ថៃមកឈ្វេងយល់ពីជំហរកម្ពុជាក្នុងពេលកម្ពុជាធ្វើប្រធានអាស៊ាន

ភ្នំពេញ៖សម្ដេចតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា បានជម្រាបរដ្ឋមន្រ្តីការបរទេសថៃថា គោលដៅសំខាន់កម្ពុជាក្នុងនាមជាប្រធានអាស៊ាន គឺ ប្រយុទ្ធប្រឆាំងជំងឺកូវីដ១៩ បើកសេដ្ឋកិច្ចសង្គម និងតភ្ជាប់រវាងប្រជាជន និងប្រជាជននៅអាស៊ានក៏ដូចជាបញ្ហាសមុទ្រចិនខាងត្បូងផងដែរក្នុងឱកាសទទួលជួបពិភាក្សាការងារជាមួយលោកឧបនាយករដ្ឋមន្រ្តី ដន ប្រាម៉ាត់វីណៃ រដ្ឋមន្រ្តីការបរទេសថៃ នៅវិមានសន្តិភាព នៅព្រឹកថ្ងៃទី ១៧ ខែធ្នូ ឆ្នាំ ២០២១នេះ។ 

លោក អ៊ាង សុផល្លែត ជំនួយការសម្ដេចតេជោហ៊ុនសែនបានឲ្យដឹងថា លោករដ្ឋមន្រ្តីកាងបរទេសថៃបានសម្ដែងនូវការអបអរសាទរចំពោះកម្ពុជា ដែលបានទប់ស្កាត់ នៃការរីករាលដាលកូវីដ១៩ យ៉ាងជោគជ័យ ជាពិសេសការចាក់ស្រោចវ៉ាក់សាំងជូនប្រជាពលរដ្ឋបានប្រមាណជាង៨៩ភាគរយនិងអបអរសាទរចំពោះសម្ដេចតេជោ ហ៊ុន សែន ដែលបានអភិវឌ្ឍន៍កម្ពុជាបានឆាប់រហ័ស។

បើតាមលោក អ៊ាង សុផល្លែត ក្នុងឱកាសនេះ លោកឧបនាយករដ្ឋមន្ត្រី នៃប្រទេសថៃ ក៏បានគោរពសូមការស្វែងយល់ពីសម្ដេចតេជោ ហ៊ុនសែន នូវគោលដៅ នៃការដឹកនាំអាស៊ាននៅឆ្នាំ ២០២២ខាងមុខ។ សម្ដេចតេជោ ហ៊ុន សែន ក៏បានជម្រាបលោកឧបនាយករដ្ឋមន្ត្រីថៃថា គោលដៅសំខាន់ដែលត្រូវធ្វើ ក្នុងនាមជាប្រធានអាស៊ាននោះ គឺប្រយុទ្ធប្រឆាំងជំងឺកូវីដ១៩ ធ្វើយ៉ាងណាបើកសេដ្ឋកិច្ចសង្គម និងតភ្ជាប់រវាងប្រជាជននិងប្រជាជននៅអាស៊ាន។

សម្តេចតេជោ ហ៊ុន សែន ក៏បានមានប្រសាសន៍ថា «កម្ពុជានឹងខិតខំពង្រឹងមិត្តភាព សាមគ្គីភាពជំរុញកិច្ចសហប្រតិបត្តិការរវាងប្រទេសអាស៊ាន»។
ទាក់ទងបញ្ហាសមុទ្ទចិនខាងត្បូសម្ដេចតេជោ ហ៊ុន សែន បញ្ជាក់ថា «ជំហររបស់កម្ពុជា ពាក់ព័ន្ធនឹងសមុទ្រចិនខាងត្បូងនោះ គឺជំរុញអនុវត្តឲ្យបានខ្ជាប់ខ្ជួនតាមDOC និងឱ្យប្រទេសដែលពាក់ព័ន្ធធ្វើការចរចាគ្នា»។ សម្ដេចតេជោ ហ៊ុនសែន បានមានប្រសាសន៍បញ្ជាក់បន្ថែមថា «កម្ពុជា នឹងខិតខំប្រឹងប្រែងសម្រេច COC ឱ្យបាន».។

សូមជម្រាបថា តបតាមការអញ្ជើញរបស់លោកឧបនាយករដ្ឋមន្ត្រី ប្រាក់ សុខុន រដ្ឋមន្រ្តីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា លោក ដន ប្រាម៉ាត់វីណៃ ឧបនាយករដ្ឋមន្រ្តី រដ្ឋមន្រ្តីការបរទេសថៃ បានអញ្ជើញមកបំពេញទស្សនកិច្ចផ្លូវការនៅកម្ពុជា និងធ្វើជាសហប្រធានជាមួយលោកឧបនាយករដ្ឋមន្រ្តី ប្រាក់ សុខុន ដឹកនាំកិច្ចប្រជុំលើកទី១១ នៃគណៈកម្មការចម្រុះសម្រាប់កិច្ចសហប្រតិបត្តិការទ្វេភាគី (JC) រវាងកម្ពុជា និងថៃ ពីថ្ងៃទី១៦ ដល់ទី១៨ ខែធ្នូ ឆ្នាំ២០២១ នៅរាជធានីភ្នំពេញ។

កិច្ចប្រជុំគណៈកម្មការចម្រុះ (JC) លើកទី១១ ក្រោមមូលបទ «សន្តិភាព វិបុលភាព ស្តារឡើងវិញទាំងអស់គ្នា» លោកឧបនាយករដ្ឋមន្រ្តី រដ្ឋមន្រ្តីការបរទេសទាំងពីរ នឹងពិនិត្យឡើងវិញនូវវឌ្ឍនភាពនៃការអនុវត្តកំណត់ហេតុកិច្ចប្រជុំ JC លើកទី១០ កាលពីឆ្នាំ២០១៦ និងពិភាក្សាលើទិដ្ឋភាពនានា នៃកិច្ចសហប្រតិបត្តិការរវាងប្រទសទាំងពីរ ក្នុងក្របខណ្ឌទ្វេភាគី និងពហុភាគី ក្នុងគោលបំណងបន្តពង្រឹង និងលើកកម្ពស់បន្ថែមទៀតនូវកិច្ចសហប្រតិបត្តិការដ៏ជិតស្និទ្ធ និងគ្រប់ជ្រុងជ្រោយ រវាងព្រះរាជាណាចក្រទាំងពីរ ដើម្បីការស្តារសេដ្ឋកិច្ចឡើងវិញយ៉ាងឆាប់រហ័ស ក្រោយពីវិបតិ្តកូវីដ-១៩។

ក្រោយពេលបញ្ចប់កិច្ចប្រជុំគណៈកម្មការចម្រុះ (JC) លើកទី១១ លោកឧបនាយករដ្ឋមន្រ្តី រដ្ឋមន្រ្តីការបរទេសទាំងពីរ នឹងអញ្ជើញចូលរួមជាអធិបតីក្នុងពិធីប្រគល់-ទទួលជានិមិត្តរូបនូវឧបករណ៍សម្រាប់ធ្វើតេស្ត RT-PCR និង SARS-CoV-2 ពីរាជរដ្ឋាភិបាលថៃ ប្រគល់ជូនមន្ទីរពេទ្យបង្អែកប៉ោយប៉ែត និងមន្ទីរពេទ្យមង្គលបូរី នៃខេត្តបន្ទាយមានជ័យ៕