ក្រសួងពាណិជ្ចកម្មកម្ពុជា-EU ពិភាក្សាអំពីការសិក្សាគោលនយោបាយ និងយុទ្ធសាស្ត្រអភិវឌ្ឍន៍ឧស្សាហកម្មវាយនភណ្ឌកាត់ដេរ សម្តេចពិជ័យបន្ទាសអឺរ៉ុប
21-September-2026 / សេដ្ឋកិច្ច
ភ្នំពេញ៖ លោក សុខ សុភ័ក្ត្រ រដ្ឋលេខាធិការក្រសួងពាណិជ្ជកម្មបានដឹកនាំប្រតិភូក្រសួងពាណិជ្ជកម្ម នៅថ្ងៃទី ១១ខែឧសភា ឆ្នាំ ២០២២ បានជួបជាមួយប្រតិភូសហភាពអឺរ៉ុបប្រចាំកម្ពុជា (EU) ដើម្បីពិភាក្សាអំពីការសិក្សាគោលនយោបាយ និងយុទ្ធសាស្ត្រអភិវឌ្ឍន៍ឧស្សាហកម្មសំលៀកបំពាក់ វាយនភណ្ឌ និងស្បែកជើង គោលនយោបាយអាស៊ាន និងអំពីគំនិតផ្តួចផ្តើមស្តីពីថាមពលបៃតង ព្រមទាំងខ្សែច្រវាក់តម្លៃឧស្សាហកម្មក្រោមកម្មវិធីណែនាំពហុឆ្នាំ ២០២១-២០២៧ របស់សហភាពអឺរ៉ុប។
ក្នុងឱកាសនោះ លោករដ្ឋលេខាធិការ បានលើកឡើងអំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការកែលម្អបរិយាកាសធុរកិច្ច និងវិនិយោគនៅកម្ពុជា តាមរយៈការដាក់ចេញនូវច្បាប់វិនិយោគថ្មីៗ ច្បាប់ស្តីពីភាពជាដៃគូរដ្ឋនិងឯកជន ការបង្កើនភាពប្រកួតប្រជែង តាមរយៈការធ្វើកំណែទម្រង់និងបញ្ចុះថ្លៃដើម ការរៀបចំលិខិតបទដ្ឋានច្បាប់និងប្បញ្ញត្តិថ្មីៗ ការដាក់ចេញនូវយុទ្ធសាស្ត្រកាត់ដេរ យុទ្ធសាស្ត្រនិងកម្មវិធីកែទម្រង់-ស្តារសេដ្ឋកិច្ចនានា ព្រមទាំងកិច្ចសហការយ៉ាងជិតស្និទ្ធិជាមួយនឹងអង្គការអន្តរជាតិ និងដៃគូអភិវឌ្ឍន៍នានា ដើម្បីធានាបាននូវការអនុវត្តគ្រប់ជ្រុងជ្រោយ និងប្រសិទ្ធិភាព។
លោកបន្តថា រោងចក្រសហគ្រាសនៅកម្ពុជា ត្រូវបានលើកទឹកចិត្តក្នុងការអនុវត្តកម្មវិធីដែលផ្តល់ផលវិជ្ជមានលើកិច្ចការពារបរិស្ថាន ការប្រើប្រាស់ថាមពលល្អ និងការលើកកម្ពស់សុខុមាលភាពនិងស្តង់ដារការងាររបស់និយោជិក ការអនុវត្តមូលនិធិសន្តិសុខសង្គម រួមទាំងការបណ្តុះបណ្តាលជំនាញថ្មីផងដែ។ ក្នុងនោះ កម្មវិធីរោងចក្រកាន់តែប្រសើរនៅកម្ពុជា របស់អង្គការពលកម្មអន្តរជាតិបានក្លាយជាឧទាហរណ៍ល្អមួយសម្រាប់ទាក់ទាញការបញ្ជាទិញ ហើយភាគីដៃគូពាក់ព័ន្ធគួរពិនិត្យលទ្ធភាពបន្តផ្តល់មូលនិធិសម្រាប់អនុវត្តរហូតសម្រេចបាននូវកំណែទម្រង់ ក៏ដូចជាលទ្ធផលគាប់ប្រសើរស្របតាមផែនការអភិវឌ្ឍន៍ឧស្សាហកម្មសំលៀកបំពាក់ វាយនភណ្ឌ និងស្បែកជើង វិស័យកសិ-ឧស្សាហកម្ម និងវិស័យដទៃទៀត។
ភាគី EU បានបង្ហាញអំពីកម្មវិធីណែនាំពហុឆ្នាំ ២០២១-២០២៧ របស់សហភាពអឺរ៉ុប ដែលមានដាក់បញ្ចូលនូវគំនិតផ្តួចផ្តើមស្តីពីថាមពលបៃតង និងខ្សែច្រវាក់តម្លៃឧស្សាហកម្ម និងកសិកម្ម ដែលនឹងជួយលើកកម្ពស់ប្រសិទ្ធិភាពនៃការប្រើប្រាស់ថាមពល កិច្ចការពារបរិស្ថាន ការគោរពស្តង់ដារការងារ ផលិតភាពនិងសង្គមសេដ្ឋកិច្ចប្រកបដោយចីរភាព ទំនួលខុសត្រូវ និងសុខមាលភាពនៅកម្ពុជា ដែលស្ថាប័នពាក់ព័ន្ធអាចស្វែងយល់បន្ថែមក៏ដូចជាស្វែងរកជំនួយបច្ចេកទេស និងការគាំទ្រពីភាគី EU។
ជំនាញការសហភាពអឺរ៉ុប ក៏បានជម្រាបពីគំនិតផ្តួចផ្តើមទាំងនេះ ថានឹងជួយសម្រួលការធ្វើពាណិជ្ជកម្ម ការចូលរួមខ្សែច្រវាក់តម្លៃតំបន់សម្រាប់វិស័យឧស្សាហកម្ម និងកសិកម្មអាទិភាពរបស់កម្ពុជា ដែលស្របនឹងគោលដៅអភិវឌ្ឍន៍របស់ EU ដែលមានការគិតគូខ្ពស់អំពីការអភិវឌ្ឍប្រកបដោយបរិយាប័ន្ន តម្លាភាព ការអភិវឌ្ឍសមត្ថភាពជំនាញដល់និយោជិក និងការអនុវត្តច្បាប់ និងបទបញ្ញតិ្តចាំបាច់។
ក្នុងពេលដែលក្រសួងពាណិជ្ជកម្មនិងសហគមន៍អឺរ៉ិបកំពុងខិតខំសម្របសម្រួសគ្នារឿងរកស៊ី សម្តេចពិជ័យសេនាទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិនាព្រឹកថ្ងៃទី ១២ខែឧសភាឆ្នាំ ២០២២ បានប្រតិកម្មឆ្លើយតបទៅនឹងសេចក្តីថ្លៃការណ៍របស់សភាសហភាពអឺរ៉ុប កាលពីថ្ងៃទី៥ខែ ឧសភាឆ្នាំ ២០២២ ដែលធ្វើប៉ះពាល់ដល់អធិបតេយ្យភាពរបស់កម្ពុជា។
សម្តេចពិជ័យសេនាទៀ បាញ់ និយាយ ថា រដ្ឋសភាបានធ្វើការច្រានចោលរួចហើយនូវសេចក្តីថ្លែងការណ៍របស់សភាសហភាពអឺរុប ពីព្រោះការលើកឡើងនោះអត់មានភាពច្បាស់លាស់ទាល់តែសោះ គឺចោទប្រកាន់ដោយងងើលគ្មានមូលដ្ឋាន ចំពោះព្រះរាជាណាចក្រដ៏អភ័ព្វរបស់យើង។សម្តេចពិជ័យសេនា បានលើកឡើងថា៖ «យើងបានបំពេញអ្វីៗសព្វបែបយ៉ាងទាំងអស់។ហើយអ្វីដែលគេចោទប្រកាន់យើងបានបំពេញយ៉ាងពេញលេញក្នុងរយៈពេលកន្លងមក។ឧទាហរណ៍គេថា នៅកម្ពុជាអត់មានប្រជាធិបតេយ្យ មិនដឹងគេយកស្តង់ដារអ្វី តាមរបៀបណា ប្រទេសណា? តាមដែលយើងយល់ប្រជាធិបតេយ្យខ្ពស់បំផុត គឺដំណើរការបោះឆ្នោតត្រឹមត្រូវ តាមច្បាប់កំណត់»។
សម្តេចពិជ័យសេនាទៀ បាញ់ បញ្ជាក់ទៀតថា គេមិនគួរមកចាត់ចែងដឹកនាំប្រទេសដ៏ទៃជំនួសអ្នកដឹកនាំប្រទេសនោះដោយផ្ទាល់នោះទេ។ ទាក់ទងនឹងការចោទប្រកាន់ថា កម្ពុជារំលោភសិទ្ធិមនុស្ស គឺកម្ពុជាបានអនុញ្ញាតឲ្យមានការបង្កើតគណបក្សនយោបាយចូលរួមប្រកួតប្រជែងបោះឆ្នោត នៅគ្រប់អាណត្តិ។ការចោទប្រកាន់បែបនេះពីសំណាក់សភាសហភាពអឺរ៉ុបគឺមានភាពអយុត្តិធម៌សម្បើមណាស់សម្រាប់ព្រះរាជាណាកម្ពុជា។ កម្ពុជាមានសន្តិភាពពេញលេញ មានគុណតំលៃធំធេងណាស់។
