វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4857 នាក់
ម្សិលមិញ 5378 នាក់
សរុប 14084150 នាក់
ភ្នំពេញ៖ក្រោយពីបញ្ចប់ការបោះឆ្នោតនៅទូទាំងប្រទេសនារៀលថ្ងៃទី២៩ក្កដាគណៈកម្មាធិការជាតិ រៀបចំការបោះឆ្នោត (គ.ជ.ប) បានប្រកាសឲ្យដឹងថា៖ប្រជាពលរដ្ឋដែលបានចូលរួមបោះឆ្នោត ជ្រើសតាំងតំណាងរាស្ត្រនីតិកាលទី៦ សម្រាប់ឆ្នាំ២០១៨នេះ មានចំនួន៦,៨៨៥,៧២៩នាក់ ក្នុងចំណោមពលរដ្ឋដែលគ្រប់អាយុ ស្ថិតនៅក្នុងបញ្ជីបោះឆ្នោតចំនួន៨,៣៨០,២១៧នាក់ ដែលគិតជាភាគរយមានចំនួន៨២.១៧ភាគ។
ចំនួននេះច្រើនជាងពលរដ្ឋទៅបោះឆ្នោតសកលកាលពីឆ្នាំ២០១៣។ លោក ស៊ិក ប៊ុនហុក ប្រធានគ.ជ.ប បានមានប្រសាសន៍ថា ការិយាល័យបោះឆ្នោតចំនួន២២,៩៦៧នៅទូទាំងប្រទេស បានបើកបម្រើឲ្យការបោះឆ្នោតទាំងអស់។ដំណើរការបោះឆ្នោតបានប្រព្រឹត្តទៅដោយប្រក្រតីភាព មិនមានការរំខាន់អ្វីទេ ទាំងសុវត្ថិភាព សន្តិសុខ ទាំងទឹកចិត្តរីករាយ របស់អ្នកបោះឆ្នោតម្នាក់ៗ។ ក្នុងនោះ មានការិយាល័យខ្លះបិទមុនម៉ោង៣ ដោយសារអ្នកមានឈ្មោះក្នុងបញ្ជីនៃការិយាល័យ បោះឆ្នោតនោះបានមកបោះឆ្នោតអស់ និងការិយាល័យភាគច្រើនបិទនៅម៉ោង៣។ ប្រធានគ.ជ.ប បន្តថា “ចំនួនពលរដ្ឋទៅបោះឆ្នោតនេះ គឺជាជោគជ័យនៃការបោះឆ្នោតរបស់យើង។ គ្មានការគំរាមកំហែងនោះទេ ហើយក៏គ្មានការបោះឆ្នោតណាដែលពលរដ្ឋសប្បាយរីករាយដូចនៅកម្ពុជាដែរ”។
ចំពោះលទ្ធផលបណ្តោះអាសន្នវិញ លោក ស៊ិក ប៊ុនហុកបានឲ្យដឹងថា នឹងត្រូវប្រកាសនៅថ្ងៃ១១ សីហា និងផ្លូវការប្រកាសនៅថ្ងៃ១៥ សីហា ក្នុងករណីគ្មានការបោះឆ្នោតសាជាថ្មី។
ទាក់ទង ទៅនឹងភាគីអន្តរជាតិទទួលឬមិនទទួលស្គាល់ លោក ស៊ិក ប៊ុនហុក បានថ្លែងថា ចំនួនពលរដ្ឋបានទៅចូលរួម បោះឆ្នោតដែលមានចំនួនច្រើនលើសលុបនេះ ដែលគិតជាភាគរយមានជាង៨០ភាគរយ គឺស្តែងឲ្យឃើញទៅដល់ភាគីអន្តរជាតិ ដែលពួកគេតែងតែលើកឡើងថា មិនទទួលស្គាល់ការបោះឆ្នោតនៅកម្ពុជា។លោកបានចោទជាសំណួរថា តើភាគីអន្តរជាតិធ្វើសកម្មភាពអ្វីផ្ទុយកម្ពុជាទៀតទេ? បើឃើញពលរដ្ឋទៅបោះឆ្នោតច្រើនយ៉ាងនេះ?
“ឆន្ទៈខ្មែរស្តែងចេញពីការទៅបោះឆ្នោតចំនួនច្រើននេះ ទៅដល់អន្តរជាតិដែលចង់បង្ហាញ ការវាយតម្លៃទាបចំពោះ ឆន្ទៈរបស់ប្រជាពលរដ្ឋ។ នេះជាចំលើយទៅមជ្ឈដ្ឋានអន្តរជាតិមួយចំនួន។ តើនេះខ្មែរស្រឡាញ់លទ្ធិប្រជាធិបតេយ្យអត់ ខណៈមាន អ្នកមកចូលរួមបោះឆ្នោតយ៉ាងគគ្រឹកគគ្រេងលើសពីឆ្នាំ២០១៣ទៀត”។
សូមបញ្ជាក់ថា ការបោះឆ្នោតថ្នាក់ជាតិអាណត្តិទី៥ កាលពីឆ្នាំ២០១៣ ចំនួនភាគរយអញ្ជើញទៅបោះឆ្នោតរបស់ប្រជាពលរដ្ឋខ្មែរ នៅទូទាំងប្រទេស មានជាង៦៩ភាគរយ។
មុនការបោះឆ្នោត អាមេរិកបានលើកឡើងថា ខ្លួនមិនបញ្ជូនអ្នកសង្កេតការណ៍មកចូលរួមពិនិត្យ លើដំណើរការបោះឆ្នោតទេ ប៉ុន្តែអ្វីដែលភ្ញាក់ផ្អើលនោះ គឺលោកទូតបានចូលរួមពិនិត្យដោយផ្ទាល់ដោយខ្លួនឯងតែម្តង។
បើយោងតាមបណ្តាញទំនាក់ទំនងសង្គមហ្វេសប៊ុក របស់គណៈកម្មាធិការជាតិរៀបចំការបោះឆ្នោត(គ.ជ.ប) បានឲ្យដឹងថា លោក វិល្លាម ហេដ ឯកអគ្គរដ្ឋទូតសហរដ្ឋអាមេរិកប្រចាំកម្ពុជា នៅព្រឹក ថ្ងៃទី២៩ ខែកក្កដា ឆ្នាំ២០១៨ បានចូលរួមសង្កេតការណ៍ បោះឆ្នោត នៅសង្កាត់ច្រាំងចំរេះទី១និងទី២ ក្នុងខណ្ឌឬស្ស៊ីកែវ។
ឆ្លើយតបចំពោះអ្នកសារព័ត៌មានក្នុងសន្និសីទ ក្រោយបញ្ចប់ការសង្កេតការណ៍បោះឆ្នោតនៅកម្ពុជា នាយប់ថ្ងៃទី២៩ ខែកក្កដា ឆ្នាំ២០១៨ ដែលបានចោទសួរទៅតំណាងអ្នកសង្កេតការណ៍ចិនថា ប្រទេសចិនបានដាក់សម្ពាធមកលើកម្ពុជា? គឺតំណាងអ្នកសង្កេតការណ៍អន្តរជាតិ មកពីចិនបានលើកឡើងថា ខ្លួនមិនឯកភាពនោះទេ។"ចំពោះសំណួរថា ប្រទេសចិនបានដាក់សម្ពាធមកលើកម្ពុជា ក្នុងការបោះឆ្នោត ចំពោះការលើកឡើងនេះខ្ញុំសូមមិនឯកភាព"។
តំណាងអ្នកសង្កេតមកពីចិនក៏បានអបអរសាទរ ចំពោះកម្ពុជាដែលបានរៀបចំការបោះឆ្នោតប្រកបដោយជោគជ័យ គ្មានការរំខាន ពីភាគីណាមួយ។ តំណាងមកពីចិនឲ្យដឹងទៀតថា ជប៉ុនបានផ្តល់ហិបឆ្នោតមកដល់គណៈកម្មាធិការជាតិ រៀបចំការបោះឆ្នោត ហើយចិនក៏បានផ្តល់ជំនួយមកជាបន្តបន្ទាប់ផងដែរ។
ភាគីអ្នកសង្កេតការណ៍បារាំងក៏បានកោតសរសើរ ពីដំណើរការបោះឆ្នោតនៅកម្ពុជាថា មានភាពរលូន ល្អប្រសើរ គ្មានអ្វីកើតឡើងឡើយ។លោក សុខ ឥសាន អ្នកនាំពាក្យគណបក្សប្រជាជនកម្ពុជា បានថ្លែងប្រាប់បណ្តាញឃោសនាថា៖គណបក្សប្រជាជនកម្ពុជា នឹងឈ្នះឆ្នោតភ្លូកទឹកភ្លូកដី ប្រៀបដូចកាលពីឆ្នាំ២០០៨នោះដែរ។ ប៉ុន្តែលោករំពឹងថា គណបក្សលោកនឹងទទួលបានលើសពី៩០អាសនៈនៃចំនួនអាសនៈរដ្ឋសភាសរុប១២៥។