វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 7735 នាក់
ម្សិលមិញ 6961 នាក់
សរុប 15995093 នាក់
ភ្នំពេញ៖ ដោយបន្ទោសទៅលើវិបត្តិឥទ្ធិពលសង្គ្រាមដែលរុស្ស៊ីលុកលុយអ៊ុយក្រែនបណ្ដាលឱ្យពិភពលោកជួបនឹងបញ្ហាសេដ្ឋកិច្ចលោកជាចាន់តូអគ្គនាយកធនាគាជាតិកម្ពុជាបានឲ្យដឹងថាប្រទេសកម្ពុជាយើងទទួលរងផលប៉ះពាល់ពីវិបត្តិប្រេងដល់ខ្លាំងក្លានេះដែរបង្កកំណើនអតិផរណានៅក្នុងរង្វង់៧,២០ ភាគរយក្នុងខែឧសភា២០២២ដែលមិនធ្លាប់មានក្នុងរយៈពេលជាង១០ឆ្នាំមកនេះ។
ថ្លែងនៅក្នុងសន្និបាតបូកសរុបលទ្ធផលការងារប្រចាំឆមាសទី១ និងទិសដៅការងារឆមាសទី២ ឆ្នាំ២០២២ របស់ធនាគារជាតិនៃកម្ពុជានាព្រឹកថ្ងៃពុធនេះលោក ជា ចាន់តូ បានអះអាងថា ធនាគារជាតិនៃកម្ពុជា បានថ្លឹងថ្លែងការអនុវត្តនយោបាយរូបិយវត្ថុ ដើម្បីគ្រប់ គ្រងសម្ពាធអតិផរណាផង និងគាំទ្រការស្តារកំណើនសេដ្ឋកិច្ចផង។ បើតាមលោកទេសាភិបាលធនាគារជាតិ នៃកម្ពុជា ដើម្បីរួមចំណែកគ្រប់គ្រងសម្ពាធអតិផរណា អត្រាប្តូរប្រាក់ត្រូវបានបន្តរក្សាឱ្យមានស្ថិរភាព សំដៅការពារអំណាចទិញរបស់ប្រាក់រៀល ក៏ដូចជាប្រាក់ ចំណូលរបស់ប្រជាពលរដ្ឋងាយរងគ្រោះ។
បើតាមការវាយតម្លៃ ការកើនឡើងនៃអតិផរណានេះ មិនមែនមានតែនៅកម្ពុជានោះទេ។ ជាក់ស្តែង នៅខែ មិថុនា ឆ្នាំ២០២២នេះ អត្រាអតិផរណានៅអាមេរិកបានកើនឡើងដល់ ៩,១% ដែលជាកម្រិតខ្ពស់បំផុតក្នុង រយៈពេល ៤០ឆ្នាំចុងក្រោយនេះ ខណៈដែលអតិផរណានៅតំបន់ចាយប្រាក់អឺរូបានកើនដល់ ៨,៦% ដែលជាអត្រាខ្ពស់បំផុតចាប់តាំងពីការបង្កើតប្រាក់អឺរ៉ូមក ។ ជា មួយគ្នានេះ ការដំឡើងអត្រាការប្រាក់គោលនៅសហរដ្ឋ អាមេរិក បាននាំឱ្យមានលំហូរមូលធនចូលសហរដ្ឋ អាមេរិក ដែលធ្វើឱ្យតម្លៃប្រាក់ដុល្លារអាមេរិកកើនឡើង។ ជាលទ្ធផល រូបិយប័ណ្ណនៅប្រទេសជាច្រើន បានថយថ្លៃធៀបនឹងដុល្លារអាមេរិក។ ចំណែក នៅប្រទេសកំពុងលូតលាស់ និងកំពុងអភិវឌ្ឍន៍វិញ ទុនបម្រុងអន្តរជាតិ ក៏បានស្រកចុះផងដែរ ដូចជា ប្រទេសឡាវ ស្រីលង្កា និងបង់ក្លាដែស ជាដើម ដែលបង្កជាបញ្ហាប្រឈមដល់ការអនុវត្តនយោបាយរូបិយវត្ថុនិងទិញទំនិញក្រៅប្រទេស។
ក្រៅពីរឿងសង្គ្រាមឈ្លានពានអ៊ុក្រែន ការបន្តអនុវត្តនយោបាយគ្មានកូវីដ-១៩ (Zero COVID policies) យ៉ាងម៉ឺងម៉ាត់នៅប្រទេសចិន ក៏បានបង្កឱ្យមានការរអាក់រអួលដល់ខ្សែច្រវាក់ផលិតកម្មនិងផ្គត់ផ្គង់ទាំងក្នុងស្រុកនិងលើពិភពលោកផងដែរ។ គួបផ្សំនឹងការធ្លាក់ចុះនៃវិស័យអចលនទ្រព្យ សេដ្ឋកិច្ចចិនត្រូវបានរំពឹងថា នឹងថយល្បឿនគួរឱ្យកត់សម្គាល់ ដែលបាន និងកំពុងជះឥទ្ធិពលអវិជ្ជមានដល់ការវិនិយោគ ពាណិជ្ជកម្មអន្តរជាតិ និងវិស័យទេសចរណ៍ពិភពលោក.។