ប្រធានាធិបតីស្តីទីលោក Ranil Wickremesinghe ជាប់ឆ្នោតជាប្រធានាធិបតីថ្មីស្រីលង្កា
21-September-2026 / ព័ត៌មានអន្តរជាតិ
ប្រទេសស្រីលង្កា៖លោករ៉ានីលវិក្រឹមស៊ិង( Ranil Wickremesinghe) ជាបុគ្គលធ្លាប់កាន់តំណែងនាយករដ្ឋមន្ត្រីស្រីលង្កា ៦អាណត្តិកន្លងមកនិងជាប្រធានាធិបតីស្តីទីក្នុងចំណោមបេក្ខភាពប្រធានាធិបតីដែលមានបេក្ខភាព៣រូបប្រកួតប្រជែងបានជាប់ឆ្នោតជាប្រធានាធិបតីថ្មីនៅក្នុងការបោះឆ្នោតនៅសភានាថ្ងៃទី២០ខែកក្កដាឆ្នាំ២០២២ ដើម្បីដឹកនាំប្រទេសជំនួសអតីតប្រធានាធិបតីលោករ៉ាចាប៉ាសា( Rajapaksa )ដែលរត់គេចចេញពីប្រទេស។
មានកម្លាំងទាហានរាប់រយនាក់ប្រដាប់ដោយអាវុធបានដាក់ពង្រាយការពារសន្តិសុខនៅជុំវិញរដ្ឋសភា ក្នុងពេលកំពុងប្រជុំបោះឆ្នោតជ្រើសរើសប្រធានាធិបតី។ នៅព្រឹកថ្ងៃទី២០ ខែកក្កដា រដ្ឋសភាស្រីលង្កាដែលមានតំណាងរាស្ត្រ២២៥រូប បានសម្រេចបោះឆ្នោតជ្រើសរើសប្រធានាធិបតីថ្មីដែលមានអ្នកចូលរួមនៅក្នុងការប្រកួតរួមមានប្រធានាធិបតីបណ្តោះអាសន្នRanilWickremesinghe,តំណាងរាស្ត្រDullasAlahapperuma មកពីគណបក្សកាន់អំណាច និងមេដឹកនាំគណបក្សអំណាចប្រជាជន លោក Anura Kumara Dissanayake។
មានការវាយតម្លៃថាបើជ័យជម្នះបានទៅលើ ប្រធានាធិបតីស្តីទី លោកRanil Wickremesinghe ដែលប្រជាជនស្រីលង្កាជាច្រើននាក់មិនគាំទ្រ ព្រោះពួកគេចាត់ទុករូបលោក ជាសម្ព័ន្ធមិត្តរបស់អតីតប្រធានាធិបតី លោក Gotabaya Rajapaksa នោះវាទំនងជានឹងនាំទៅរកសកម្មភាពតវ៉ាជាបន្តបន្ទាប់ទៀតពីសំណាក់ក្រុមបាតុករ។
បេក្ខជនម្នាក់ទៀតជាសមាជិកសភានៃគណបក្ស SLPP លោក Dullas Alahapperuma។ ដ្បិតលោក អាឡាហាបពើរូម៉ា មិនសូវមានការជំទាស់ពីក្រុមបាតុករ និងបក្សប្រឆាំងនោះទេ ប៉ុន្តែរូបលោកមិនធ្លាប់មានបទពិសោធន៍ផ្នែកអភិបាលកិច្ចកម្រិតខ្ពស់ឡើយ។រីឯបេក្ខជនទី៣ គឺលោក Anura Kumara ដែលជាប្រធានគណបក្សឆ្វេងនិយម NPP ត្រូវគេមើលឃើញថា មិនមានឱកាសពិតប្រាកដក្នុងការទទួលបានជ័យជម្នះឡើយ ព្រោះគណបក្សរបស់លោកកាន់កាប់តែ៣អាសនៈប៉ុណ្ណោះ នៅក្នុងសភាដែលមានអាសនៈសរុបទាំងអស់២២៥អាសនៈ។
លទ្ធផលផ្លូវការបានបង្ហាញថាលោករ៉ានីលវិក្រឹមស៊ិង( Ranil Wickremesinghe) ទទួលបានសម្លេងគាំទ្រ១៣៤សម្លេងក្នុងការបោះឆ្នោតក្នុសភា ដោយគូប្រជែងសំខាន់ជាងគេលោកឌុលឡាស អាឡាហាពែរូម៉ា(Dullas Alahapperuma)ទទួលបាន៨២សម្លេងហើយជនឆ្វេងនិយម អានុរ៉ា ឌីសសាណាយ៉ាកេ (Anura Dissanayake)ទទួលបានតែបីសម្លេង។ក្រោយការរាប់សន្លឹកឆ្នោតចប់ អគ្គលេខាសភាបាននិយាយថា«លោករ៉ានីល វីកក្រេមេស៊ីង បានជាប់ជាប្រធានាធិបតីប្រតិបត្តិលើកទីប្រាំបីនៅក្រោមរដ្ឋធម្មនុញ្ញ»។
មេដឹកនាំរូបនេះបានពណ៌នាការជាប់ឆ្នោតរបស់លោកថាជា«ការផ្តល់កិត្តិយសនិងឯកសិទ្ធិ»ដើម្បីដោះស្រាយបញ្ហារបស់ប្រទេស នៅពេលលោកថ្លែងទៅកាន់សភាក្រោយការប្រកាសលទ្ធផល។លោកបាននិយាយថា«ការបែកបាក់របស់យើងឥឡូវចប់»។លោកក៏បានអញ្ជើញលោកឌុលឡាស អាឡាហាពែរូម៉ាអោយចូលរួមជាលោកនិង«រួមគ្នាធ្វើការដើម្បីនាំប្រទេសចេញពីវិបត្តិដែលយើងកំពុងប្រឈម»។
ដោយជ្រើសរើសនាយករដ្ឋមន្ត្រីវ័យ៧៣ឆ្នាំរូបនេះអោយកាន់តំណែងប្រតិបត្តិកំពូល គណៈរដ្ឋមន្ត្រីបច្ចុប្បន្ននឹងត្រូវរលាយជាស្វ័យប្រវត្តិហើយលោកនឹងជ្រើសរើសនាយករដ្ឋមន្ត្រីម្នាក់ដើម្បីបង្កើតគណៈរដ្ឋមន្ត្រីថ្មីមួយ។
ប្រធានសភាស្រីលង្កាបាននិយាយថា«នេះជាសម័យប្រជុំប្រវត្តិសាស្ត្រមួយ វាមិនត្រឹមតែសភាតែប្រទេសទាំងមូល។គ្រប់ក្រសែភ្នែកពិភពលោកសម្លឹងមកយើងនៅថ្ងៃនេះ នៅពេលយើងជ្រើសរើសប្រធានាធិបតីថ្មីម្នាក់»។សូមបញ្ជាក់ថា លោក រ៉ានីល វីកក្រេមេស៊ីង បានក្លាយជាប្រធានាធិបតីស្តីទីកាលពីសប្តាហ៍មុនបន្ទាប់ពីប្រធានាធិបតីដែលត្រូវបាតុករចោរោមបណ្តេញពីអំណាចលោករ៉ាចាប៉ាក់សា(Rajapaksa)បានភៀសខ្លួនចេញពីប្រទេសទៅកាន់កោះម៉ាល់ឌីវ និងបន្ទាប់មកទៅសិង្ហបុរី មុនប្រកាសលាឈប់ផ្លូវការ៕
