ឧបនាយករដ្ឋមន្ត្រីអូនពន្ធ័មុនីរត្ន័ប្រកាសដាក់ឲ្យប្រើសរោងចក្រប្រព្រឹត្តកម្ម ទឹកស្អាតបាក់ខែងជំហានទី២ និងបើកការដ្ឋានសាងសង់ជំហានទី ៣
21-September-2026 / សេដ្ឋកិច្ច
ភ្នំពេញ៖ គម្រោងសាងសង់រោងចក្រប្រព្រឹត្តកម្មទឹកស្អាតបាក់ខែងទាំង ៣ជំហាន គ្រោងនឹងចំណាយថវិកាសរុបចំនួនប្រមាណ ៦៦០លានដុល្លារអាម៉េរិក, ដែលក្នុងនោះ រួមមាន៖ ឥណទានសម្បទានពីទីភ្នាក់ងារបារាំងសម្រាប់ការអភិវឌ្ឍ (AFD) ចំនួន ៤១០លានដុល្លារអាម៉េរិក, ឥណទានសម្បទានពីធនាគារវិនិយោគអឺរ៉ុប (EIB) ចំនួន ១០០លានដុល្លារអាម៉េរិក, ហិរញ្ញប្បទានឥតំណងពីសហគមន៍អឺរ៉ុប (EU) ចំនួន ២៦លានដុល្លារអាម៉េរិក និងថវិកាបដិភាគពីរដ្ឋាករទឹកស្វយ័តក្រុងភ្នំពេញចំនួន ១២៤លានដុល្លារអាម៉េរិក។ នេះជាការលើកឡើងរបស់លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រី ក្រសួងសេដ្ឋកិច្ច និងហិរញ្ញវត្ថុ ក្នុងពិធីសម្ពោធដាក់ឱ្យដំណើរការជាផ្លូវការនូវ «រោងចក្រប្រព្រឹត្តកម្ម ទឹកស្អាតបាក់ខែងជំហានទី២ និងបើកការដ្ឋានសាងសង់ជំហានទី ៣» នៅថ្ងៃទី២៥ ខែមិថុនា ឆ្នាំ២០២៤។
លោកអគ្គបណ្ឌិតសភាចារ្យ អូន ព័ន្ធមុនីរ័ត្ន បន្តថា បន្ទាប់ពីគម្រោងសាងសង់ជំហានទី៣ ត្រូវបានបញ្ចប់, រោងចក្រប្រព្រឹត្តកម្មទឹកស្អាតបាក់ខែង នឹងមានសមត្ថភាពផលិតទឹកស្អាត បានចំនួនប្រមាណ ១៩ ម៉ឺន ៥ពាន់ម៉ែត្រគូប បន្ថែមទៀតក្នុងមួយថ្ងៃ ដើម្បីឆ្លើយតបទៅនឹងតម្រូវការទឹកស្អាតប្រចាំថ្ងៃពីសំណាក់បងប្អូនប្រជាពលរដ្ឋ នៅក្នុងរាជធានីភ្នំពេញ និងក្រុងតាខ្មៅនៃខេត្តកណ្តាល ដែលចេះតែបន្តកើនឡើងជាលំដាប់។
លោកអគ្គបណ្ឌិតសភាចារ្យ អូន ព័ន្ធមុនីរ័ត្ន ប្រកាសថា ការដាក់ឲ្យដំណើរការនូវរោងចក្រប្រព្រឹត្តកម្មទឹកស្អាតជំហានទី២ នាពេលនេះ គឺជាការបិទបញ្ចប់ទាំងស្រុងនូវបញ្ហាកង្វះទឹកស្អាត នៃផ្ទៃសេវាគ្របដណ្តប់របស់រដ្ឋាករទឹកស្វយ័តក្រុងភ្នំពេញ ដែលធ្លាប់បានកើតមានដោយអន្លើនាពេលកន្លងទៅ នៅក្នុងភូមិសាស្ត្រខ្លះនៃរាជធានីភ្នំពេញ និងក្រុងតាខ្មៅ នៃខេត្តកណ្តាល ដើម្បីធានានូវការផ្គត់ផ្គង់ទឹកស្អាត ជូនប្រជាពលរដ្ឋប្រើប្រាស់គ្រប់គ្រាន់ និងគ្រប់ពេល, ជាមួយនឹងការផ្តល់នូវសេវាល្អ និងរហ័ស។
លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា រោងចក្រប្រព្រឹត្តកម្មទឹកស្អាតបាក់ខែងជំហានទី២ ដែលត្រូវបានសម្ពោធដាក់ឲ្យដំណើរការជាផ្លូវការ នាពេលនេះ, មានសមត្ថភាពផលិតទឹកស្អាត បានចំនួនប្រមាណ ១៩ម៉ឺន ៥ពាន់ម៉ែត្រគូបបន្ថែមទៀតក្នុងមួយថ្ងៃ។ បច្ចុប្បន្ន រដ្ឋាករទឹកស្វយ័តក្រុងភ្នំពេញ អាចផលិតទឹកស្អាតបាន ចំនួនប្រមាណ ៩៨ម៉ឺន ២ពាន់ម៉ែត្រគូប ក្នុងមួយថ្ងៃ, ដែលបរិមាណនេះ អាចឆ្លើយតបទៅនឹងតម្រូវការបច្ចុប្បន្នរបស់ប្រជាពលរដ្ឋនៅក្នុងរាជធានីភ្នំពេញ និងក្រុងតាខ្មៅនៃខេត្តកណ្តាល។
សូមជម្រាបថា ទីភ្នាក់ងារបារាំងសម្រាប់ការអភិវឌ្ឍ (AFD) និងសហភាពអឺរ៉ុប (EU) ដែលបានសហការ ផ្ដល់ហិរញ្ញប្បទានដល់រដ្ឋាករទឹកស្វយ័តក្រុងភ្នំពេញ ដើម្បីអនុវត្តគម្រោងសាងសង់ រោងចក្រប្រព្រឹត្តកម្មទឹកស្អាតបាក់ខែងជំហានទី២ រហូតសម្រេចបានជាផ្លែផ្កាដ៏ត្រចះត្រចង់ និងបន្តឲ្យកម្ពុជាអាចបើកការដ្ឋានសម្រាប់គម្រោងសាងសង់រោងចក្រប្រព្រឹត្តកម្មទឹកស្អាតបាក់ខែងជំហានទី៣ ដែលគ្រោងនឹងបញ្ចប់នៅត្រីមាសទី៣ ឆ្នាំ ២០២៧ខាងមុខ។
លោកអគ្គបណ្ឌិតសភាចារ្យ អូន ព័ន្ធមុនីរ័ត្ន លើកឡើងថា ការសម្រេចបាននូវសមិទ្ធផលដ៏ធំនៃវិស័យទឹកស្អាត តាមរយៈការសាងសង់រោងចក្រប្រព្រឹត្តកម្មទឹកស្អាតបាក់ខែងជំហានទី១, ជំហានទី២, និងជំហានទី៣ ដែលផ្តល់លទ្ធភាពនៃការផលិតទឹកស្អាតរហូតដល់ចំនួនជាង ១លាន ១៧ម៉ឺនម៉ែត្រគូប ក្នុងមួយថ្ងៃ តាមផែនការរំពឹងទុកនៅត្រឹមចុងឆ្នាំ ២០២៧ខាងមុខ ដើម្បីគាំទ្រដល់ការអនុវត្តកម្មវិធីនយោបាយ និងគោលនយោបាយរបស់រាជរដ្ឋាភិបាល, រដ្ឋាករទឹកស្វយ័តក្រុងភ្នំពេញ កំពុងបន្តពង្រឹងសមត្ថភាពរបស់ខ្លួន ក្នុងការផលិត និងការផ្គត់ផ្គង់ទឹកស្អាត ជូនដល់ប្រជាពលរដ្ឋនៅក្នុងរាជធានីភ្នំពេញ និងក្រុងតាខ្មៅ នៃខេត្តកណ្តាល ស្របតាមផែនការមេរបស់ខ្លួន។
លោកអគ្គបណ្ឌិតសភាចារ្យ សង្ឃឹមថា រដ្ឋាភិបាលបារាំង, រដ្ឋាភិបាលជប៉ុន, ធនាគារវិនិយោគអឺរ៉ុប, សហភាពអឺរ៉ុប, មូលនិធិសហប្រតិបត្តិការអភិវឌ្ឍន៍សេដ្ឋកិច្ចនៃសាធារណរដ្ឋកូរ៉េ ព្រមទាំងប្រទេសជាដៃគូអភិវឌ្ឍន៍ផ្សេងទៀត នឹងបន្តជួយគាំទ្រ ទាំងហិរញ្ញវត្ថុ និងបច្ចេកទេសដល់រដ្ឋាករទឹកស្វយ័តក្រុងភ្នំពេញ ដើម្បីធានាថា រាល់ការអនុវត្តគម្រោងទាំងឡាយអាចសម្រេចបានដោយជោគជ័យស្របតាមផែនការមេលើកទី៣ ពីឆ្នាំ ២០២១ ដល់ឆ្នាំ ២០៣០ និងក្នុងរយៈពេលវែងទៅមុខ សំដៅសម្រេចបាននូវគោលដៅផ្គត់ផ្គង់ទឹកស្អាត ១០០% ជូនប្រជាពល រដ្ឋនៅទូទាំងប្រទេស៕
