វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1562 នាក់
ម្សិលមិញ 5378 នាក់
សរុប 14080855 នាក់
ប្រទេសថៃ៖ លោកព្រីឌីដាវចៃ( Predee Daochai )អាយុ៦១ឆ្នាំដែលទើបតែងតាំងជារដ្ឋមន្ត្រីក្រសួងហិរញ្ញវត្ថុកាលពីខែមុន បានលាឈប់ពីតំណែង ខណៈដែលរដ្ឋាភិបាលថៃដឹកនាំដោយលោកប្រាយុទ្ធចាន់អូចាកំពុងព្យាយាមទាញសេដ្ឋកិច្ចធំបំផុតទី២ នៅអាស៊ីអាគ្នេយ៍ ចេញពីវិបត្តិដែលបណ្តាលមកពីការរីករាលដាលនៃជំងឺកូវីដ១៩ ។
គេមិនទាន់ដឹងថា ហេតុអ្វីបានជាលោកលាឈប់ពីតំណែងនោះទេតែ ប្រព័ន្ធផ្សព្វផ្សាយថៃ បាននិយាយថា លោកចង់លាឈប់ដោយសារហេតុផលសុខភាព ។ ព័ត៌មានស្តីពី លោក Predee បានស្នើសុំលាលែងពីតំណែង បានជំរុញឱ្យផ្សារហ៊ុនធ្លាក់ចុះ ០,៩ ភាគរយ ប៉ុន្តែវាបានធូរស្រាលមកវិញ នៅក្បែរ ០,៤ ភាគរយ ។ការចាកចេញរបស់លោកPredee នឹងបង្កើតឡើងនូវភាពមិនប្រាកដប្រជា នៅក្នុងការធ្វើគោលនយោបាយនៅពេលដែលរដ្ឋាភិបាលបានបញ្ចេញប្រាក់លើកទឹកចិត្តរាប់ពាន់លានដុល្លារ ដើម្បីជួយសេដ្ឋកិច្ច ។
លោក Kobsidthi Silpachaiប្រធានស្រាវជ្រាវទីផ្សារមូលធនរបស់ធនាគារ Kasikornbankមានប្រសាសន៍ថា “ដូច្នេះព្រឹត្តិការណ៍នេះ គឺជាការខកចិត្តដ៏ធំមួយ” ។ លោកបាននិយាយថា ភាពមិនប្រាកដប្រជាអំពីថា តើអ្នកណានឹងក្លាយជារដ្ឋមន្ត្រីហិរញ្ញវត្ថុ នឹងធ្វើឱ្យប៉ះពាល់ដល់ទំនុកចិត្តវិស័យឯកជន និងអាចបង្កើនការព្រួយបារម្ភអំពីស្ថិរភាពនយោបាយ ។សេដ្ឋកិច្ចរបស់ប្រទេសថៃបានធ្លាក់ចុះ ១២,២ ភាគរយ នៅក្នុងត្រីមាសទី ២ ដែលជាការធ្លាក់ចុះដ៏អាក្រក់បំផុត ចាប់តាំងពីវិបត្តិហិរញ្ញវត្ថុអាស៊ី កាលពីជាង ពីរទសវត្សរ៍មុន ។
យោងតាមក្រសួងហិរញ្ញវត្ថុ បានឱ្យដឹងថា សេដ្ឋកិច្ចរបស់ប្រទេសនេះ នឹងធ្លាក់ចុះ ៨.៥ ភាគរយ នៅក្នុងឆ្នាំ២០២០នេះ ។ លោក ChairatTriratanajaraspon ប្រធានក្រុមប្រឹក្សាទេសចរណ៍ថៃ បានមានប្រសាសន៍ថា “យើងសង្ឃឹមថា លោករដ្ឋមន្ត្រីនឹងជួយដោះស្រាយបញ្ហាប្រាក់កម្ចីទន់ ប៉ុន្តែប្រហែលជាគ្មានឱកាសទេ” ។លោកព្រីឌី( Predee) ត្រូវបានព្រះមហាក្សត្រថៃតែងតាំងលោក ជារដ្ឋមន្ត្រីហិរញ្ញវត្ថុ កាលពីថ្ងៃទី៦ ខែសីហា ។ លោក Predee ធ្លាប់ជាសហប្រធាននៃធនាគារ Kasikornbankរយៈពេល៣៨ឆ្នាំ មុនពេលចូលរួមក្នុងគណៈរដ្ឋមន្ត្រី ។