ចិនប្រតិកម្មរឿងរដ្ឋសភាបារាំងអនុមត័សេចក្តីសម្រេចមួយចោទចិនថាបង្កើតប្រល័យពូជសាសន៍នៅតំបន់ស៊ិនជាំង!
21-September-2026 / ព័ត៌មានអន្តរជាតិ
ប្រទេសចិន៖ ក្រសួងការបរទេសចិន តាមរយៈ អ្នកនាំពាក្យ បានចេញមុខប្រឆាំងដាច់ខាត និងបានវាយបកបារាំងវិញ ថា កំពុងលូកដៃចូលកិច្ចការផ្ទៃក្នុងរបស់ចិនបន្ទាប់ពីរដ្ឋសភាបារាំងបោះឆ្នោតលើសេចក្តីសម្រេច ចោទប្រកាន់រដ្ឋអំណាចចិនថា បានប្រព្រឹត្តអំពើប្រល័យពូជសាសន៍ទៅលើជនជាតិអ៊ុយហ្គួរ នៅខេត្តស៊ីនជាំងកាលពីថ្ងៃទី២០មករា ។
សភាបារាំងបានបោះឆ្នោតអនុម័តសេចក្តីសម្រេចដែលទទួលស្គាល់ថា ការប្រព្រឹត្តអំពើហិង្សារបស់អាជ្ញាធរចិនទៅលើប្រជាជនអ៊ុយហ្គួរនៅខេត្តស៊ីនជាំង គឺជាបទឧក្រិដ្ឋកម្មប្រឆាំងមនុស្សជាតិ និងជាអំពើប្រល័យពូជសាសន៍។ តែអ្នកនាំពាក្យរបស់ក្រសួងការបរទេសបាននិយាយទាត់ចោលការចោទប្រកាន់ និងបានវាយបករិះគន់ខ្លាំងៗវិញថា សេចក្តីសម្រេចរបស់រដ្ឋសភាបារាំង ស្តីពីស៊ីនជាំងធ្វើឡើងដោយឈរលើការមិនដឹងការពិត ការគ្មានចំណេះដឹងផ្នែកច្បាប់ និងបានរំលោភចូលកិច្ចការផ្ទៃក្នុងរបស់ប្រទេសចិន។ ចិនប្រឆាំងដាច់ខាត នឹងសេចក្តីសម្រេចរបស់រដ្ឋសភាបារាំង។
ដោយលើកបង្ហាញ តួលេខប្រជាសាស្ត្រ នៅក្នុងសន្និសីទកាសែត អ្នកនាំពាក្យក្រសួងការបរទេសចិនបានចោទជាសំណួរថា បើសិនមានអំពើប្រល័យពូជសាសន៍ នៅស៊ីនជាំងតើ គេអាចពន្យល់បានយ៉ាងម៉េចពីកំណើនប្រជាជននៅស៊ីនជាំង។ កន្លងមក អង្គការការពារសិទ្ធិមនុស្ស និងការសិក្សារបស់ប្រទេសលោកខាងលិច មួយចំនួនដែលពឹងផ្អែកលើតួលេខ ឯកសាររបស់មន្ត្រីចិន ធ្លាប់បានចោទប្រកាន់ប៉េកាំងថាបានបង្កើតមន្ទីរឃុំឃាំង ដាក់មនុស្សជាង១លាននាក់នៅ ខេត្តស៊ីនជាំង ដែលនៅក្នុងនោះ ភាគច្រើនជាប្រជាជនអ៊ុយហ្គួរ។
សាក្សីរួចរស់ជីវិតមួយចំនួន ដែលបានរត់គេចចេញទៅបរទេស ធ្លាប់បាននិយាយពីលក្ខខណ្ឌជីវិតដ៏អាក្រក់នៅក្នុងជំរំ ដូចជា ការធ្វើទារុណកម្ម ការចាប់បង្ខំឲ្យធ្វើការ ការរំលោភផ្លូវភេទ និងការចាប់បង្ខំ វះយកសរីរាង្គជាដើម។ដំបូងឡើយ ប៉េកាំងធ្លាប់បានបដិសេធថា គ្មានជំរំដាក់មនុស្សជាង១លាននាក់នោះទេ។ ប៉ុន្តែ ក្រោយមក ក៏បែរមកទទួលស្គាល់វិញ ពិតជាបានបង្កើតមណ្ឌលអប់រំនៅខេត្តស៊ីនជាំង សម្រាប់បណ្តុះបណ្តាលវិជ្ជាជីវៈ ក្នុងគោលដៅអូសទាញប្រជាជនអ៊ុយហ្គួរ កាន់សាសនាអ៊ីស្លាម ឲ្យចាកឆ្ងាយចេញពី អន្ទាក់របស់ក្រុមអ៊ីស្លាមជ្រុលនិយម។ ថ្មីៗនេះ អាជ្ញាធរចិនបានអះអាងថា គេនឹងបិទមណ្ឌលអប់រំនៅស៊ីនជាំង ព្រោះថាសិស្សទាំងអស់បានបញ្ចប់ការបណ្តុះបណ្តាលរបស់ខ្លួន។
គួរកត់សំគាល់ថា នៅប៉ុន្មានថ្ងៃមុនការចាប់ផ្តើមបើកសម្ពោធ កម្មវិធីប្រកួតកីឡាអូឡាំពិករដូវរងារ នៅក្រុងប៉េកាំង សំឡេងថ្កោលទោស បរិហារការរំលោភសិទ្ធិមនុស្សនៅចិន បានបន្លឺកាន់តែខ្លាំងឡើង ពីសំណាក់ស្ថានប័នកំពូលរដ្ឋ នៅតាមបណ្តាប្រទេសមហាអំណាចមួយចំនួន មានដូចជាបារាំង អាមេរិក អង់គ្លេស និងកាណាដាជាដើម។
សេចក្តីសម្រេចចិត្ត ដែលត្រូវបានដាក់ស្នើដោយគណបក្សសង្គមនិយមបារាំង ត្រូវបានសមាជិកសភាបារាំង បោះឆ្នោតគាំទ្រ សឹងតែជាឯកច្ឆ័ន្ទ។ បើទោះជាគ្មានខ្លឹមសារអំណាចចាប់បង្ខំក្តី តាមរយៈសេចក្តីសម្រេចចិត្តនេះ រដ្ឋសភាបារាំងបានចាត់ទុកអំពើធ្វើទុក្ខបុកម្នេញ ដែលរដ្ឋអំណាចចិនបានធ្វើទៅលើប្រជាជនអ៊ុយហ្គូរ ថាមានទម្រង់ជាអំពើប្រល័យពូជសាសន៍ និងអំពើឧក្រិដ្ឋកម្មប្រឆាំងមនុស្សជាតិ។
រដ្ឋសភាបារាំង ក៏បានអំពាវនាវឲ្យរដ្ឋភិបាលបារាំង ត្រូវតែរូតរះ ចាត់វិធានការដូចគ្នានេះ ដើម្បីជំរុញឲ្យសហគមអន្តរជាតិ រួមគ្នាដាក់សំពាធទៅលើរដ្ឋាភិបាលចិន ឲ្យបញ្ឈប់ជាបន្ទាន់ នូវអំពើរំលោភសិទ្ធិមនុស្ស ដ៏ធ្ងន់ធ្ងរនេះ។ ក្រៅពីស្ថានភាពជនជាតិអ៊ុយហ្គួរ រដ្ឋសភាបារាំង ក៏បានថ្លែងការបារម្ភផងដែរ អំពីស្ថានភាពរងទុក្ខលំបាក របស់សហគមជនជាតិភាគតិចផ្សេងទៀត នៅតំបន់ស៊ីនជាំង ដែលកាន់សាសនាអ៊ីស្លាម។
លោក Dolkun Isa ប្រធានសន្និបាតពិភពលោកនៃជនជាតិអ៊ុយហ្គួរ (CMO) បានអបអរសាទរ ចំពោះការសម្រេចរបស់សភាបារាំង ដោយលោកបានលើកឡើងថា វាគឺជាការបោះជំហានមួយបន្ថែមទៀត ក្នុងការឈានទៅទទួលស្គាល់ឲ្យបានទូលំទូលាយ ទូទាំងពិភពលោក ថាចិនបាននិងកំពុង ធ្វើអំពើប្រល័យពូជសាសន៍ លើប្រជាជនអ៊ុយហ្គួរ។
ក្រៅពីសភាបារាំង ដែលបានថ្កោលទោសចិន រដ្ឋាភិបាលអាមេរិក រដ្ឋសភាអង់គ្លេស ហូឡង់ និងកាណាដា ក៏បានអនុម័តសេចក្តីសម្រេចចិត្តស្រដៀងគ្នានេះដែរ ដោយបានចាត់ទុកថារដ្ឋាភិបាលចិន បានធ្វើអំពើប្រល័យពូជសាសន៍ និងអំពើឧក្រិដ្ឋប្រឆាំងមនុស្សជាតិ ទៅលើប្រជាជនអ៊ុយហ្គួរ។ កាលពីថ្ងៃពុធ អង្គការ Amnesty International បានអំពាវនាវថា សហគមអន្តរជាតិ មិនត្រូវចាញ់បោកការបំភ័ន្តភ្នែករបស់ចិនបានឡើយ ដោយមិនត្រូវភ្លេចថា ស្របពេលដែលកម្មវិធីកីឡាអូឡាំពិករដូវរងារនៅក្រុងប៉េកាំង ត្រូវចិនរៀបចំធ្វើយ៉ាងសម្បើមពេញមុខ តែនៅពីក្រោយនោះ គឺរដ្ឋចិនបានធ្វើអំពើរំលោភសិទ្ធិមនុស្ស ដ៏ធ្ងន់ធ្ងរបំផុត ទៅលើប្រជាជនអ៊ុយហ្គួរ៕
