សម្ព័ន្ធមិត្តលោកស្រីSuu Kyiនឹងបង្កើតរដ្ឋាភិបាលបណ្តោះអាសន្នមួយក្នុងពេលពួកយោធាបង្កើនការបង្ក្រាប!
15-March-2026 / ព័ត៌មានអន្តរជាតិ
ភូមា៖គណបក្សសម្ព័ន្ធជាតិដើម្បីប្រជាធិបតេយ្យ(NLD)របស់អ្នកស្រីអោងសានស៊ូជីបានប្រកាសថាខ្លួននឹងបង្កើតរដ្ឋាភិបាលបណ្តោះអាសន្នមួយដើម្បីប្រឈមមុខនឹងរដ្ឋាភិបាលយោធានិងស្វែងរកមធ្យោបាយដើម្បីទទួលបានការទទួលស្គាល់ជាអន្តរជាតិ។
លោកសាសា( Sa Sa)មន្ត្រីគណបក្ស NLDនៅក្នុងបទសម្ភាសន៍ជាមួយកាសែត Financial Times តាមរយៈវីដេអូនិយាយថា៖សម្ព័ន្ធមិត្តរបស់លោកស្រីAungSuuKyiនឹងបង្កើតជារដ្ឋាភិបាលបណ្តោះអាសន្នដើម្បីប្រកួតប្រជែងជាមួយរដ្ឋាភិបាលយោធារបស់ឧត្តមសេនីយ៍Min Aung Hlaing។មន្ត្រីរូបនោះបានបង្ហើបថា៖សមាជិកសភាគណបក្សកំពុងព្យាយាមចៀសវាងការចាប់ខ្លួនដោយអាជ្ញាធរយោធានោះមានឆន្ទៈក្នុងការប្រថុយប្រថានក្នុងការបង្កើតរដ្ឋាភិបាលបណ្តោះអាសន្នមួយ”ដើម្បីជាប្រយោជន៍ដល់ប្រជាជនមីយ៉ាន់ម៉ា”។លោកSaSaបាននិយាយថា”យើងនឹងធ្វើការយ៉ាងជិតស្និទ្ធជាមួយសហគមន៍អន្តរជាតិជាមួយប្រទេសចិននិងឥណ្ឌា។ពួកគេក៏ទទួលបានអត្ថប្រយោជន៍ពីការមានប្រទេសជិតខាងដែលមានស្ថេរភាពផងដែរ”។
សូមបញ្ជាក់ដែរថា៖កាលពីថ្ងៃទី២៦ខែកុម្ភៈ ម៉ាលោកខ្វៃម៉ូទុន(KyawMoeTun)ឯកអគ្គរដ្ឋទូតមីយ៉ាន់ប្រចាំអង្គការសហប្រជាជាតិបានថ្លែងនៅក្នុងកិច្ចប្រជុំនៃមហាសន្និបាតអង្គការសហប្រជាជាតិថា៖លោកជាតំណាងរដ្ឋបាលរបស់លោកស្រីស៊ូជី(SuuKyi)និងបានជំរុញឱ្យអង្គការសហប្រជាជាតិធ្វើសកម្មភាពប្រឆាំងនឹងពួកយោធា“។ភ្លាមៗបន្ទាប់ពីសុន្ទរកថាខាងលើរបស់លោកខ្វៃ(Kyaw) ត្រូវបានអាជ្ញាធរយោធាភូមាច្រានចោល។លោកបានប្រកាសថាលោកនិងអ្នកគាំទ្រលោកស្រីAungSuuKyiនឹងតស៊ូរហូតដល់ទីបញ្ចប់ដើម្បីស្តារលទ្ធិប្រជាធិបតេយ្យនៅមីយ៉ាន់ម៉ា។
ដោយឡែកនៅថ្ងៃទី២៨ខែកុម្ភៈទីភ្នាក់ងារសារព័ត៌មានAFPបានរាយការណ៍ឲ្យដឹងថាមានការបង្ក្រាបលើបាតុករដោយក្រុមប៉ូលិស។ក្នុងចំណោមមនុស្ស៧នាក់ដែលបានស្លាប់គឺមានអ្នកតវ៉ា៣ នាក់នៅក្នុងទីក្រុងដាវ៉ី(Dawei)ភាគខាងត្បូងប្រទេសមីយ៉ាន់ម៉ា២ នាក់នៅទីក្រុងMandalayនិង២ នាក់ទៀតនៅទីក្រុងYangon។នៅទីក្រុងYangonបុរសម្នាក់បានស្លាប់បន្ទាប់ពីត្រូវគ្រាប់កាំភ្លើងចំដើមទ្រូងខណៈស្ត្រីម្នាក់ទៀតបានស្លាប់ដោយការគាំងបេះដូងនៅពេលប៉ូលីសបានប្រើគ្រាប់បែកដៃដើម្បីបំបែកក្រុមអ្នកតវ៉ា។Pyae Zaw Heinបុគ្គលិកសង្គ្រោះបន្ទាន់ម្នាក់បាននិយាយថាមនុស្ស៣នាក់នៅDawei បានស្លាប់ដោយសារការវាយដោយគ្រាប់កាំភ្លើងពិតខណៈអ្នកផ្សេងទៀតរងរបួសដោយសារគ្រាប់កាំភ្លើងកៅស៊ូ។
បុគ្គលិករូបនេះបានព្រមានថាចំនួនអ្នកស្លាប់និងរបួសអាចកើនឡើងថែមទៀត។នៅកណ្តាលទីក្រុងYangonកម្លាំងសន្តិសុខបានប្រើឧស្ម័នបង្ហូរទឹកភ្នែកដើម្បីបំបែកបាតុករប្រមាណ១ ម៉ឺននាក់។នេះគ្រាន់តែជាការតវ៉ាមួយក្នុងចំណោមការតវ៉ាជាច្រើនដែលបានកើតឡើងនៅក្នុងទីក្រុងធំបំផុតមួយនេះនៅក្នុងប្រទេសមីយ៉ាន់ម៉ា។ ក្រុមបាតុករជាច្រើននាក់បានពាក់ម៉ាសការពារមួកនិងវ៉ែនតាការពារក្នុងបរិបទនៃកម្លាំងសន្តិសុខកាន់តែខ្លាំងឡើងៗក្នុងការដោះស្រាយជាមួយបាតុកម្ម។ប៉ុស្តិ៍ទូរទស្សន៍ MRTVបាននិយាយថាកម្លាំងសន្តិសុខមីយ៉ាន់ម៉ាបានចាប់ខ្លួនមនុស្សជាង៤៧០នាក់អំឡុងបាតុកម្មនៅថ្ងៃទី២៧កុម្ភៈ។យោធាមីយ៉ាន់ម៉ាបានប្រឈមមុខនឹងរលកនៃការខឹងសម្បារពីមតិសាធារណៈទាំងក្នុងនិងក្រៅប្រទេសចាប់តាំងពីរដ្ឋប្រហារថ្ងៃទី១ខែកុម្ភៈ។
យោងតាមGuardianនិង Sputnik
