អាមេរិកប្រើដ្រូនសម្លាប់មេចលនាអាល់កៃដាបន្ទាប់ពីបេឡាដឹននៅក្នុងប្រទេសអាហ្កានីស្ថាន!
21-September-2026 / ព័ត៌មានអន្តរជាតិ
អាហ្កានីស្ថាន៖ កាលពីយប់ថ្ងៃចន្ទទី ១សីហា លោកប្រធានាធិបតីអាមេរិក ចូ បៃដិន បានប្រកាសជូនដំណឹង ដោយផ្សាយបន្តផ្ទាល់ តាមកញ្ចក់ទូរទស្សន៍ជាតិ អំពីការសម្លាប់មេដឹកនាំ ចលនាអាល់កៃដា Ayman al-Zawahiri អៃម៉ាន អាល់ហ្សាវ៉ាហ៊ីរី នៅក្នុងប្រតិបត្តិការប្រឆាំងក្រុមភេរវជន នៅប្រទេសអាហ្វហ្កានីស្ថាន ដោយប្រើយន្តហោះគ្មានមនុស្សបើក(ប្រើដ្រូន)។
អៃម៉ាន អាល់ហ្សាវ៉ាហ៊ីរី ជាភេរវជនដែលអាមេរិកតាមស្វែងរកបំផុតនៅលើពិភពលោក។ អាមេរិកសន្យាផ្តល់រង្វាន់ចំនួន ២៥លានដុល្លារ ជាថ្នូរនឹងការផ្តល់ព័ត៌មានឱ្យគេអាចរកឃើញមេអាល់កៃដាហ្សាវ៉ាហ៊ីរីនេះ។ លោកប្រធានាធិបតីអាមេរិក បានរៀបរាប់ថា ហ្សាវ៉ាហ៊ីរី មិនត្រឹមតែជាអ្នករៀបចំផែនការធ្វើមហាភេរវកម្មបើកបុកអគារនៅទីក្រុងញូវយ៉កនិងវ៉ាស៊ីនតោន កាលពី ថ្ងៃទី ១១កញ្ញា២០០១ បង្កឱ្យស្លាប់ពលរដ្ឋអាមេរិកអស់ជិតបីពាន់នាក់ទេ តែក៏អ្នកដឹកនាំធ្វើភេរវកម្មប្រឆាំងអាមេរិកជាច្រើនបន្តបន្ទាប់ទៀត ដូចជា បានវាយប្រហារនាវាយោធាអាមេរិក USS Cole នៅឆ្នាំ២០០០ បានធ្វើភេរវកម្មប្រឆាំងស្ថានទូតអាមេរិក នៅតង់ហ្សានី និងនៅកេនយ៉ា កាលពីឆ្នាំ១៩៩៨។
បើតាមប្រសាសន៍របស់លោក ចូបៃដិន គឺអាមេរិកការធ្វើឃាត នេះមិនត្រឹមតែជាជោគជ័យនៃប្រតិបត្តិការដ្រូនមួយទេ តែ បានរកឃើញយុត្តិធម៌ ជូនគ្រួសារជនរងគ្រោះ ដោយអាមេរិកសម្លាប់មេដឹកនាំភេរវកម្មនោះផងដែរ។ប្រតិបត្តិការផ្លូវអាកាស បានវាយប្រហារចំលើផ្ទះស្នាក់នៅ ក្នុងសង្កាត់ដ៏ប្រណិតកណ្តាលទីក្រុងកាប៊ូល ដោយគ្មានប្រើកងកម្លាំងអាមេរិកថ្មើរជើងនិងនៅលើដី ម្នាក់ទេ។ ហើយក៏គ្មានបង្កឱ្យមានជនស៊ីវិលណាម្នាក់ផ្សេងរងគ្រោះដែរ។ នេះបើតាមការអះអាងរបស់អ្នកទទួលខុសត្រូវជាន់ខ្ពស់អាមេរិក មកកាន់អ្នកសារព័ត៌មាន ដោយបន្ថែមថា វត្តមានរបស់ហ្សាវ៉ាហ៊ីរី នៅកាប៊ូល ជាការរំលោភកិច្ចព្រមព្រៀងក្រុងដូហា រវាងអាមេរិកនិងតាលីបង់កាលពីឆ្នាំ២០២០។
សូមបញ្ជាក់ថាបន្ទាប់ពីបាត់ខ្លួនគ្មានសញ្ញាសូន្យឈឹងអស់ជាង១០ឆ្នាំ វ៉ាស៊ីនតោនទើបប្រទះឃើញក្រុមគ្រួសាររបស់ ហ្សាវ៉ាហ៊ីរី នៅឆ្នាំ២០២២នេះ រស់លាក់ខ្លួនក្នុងផ្ទះមួយនាក្រុងកាប៊ូល។ ប៉ុន្មានខែក្រោយមក ក្រុមចារកិច្ចអាមេរិកបានស៊ើបដឹងថាមេអាល់កៃដា ហ្សាវ៉ាហ៊ីរី ពិតជាលាក់ខ្លួននៅក្នុងផ្ទះនេះមែន ហើយក៏ចាប់ផ្តើមសិក្សារកវិធីយ៉ាងណាដែលមិនប៉ះពាល់ដល់ជនស៊ីវិល។ ហ្សាវ៉ាហ៊ីរី មិនដែលចេញដើរក្រៅផ្ទះទេ តែចូលចិត្តចេញមកឈរនៅរានហាលមុខផ្ទះយ៉ាងយូរ។ តាមរយៈការសម្គាល់នេះ អាមេរិកបានបញ្ជាដ្រូនមានបំពាក់មីស៊ីលHellfire ពីចម្ងាយបាញ់សម្លាប់មេអាល់កៃដា ពេលចេញមកលំហែលើរានហាលនោះតែម្តង។
ផែនការកម្ចាត់មេអាល់កៃដា ត្រូវបានបង្ហាញជូនប្រធានាធិបតីអាមេរិក នៅថ្ងៃទី ១កក្កដា នៅក្នុង បន្ទប់ Situation Room ដ៏មហាសុវត្ថិភាពបំផុត ដែលគេធ្លាប់ឃើញតាមរយៈរូបថតលោកប្រធានាធិបតី អាមេរិក បារ៉ាក់ អូបាម៉ា បញ្ជាប្រតិបត្តិការសម្លាប់ បេនឡាដិន កាលពីឆ្នាំ២០១១ ហើយលោកបៃដិន កាលនោះ នៅជាអនុប្រធានាធិបតី អង្គុយក្បែរ។
អៃម៉ាន អាល់ហ្សាវ៉ាហ៊ីរី ជានរណា ?កើតក្នុងគ្រួសារអភិជនអេហ្ស៊ីប នៅឆ្នាំ១៩៥១ ជិតក្រុងគែរ អៃម៉ាន អាល់ហ្សាវ៉ាហ៊ីរី មានត្រកូល ខ្ពង់ខ្ពស់ ជាអ្នកមាន ជាអ្នកចេះដឹង ទាំងខាងម្តាយទាំងខាងឪពុក (ឪពុកជាគ្រូពេទ្យ ជីតាជាប្រមុខសាសនា) ហ្សាវ៉ាហ៊ីរី រៀនពូកែខ្លាំង បានក្លាយជាវេជ្ជបណ្ឌិតជំនាញវះកាត់នៅអាយុ២៣ឆ្នាំ និងមានជំនឿស៊ុបក្នុងសាសនាអ៊ីស្លាម ( ស៊ុននីត) ហើយបានចូលប្រលូកនយោបាយបម្រើចលនាខុសច្បាប់ Frère musulman តាំងពីនៅជាក្មេងជំទង់អាយុទើប១៥ឆ្នាំ ក្នុងបំណងច្បាស់លាស់មួយគឺផ្តួលរំលំរបបកាន់អំណាច។ជាប្រមុខចលនាជីហាតអ៊ីស្លាមអេហ្ស៊ីប អស់រយៈពេលយ៉ាងយូរ ហ្សាវ៉ាហ៊ីរី ចូលក្នុងចលនាអាល់កៃដា នៅចុងឆ្នាំ១៩៩០។
តាំងពីភេរវកម្មថ្ងៃ១១កញ្ញា២០០១មក ហ្សាវ៉ាហ៊ីរី នៅកៀកជាប់ និងក្លាយជាដៃស្តាំរបស់ បេនឡាដិន។ ហ្សាវ៉ាហ៊ីរី បានក្លាយជាមេដឹកនាំចលនាអាល់កៃដា បន្តពីអូសាម៉ា បេនដាឡិន ដែលកងកម្មង់ដូអាមេរិកបានចូលទៅសម្លាប់ដល់ផ្ទះដែរ តែនៅប៉ាគីស្ថាន កាលពីឆ្នាំ២០១១។ ពីកន្លែងលាក់ខ្លួន មេអាល់កៃដារូបនេះ បានដឹកនាំសម្របសម្រួលចលនាភេរវនិយមអន្តរជាតិ នៅទូទាំងពិភពលោក។ ជាសរុបទៅហ្សាវ៉ាហ៊ីរី ជាមេដឹកនាំជីហាត ដែលមានអាយុវែងជាងគេបំផុត (៤០ឆ្នាំ) និងបានទ្រទ្រង់ អាល់កៃដាឱ្យនៅជាចលនាភេរវនិយមប្រឆាំងសហរដ្ឋអាមេរិកដូចអ្វីដែលបេនឡាដិនស្រមៃចង់បាន។ ដូច្នេះការស្លាប់របស់ហ្សាវ៉ាហ៊ីរី គឺជាការបាត់បង់ដ៏ធំធេងរបស់អាល់កៃដា និងអាចធ្វើឱ្យចលនានេះចុះថមថយសមត្ថភាពក្នុងការសហការផ្តុំគ្នាជាក្រុម។
