វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 1968 នាក់
ម្សិលមិញ 6501 នាក់
សរុប 13950523 នាក់
ប្រទេសអង់គ្លេស៖លោក Boris Johnson បានយល់ព្រមលាលែងពីតំណែង មេដឹកនាំគណបក្សអភិរក្សដែលធ្វើឲ្យលោកបាត់បង់តួនាទីនាយករដ្ឋមន្ត្រីនៅថ្ងៃព្រហស្បតិទី៧ក្កដានេះបន្ទាប់ពីរងការកៀបសង្កត់ពីមន្ត្រីក្នុងគណបក្សអភិក្សនិយមរបស់លោក។ ប៉ុន្តែលោកបូរិសចនសុននឹងបន្តធ្វើជានាយករដ្ឋមន្ត្រី រហូតដល់រដូវស្លឹកឈើជ្រុះពេលមានអ្នកមកជំនួស។ការប្រកួតប្រជែង រើសអ្នកដឹកនាំគណបក្សអភិរក្សនឹងប្រព្រឹត្តទៅនៅរដូវក្តៅនេះហើយនាយករដ្ឋមន្ត្រីថ្មី នឹងចូលកាន់តំណែង ស្របពេលគណបក្ស ធ្វើសន្និសីទក្នុងខែតុលា។
សូមបញ្ជាក់ថាលោកនាយករដ្ឋមន្ត្រីអង់គ្លេស លោក Boris Johnson ប្រឈមនឹងសម្ពាធពីមហាជនឱ្យលាលែងចេញពីតំណែង ក្រោយពីមានមន្ត្រីរដ្ឋាភិបាលរហូតដល់ទៅ៤០រូបបានលាលែងចេញពីតំណែង។
សារព័ត៌មាន Al Jazeera នៅថ្ងៃព្រហស្បតិ៍ ទី៧ ខែកក្កដា ឆ្នាំ២០២២ បានផ្សាយមុននេះថា នាយករដ្ឋមន្ត្រីអង់គ្លេស លោក បូរីស ចនសុន បានប្រាប់សមាជិកសភាថាលោកនឹងមិនលាលែងចេញពីតំណែងនោះទេ បើទោះបីគណៈរដ្ឋមន្ត្រី និងមន្ត្រីជាច្រើនរូបនាំគ្នាលាលែងពីតំណែងដើម្បីសម្ដែងការមិនពេញចិត្តចំពោះការដឹកនាំប្រទេសនិងការដោះស្រាយបញ្ហារបស់លោកពាក់ព័ន្ធនឹងសំណុំរឿងមន្ត្រីជាន់ខ្ពស់ម្នាក់ដែលរងការចោទប្រកាន់ពីការបៀតបៀនផ្លូវភេទក៏ដោយ។
ការបញ្ជាក់ជំហរខាងលើរបស់លោក ចនសុន ធ្វើឡើងក្នុងអំឡុងនៃការសួរដេញដោលមួយនៅឯសភាអង់គ្លេសកាលពីថ្ងៃពុធកន្លងមកនេះ។ លោក ចនសុន បានបញ្ជាក់ដូច្នេះថា «ការងាររបស់នាយករដ្ឋមន្ត្រីនៅក្នុងកាលៈទេសៈដ៏លំបាក នោះគឺបន្តដើរទៅមុខ ហើយនេះគឺជាអ្វីដែលខ្ញុំកំពុងធ្វើ»។ នាយករដ្ឋមន្ត្រីរូបនេះបន្ថែមទៀតថា លោកខ្លួនឯងមិនជឿទេថាវាជាការប្រឆាំងនឹងផលប្រយោជន៍ជាតិ បើលោកនៅតែបន្តកាន់អំណាចនោះ។
មុននឹងលាលែងនាយករដ្ឋមន្ត្រីអង់គ្លេសលោក Boris Johnson បានបណ្តេញរដ្ឋមន្ត្រី Michael Gove បន្ទាប់ពីមន្ត្រីកំពូលបានជំរុញឱ្យលោកលាលែងពីតំណែងបន្ទាប់ពីមានរឿងអាស្រូវជាបន្តបន្ទាប់។រដ្ឋមន្ត្រីក្រសួងលំនៅដ្ឋាន សហគមន៍ និងរដ្ឋាភិបាលក្នុងតំបន់ លោក Michael Gove ត្រូវបាននាយករដ្ឋមន្ត្រីអង់គ្លេស លោក Boris Johnson បណ្តេញចេញពីតំណែងកាលពីល្ងាចថ្ងៃទី០៦ ខែកក្កដា។ មុននេះ Gove បានទៅជួបនាយករដ្ឋមន្ត្រីអង់គ្លេសដើម្បីណែនាំ Johnson ឱ្យលាលែងពីតំណែងដើម្បីផលប្រយោជន៍ជាតិ ក៏ដូចជាគណបក្សអភិរក្សហើយបានព្រមានថា គណបក្សនេះលែងគាំទ្រលោកទៀតហើយ។
លេខាធិការ Gove ត្រូវបានគេជឿថាជាសមាជិកគណៈរដ្ឋមន្ត្រីដំបូងគេដែលប្រឈមមុខនឹងការជំរុញឱ្យនាយករដ្ឋមន្ត្រី Johnson លាលែងពីតំណែង។ ការសម្រេចចិត្តបណ្តេញលោក Gove ធ្វើឡើងដោយនាយករដ្ឋមន្ត្រីអង់គ្លេសបន្ទាប់ពីរដ្ឋមន្ត្រីពីររូបគឺ Rishi Sunak និង Sajid Javid បានដាក់ពាក្យលាលែងពីតំណែង ដោយចាប់ផ្តើមមានរលកនៃការចាកចេញពីគណៈរដ្ឋមន្ត្រីដើម្បីតវ៉ាប្រឆាំងនឹងលោក Johnson ។រដ្ឋមន្ត្រីកុមារនិងគ្រួសារ Will Quince លេខាធិការសាលារៀន Robin Walker និងអនុរដ្ឋមន្ត្រីដឹកជញ្ជូន Laura Trott ក្រោយមកបានលាលែងពីតំណែងដោយសារតែ “បាត់បង់ទំនុកចិត្ត” ក្នុងការដឹកនាំរបស់លោក Johnson ។
មកដល់ថ្ងៃព្រហស្បតិ រដ្ឋមន្ត្រី អនុរដ្ឋមន្ត្រី និងជំនួយការសមាជិកសភាអង់គ្លេសចំនួន៤៣ នាក់បានលាលែងពីតំណែង។ នាយករដ្ឋមន្ត្រី Johnson កំពុងប្រឈមមុខនឹងរឿងអាស្រូវ និងការរិះគន់ជាបន្តបន្ទាប់ចំពោះការធ្វើពិធីជប់លៀងចំពេលមានការចាក់សោរ Covid-19 របស់ចក្រភពអង់គ្លេសនៅឆ្នាំ២០២០។ សម្ពាធលើនាយករដ្ឋមន្ត្រីអង់គ្លេសត្រូវបានគេរំពឹងថានឹងកើនឡើង ខណៈដែលអ្នកសេដ្ឋកិច្ចបានព្យាករណ៍ថាប្រទេសនេះមានហានិភ័យក្នុងការឈានចូលដល់វិបត្តិសេដ្ឋកិច្ចដោយសារតែបច្ចុប្បន្ន។ភាពមិនប្រាកដប្រជាទាក់ទងនឹងអតិផរណានិងវិបត្តិប្រេងឥន្ធនៈសកល។
លោក បូរីស ចនសុន ចូលកាន់អំណាចនៅ ខែកក្កដា ឆ្នាំ២០១៩ បន្ទាប់មកនៅខែមករា ដើមឆ្នាំ២០២០ លោកបានសម្តេច ជោគជ័យ ដកខ្លួនអង់គ្លេសចេញពីសហភាពអឺរ៉ុប ទោះបីជាក្នុងតម្លៃណាក៏ដោយ។ពួកអ្នកគាំទ្រការផ្តាច់ខ្លួនពីអឺរ៉ុប ចាត់ទុករូបលោក ថាជាវីរបុរស ផង។ លោក បូរីស ចនសុន អាយុ៥៨ឆ្នាំ បានក្លាយជានាយករដ្ឋមន្ត្រីអង់គ្លេសទី១ ដែលជួបរឿងធវ្ើឲ្យលោកបាត់ប្រជាប្រីយ៍ខ្លាំងជាងគេ ក្នុងប្រវត្តិសាស្ត្រនយោបាយអង់គ្លេស។ពោលគឺមានការភូតកុហកច្រើននៅក្នុងដំណើរការដឹកនាំជាតិ, នាំឲ្យមានកំហឹងប្រជាជន, ការធុញទ្រាន់ចំពោះអ្នកនយោបាយនិងអ្នកតំណាងរាស្ត្រ ហើយបង្កឲ្យមានចលនាប្រឆាំងច្រើននៅក្នុងសង្គម។ មិនតែប៉ុណ្ណោះ ក្រោមការដឹកនាំរបស់លោក គឺអង់គ្លេសបានជួបនឹងបញ្ហាអតិផរណាទំនេញ ដល់ទៅ៩% ដែលគេពុំធ្លាប់ជួបទេ ពីមុនមក។
បញ្ហាជាបន្តបន្ទាប់ គួរឲ្យកត់សម្គាល់ គឺចាប់តាំងតែពីពេលមានរឿងអាស្រូវ ផឹកស៊ីជប់លៀង នៅក្នុងនិវេសដ្ឋាននាយករដ្ឋមន្ត្រី ខរំលោភច្បាប់ប្រឆាំងកូវីតណៈពេលដែល នគរអង់គ្លេស និងពិភពលោក កំពុងស្ថិតក្នុងការបិទខ្ទប់ ដោយកូវីដ១៩ កាលពីឆ្នាំ ២០២១។ នៅមានរឿងអាស្រូវផ្លូវភេទជាច្រើននៅក្នុងសភា ជាក់ស្តែង មានតំណាងរាស្ត្រម្នាក់ដែលជាប់ចោទពីបទចាប់រំលោភត្រូវនគរបាលចាប់ខ្លួន រួចត្រូវដោះលែងវិញ។ តំណាងរាស្ត្រម្នាក់ទៀតបានលាចុះពីតំណែងក្នុងខែមេសា ក្រោយពីបានមើលរឿងកុនកូនជ្រូក អាសអាភាសលើទូរស័ព្ទដៃ នៅក្នុងមន្ទីររដ្ឋសភាជាតិជាដើម។ក្រៅពីនេះអង់គ្លេសក៏បាននិងកំពុងប្រឈមការផ្តាច់ខ្លួនប្រកាសឯករាជ្យរបស់ស្កុតលែនផងដែរ។
បញ្ហានេះលោក បូរីស ចនសុន បាននិយាយនៅក្នុងលិខិតមួយច្បាប់ឆ្លើយតបទៅកាន់ ប្រមុខរដ្ឋាភិបាលរបស់ស្កុតលែន គឺលោកស្រី នីកូឡា ស្ទើចិន (Nicola Sturgeon កាលពីថ្ងៃទី៦ក្កដាថា ឥឡូវមិនមែនជាពេលត្រូវ ងាកទៅផ្តោតលើសំណួរនៃ ការរៀបចំការបោះឆ្នោតប្រជាមតិ ស្តីពីឯករាជ្យរបស់ស្កុតលែននោះឡើយ។ នេះបើតាមការដកស្រង់ការផ្សាយពី ទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី៧ ខែកក្កដា ឆ្នាំ២០២២។
កាលពីសប្តាហ៍មុន លោកស្រី Sturgeon បានប្រកាសពីផែនការ ដើម្បីរៀបចំការបោះឆ្នោតប្រជាមតិ ស្តីពីឯករាជ្យជាលើកទី២ នៅខែតុលា ឆ្នាំ២០២៣ ហើយបានប្តេជ្ញាថា លោកស្រីនឹងប្រើវិធានការតាមផ្លូវច្បាប់ ប្រសិនបើរដ្ឋាភិបាលអង់គ្លេសរារាំង។ ក្នុងលិខិតឆ្លើយតបទៅកាន់លោកស្រី Sturgeon លោក ចនសុន បានលើកឡើងដូច្នេះថា «ស្របពេលដែលប្រទេសយើងកំពុងប្រឈមនឹង បញ្ហាមិនធ្លាប់មានជាច្រើនទាំងក្នុង និងនៅក្រៅប្រទេស ខ្ញុំមិនអាចយល់ស្របថា ឥឡូវជាពេលដែលគួរត្រឡប់ទៅរកសំណួរ ដែលត្រូវបានឆ្លើយយ៉ាងច្បាស់រួចមកហើយ ដោយប្រជាជនស្កុតលែន កាលពីឆ្នាំ២០១៤ នោះឡើយ»។
ឆ្លើយតប វិញនោះ លោកស្រី Sturgeon បានបង្ហោះសារដូច្នេះវិញថា «ខ្ញុំចង់បញ្ជាក់ឱ្យច្បាស់ថា ស្កុតលែននឹងមានឱកាស ដើម្បីជ្រើសរើសឯករាជ្យរបស់ខ្លួន ជាថ្មីម្តងទៀត។ ខ្ញុំសង្ឃឹមថា ការបោះឆ្នោតប្រជាមតិមួយ អាចនឹងធ្វើឡើងនៅថ្ងៃទី១៩ ខែតុលា ឆ្នាំ២០២៣ ប៉ុន្តែបើមិនអាចតាមវិធីនេះទេ គឺតាមរយៈការបោះឆ្នោតសកល។ ប្រជាធិបតេយ្យរបស់ស្កុតលែន នឹងមិនក្លាយជា អ្នកទោសរបស់នាយករដ្ឋមន្ត្រីអង់គ្លេសរូបនេះ ឬក៏នាយករដ្ឋមន្ត្រីអង់គ្លេសរូបណាផ្សេងទៀត ជាដាច់ខាត»។គួរបញ្ជាក់ថា ក្នុងការបោះឆ្នោតប្រជាមតិ កាលពីឆ្នាំ២០១៤ ប្រជាជនស្កុតលែនបានបោះឆ្នោតក្នុងសំឡេងគាំទ្រ ៥៥ភាគរយ ទល់នឹងសំឡេងប្រឆាំង៤៤ភាគរយ ដើម្បីបន្តស្ថិតនៅក្នុងចក្រភពអង់គ្លេស.។