វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 235 នាក់
ម្សិលមិញ 5378 នាក់
សរុប 14079528 នាក់
អ៊ុយក្រែន៖នាយករដ្ឋមន្ត្រីអ៊ីតាលីលោក Mario Draghi, ប្រធានាធិបតីបារាំងលោក Emmanuel Macron និងអធិការបតីអាល្លឺម៉ង់លោក Olaf Scholz បានធ្វើដំណើរតាមរថភ្លើងរួមគ្នាទាំងយប់ ទៅកាន់ទីក្រុង កៀវ ដើម្បីឆ្លើយតបទៅនឹងការរិះគន់ សម្រាប់ការគាំទ្រមិនសូវកក់ក្តៅរបស់ពួកគេ ចំពោះប្រទេសអ៊ុយក្រែន។ប្រធានាធិបតីប្រទេសប៉ូឡូញក៏បានធ្វើដំណើរទស្សនៈកិច្ចនៅអ៊ុយក្រែនស្របគ្នានោះដែរ។ដំណើរនេះកើតឡើងមួយថ្ងៃ មុនពេលគណៈកម្មការអឺរ៉ុបគ្រោងនឹងចេញអនុសាសន៍មួយ អំពីឋានៈអ៊ុយក្រែនជាបេក្ខជនសម្រាប់សមាជិកភាពសហភាពអឺរ៉ុប។
ប្រធានាធិបតីបារាំងលោក Macron និយាយថា “យើងបានឈានដល់ចំណុចមួយ ដែលយើងត្រូវបញ្ជូនសញ្ញានយោបាយច្បាស់លាស់ថា ពួកយើងជាជនជាតិអឺរ៉ុប ឆ្ពោះទៅរកអ៊ុយក្រែន និងប្រជាជនរបស់ពួកគេ នៅពេលដែលពួកគេកំពុងទប់ទល់ដោយវីរភាព”។គួរបញ្ជាក់ថា ការតស៊ូរបស់អ៊ុយក្រែន គឺពឹងផ្អែកយ៉ាងខ្លាំងលើការគាំទ្រផ្នែកយោធា ពីសំណាក់បរទេស។
ទីភ្នាក់ងារសារព័ត៌មាន Reuters នៅថ្ងៃព្រហហ្បតិ៍ ទី១៦ ខែមិថុនា ឆ្នាំំ២០២២បានឲ្យដឹងថារដ្ឋមន្ត្រីការពារជាតិរបស់ប្រទេសអាល្លឺម៉ង់ លោកស្រី គ្រីស្ទីន ឡាំប្រ៊ិច (Christine Lambrecht) បាននិយាយនៅថ្ងៃព្រហស្បតិ៍ទី១៦មិថុនាថា ប្រព័ន្ធបាញ់គ្រាប់រ៉ុក្កែត ដែលអាល្លឺម៉ង់បានសន្យាផ្តល់ទៅឲ្យទីក្រុងកៀវ អាចនឹងបញ្ជូនទៅដល់អ៊ុយក្រែន នៅអំឡុងខែកក្កដា ឬ ខែសីហា ខាងមុខនេះ បន្ទាប់ពីកងទ័ពអ៊ុយក្រែន ទទួលលការបណ្តុះបណ្តាលពី របៀបប្រើប្រាស់អាវុធទាំងនេះរួចរាល់។
លោកស្រី ឡាំប្រ៊ិច បានប្រាប់អ្នកសារព័ត៌មាន កំលុងពេលទៅដល់ទីក្រុងព្រុចសែល សម្រាប់កិច្ចពិភាក្សានៅថ្ងៃទី២ ជាមួយសមភាគី NATO យ៉ាងដូច្នេះថា «ការហ្វឹកហ្វឺនលើរបៀបប្រើប្រព័ន្ធបាញ់គ្រាប់រ៉ុក្កែតទាំងនេះ អាចនឹងចាប់ផ្តើមនាចុងខែមិថុនា ដូច្នេះមានន័យថា អាល្លឺម៉ង់អាចបញ្ជូនឱ្យដល់ដៃអ៊ុយក្រែន នៅចុងខែកក្កដា ឬដើមខែសីហា»។ដោយឡែកប្រធានាធិបតីអាមេរិក លោក Joe Biden បានប្រកាសថា ទីក្រុងវ៉ាស៊ីនតោន នឹងផ្តល់ជំនួយផ្នែកសន្តិសុខបន្ថែម ក្នុងទំហំទឹកប្រាក់ ១ពាន់លានដុល្លារទៀត ដែលក្នុងជំនួយនោះរួមមានកាំភ្លើងធំ និងអាវុធផ្សេងៗ។
ក្នុងកញ្ចប់ជំនួយថ្មីនេះរួមមាន គ្រាប់កាំភ្លើងធំ MLRS, កាំភ្លើងយន្ត M777 ចំនួន ១៨គ្រឿង និងរថយន្តយុទ្ធសាស្ត្រដើម្បីសណ្តោងពួកគេនិងគ្រាប់កាំភ្លើង១៥៥មិល្លីម៉ែត្រ ចំនួន៣៦ ០០០គ្រាប់។ចាប់តាំងពីប្រទេសរុស្ស៊ីបានចាប់ផ្តើមយុទ្ធនាការយោធារបស់ខ្លួននៅក្នុងប្រទេសអ៊ុយក្រែនមេដឹកនាំអឺរ៉ុប និងអង្គការអន្តរជាតិជាច្រើនបានធ្វើដំណើរទៅកាន់ទីក្រុងគៀវដើម្បីបង្ហាញពីសាមគ្គីភាព និងការគាំទ្រសម្រាប់ប្រទេសនេះ។
មានប្រធានរឿងសំខាន់ៗមួយចំនួន ដែលថ្នាក់ដឹកនាំអឺរ៉ុបទាំង៤រូបលើកយកទៅជជែក ពិភាក្សាជាមួយលោកហ្សេឡេស្គី។ សម្រាប់អ៊ុយក្រែន រឿងអាវុធជារឿងអាទិភាពដើម្បីអាចឈ្នះ និងអាចមានប្រៀបលើទាហានរុស្ស៊ីនៅលើសមរភូមិ។ តែអ្វីដែលលោកហ្សេឡេនស្គីបានអំពាវនាវយ៉ាងទទូច គឺសុំឲ្យបារាំង អាល្លឺម៉ង់ និងអ៊ីតាលីប្រគល់គ្រឿងសព្វាវុធធុនធ្ងន់បន្ថែមទៀត។ក្រៅពីនោះការស្វែងរកកិច្ចព្រមព្រៀងដើម្បីរំដោះផលិតផលគ្រាប់ធញ្ញជាតិ និងស្រូវសាលីអ៊ុយក្រែនជាច្រើនម៉ឺនតោនដែលកំពុងជាប់គាំងនៅកំពង់ផែអ៊ុយក្រែន Odessa នៃសមុទ្រខ្មៅដែលជារឿងសំខាន់ និងអាទិភាពដើម្បីកម្រិតហានិភ័យនៃវិបត្តិកង្វះស្បៀងក្នុងលោក ពិសេសនៅក្នុងបណ្តាប្រទេសមេឌីទែរ៉ាណេ។ តែមកដល់ពេលនេះ ការចរចាហាក់កំពុងជួបការលំបាកដោយសារតែអ៊ុយក្រែនបដិសេធមិនព្រមដោះមីនដែលខ្លួនពង្រាយនៅកំពង់ផែដើម្បីកុំឲ្យនាវាចម្បាំងរុស្ស៊ីអាចចូលបាន។ បារាំងបានដាក់ខ្លួនដើម្បីចូលរួមជួយដោះស្រាយរឿងនេះ តែមិនបានបញ្ជាក់លំអិតពីវិធានការដែលត្រូវជួយទេ។
ប្រធានរឿងសំខាន់ចុងក្រោយទាក់ទងនឹងសំណើសុំចូលជាសមាជិកសហភាពអឺរ៉ុបរបស់អ៊ុយក្រែន។ នីតិវិធីសុំចូលជាសមាជិកសហភាពអឺរ៉ុបត្រូវប្រើពេលយូរ និងមានឧបសគ្គច្រើន។ តែអ្វីដែលអ៊ុយក្រែនចង់បានភ្លាមៗនៅចំពោះមុខពេលនេះ គឺសុំឲ្យសហភាពអឺរ៉ុបទទួលយកបេក្ខភាពអ៊ុយក្រែនជាផ្លូវការនៅក្នុងកិច្ចប្រជុំក្រុមប្រឹក្សាអឺរ៉ុបនៅថ្ងៃទី២៣ និង ២៤ មិថុនាខាងមុខ។ តាមធម្មតា គណកម្មការអឺរ៉ុបអាចផ្តល់ភ្លើងខៀវនៅថ្ងៃសុក្រ ទី១៧ មិថុនា។ តែគឺសមាជិកទាំង ២៧ប្រទេសដែលជាអ្នកសម្រេចចុងក្រោយក្នុងសំឡេងឯកភាពជាឯកច្ឆន្ទ។ តែពេលនេះ មានប្រទេសសមាជិកខ្លះបានដាក់លក្ខខណ្ឌមួយចំនួនរួចជាស្រេច ពិសេសហូឡង់ ដាណឺម៉ាក និងអូទ្រីសបានលើកឡើងពីបញ្ហានីតិរដ្ឋ និងការប្រឆាំងអំពើពុករលួយ។
សូមបញ្ជាក់ថាក្រៅពីពីមេដឹកនាំខាងលើនេះកាលពីខែមេសាមេដឹកនាំនៃប្រទេសអង់គ្លេស ប៉ូឡូញ លីទុយអានី ឡាតវី និងអេស្តូនី បានទៅទស្សនាទីក្រុងគៀវតាមកប៉ាល់បន្ទាប់ពីរុស្ស៊ីបានប្រកាសដកកងកម្លាំងរបស់ខ្លួនចេញពីជាយក្រុងគៀវបាន១០ថ្ងៃ។នៅពេលដែលអគ្គលេខាធិការអង្គការសហប្រជាជាតិលោក Antonio Guterres និងនាយករដ្ឋមន្ត្រីប៊ុលហ្គារីលោក Kiril Petkov បានធ្វើទស្សនកិច្ចនៅទីក្រុងគៀវកាលពីថ្ងៃទី២៨ខែមេសា កងកម្លាំងរុស្ស៊ីបានបាញ់រ៉ុក្កែតចូលទៅក្នុងទីក្រុងដោយបំផ្លាញផ្នែកមួយនៃអគារផ្ទះល្វែងកម្ពស់២៥ជាន់នៅភាគខាងលិចទីក្រុងគៀវ។ កាលនោះរដ្ឋមន្ត្រីការបរទេសអ៊ុយក្រែន លោក Dmytro Kuleba បាននិយាយនៅពេលនោះថា នេះគឺជាវិធីរបស់រុស្ស៊ីក្នុងការ “បង្ហាញអាកប្បកិរិយារបស់ខ្លួនចំពោះអ៊ុយក្រែន អឺរ៉ុប និងពិភពលោក”។
ដំណើរទស្សនកិច្ចរបស់មេដឹកនាំប្រទេសអាល្លឺម៉ង់ បារាំង និងអ៊ីតាលី ធ្វើឡើងក្នុងបរិបទដែលយុទ្ធនាការយោធាពិសេសរបស់រុស្ស៊ីបានបង្វែរការផ្តោតអារម្មណ៍របស់ខ្លួនទៅកាន់តំបន់Donbassភាគខាងកើតអ៊ុយក្រែនជាកន្លែងដែលមានលក្ខខណ្ឌសមរភូមិសមរភូមិសម្រាប់រុស្ស៊ីដើម្បីទាញយកផលប្រយោជន៍តំបន់នោះជាមួយនឹងអាវុធធុនធ្ងន់។ កងកម្លាំងរុស្ស៊ីកំពុងគ្រប់គ្រងភាគច្រើននៃទីក្រុង Severodonetsk ដែលជាទីតាំងចុងក្រោយមួយរបស់កងកម្លាំងអ៊ុយក្រែននៅក្នុងខេត្ត Lugansk ។ប្រសិនបើរុស្ស៊ីចាប់យក Severodonetsk និង Lysychansk នោះរុស្ស៊ីនឹងគ្រប់គ្រងខេត្ត Lugansk ទាំងស្រុង ដោយហេតុនេះបង្កើតជាច្រកផ្លូវទៅកាន់ទីក្រុង Sloviansk និង Kramatorsk ដែលជាទីក្រុងក្នុងតំបន់ Donetsk ។ ទាំងនេះនឹងក្លាយជាគោលដៅចុងក្រោយសម្រាប់រុស្ស៊ីក្នុងការបំពេញគោលដៅ “រំដោះ” តំបន់ Donbass នៅភាគខាងកើតអ៊ុយក្រែន៕យោងតាមCNN