វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 507 នាក់
ម្សិលមិញ 5467 នាក់
សរុប 14160084 នាក់
ខេត្តកំពង់ស្ពឺ៖ អ្នកចម្រៀងស្រីនៅទីរួមខេត្តកំពង់ស្ពឺម្នាក់ឈ្មោះ កង ឧស្សាកាលពីវេលាម៉ោងប្រមាណ១០យប់ថ្ងៃទី២៤ ខែកុម្ភៈ ត្រូវបានជនមួយក្រុមមានប្រុសមានស្រីព្រួតគ្នាវាយរហូតបែកភ្នែកបែកមុខមាត់មើលទៅគួរឲ្យសង្វេគនៅអាហាដ្ឋានយីយោហេងហេងនៅទីរួមខេត្តកំពង់ស្ពឺ។
តារាចម្រៀងវ័យ៣២ដែលរងគ្រោះ បានបញ្ជាក់ថា ថ្ងៃកើតហេតុខាងលើនាងនិងប្អូនស្រី រួមទាំងមិត្តភកិ្ដ ២នាក់ផ្សេងទៀតបានចូលទៅទទួលទានអាហារនៅហាងខាងលើនាតំបន់ផ្សាររាត្រីខេត្តកំពង់ស្ពឺ ដែលមានក្រុមនាងមួយតុ និងក្រុមមួយផ្សេងទៀតប្រមាណ៥ទៅ៦នាក់ដែរ។ នាងថា ដោយសារពីមុនប្អូនស្រីនាង និងនារីម្នាក់ក្នុងក្រុមផ្សេងនោះធ្លាប់មានទំនាស់នឹងគ្នាទើបលេចចេញការដៀមដាមផ្លែផ្កាពីសំណាក់ក្រុមម្ខាងទៀតរហូតក្រុមនោះគប់កែវក្នុងហាងអស់៣ទៅ៤ដង ប៉ុន្តែនាងមិនចង់តបតព្រោះតែមិនចង់មានរឿង ។
នាង រៀបរាប់ទាំងអួលដើមករ ថាដោយអត់ទ្រាំនឹងការជេរប្រមាថដៀមដាមកាន់តែខ្លាំងនាងក៏គប់កែវមួយចោលរហូតមានបុរស និងនារីដែលនៅភាគីម្ខាងទៀតបានស្ទុះមកវាយនាងរហូតដល់បែកមុខបែកមាត់ និងត្រូវត្រង់ភ្នែកជាដំណំ ហើយប្អូននាងក៏ត្រូវក្រុមម្ខាងទៀតវាយរហូតរបួសដៃផងដែរ។ ក្រោយពេលកើតហេតុក្រុមម្ខាងទៀតនោះបានចាកចេញពីកន្លែងកើតហេតុ ខណៈបុរស ដែលបានវាយមកលើនាងបានរត់គេចខ្លួនបាត់។
សមត្ថិកិច្ចបានមកដល់កន្លែងកើតហេតុនិងសាកសួរក៏បានស្គាល់មុខសញ្ញា ដែរប៉ុន្តែនៅមិនទាន់អាចស្វែងរកជនបង្កមកដាក់ទោសបាននៅឡើយទេមកដល់ពេលនេះ។ នាងថានាងចង់បានយុត្តិធម៌ព្រោះតែពេលនេះនាងមានបញ្ហាសុខភាពធ្ងន់ធ្ងរ ភ្នែករបស់នាងនៅតែហូរឈាមបើទោះបីជាបានជួបគ្រូពេទ្យ និងឲ្យបន្តតាមដាន ដែលនាងបារម្ភខ្លាំង ខណៈដែលការងារច្រៀងតាមកម្មវិធីផ្សេងក៏នាងខកខានរកប្រាក់ចំណូលផងដែរ។