នាយខុទ្ទកាល័យសម្តេចសខេងនិងអភិបាលខេត្តកណ្តាលបើកដៃឲ្យចាត់ការមេឈ្មួញយកគ្រឿងចក្រឈូសផ្លូវប្រជាពលរដ្ឋហើយ
21-September-2026 / ព័ត៌មានជាតិ
ភ្នំពេញ ៖ករណីយ៍ ឈ្មួញរកស៊ីរណ្តៅដី និងការដ្ឋានខ្សាច់យកគ្រឿងចក្រមកជីកផ្តាច់ផ្លូវប្រជាពលរដ្ឋដែលមានទំហំទទឹង៧ម៉ែត្រ និងបណ្តោយ២៣៩ម៉ែត្រ ក្នុងប្រវែងជាង៤២២ម៉ែត្រ ភូមិឈើទាល២ ឃុំឈើទាល ស្រុកកៀនស្វាយ ខេត្តកណ្ដាល ដើម្បីយកអាចម៌ដីលក់ ដោយសំអាងថា ប្រជាពលរដ្ឋធ្វើផ្លូវលើដីរបស់ខ្លួនបង្កការក្តៅក្រហាយនោះត្រូវបានចៅហ្វាយខេត្តកណ្តាលចេញមុខដោះស្រាយឯអ្នកឈូសត្រូវបានអ្នកនាំពាក្យក្រសួងមហាផ្ទៃលោកខៀវសុភក្រ័បើកដៃឲ្យចាត់ការបើប្រព្រឹត្តខុសច្បាប់។
លោកនាយឧត្តមសេនីយ៍សន្តិបណ្ឌិត ខៀវ សុភ័គ នាយកខុទ្ទកាល័យសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាអ្នកនាំពាក្យក្រសួងមហាផ្ទៃ បានប្រាប់កាសេតថា លោក ចាន់ វិទូ លែងជាជំនួយការសម្តេចក្រឡាហោម ស ខេង ទៀតហើយ និងសូមឲ្យសមត្ថកិច្ចចាត់វិធានការតាមផ្លូវច្បាប់បើសិនជាលោក ចាន់ វិទូ បានប្រព្រឹត្តខុស។
សូមបញ្ជាក់ថាកាលពីព្រឹកថ្ងៃទី១៥ ខែកញ្ញា ឆ្នាំ២០២១ មានប្រជាពលរដ្ឋប្រមាណជាង ១០០គ្រួសារ មកពីភូមិឈើទាល២ ឃុំឈើទាល ស្រុកកៀនស្វាយ ខេត្តកណ្ដាល បាននាំគ្នាតវ៉ាមុខសាលាខេត្តកណ្តាល ដើម្បីសុំអន្តរាគមន៍ពីលោក គង់ សោភ័ណ្ឌ អភិបាលខេត្តកណ្ដាល ដើម្បីជួយដោះស្រាយពាក់ព័ន្ធទៅនឹងករណីមន្ត្រីនគរបាលឈ្មោះ ចាន់ វិទូ ដែលមានតួនាទីជាជំនួយការសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានយកគ្រឿងចក្រមកកាយ និងឈូសឆាយផ្ដាច់ផ្លូវសាធារណៈមួយកន្លែង ស្ថិតនៅចំណុចផ្លូវកំពង់រទេះ ក្នុងភូមិឈើទាល២ ឃុំឈើទាល ស្រុកកៀនស្វាយ។
បន្ទាប់ពីស្តាប់ការលើកឡើងរបស់ប្រជាពលរដ្ឋ ឯកឧត្តម គង់ សោភ័ណ្ឌ អភិបាលខេត្តកណ្ដាល បានប្រគល់ភារកិច្ចជូនរដ្ឋបាលស្រុកកៀនស្វាយ ត្រូវជូនដំណឹងដល់អ្នកដែលបានប្រព្រឹត្តនោះ ទុកពេលឲ្យជួយជុលធ្វើផ្លូវដែលបានកាយនោះឡើងវិញក្នុងរយៈពេល ១០ថ្ងៃ។ ក្នុងករណីមិនអនុវត្តតាមនោះរដ្ឋបាលខេត្ត នឹងចាត់វិធានការតាមផ្លូវច្បាប់ជាធរមាន។
ប្រជាពលរដ្ឋជាង ១០០ គ្រួសារ បានសំដែងនូវការអបអរសាទរ និងថ្លៃអំណរគុណយ៉ាងជ្រាលជ្រៅ ចំពោះអភិបាល នៃគណៈអភិបាលខេត្តកណ្ដាល ដែលបានយកចិត្តទុកដាក់ និងគិតគូរជួយដោះស្រាយជូនពួកគាត់ ដែលនេះសបញ្ជាក់ឲ្យឃើញថា អាជ្ញាធរខេត្តកណ្ដាល គឺជាអ្នកបម្រើប្រជាពលរដ្ឋ និងគិតគូរពីសុខទុក្ខរបស់ប្រជាពលរដ្ឋនៅក្នុងមូលដ្ឋាន។
ចំណែកលោក សុខ ពិសិដ្ឋ អភិបាលរងស្រុកកៀនស្វាយ បានឲ្យដឹងថា រដ្ឋបាលស្រុក បានចាត់ក្រុមការងារស្រុក ចុះពិនិត្យ អង្កេត ឃើញថា ផ្លូវ១ខ្សែដែលប្រជាពលរដ្ឋបានស្នើសុំជួយអន្តរាគមន៍ គឺពិតជាផ្លូវសាធារណៈដែលប្រជាពលរដ្ឋ បានប្រើប្រាស់តាំងពីបូរាណមក។ ហើយរដ្ឋបាលស្រុកធ្លាប់បានកោះហៅអ្នកដែលបានប្រព្រឹត្តនោះ មកដោះស្រាយ ០២ លើកមកហើយ ប៉ុន្តែគាត់ពុំដែលបានមកចូលរួមដោះស្រាយនោះទេ។
ប្រជាពលរដ្ឋបានឲ្យដឹងថា ឈ្មោះ ចាន់ វិទូ ជាមន្ត្រីនគរបាល និងជាឈ្មួញរកស៊ីរណ្តោះដី បានយកឈ្មោះឯកឧត្តម យឹម លៀង មកប្រើគំរាមកំហែង ជីកផ្តាច់ផ្លូវសាធារណៈរបស់រដ្ឋ ដើម្បីជាប្រយោជន៍របស់ខ្លួន។លោក កូវ ផាន់នី ប្រជាពលរដ្ឋដែលមកចូលរូមតវ៉ាបានប្រាប់ថា លោក ចាន់ វិទូ ថៅកែរណ្តៅដី និងការដ្ឋានខ្សាច់ បានយកគ្រឿងចក្រមកជីកផ្តាច់ផ្លូវពលរដ្ឋដែលមានទំហំទទឹង៧ម៉ែត្រ និងបណ្តោយ២៣៩ម៉ែត្រ ក្នុងប្រវែងជាង៤២២ម៉ែត្រយកអាចម៌ដីលក់ ដោយសំអាងថា ពលរដ្ឋធ្វើផ្លូវលើដីរបស់ខ្លួន។
តាមតំណាងពលរដ្ឋប្រាប់ថា ផ្លូវដែលលោក ចាន់ វិទូ ជីកផ្តាច់ និងកាយយកអាចម៌ដីលក់នោះជាផ្លូវចាស់ ដែលពលរដ្ឋមានដីនៅអមសងខាងផ្លូវ បានបរិច្ចាកដីរបស់ខ្លួន ដើម្បីពង្រីកផ្លូវទំហំទទឹង ៧ម៉ែត្រ និងបណ្តោយ៦៥០ម៉ែត្រ បានធ្វើតំណើរស្រួល ខ្ពស់ផុតទឹក ទៅរកត្រី បេះបន្លែ សម្រាប់អាស្រ័យផល និងការចូលទៅទីគោរពបូជាលោកតាម្ចាស់ស្រុកជាដើម។
