វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 3804 នាក់
ម្សិលមិញ 4292 នាក់
សរុប 14113503 នាក់
កោះកុង៖ក្រុមហ៊ុនឯកជនដែលមានបំណងវិនិយោគបង្កើតទីតាំងវារីវប្បកម្ម និងកំពង់ផែខ្នាតតូច តាមរយៈការស្នើជួលដីរដ្ឋសម្រាប់ដំណើរការអាជីវកម្មរបស់ខ្លួន ត្រូវអនុវត្តន៍លក្ខខណ្ឌចំនួន ៤ចំណុច។
ករណីយ៍នេះលោក អ៊ុក ភ័ ក្ត្រា អភិបាលរងនៃគណៈអភិបាលខេត្តកោះកុងបាន ឲ្យដឹងពីលក្ខខណ្ឌចំនួន ៤ចំណុចថា៖
១- អ្នកវិនិយោគធ្វើការសិក្សាឱ្យបានច្បាស់លាស់អំពីសក្តានុពល ភាពអំណោយផល និង ប្រភេទនៃវារីវប្បកម្ម (ត្រី និងក្តាម) ដែលគ្រោងនឹងយកមក ចិញ្ចឹមដើម្បីឲ្យត្រូវ និងស្ថានភាពភូមិសាស្ត្រនៃតំបន់នេះ។២- សិក្សាឲ្យបានច្បាស់លាស់អំពីបច្ចេកទេសនៃការគ្រប់គ្រង គម្រោងវារីវប្បកម្មនេះ ប្រកបដោយប្រសិទ្ធភាព ចៀសវាងមានការប៉ះពាល់ដល់បរិស្ថាន ដល់សហគមន៍ និងការបំពុលចូលសមុទ្រ។
៣- ចូលរួមថែរក្សាបរិស្ថានធនធានធម្មជាតិនៅក្នុង និងក្បែរទីតាំងគម្រោងធ្វើអាជីវកម្ម វារីវប្បកម្មនេះ ដើម្បីធានាបាននូវនិរន្តរភាព បរិស្ថាន និងជីវចម្រុះ។
៤- រាល់ការសាងសង់ និងអនុវត្តន៍គម្រោងវារីវប្បកម្ម ត្រូវគោរពតាមគោលការណ៍ណែនាំរបស់រាជរដ្ឋាភិបាល ក្រសួងបរិស្ថាន និងលិខិតបទដ្ឋានគតិយុត្តនានា ដែលមានចែងជាធរមាន។
សូមបញ្ជាក់ថាកាលពីពេលថ្មីៗនេះ បន្ទាប់ពីចុះពិនិត្យទីតាំងស្នើសុំជួលដីរដ្ឋទំហំ ៣៦,៨៧ហិកតា រយៈពេលខ្លី (ក្រោម១៥ឆ្នាំ) ដើម្បីវិនិយោគវារីវប្បកម្ម បង្កាត់ពូជត្រី និងចិញ្ចឹមក្តាម ស្ថិតនៅឃុំ ជ្រោយប្រស់ ស្រុកកោះកុង រួចមក លោក ស្រ៊ុន ដារិទ្ធ រដ្ឋលេខាធិការក្រសួងបរិស្ថាន និងជាប្រធានប្រតិភូក្រុមការងារអន្តរក្រសួង រួមជាមួយអាជ្ញាធរខេត្តកោះកុង បានចុះប្រជុំផ្សព្វផ្សាយសេចក្តីសម្រេចស្តីពីការបង្កើតក្រុមការងារអន្តរក្រសួង ដើម្បីចុះពិនិត្យ សិក្សា និងវាយតម្លៃដីជាក់ស្តែងលើដីសាធារណៈរបស់រដ្ឋ ក្រោយទទួលការអនុញ្ញាតជាគោលការណ៍ពីរាជរដ្ឋាភិបាលក្នុងការជួលជូនវិស័យឯកជនក្នុងការវិនិយោគ លើគម្រោងចំនួន ២ទៀត គឺគម្រោងវារីវប្បកម្មក្តាមតាមបែបធម្មជាតិ ទំហំដី ៣៦៩ហិកតា និងគម្រោងសាងសង់កំពង់ផែខ្នាតតូច ទំហំដី ៧.៧៦៧ម៉ែត្រការ៉េ ស្ថិតនៅស្រុកស្រែអំបិល ខេត្តកោះកុង។
ក្រោយពីក្រុមការងារអន្តរក្រសួងបានចុះពិនិត្យទីតាំងជាក់ស្តែង អាជ្ញាធរខេត្ត បានតម្រូវឲ្យតំណាងក្រុមហ៊ុន ត្រូវរៀបចំគ្រោងការ និងផែនការវិនិយោគឲ្យបានរួចរាល់ និងត្រូវស្នើសុំការបោះបង្គោលព្រំឲ្យបានច្បាស់លាស់ ទើបក្រុមការងារអន្តរក្រសួង នឹងចុះមកពិនិត្យ សិក្សា និងវាយតម្លៃលើការជួលដី ដែលជាសម្បត្តិរបស់រដ្ឋនេះម្តងទៀត ចំណែកស្ថាប័នសំខាន់ក្នុងការវាយតម្លៃការជួលដីរដ្ឋនេះគឺជាសមត្ថកិច្ចរបស់ក្រសួងសេដ្ឋកិច្ច និងហិរញ្ញវត្ថុ។
តាមការរំពឹងទុកម្រោងទាំងនេះនឹងចូលរួមលើកកម្ពស់កម្រិតជីវភាពប្រជាជនមូលដ្ឋាន និងជាផ្នែកមួយនៃសេដ្ឋកិច្ចជាតិ៕