សម្តេចតេជោប្រកាសបើកឲ្យកីឡាករវិជ្ជមានកូវីតអាចប្រឡងបាក់ឌុបបាន!
26-March-2024 / សុខភាពនិងកីឡា
ភ្នំពេញ៖ សម្តេចតេជោ ហ៊ុន សែននាល្ងាចថ្ងៃទី២៦ ខែធ្នូ ឆ្នាំ២០២១នេះថា «ខ្ញ៉ំសម្រេចឱ្យកីឡាករការ៉ាត់តេដូ ២រូបវិជ្ជមានកូវីដ១៩ ដែលទើបមកពីប្រកួតនៅប្រទេសកាហ្សាក់ស្តង់ អាចប្រឡងបាក់ឌុបបាននៅមន្ទីរពេទ្យ»។ ការថ្លែងរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជាបានធ្វើឡើង ក្នុងពិធីប្រគល់ ទទួលអំណោយវ៉ាក់សាំងកូវីដ-១៩ (Pfizer)ពីរដ្ឋាភិបាល និងប្រជាជន នៃប្រទេសអូស្ត្រាលីចំនួន៧៨,៣០០ដូសក្នុងចំណោម ចំនួន ២,៣៥លានដូស ជូនរាជរដ្ឋភិបាល និងប្រជាជន នៃព្រះរាជាណាចក្រកម្ពុជា ដើម្បីទប់ស្កាត់ការរីករាលដាលកូវីដ-១៩.។នៅសល់ចំនួន១,៥៦៧,៥៣០ដូសទៀតនឹងមកដល់ថ្ងៃទី២៨ ធ្នូឆ្នាំ២០២១ខាងមុខ ។
សម្ដេចតេជោ ហ៊ុន សែន បានថ្លែងបន្តថា« កន្លងទៅក្រសួងអប់រំ យុវជន និងកីឡាបានសម្រេចថា អ្នកដែលមានកូវីដ១៩ គឺមិនអនុញ្ញាតឲ្យមានការចូលប្រឡងបាក់ឌុបនោះទេ»។សម្តេចតេជោ ហ៊ុន សែន បញ្ជាក់ថា «ខ្ញុំបានស្នើឲ្យមានការកែតម្រូវ ហើយអនុញ្ញាតឲ្យសិស្សបានចូលប្រឡង ក៏ប៉ុន្តែខ្ញុំក៏សុំស្នើកុំឲ្យមណ្ឌលវិទ្យាល័យបាក់ទូកត្រៀមប្រឡងបាក់ឌុបក៉ំមានការស្លន់ស្លោរ យើងមិនយកអ្នកទាំងពីររូបដែលចេញទៅប្រកួតកីឡា ដោយមានការចាត់តាំងត្រឹមត្រូវពីក្រសួងអប់រំ យុវជន និងកីឡាទៅប្រឡងនៅមណ្ឌលប្រឡងបាក់ឌុបនៅវិទ្យាល័យបាក់ទូកនោះទេក៏ប៉ុន្តែយើងបានចាត់ចែងឲ្យមានការប្រឡងនៅនឹងមន្ទីរពេទ្យតែម្ដង ដែលមានគ្រូពេទ្យ សាស្ត្រាចារ្យរបស់យើងចូលទៅធ្វើការពិនិត្យ នៃការប្រឡង»។
សូមជម្រាបថា ការប្រឡងសញ្ញាបត្រមធ្យមសិក្សាទុតិយភូមិ ត្រូវរៀបចំឡើងរយៈពេល២ថ្ងៃ គឺថ្ងៃទី២៧-២៨ ខែធ្នូ ឆ្នាំ២០២១ ការប្រឡងសញ្ញាបត្រមធ្យមសិក្សាទុតិយភូមិ ឆ្នាំ២០២១ មានមណ្ឌលប្រឡងសរុប ២០៤មណ្ឌល ត្រូវជា ៤៦១៦បន្ទប់ បេក្ខជនចុះឈ្មោះប្រឡងសរុប ១សែន១ម៉ឺន ៤ពាន់ ១៨៣នាក់ គណៈមេប្រយោគ និងគណៈកម្មការនានាចូលរួមក្នុងដំណើរការប្រឡងមានចំនួន ៣ម៉ឺន១ពាន៤៣២នាក់។
ទាក់ទងរឿងកូវីតនេះដែរសម្តេចតេជោ ហ៊ុន សែន បានថ្លែងបង្ហាញសង្ឃឹមថា មេរោគកូវីដ១៩ អូមីក្រុង មិនហូរចូលដល់សហគមន៍នោះទេ។ «បើទោះបីពិភពលោកកំពុងប្រឈមដោយមេរោគកូវីដ អូមីក្រុង តែកម្ពុជានៅបន្តបើកប្រទេសឡើងវិញដំណើរការសង្គមធម្មតា ប្រកបដោយការប្រុងប្រយ័ត្នខ្ពស់»។សម្តេចតេជោ អំពាវនាវឱ្យពលរដ្ឋប្រុងប្រយ័ត្នខ្ពស់លើករណីមេរោគ អូមីក្រុង តែក៉ំភ័យស្លន់ស្លោ។
សម្តេចតេជោ ហ៊ុន សែន បានឲ្យដឹងថា «ថ្ងៃនេះមានកូវីដ១៩ មាន១៥ករណី សុទ្ធតែនាំចូល។ រហូតមកដល់ពេលនេះ កម្ពុជាមានការរកឃើញ អូមីក្រុង ៣១ករណី តែបានជាសះស្បើយ ៣ករណីហើយ»។ទាក់ទងជំនួយវ៉ាក់សាំងបង្ការជំងឺកូវីដ១៩ Pfizer ចំនួន ២,៣៥លានដូស ជួយកម្ពុជាវាបង្កើតបានជាផ្នែកមួយនៃការប្តេជ្ញាចិត្តរបស់អូស្ត្រាលី ក្នុងការចែករំលែកវ៉ាក់សាំងបង្ការជំងឺកូវីដ-១៩ ដល់ទៅ ៦០លានដូស ជាមួយតំបន់ឥណ្ឌូប៉ាស៊ីហ្វិក ត្រឹមដំណាច់ឆ្នាំ ២០២២ដែលបានចែកចាយបានជាង ១០លានដូស មកហើយ រហូតមកដល់បច្ចុប្បន្ននេះ។
សម្តេចតេជោ ហ៊ុន សែន កន្លងទៅថ្មីៗនេះ បានថ្លែងអំណរគុណដល់ប្រទេសជាមិត្ត មានចិន ជប៉ុន អង់គ្លេស អាមេរិក ហូឡង់ ដែលបានផ្តល់ជំនួយវ៉ាក់សាំងមកដល់ប្រទេសកម្ពុជា ដើម្បីជាចំណែកទប់ស្កាត់នឹងការរាតត្បាតជំងឺកូវីដ១៩នេះ។ កម្ពុជា គឺជាប្រទេសដែលរកបានវ៉ាក់សាំង បានលឿនសម្រាប់ចាក់ជូនប្រជាពលរដ្ឋ។ តាមរយៈផែនការមួយច្បាស់លាស់ទាំងការទិញ ជំនួយពីប្រទេសជាមិត្ត និងមជ្ឈមណ្ឌលកូវ៉ាក់នោះ មកដល់ពេលនេះ កម្ពុជារកបានវ៉ាក់សាំងសរុបជាង ៤០លានដូស។
គួរបញ្ជាក់ថា កំណើនអត្រាចាក់វ៉ាក់សាំងកូវីដ-១៩ នៅកម្ពុជា គិតត្រឹមថ្ងៃទី២៥ ខែឆ្នូ ឆ្នាំ២០២១លើប្រជាជនអាយុពី ១៨ឆ្នាំឡើង មាន ១០១,៤១% ធៀបជាមួយចំនួនប្រជាជនគោលដៅ ១០លាននាក់ លើកុមារ-យុវវ័យអាយុពី ១២ឆ្នាំ ទៅក្រោម ១៨ឆ្នាំ មាន ៩៩,០៤% ធៀបជាមួយចំនួនប្រជាជនគោលដៅ ១លាន៨សែន នាក់លើកុមារអាយុពី ០៦ឆ្នាំ ដល់ក្រោម ១២ឆ្នាំ មាន ១០៥,០៩% ធៀបជាមួយនឹងប្រជាជនគោលដៅជិត ១លាន៩សែននាក់ លើកុមារអាយុ ០៥ឆ្នាំ មាន ៩៨,២៦% ធៀបជាមួយនឹងប្រជាជនគោលដៅ ៣០ម៉ឺននាក់ ជារួមលទ្ធផលចាក់វ៉ាក់សាំងធៀបនឹងចំនួនប្រជាជនសរុប ១៦លាននាក់ មាន ៨៩,០៣% 
