វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1700 នាក់
ម្សិលមិញ 6501 នាក់
សរុប 13950255 នាក់
ភ្នំពេញ៖ ទាក់ទងបញ្ហានេះអ្នកនាំពាក្យក្រសួងសាធារណការ និងដឹកជញ្ជូន លោក គង់ វិមាន នៅថ្ងៃទី០២ ខែសីហានេះបានប្រាប់កាសែត ថា បើយោងតាមផ្លូវច្បាប់នៅលើពិភពលោកក៏ដូចជានៅប្រទេសកម្ពុជា ឯកសារ ៣មុខដែលតម្រូវឲ្យអ្នកបើកបរត្រូវមានជាប់ខ្លួនពេលបើកបរលើដងផ្លូវគឺបណ្ណបើកបរ បណ្ណសម្គាល់យានយន្ត (កាតគ្រី) និងបណ្ណត្រួតពិនិត្យលក្ខណបច្ចេកទេស(ឆៀក)។ លោកថាប៉ុន្ដែបច្ចុប្បន្នដោយមានការសម្រួលពីអាជ្ញាធរ និងជំនាញគឺឯកសារ ២ មុខដែលអ្នកបើកបរអាចថតចម្លង ហើយយកទៅបញ្ជាក់ពីអាជ្ញាធរមានសមត្ថកិច្ច ឬតាមច្រកចេញចូលតែមួយតាមបណ្តាសាលាខ័ណ្ឌ/ស្រុក ដើម្បីប្រើពេលបើករថយន្តនោះគឺ បណ្ណឆៀក និងកាតគ្រី។
អ្នកនាំពាក្យក្រសួងសាធារណការ បានគូសបញ្ជាក់ថា បុគ្គលមួយចំនួនដែលបានបង្ហោះសារនៅលើបណ្តាញសង្គមនោះ មិនមែនពួកគេមិនដឹងពីការអនុគ្រោះរបស់អាជ្ញាធរលើឯកសារ ២មុខដែលអាចប្រើច្បាប់ថតចម្លងបាននោះទេ តែសកម្មភាពទាំងនេះគឺជាការឌឺឌងឲ្យមន្ត្រីតែម្តង ខណៈជំនាញធ្លាប់បានបកស្រាយច្រើនដងរួចមកហើយ។សូមជម្រាបថា ការអនុវត្តកាត់ពិន្ទុលើបណ្ណបើកបរសម្រាប់អ្នកដែលល្មើសច្បាប់ចរាចរណ៍នឹងត្រូវអនុវត្តពីខែកញ្ញាខាងមុខនេះ ខណៈការបើកបរលើដងផ្លូវ ហើយអ្នកបើកបរមិនមានឯកសារទាំង៣ ប្រភេទខាងលើជាប់តាមខ្លួននោះទេក៏ជាការល្មើសច្បាប់ចរាចរណ៍ផ្លូវគោកដែរ។
ក្រៅពីរឿងបើកបរត្រូវមានឯកសារហ្សីនយកទៅជាមួយក្រសួងសេដឋកិច្ចនិងហិរញ្ញវត្ថុក៏បានតម្រូវឲ្យមានការធានារ៉ាប់រងយានយន្តឯកជនផងដែរ។ទាក់ទងបញ្ហានេះអគ្គនាយកនិយ័តករធានារ៉ាប់រងកម្ពុជា លោក ប៊ូ ច័ន្ធភីរូ នាព្រឹកថ្ងៃទី២ ខែសីហា ឆ្នាំ២០២២នេះ បានអះអាងថា ការដាក់ចេញនូវច្បាប់ធានារ៉ាប់រងនេះ មិនមែនជាបន្ទុកចំពោះម្ចាស់យានយន្តនោះទេ ប៉ុន្តែផ្ទុយទៅវិញ គឺជាការជួយដោះស្រាយបន្ទុកផ្នែកហិរញ្ញវត្ថុ ចំពោះម្ចាស់យានយន្ត នៅពេលដែលមានគ្រោះថ្នាក់កើតឡើង។ឆ្លើយតបនឹងសំណួរអ្នកសារព័ត៌មាន ក្នុងសន្និសីទសារព័ត៌មាន ស្តីពីសមិទ្ធផលសម្រេចបាន រយៈពេល៥ឆ្នាំ របស់ក្រសួងសេដ្ឋកិច្ច និងហិរញ្ញវត្ថុ, លោកអគ្គនាយក បានបញ្ជាក់ថា រាជរដ្ឋាភិបាល មានគម្រោងអនុវត្តច្បាប់ស្តីពីការធានារ៉ាប់រងនេះ តាំងពីឆ្នាំ២០១៤មកម្ល៉េះ ប៉ុន្តែដោយសារយានយន្តមានច្រើនប្រភេទ នាំឲ្យត្រូវការពេលវេលាសិក្សាឲ្យបានស៊ីជម្រៅ ថាតើត្រូវចាប់ផ្តើមលើប្រភេទណាមុន និងប្រភេទណាក្រោយ។
លោក ប៊ូ ច័ន្ទភីរូ បានលើកឡើងថា នេះគឺជាបង្រៀនសន្សំប្រាក់មួយ សម្រាប់ប្រជាពលរដ្ឋ ដែលជាម្ចាស់យានយន្ត យកទៅដោះស្រាយ នៅពេលមានគ្រោះថ្នាក់កើតឡើង ហើយកាតាព្វកិច្ចបង់ធានារ៉ាប់រង ក៏គឺជាឧបករណ៍មួយ ដើម្បីជួយទៅដល់ប្រព័ន្ធសន្តិសុខសង្គម និងជួយដល់ប្រជាពលរដ្ឋ ទទួលបានបន្ទុកហានិភ័យគ្រោះថ្នាក់ ដែលផ្តល់ដោយក្រុមហ៊ុនធានារ៉ាប់រង តាមរយៈការទិញធានារ៉ាប់រង ពីក្រុមហ៊ុនធានារ៉ាប់រងនេះ។ លោកឲ្យដឹងដែរថា កម្ពុជា ខាតបង់ថវិកាជាង៣០០លានដុល្លារ ក្នុងមួយឆ្នាំ ដោយសារគ្រោះថ្នាក់ចរាចរ។
សូមជម្រាបថា បច្ចុប្បន្ន កម្ពុជា មានក្រុមហ៊ុនធានារ៉ាប់រងផ្ទាល់ចំនួន ៣៨ ដែលក្នុងនោះក្រុមហ៊ុនធានារ៉ាប់រងទូទៅ ចំនួន១៨, ក្រុមហ៊ុនធានារ៉ាប់រងអាយុជីវិតចំនួន១៤, និងក្រុមហ៊ុនធានារ៉ាប់រងខ្នាតតូចចំនួន៦ កំពុងធ្វើប្រតិបត្តិការអាជីវកម្មធានារ៉ាប់រង នៅក្នុងព្រះរាជាណាចក្រកម្ពុជា។ នេះបើយោងតាមឯកសារស្តីពីសមិទ្ធផលសម្រេចបាន រយៈពេល៥ឆ្នាំ ពីឆ្នាំ២០១៧-ឆ្នាំ២០២១ របស់ក្រសួងសេដ្ឋកិច្ច និងហិរញ្ញវត្ថុ។ ក្រុមហ៊ុនទាំងនេះ មានទាំងប្រភេទក្រុមហ៊ុនបរទេសចំនួន ២៣ ក្រុមហ៊ុនក្នុងស្រុក១៥ និងក្រុមហ៊ុនចំរុះរដ្ឋ ២។ ក្រុមហ៊ុនធានារ៉ាប់រងទាំងអស់មានទ្រព្យសកម្ម ចំនួនប្រមាណ ៧៤១លានដុល្លារអាមេរិក និងមូលនិធិភាគហ៊ុនិកចំនួនប្រមាណជាង ៣៤២ លានដុល្លារអាមេរិក ក្នុងឆ្នាំ២០២០៕