វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4415 នាក់
ម្សិលមិញ 4292 នាក់
សរុប 14114114 នាក់
រាជធានីភ្នំពេញ៖កញ្ញា ឈឹម ស៊ីថរ ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ និងមេសហជីព២នាក់ទៀតដែលដឹកនាំការតវ៉ាទាមទាសិទ្ធឲ្យបុគ្គលឹកក្រុមហ៊ុនណាហ្កាដែលត្រុវបញ្ឈប់បានចូលធ្វើការងារវិញត្រូវបានអាជ្ញាស្លៀកពាក់ស៊ីវិលចាប់ខ្លួនហើយ នៅរសៀលនេះ នៅពេលពួកគេបានដើរទៅចូលរួមធ្វើកូដកម្មដោយសន្តិវិធីនៅទីតាំងមុខក្រុមហ៊ុនកាស៊ីណូណាហ្គាវើលដ៍។
លោក សាន សុខសីហាអ្នកនាំពាក្យស្នងការដ្ឋាននគរបាលរាជធានីភ្នំពេញ បានឱ្យដឹងថា មេដឹកនាំសហជីព ៣រូប រួមមាន កញ្ញា ឈឹម ស៊ីថរ លោក សុខ ណារិទ្ធ និងលោក សុខ គង្គា ត្រូវបានសមត្ថកិច្ចចាប់ខ្លួនបានហើយ នៅម៉ោងជាង៤រសៀលនេះ ពាក់ព័ន្ធនឹង «ការញុះញង់ និងរៀបចំការតវ៉ានៅមុខក្រុមហ៊ុនណាហ្គាវើលដ៍»។មុនពេលត្រូវចាប់ខ្លួនកញ្ញា ឈឹម ស៊ីថរ បានប្រកាសកាលពីព្រឹកមិញថា នាងនឹងទៅចូលរួមធ្វើកូដកម្មដោយសន្តិវិធីនៅទីតាំងមុខអគារណាហ្គាវើលដ៍ដែលជាទីកន្លែងក្រុមសហជីពនិងសមាជិកសហជីពកំពុងធ្វើកូដកម្ម។ កញ្ញាបានសន្និដ្ឋានជាមុនថា នាងនឹងអាចត្រូវបានចាប់ខ្លួនដោយកម្លាំងមានសមត្ថកិច្ច។
ការចាប់ខ្លួនមេសហជីពទ្រទ្រង់សិទ្ធិការងារបុគ្គលិកកម្មករខ្មែរនេះ អ្នកស្រី ចក់ សុភាពនាយិកាមជ្ឈមណ្ឌលសិទ្ធិមនុស្សកម្ពុជា បានសរសេរនៅក្នុងហ្វេសប៊ុកចោទជាសំណួរថា៖ «តើនេះជាសង្គមអ្វី ដែលអាជ្ញាធរមកចាប់ស្ត្រីវ័យក្មេងដោយហិង្សា ក្រៀកកគ្នា ហើយញាត់ចូលឡានទាំងប្រញាប់ប្រញាល់គ្មានដីកាត្រឹមត្រូវ?»។
ទាក់ទងការចាប់ខ្លួននេះ ព្រះរាជអាជ្ញារងអមសាលាដំបូងរាជធានីភ្នំពេញ លោក សេង ហៀង បានថ្លែងក្នុងសន្និសីទនៅស្នងការដ្ឋាននគរបាលរាជធានីភ្នំពេញនាព្រឹកថ្ងៃទី៤មករា ថា ក្រោយពីធ្វើការស្រាវជ្រាវលើក្រុមកម្មករដែលធ្វើកូដកម្មទាមទារលក្ខខណ្ឌការងារពីក្រុមហ៊ុនណាហ្គាវើលដ៍ អស់រយៈពេលជាង១០ថ្ងៃនេះ សមត្ថកិច្ចបានចុះចាប់ខ្លួនបុគ្គលិកណាហ្គាវើលដ៍ចំនួន១០នាក់កាលពីយប់ថ្ងៃឆ្លងឆ្នាំ ដោយមានដីកាត្រឹមត្រូវតាមច្បាប់ មិនដូចការលើកឡើងរបស់បុគ្គលមួយចំនួនដែលថាសមត្ថកិច្ចចុះចាប់មនុស្សដោយគ្មានដីកានោះទេ។លោកសេងហៀងបញ្ជាក់ថា ដើមចមដែលនាំឱ្យសមត្ថកិច្ចចាប់ខ្លួនកម្មករ ដោយសារពួកគេប្រមូលផ្ដុំគ្នាតវ៉ាដោយខុសច្បាប់និងមានអង្គការចាត់តាំងនៅក្រៅប្រទេសមួយចំនួនជួយឧបត្ថម្ភជាប្រាប់រាប់ម៉ឺនដុល្លារដល់ក្រុមសហជីពក្នុងក្រុមហ៊ុនណាហ្គាវើលដ៍ ដើម្បីធ្វើបាតុកម្មប្រឆាំងនឹងក្រុមហ៊ុន។ព្រះរាជអាជ្ញារងបញ្ជាក់ថា ក្រោយពីប្រមូលបានភស្តុតាងមួយចំនួន តុលាការបានចេញដីកាបង្គាប់ឱ្យចាប់ខ្លួនមេសហជីពចំនួន៣នាក់ដែលដឹកនាំបាតុករ រួមមាន កញ្ញា ឈឹម ស៊ីថរ, លោក សុខ ណារិទ្ធ និងលោក សុខ គង្គា ដើម្បីយកមកផ្ដន្ទាទោសតាមច្បាប់។
ទាក់ទងរឿងនេះដែរនៅលើទំព័រហ្វេសប៊ុកស្ថានទូតសហរដ្ឋអាមេរិកបានសសេរថា ស្ថានទូតកំពុងឃ្លាំមើលយ៉ាងយកចិត្តទុកដាក់នូវការចាប់ខ្លួនសមាជិកសហជីពនៃបុគ្គលិកកម្មករក្រុមហ៊ុនកាស៊ីណូណាហ្គាវើលដ៍ ដោយសារតែការបញ្ចេញមតិដោយសន្តិវិធី និងបានអំពាវនាវឱ្យអាជ្ញាធរកម្ពុជាស្ដាប់សំឡេងរបស់ពលរដ្ឋ«យើងកំពុងធ្វើការតាមដានយ៉ាងយកចិត្តទុកដាក់នូវការចាប់ខ្លួនសមាជិកសហជីពនៃបុគ្គលិកកម្មករនៃកាស៊ីណូណាហ្គាវើលដ៍ ដោយសារតែការបញ្ចេញមតិដោយសន្តិវិធីរបស់ពួកគេ និងស្នើឱ្យអាជ្ញាធរស្ដាប់ពីពលរដ្ឋ មិនមែនបំបិទសំឡេងរបស់គេទេ។ សេរីភាពក្នុងការបញ្ចេញមតិ ក្នុងការប្រមូលផ្ដុំគ្នា និងក្នុងការចងក្រងគ្នាជាក្រុម សមាគម ត្រូវបានធានាដោយរដ្ឋធម្មនុញ្ញនៃប្រទេសកម្ពុជា»។