់ច្បាស់ហើយរឿងសម្តេចហាមប្រារព្ធពិធីបុណ្យចូលឆ្នាំ និងបុណ្យភ្ជុំបិណ្ឌពេលកូវីដ១៩រីករាតត្បាត គឺដើម្បីការពារអាយុជីវិត។ គ្មានសិទ្ធិណា ធំជាងសិទ្ធិរស់រានមានជីវិតនោះឡើយ។សម្តេចតេជោ ហ៊ុន សែន ប្រកាសថា សម្តេចមិនធ្វើឱ្យប្រជាពលរដ្ឋបោះឆ្នោតជូនសម្តេច និងគណបក្សប្រជាជនកម្ពុជា ខកចិត្តនោះឡើយ។ សម្តេចមិនធ្វើឱ្យព្រះមហាក្សត្រខកព្រះទ័យ ក្នុងការចាត់តាំងសម្តេចធ្វើជានាយករដ្ឋមន្ត្រីនោះឡើយ។ សម្តេច នឹងប្រឹងប្រែងរក្សាការពារឱ្យបាននូវសុខសន្តិភាព។
សូមបញ្ជាក់ថារាជរដ្ឋាភិបាលកម្ពុជា កាលពីខែសីហា កន្លងទៅនេះ តាមរយៈគណៈកម្មការអន្តរក្រសួងមួយ ដឹកនាំដោយឯកឧត្តមឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានបើកយុទ្ធនាការទ្រង់ទ្រាយធំក្នុងការវាស់វែង កំណត់និយាមកាក្បាលដី និងរមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា ក៏ដូចជារុះរើសំណង់ខុសច្បាប់ចេញពីតំបន់ទាំងនេះ។
ការបើកយុទ្ធនាការនេះ បានធ្វើឡើងបន្ទាប់ពីប្រាសាទក្នុងតំបន់រមណីយអង្គរ បានរងការព្រមានពីអង្គការយូណេស្កូ ក្នុងការដកប្រាសាទតំបន់រមណីយដ្ឋានអង្គរចេញពីបញ្ជីសម្បត្តិបេតិកភណ្ឌពិភពលោក ព្រោះតែសំណង់ជាច្រើនត្រូវបានសង់ឡើងនៅតំបន់រមណីយដ្ឋានអង្គរផ្ទុយពីលក្ខខណ្ឌកំណត់ដោយអង្គការយូណេស្កូ ក្រោយពេលដាក់បញ្ចូលក្នុងបញ្ជីសម្បត្តិបេតិកភណ្ឌពិភពលោកនាថ្ងៃទី១៤ ខែធ្នូឆ្នាំ១៩៩២។
គិតចាប់ពីថ្ងៃទី១៨ ខែសីហា ដល់ថ្ងៃទី១០ ខែកញ្ញា បានបញ្ចប់ការវាស់វែងក្បាលដី និងស្រង់ព័ត៌មានអ្នកកាន់កាប់ដីនៅភូមិគោលដៅទាំង ១១៤ភូមិ ក្នុងឃុំចំនួន១៧ សង្កាត់ចំនួន៧ ក្រុងចំនួន១ និងស្រុកចំនួន៤ ដោយវាស់វែងក្បាលដីបានសរុប ៩៣,៣៥១ក្បាលដី ទំហំ ១០,៩៤៥ហិកតា។ ក្នុងនោះ ក្បាលដីមានសំណង់ចំនួន ៣៩,០៤០ក្បាលដី, ក្បាលដីគ្មានសំណង់ចំនួន ៤៧,៣៤០ក្បាលដី និងក្បាលដីជាំដីស្រែចម្ការចំនួន ៦,៩៩១ក្បាលដី៕
