អ៊ុយក្រែនដាច់អគ្គិសនីទ្រង់ទ្រាយធំនៅតំបន់ភាគខាងកើតដោយសារទាហ៊ានរុស្ស៊ីផ្លោងដាក់បន្ទាប់ពីដកថយ
21-September-2026 / ព័ត៌មានអន្តរជាតិ
អ៊ុយក្រែន៖តំបន់ភាគខាងកើតអ៊ុយក្រែន បានដាច់អគ្គិសនីទ្រង់ទ្រាយធំ ក្រោយពីអាជ្ញាធរទីក្រុងកៀវប្រកាសថា កម្លាំងទហានរុស្ស៊ីបានដកថយ។សារព័ត៌មាន Al Jazeera បានផ្សាយថា ប្រធានាធិបតីអ៊ុយក្រែន លោក Zelenskyy បានចោទប្រកាន់ទីក្រុងមូស្គូមានចេតនាវាយប្រហារទៅលើហេដ្ឋារចនាសម្ព័ន្ធ ទើបបណ្តាលឱ្យមានការដាច់ភ្លើងទ្រង់ទ្រាយធំ ។ ក្រៅពីដាច់ប្រព័ន្ធអគ្គិសនី តំបន់ភាគខាងកើតក៏ត្រូវដាច់ទឹកផងដែរនៅយប់ថ្ងៃទី១១ខែកញ្ញា។ ការដាច់ទឹក ភ្លើងធ្វើឱ្យប៉ះពាល់ដល់ពលរដ្ឋប្រមាណ៩លាននាក់ដែលរស់នៅក្នុងតំបន់ភាគខាងកើត រួមទាំងតំបន់ដែលរុស្ស៊ីគ្រប់គ្រងផងដែរ។តាមការផ្សាយរបស់សារព័ត៌មាន Al Jazeera ការដាច់អគ្គិសនីកើតឡើងនៅ៥តំបន់ផ្សេងគ្នា ភាគខាងជើង និងភាគខាងកើតប្រទេសអ៊ុយក្រែន ។ការវាយប្រហារដោយគ្រាប់ផ្លោងរបស់ទាហានរុស្ស៊ីមកលើស្ថានីយរថភ្លើងរបស់ទីក្រុង Kharkiv កាលពីថ្ងៃអាទិត្យម្សិលមិញ បានបង្កឱ្យមានការឆាបឆេះយ៉ាងសន្ធោសន្ធៅ និងធើ្វឱ្យពលរដ្ឋក្នុងទីក្រុងដ៏ធំទី ២ របស់អ៊ុយក្រែនរួមនិងតំបន់ជិតខាងមួយចំនួនទៀតដូចជា Zaporizhzhia, Dnipropetrovsk ហើយនិង Sumy មិនមានអគ្គិសនីប្រើប្រាស់ពេញមួយយប់។
ប្រធានាធិបតីអ៊ុយក្រែន លោក Zelenskiy បានបង្កោះសារមួយនៅលើបណ្ដាញសង្គម Twitter ដោយបានធើ្វការថ្កោលទោសយ៉ាងខ្លាំងលើការវាយប្រហារខាងលើនេះ រួមនិងបានហៅរដ្ឋាភិបាលទីក្រុងមូស្គូថា ”ជាក្រុមភេរវករដែលចូលចិត្តធើ្វរឿងខ្មៅងងឹតនិងមិន ខ្វាយខ្វល់អំពីច្បាប់ទម្លាប់ និងចូលចិត្តបើកការវាយប្រហារដោយមិនគិតថាជាទីតាំងយោធាឬក៏ជាទីតាំងជនស៊ីវិលនោះទេ”។នៅក្នុងប្រតិបត្តិការវាយបករបស់យោធាអ៊ុយក្រែនដែលបានចាប់ផ្តើមធើ្វឡើងនៅដើមខែកញ្ញាកន្លងទៅនេះ ក្នុងគោលបំណងដើម្បីដណ្ដើមកាន់កាប់ត្រឡប់មកវិញនូវទឹកដីភាគខាងកើតរបស់ខ្លួនពីទាហានរុស្ស៊ីគឺបានទទួលជោគជ័យគួរឱ្យកត់សម្គាល់ដោយបានធើ្វការដណ្ដើមកាន់កាប់ទឹកដីភាគខាងកើតភាគច្រើនពីទាហានរុស្ស៊ី នេះបើយោងតាមការអះអាងរបស់មេបញ្ជាការយោធាប្រទេសអ៊ុយក្រែន គឺលោកឧត្តមសេនីយ៍ Valery Zaluzhny។
ប្រធានាធិបតី Zelenskyបាននិយាយថាទាហានរុស្ស៊ីមាន “ជម្រើសដ៏ល្អ” ដើម្បីភៀសខ្លួន ដោយសារតែការវាយប្រហារតបតដោយអះអាងថាអ៊ុយក្រែនបានដណ្តើមយកទឹកដីប្រហែល “២,០០០ គីឡូម៉ែត្រ” មកវិញ។ប្រធានាធិបតីអ៊ុយក្រែនលោក Volodymyr Zelensky បាននិយាយនៅក្នុងសុន្ទរកថាធម្មតារបស់គាត់កាលពីល្ងាចថ្ងៃទី១០ខែកញ្ញាថា”ក្នុងរយៈពេលប៉ុន្មានថ្ងៃកន្លងមកនេះ យោធារុស្ស៊ីបានបង្ហាញយើងពីផ្នែកពិតប្រាកដបំផុតរបស់ពួកគេគឺខ្នងរបស់ពួកគេ” ។ “ការរត់គេចគឺជាជម្រើសដ៏ល្អសម្រាប់ពួកគេយ៉ាងណាក៏ដោយ។នៅព្រឹកថ្ងៃអាទិត្យ អគ្គបញ្ជាការកងទ័ពអ៊ុយក្រែនអះអាងថា ក្នុងរវាងប៉ុន្មានថ្ងៃចុងក្រោយនេះ គេបានដណ្តើមមកវិញនូវផ្ទៃដីចំនួន៣ពាន់គីឡូម៉ែត្រការ៉េ។ មិនត្រឹមតែប៉ុណ្ណោះ កងទ័ពអ៊ុយក្រែនកំពុងតែមានជ័យជំនះ ឈានទៅដណ្តើមយកមកវិញនូវទីក្រុង Koupiansk និង Izioum។ ក្រុង Izioum គឺជាតំបន់ផ្លូវខ្វែង ដ៏សំខាន់ រវាងទីក្រុងខារគីវ ដែលស្ថិតនៅខាងជើង និងតំបន់ដុនបាស ដែលស្ថិតនៅខាងត្បូង។
កាលពីល្ងាចថ្ងៃសៅរ៍ រដ្ឋមន្ត្រីការពារជាតិរុស្ស៊ី បានប្រកាសដកកម្លាំងទ័ព ថយចេញពីតំបន់ខាងកើត និងខាងត្បូងក្រុងខារគីវ។ រុស្ស៊ីអះអាងថា ការដកទ័ពថយនេះ គឺដើម្បីប្រមូលកម្លាំងយកទៅពង្រឹងនៅតំបន់ដូណេតស្គ៍។ យោងតាមការវិភាគ រុស្ស៊ីចង់ប្រាប់ទៅពិភពលោកថា ខ្លួនដកថយដោយយុទ្ធសាស្ត្រ មិនមែនដកថយដោយបរាជ័យទេ។ តែយ៉ាងណា រូបភាពដែលគេបានចែកចាយពីសមរភូមិ បានបង្ហាញឲ្យឃើញ នូវសម្ភារៈយោធារុស្ស៊ី មានរថក្រោះ ឡានទាហាន អាវុធ គ្រាប់កាំភ្លើង ជាដើម ត្រូវឆេះខ្លោច ឬបោះបង់ចោល ហាក់ដូចជាកងទាហានរុស្ស៊ី បានរត់ភៀសខ្លួនយកតែប្រាសអាយុ។ យ៉ាងណាមិញ លោក Denis Pouchiline មេដឹកនាំតំបន់ផ្តាច់ខ្លួនដូណេតស្គ៍ ដែលនិយមគាំទ្ររុស្ស៊ី បានថតសារវីដេអូ អះអាងថាស្ថានការណ៍កំពុងតែលំបាកខ្លាំង សម្រាប់ក្រុមខ្លួន។
ខណៈដែលការវាយប្រយុទ្ធគ្នា នៅភាគខាងកើត កាន់តែកក្រើកខ្លាំង នៅតំបន់ខាងត្បូងឯណោះ ការព្រួយបារម្ភ ក៏កាន់តែធំ ទាក់ទិននឹងស្ថានីយ៍អគ្គិសនីនុយក្លេអ៊ែរហ្សាប៉ូរីចា។ ព្រឹកថ្ងៃទី១១កញ្ញានេះ ក្រុមហ៊ុនអ៊ុយក្រែន Energoatom ដែលជាអ្នកចាត់ចែងការងារនៅស្ថានីយ៍នេះ បានបញ្ជាក់ឲ្យដឹងថា គេបានបិទរ៉េអាក់ទ័រទី៦ ដែលជារ៉េអាក់ទ័រចុងក្រោយ ឲ្យឈប់ដំណើរការហើយ។ អ្នកជំនាញក្រុមហ៊ុនអគ្គិសនីនុយក្លេអ៊ែរនេះ អះអាងថា បច្ចុប្បន្នគេមានសល់ប្រេងម៉ាស៊ូត សម្រាប់ប្រើតែ១០ថ្ងៃទៀតប៉ុណ្ណោះ ដើម្បីប្រើក្នុងការបន្ថយសីតុណ្ហភាពរ៉េអាក់ទ័រនុយក្លេអ៊ែរ។ អគ្គនាយក Energoatom បានទាមទារ ឲ្យកងទ័ពរុស្ស៊ីត្រូវតែចាកចេញពីស្ថានីយ៍នេះ ហើយឈប់យកទីតាំងនេះ ជាខែល ជាមូលដ្ឋាននៃការបាញ់គ្រាប់ប្លោងតទៅទៀត។
លោកបានអំពាវនាវសាជាថ្មីថា ត្រូវតែបង្កើតតំបន់នេះជាតំបន់សុវត្ថិភាពពិសេស គ្មានការប្រយុទ្ធ ព្រោះក្នុងករណីមានការបាញ់ប្លោងមកលើស្ថានីយ៍នេះជាថ្មីទៀត នោះស្ថានការណ៍ប្រាកដជាធ្ងន់ធ្ងរ ក្លាយជាមហន្តរាយនុយក្លេអ៊ែរ.។កាលពីថ្ងៃទី១០ ខែកញ្ញាទីតាំងយោធាអ៊ុយក្រែនទាំងសងខាងនៃប្រទេសរុស្ស៊ី និងអ៊ុយក្រែនបានចែករំលែករូបភាពជាបន្តបន្ទាប់ដែលបង្ហាញថាទាហានអ៊ុយក្រែនបានចូលទៅក្នុងទីក្រុងយុទ្ធសាស្ត្រ Kupyansk ក្នុងខេត្ត Kharkov ។ អភិបាលក្រុង Kharkov លោក Oleh Synyehubov ក៏បានបញ្ជាក់ផងដែរថាកងទ័ពអ៊ុយក្រែនបានដណ្តើមបានមកវិញនូវទីក្រុង Balakliya ដែលជាទីក្រុងសំខាន់មួយទៀតនៅក្នុងតំបន់៕ AFP
