ការគាំទ្រលោកប្រធានាធិបតីត្រាំធ្លាក់ចុះធ្វើឲ្យស្រពិចស្រពឹលសម្រាប់អាណត្តិទី២
25-April-2025 / ព័ត៌មានអន្តរជាតិ
អាមេរិក៖ ការស្ទង់មតិមួយរបស់បណ្តាញសារព័ត៌មានវ៉ាស៊ិនតោប៉ុស្តិ( Washington Post) និងអាប៊ីស៊ី( ABC) ប្រកាស កាលពីថ្ងៃទី១១ ខែកញ្ញា បង្ហាញថា ស្ថានភាពសេដ្ឋកិច្ចរបស់អាម៉េរិក គឺជាប្រធានបទដ៏សំខាន់បំផុត នៅក្នុងការបោះឆ្នោតជ្រើសរើសប្រធានាធិបតីអាម៉េរិក នៅឆ្នាំ២០២០ ខាងមុខនេះ។
ចំនួនពលរដ្ឋគាំទ្រលោក ត្រាំ បានធ្លាក់ចុះយ៉ាងខ្លាំង រហូតដល់ត្រឹមតែ ៣៨ភាគរយ ខណៈការស្ទង់មតិ នៅខែកក្កដា កន្លងមក មានការគាំទ្រ ចំនួន៤៤ភាគរយ។ នៅក្នុងការស្ទង់មតិនោះផងដែរ ពលរដ្ឋអាម៉េរិក បានប្រឆាំងយ៉ាងខ្លាំងទៅលើវិធីសាស្ត្រដោះស្រាយវិវាទ នៅក្នុងសង្គ្រាមពាណិជ្ជកម្ម រវាងអាម៉េរិក និង ចិន។ នៅក្នុងចំណោមអ្នកដែលត្រូវស្ទង់មតិនោះ មានតែ៣៥ភាគរយប៉ុណ្ណោះ បានយល់ស្របទៅនឹងដំណោះស្រាយរបស់លោក ត្រាំ ជុំវិញសង្គ្រាមពាណិជ្ជកម្មនេះ។
ប្រសិនបើអ្នកគាំទ្រធ្លាក់ចុះយ៉ាងខ្លាំងនោះ លោកប្រធានាធិបតីអាម៉េរិក ដូណាល់ ត្រាំ អាចបាត់បង់ក្តីសង្ឃឹម ក្នុងការជាប់ឆ្នោតជាប្រធានាធិបតីអាម៉េរិកសាជាថ្មី នៅក្នុងអាណត្តិទីពីររបស់លោក ក្នុងការបោះឆ្នោត នាឆ្នាំ២០២០ខាងមុខនេះ។ប្រហែលដោយសារចឹងហើយបានជាប្រធានាធិបតីអាមេរិក ដូណាល់ ត្រាំ បានប្រកាសថា នឹងត្រូតពិនិត្យចុះកិច្ចព្រមព្រៀងពាណិជ្ជកម្ម បណ្តោះអាសន្ន ជាមួយចិន មុនពេលពិភាក្សាស្តីពីកិច្ចព្រមព្រៀងផ្លូវការបញ្ចប់សង្គ្រាម អូសបន្លាយរយៈពេលជាងមួយឆ្នាំកន្លងមក។
សារព័ត៌មានរ៉យទ័របានផ្សាយថា ប្រសិនបើមានកិច្ចព្រមព្រៀងនោះគឺជាជំហានវិជ្ជមាននៅក្នុងកិច្ចពិភាក្សាខាងមុខ ដើម្បីឈានដល់កិច្ចព្រមព្រៀងជាផ្លូវការ។ កាលពីថ្ងៃទី១២ ខែកញ្ញាកន្លងមក ចិនបាននាំចូលសណ្តែកសៀងពីអាមេរិក ដល់ទៅ១០នាវា គឺជាចំនួនច្រើនបំផុត មិនធ្លាប់មានចាប់តាំងពី ខែមិថុនា មកទលពេលនេះ។ នៅពេលជាមួយគ្នានោះដែរ អាមេរិកក៏បានសម្រេចពន្យាពេលដំឡើងពន្ធលើទំនិញនាំចូលពីចិនដូចគ្នា។ ចិនបាន ទិញសណ្តែកពីអាមេរិក យ៉ាតិច៦សែនតោន ក្នុងកិច្ចពិភាក្សា ហើយ សណ្តែកទាំងនោះនឹងទៅដល់ប្រទេសចិន ក្នុងអំឡុងខែតុលានិងដល់ ខែធ្នូ ឆ្នាំ២០១៩។
អាចនិយាយបានថា ប្រធានាធិបតី អាមេរិកដូណាលត្រាំ និងប្រធានាធិបតីចិន ស៊ី ជីនពីន បានសម្រេច ថយមួយជំហានម្នាក់នៅក្នុងសង្គ្រាមពាណិជ្ជកម្ម ទើបអាចស្វែងរកដំណោះស្រាយឈានដល់កិច្ចព្រមព្រៀង ។ សកម្មភាពទាំងនោះត្រូវបានប្រទេសជាច្រើននៅជុំវិញពិភពលោក អបអរសាទរ ហើយបង្ហាញពីក្តីសង្ឃឹមថា មហាអំណាចសេដ្ឋកិច្ចពិភពលោកទាំងពីរនឹងបញ្ចប់សង្គ្រាមពាណិជ្ជកម្ម ក្នុងពេលឆាប់ៗនេះ ដើម្បីបញ្ជៀសផលប៉ះពាល់ដល់សេដ្ឋកិច្ចពិភពលោកកាន់តែខ្លាំង ។
ក្រៅពីរឿងសេដ្ឋកិច្ចលោកប្រធានាធិបតីត្រាំក៏ប្រឈមនិងការបាត់បង់ទំនុកចិត្តពីសម្ពន្ធ័មិត្តរបស់ខ្លួននៅអឺរ៉ុបផងដែរ។នៅក្នុងសុន្ទរកថារបស់អធិកាបតីអាល្លឺម៉ង់លោកស្រី Merkel ទៅកាន់រដ្ឋសភាកាលពីថ្ងៃទី១១ ខែកញ្ញា ថា អាមេរិក ពេលនេះមិនអាចការពារឲ្យអឺរ៉ុបបានទៀតឡើយ ដូច្នេះ សហគមន៍អឺរ៉ុប ចាំបាច់ត្រូវតែបង្កើនសកម្មភាពការពារដោយខ្លួនឯង។«អាមេរិក ជាប្រទេសមហាអំណាចសេដ្ឋកិច្ច និងយោធា ហើយអឺរ៉ុប ត្រូវរងគំនាបជាច្រើនពីអាមេរិក ត្រូវបង្ខំចិត្តឲ្យធ្វើតាម អាមេរិក បើទោះបីអឺរ៉ុបមិនចង់ធ្វើក្តី។
នៅពេលនេះ អាមេរិក មិនអាចការពារអឺរ៉ុបបាន ដូច ដែលអាមេរិកធ្លាប់បានធ្វើ ក្នុងរយៈពេលនៃសង្គ្រាមត្រជាក់នោះឡើយ»។ លោកស្រីបន្តទៀតថា អឺរ៉ុប ចាំបាច់ត្រូវតែបង្កើនសកម្មភាពការពារខ្លួន ក្នុងពេលដែល សន្តិសុខ នយោបាយនៅលើពិភពលោកកំពុងតែប្រែប្រួលយ៉ាងខ្លាំង។
ទំនាក់ទំនងរវាងអាមេរិក និងអាល្លឺម៉ង កាន់តែតានតឹង ចាប់តាំងពីប្រធានាធិបតីដូណាលត្រាំឡើងកាន់តំណែងដឹកនាំអាមេរិក នៅ ថ្ងៃទី២០ ខែមករា ឆ្នាំ២០១៧។ លោកត្រាំតែងតែរិះគន់ដល់ការចូលរួម បរិចាគប្រាក់សម្រាប់ អង្គការណាតូ គឺមានចំនួនតិចជាង ការសន្យា ។ នៅក្នុងសុន្ទរកថារបស់លោកស្រី Merkel សង្គ្រាមពាណិជ្ជកម្មរវាងអាមេរិក និងចិនកំពុងតែបង្កផលប៉ះពាល់យ៉ាងខ្លាំង ដល់វិស័យនាំចេញរបស់អាល្លឺម៉ង់។
