រុស្ស៊ីចាប់ផ្តើមកំទេចក្រុងម៉ារីវប៉ូលក្នុងពេលអាមេរិកនិងអង់គ្លេសបញ្ជូនអាវុធចូលអ៊ុយក្រែន
21-September-2026 / ព័ត៌មានអន្តរជាតិ
ប្រទេសអ៊ុយក្រែន៖រុស្ស៊ីចាប់ផ្តើមទម្លាក់គ្រាប់បែកកំទេចលេណដ្ឋានលើរោងចក្រដែកម៉ារីវប៉ូលមួយ កន្លែងដែលពួកយុទ្ធជនអ៊ុយក្រែនកំពុងសម្ងំលាក់ខ្លួនមិនព្រមទម្លាក់អាវុធចុះចាញ់។ លោក ដេនីស ប្រូកូប៉េនកូ(Denys Prokopenko)ដែលទាហានរបស់គាត់កំពុងតស៊ូប្រឆាំងនឹងកងកម្លាំងរុស្ស៊ីនៅក្នុងទីក្រុងយុទ្ធសាស្ត្រភាគខាងត្បូងនេះ បាននិយាយក្នុងសារជាវីដេអូថា គ្រាប់បែកត្រូវបានទម្លាក់លើរោងចក្រទោះជាមានជនស៊ីវិលជាច្រើនកំពុងជ្រកនៅក្នុងរូងក្រោមដីនៃរោងចក្រនេះក្តី។លោកថា «កងកម្លាំងរុស្ស៊ី និងកងកម្លាំងតំណាងរបស់គេ…ដឹងថាមានជនស៊ីវិលតែពួកគេនៅតែបាញ់មកលើរោងចក្រ»។
កងទ័ពរុស្ស៊ី បានចាប់ផ្តើម បាញ់គ្រាប់កាំភ្លើងធំ និងមីស៊ីលច្រើនខ្លាំងណាស់ គិតចាប់ពីយប់ថ្ងៃចន្ទ ម្សិលមិញមក។ ផ្អែកតាមលោក Serguii Gaidai អភិបាលអ៊ុយក្រែន នៃតំបន់លូហ្កង់ស្គ៍ គឺថាកងទ័ពរុស្ស៊ីកំពុងទម្លាក់គ្រាប់ នៅ Roubijné Popasna។ ចំណែកក្រុង Kreminna បានធ្លាក់ទៅក្នុងដៃកងទ័ពរុស្ស៊ីហើយ។ លោក Serguii Gaidai ក៏បានអំពាវនាវផងដែរ ឲ្យរុស្ស៊ីត្រូវតែបើកច្រកមនុស្សធម៌ ដើម្បីឲ្យប្រជាជនស៊ីវីលចាកចេញពីទីលានប្រយុទ្ធនៅតំបន់លូហ្កងស្ក៍។
នៅក្នុងវីដេអូ ផ្សាយផ្ទាល់តាមបណ្តាញ Telegram កាលពីយប់ថ្ងៃចន្ទម្សិលមិញ លោកវ្លូឌីមៀរ ហ្សេឡេនស្គី បានលើកឡើងថា “យើងអាចបញ្ជាក់បានហើយថា ពេលនេះគឺកងទ័ពរុស្ស៊ីបានចាប់ផ្តើមបើកការវាយប្រហារទ្រង់ទ្រាយធំ មកលើតំបន់ដុនបាសហើយ។ ការវាយប្រហារ ដែលពួករុស្ស៊ីបានត្រៀមរៀបចំអស់ជាច្រើនថ្ងៃមកហើយ។ កម្លាំងទាហានរុស្ស៊ីច្រើនណាស់ ដែលនឹងមកចូលរួមក្នុងការវាយប្រហារនេះ”។ តែលោកហ្សេឡេនស្គី បានបន្ថែមថា ទោះជាទ័ពរុស្ស៊ីមានគ្នាច្រើនយ៉ាងណាក៏ដោយ ក៏កងទ័ពអ៊ុយក្រែនមិនរាថយដែរ គឺនឹងបន្តប្រយុទ្ធការពារទឹកដីអ៊ុយក្រែនជានិច្ច។
រុស្ស៊ីប៉ាន់ស្មានថា ទាហានអ៊ុយក្រែនប្រមាណ២.៥០០នាក់និងពួកទាហានស៊ីឈ្នួលបរទេសប្រហែល៤០០នាក់កំពុងសម្ងំនៅក្នុងរោងចក្រនេះ នៅពេលអាម៉េរិកបាននិយាយថាកងកម្លាំងរុស្ស៊ីជាងដប់ក្រុមកំពុងព្យាយាមវាយកំចាត់ពួកគេ។អ៊ុយក្រែនប៉ាន់ស្មានថា មនុស្សដល់ទៅ២១.០០០នាក់ត្រូវបានសម្លាប់នៅម៉ារីវប៉ូលចាប់តាំងពីទីក្រុងនេះស្ថិតក្រោមការឡោមព័ទ្ធជាច្រើនសប្តាហ៍មកនេះ ។ឧបនាយករដ្ឋមន្ត្រីអ៊ុយក្រែន បានព្រមានរុស្ស៊ីថា ការដែលរដ្ឋាភិបាលក្រុងមូស្គូមិនព្រមបើកផ្លូវមនុស្សធម៌អោយជនស៊ីវិលចេញពីទីក្រុងនេះនឹងនាំដល់ការបើកសវនាការកាត់ទោសអំពីឧក្រិដ្ឋកម្មសង្គ្រាមដោយស្របច្បាប់ តែរុស្ស៊ីបានឆ្លើយតបថា«ពួកជាតិនិយមណាស៊ីថ្មី »បានរារាំងការជម្លៀសមនុស្សចេញពីទីក្រុងនេះ។
ដោយមិនអាចវាយសម្រុកយករដ្ឋធានីកៀវបាន ទីបំផុត កងទ័ពរុស្ស៊ីបានដកថយចេញពីខាងជើងអ៊ុយក្រែន ហើយបានប្រមូលកម្លាំងឡើងវិញ ដើម្បីសម្រុកវាយប្រហារ តែនៅភាគខាងកើតទេ គឺតំបន់ដុនបាសនេះឯង។ តំបន់ដុនបាស ដែលយើងដឹងថាដែនដីមួយផ្នែក ស្ថិតក្នុងដៃរបស់ក្រុមឧទ្ទាមនិយមរុស្ស៊ី នោះគឺសាធារណរដ្ឋផ្តាច់ខ្លួន លូហ្កង់ស្គ័ និង សាធារណរដ្ឋដូណេតស៍។បើយោងតាមមន្ត្រីក្រសួងការពារជាតិអាមេរិក ដោយសុំមិនបញ្ចេញឈ្មោះ គឺរុស្ស៊ី បានបន្ថែមកម្លាំង ចំនួន១១កងវីរសេនាតូចទៀត ដែលធ្វើឲ្យចំនួនសរុប មាន៧៦កងវីរសេនាតូច នៅភាគខាងកើតអ៊ុយក្រែន។ទន្ទឹមគ្នានេះ កងទ័ពរុស្ស៊ីមិនមែនសម្រុកវាយប្រហារតែនៅខាងកើតទេ។ រុស្ស៊ីក៏នៅតែបន្តបាញ់ប្លោងមីស៊ីលទៅភាគខាងលិចដែរ ទៅលើទីតាំងយុទ្ធសាស្ត្រមួយចំនួន។ ជាក់ស្តែង កាលណពីថ្ងៃម្សិលមិញ រុស្ស៊ីបានបាញ់មីស៊ីល កម្ទេចទីតាំងស្តុកអាវុធមួយកន្លែង នៅក្បែរក្រុង Lvin។
នៅលូហ្កង់ស្ក៍ និង ដូណេតស៍ កងទ័ពអ៊ុយក្រែនអះអាងថា បានបាញ់កម្ទេចរថក្រោះរុស្ស៊ីចំនួន១០ រថពាសដែកចំនួន១៨គ្រឿង រថយន្តដឹកទាហានច្រើនគ្រឿង ព្រមទាំងប្រព័ន្ធកាំភ្លើងធំ និងកាណុងកាំភ្លើងត្បាល់មួយផងដែរ។យោងតាមប្រភពព័ត៌មាន ពីមន្ទីរបញ្ចកោណ គឺយន្តហោះដឹកគ្រឿងសព្វាវុធ ចំនួន៤ជើងហោះហើរ បានហោះទៅដល់ក្បែរព្រំដែនអ៊ុយក្រែនហើយ ដើម្បីរៀបចំប្រគល់គ្រឿងសព្វាវុធ ទៅឲ្យកងទ័ពអ៊ុយក្រែន។ យន្តហោះទី៥ នឹងហោះទៅដល់ រវាងថ្ងៃស្អែកនេះហើយ។ នេះគឺជាគ្រឿងសព្វាវុធ ដែលរដ្ឋាភិបាលអាមេរិក បានសន្យាជួយអ៊ុយក្រែន ក្នុងតម្លៃសរុបចំនួន ៨០០លានដុល្លារ។
យោងតាមលោកចនឃឺប៊ី( John Kirby) អ្នកនាំពាក្យវិមានបញ្ចកោណ គឺអ្នកជំនាញកងទ័ពអាមេរិក នឹងធ្វើការបង្វឹកកងទ័ពអ៊ុយក្រែន ឲ្យចេះប្រើ ប្រព័ន្ធកាំភ្លើងធំ M777 Howitzer។ ការហ្វឹកហាត់ នឹងធ្វើនៅក្នុងប្រទេស ក្បែរខាងជាប់អ៊ុយក្រែន។ ប្រព័ន្ធកាំភ្លើងធំ M777 Howitzer គឺជាប្រព័ន្ធកាំភ្លើងធំសេរីថ្មី របស់កងទ័ពអាមេរិក។ អ្នកនាំពាក្យក្រសួងការពារជាតិអាមេរិក បញ្ជាក់ថា កងទ័ពអ៊ុយក្រែន ធ្លាប់ប្រើតែកាណុងប្រើគ្រាប់ទំហំ ១៥២មីលីម៉ែត្រ ផលិតនៅរុស្ស៊ី។ តែកាណុង M777 Howitzer ថ្មីរបស់អាមេរិក ប្រើគ្រាប់ទំហំ១៥៥មីលីម៉ែត្រ ដែលតម្រូវឲ្យកងទ័ពអ៊ុយក្រែន ត្រូវតែហ្វឹកហាត់ពីរបៀបប្រើ។
អង់គ្លេសនឹងបញ្ជូនរថពាសដែកសម្រាប់បាញ់មីស៊ីលទៅអ៊ុយក្រែនក្នុងពេលឆាប់ៗនេះ បន្ទាប់ពីរុស្ស៊ីបានចាប់ផ្តើមការវាយលុកពេញទំហឹងរបស់ខ្លួនដើម្បីគ្រប់គ្រងភាគខាងកើតរបស់ប្រទេសនេះ។
សារព័ត៌មានThe Sun បានឱ្យដឹងថា ក្រសួងការពារជាតិអង់គ្លេសបានបង្ហាញនូវរថពាសដែកបាញ់មីស៊ីលធុន Stormer High Velocity Missile (HVM)សម្រាប់អ៊ុយក្រែននៅតំបន់ទំនាបសាលីបឺរី(Salisbury Plain) កាលពីពីរសប្តាហ៍មុន ដោយកាសែតនេះបន្ថែមថា យានជំនិះទម្ងន់ ១៣ តោននេះអាចដឹកទៅធ្វើសង្គ្រាមតាមយន្តហោះដឹកជញ្ជូន C-17ក្នុងពេលតែប៉ុន្មានថ្ងៃប៉ុណ្ណោះ។
រថពាសដែក Stormer គឺផលិតដោយក្រុមហ៊ុន BAE Systems ត្រូវការមនុស្សតែបីនាក់ប៉ុណ្ណោះដើម្បីដំណើរការវា និងប្រើប្រាស់មីស៊ីលស្តាស្ត្រេក(Starstreak)ដែលអាចបាញ់ទម្លាក់យន្តហោះហោះទាបៗ។
លោកហ្សេលេនស្គីបានកំពុងអង្វរដល់មហាអំណាចលោកខាងលិចឱ្យផ្តល់អាវុធខ្លាំងៗកាន់តែច្រើនដល់គាត់ ។
លោក John Kirby បានអះអាងថា រុស្ស៊ីកំពុងតែចាប់ផ្តើមជួបការលំបាកហើយ ក្នុងវិស័យផលិតគ្រឿងសព្វាវុធទំនើប។ យោងតាមលោក John Kirby គឺថារុស្ស៊ី កំពុងតែជួបបញ្ហា មិនអាចមានគ្រឿងផ្សំបច្ចេកវិទ្យាអេឡិចត្រូនិក ទំនើប យកមកផលិតអាវុធទំនើបបានទេ។ ជាក់ស្តែង ប្រព័ន្ធបាញ់ និងមីស៊ីល បញ្ជាពីចម្ងាយ។ គ្រឿងផ្សំបច្ចេកវិទ្យាទាំងនេះ គឺផលិតនៅតៃវ៉ាន់ និងកូរ៉េខាងត្បូង។ តែឥឡូវ ប្រទេស២នេះ មិនអាចផ្គត់ផ្គង់ឲ្យរុស្ស៊ីទៀតបានទេ ព្រោះដោយសារតែទណ្ឌកម្មរបស់អាមេរិក។នៅរសៀលថ្ងៃអង្គារ៍ទី១៩មេសានេះដែរ លោក ចូ បៃដិន នឹងបើកការប្រជុំពីចំងាយមួយទៀត ជាមួយថ្នាក់ដឹកនាំក្រុមប្រទេសសម្ព័ន្ធមិត្តអាមេរិកទាំងអស់ ដើម្បីនិយាយគ្នាពីជំហានបន្ទាប់ ក្នុងការជួយអ៊ុយក្រែន។
