វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5253 នាក់
ម្សិលមិញ 10264 នាក់
សរុប 14144435 នាក់
បន្ទាយមានជ័យ៖យ៉ាងហោចណាស់មានមនុស្សចំនួន ប្រមាណ១៩នាក់ ត្រូវបានរកឃើញស្លាប់ និងជាង៥០នាក់រងរបួស ក្នុងករណីអគ្គិភ័យឆេះកាស៊ីណូ Grand Diamond City នៅសង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យមុនពេលឆ្នាំថ្មីសកលសល់តែប៉ុន្មានថ្ងៃទៀតចូលមកដល់។
លោកឧត្តមសេនីយ៍ទោ សិទ្ធិ ឡោះ ស្នងការនគរបាលខេត្តបន្ទាយមានជ័យ បានឱ្យដឹងថា អគ្គិភ័យនេះ បានកើតមានតាំងពីវេលាម៉ោង ១១៖៣០នាទីយប់ថ្ងៃទី២៨ ខែធ្នូ ហើយរហូតដល់ទៀបភ្លឺថ្ងៃទី២៩ ខែធ្នូនេះ មិនទាន់រលត់នៅឡើយទេ។ខណៈមូលហេតុ ត្រូវបានគេរាយការណ៍ជំហ៊ានដំបូងថា ឆ្លងចរន្ដអគ្គិសនីនៅទីតាំងហ្គេមជាន់ក្រោម ហើយបានរីករាលដាលតែម្ដង។លោកស្នងការ បានឱ្យដឹងថា កម្លាំងសមត្ថកិច្ចចម្រុះប្រមាណជាង ៣០០នាក់ និងរថយន្តពន្លត់អគ្គីភ័យ ១១គ្រឿង កំពុងប្រតិបត្តិការនៅកន្លែងកើតហេតុ។ តែដោយសារទីតាំងខ្ពស់ ចង្អៀត ទំហំភ្លើងឆេះរាលដាលពាសពេញទីតាំង ទើបធ្វើឱ្យប្រតិបត្តិការពន្លត់ជួបការលំបាក ហើយមិនទាន់អាចពន្លត់បាន។
លោកទេសរដ្ឋមន្ត្រី គន់ គីម អនុប្រធានគណៈកម្មាធិការជាតិគ្រប់គ្រងគ្រោះមហន្តរាយ បានប្រាប់ កាសែតថា មានបុគ្គលិកបម្រើការងារនៅក្នុងកាស៊ីណូជាច្រើននាក់ ត្រូវបានគេជម្លៀសមកលើដំបូងអគារ។ ពេលនេះលោកបានបញ្ជូនឧទ្ធម្ភាគចក្រ និងកងកម្លាំងកុម្មង់ដូចុះទៅកន្លែងកើតហេតុ ដើម្បីជម្លៀសបុគ្គលិកចេញពីដំបូលអគារ។មនុស្សដែលកំពុងជាប់នៅលើអគារត្រូវបានជួយសង្គ្រោះមកខាងក្រៅខ្លះ ហើយនៅមានមនុស្សជាប់នៅតាមបន្ទប់ក្រុមសង្គ្រោះកំពុងបន្តរុករកចូលទៅជួយ។
កម្លាំងអន្តរាគមន៍កងប្រតិបត្តិការរុករក និងសង្គ្រោះគ្រោះមហន្តរាយ នៃកងពលតូចលេខ៧០ លេខ៥១និងក្រុមជួយសង្ក្រោះ៧១១និងកម្លាំងភាគីថៃក៏បានទៅដល់ក្រុងប៉ោយប៉ែតដោយមានឧទ្ធម្ភាគចក្រ ២គ្រឿងនៅកន្លែងកើតហេតុ។ប៉ុន្តែប្រសិទ្ធិភាពសង្គ្រោះនៅមានកម្រឹតដែលទាមទាឲ្យមន្ត្រីរាជរដ្ឋាភិបាលត្រូវពិនិត្សសិក្សាឡើងវីញក្នុងពេលដែលកម្ពុជាបាននិងកំពុងមានសំណង់អាគារខ្ពស់ៗជាច្រើនពាន់កន្លែង។
គេឃើញសម្តេចក្រឡាហោមសខេងឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃនិងលោកកែគឹមយ៉ានឧបនាយករដ្ឋមន្ត្រីបានអញ្ជើញទៅពិនិត្យស្ថានភាពនៃគ្រោះអគ្គិភ័យនេះផងដែរ។ព័ត៌មានបឋមគិតត្រឹមរសៀលថ្ងៃថ្ងៃទី២៩ ខែធ្នូ ឆ្នាំ២០២២នេះ សមត្ថកិច្ច បានឱ្យដឹងថា ក្នុងហេតុការណ៍ឆេះអគារកាស៊ីណូ ហ្គ្រែនដាយមិនស៊ីធី នៅប៉ោយប៉ែត អ្នកស្លាប់បានកើនឡើងដល់ចំនួន១៩នាក់ និង ៥៣នាក់រងរបួសធ្ងន់ ។ក្នុងនោះជនរងគ្រោះខ្លះបាត់បង់ជិវិតនៅក្នុងបន្ទប់ ហើយជនរងគ្រោះខ្លះទៀត បាត់បង់ជិវិតនៅផ្លូវដើរ នៅជណ្ដើរ ទំនងពួកគេកំពុងជម្លៀសខ្លួនពីអគ្គិភ័យ តែរត់មិនរួចដោយសារភ្លើងឆេះខ្លាំង និងមានផ្សែងខ្លាំងខ្មួលខ្មាញ់។
សេចក្ដីរាយការណ៍បានបន្ថែមទៀតថា ជនរងគ្រោះដែលនៅមានជីវិត ខ្លះត្រូវបានបញ្ជូនទៅសង្គ្រោះនៅប្រទេសថៃ និងខ្លះទៀត បញ្ជូនទៅមន្ទីរពេទ្យក្បែរកន្លែងកើតហេតុ នៅក្នុងប្រទេសកម្ពុជា។
គួរជម្រាបថា អគារកាស៊ីណូខាងលើមានកំេពស់១៧ជាន់មានបុគ្គលិកបម្រើការប្រុសស្រីប្រហែលជាង៤០០នាក់ ប៉ុន្តែការខូចខាតយ៉ាងណានោះ មិនទាន់អាចវាយតម្លៃបាននៅឡើយទេព្រោះបើតាមរូបភាពខ្ទេចហ្ម៉ត់អសទៅហើយ។សាកសព ជនរងគ្រោះជាបន្តបន្ទាប់ ក្នុងហេតុការណ៍ឆេះអគារកាស៊ីណូ ហ្គ្រែនដាយមិនស៊ីធី នៅប៉ោយប៉ែត អាជ្ញាធរបានសម្រេច តម្កល់សពជនរងគ្រោះ នៅវត្តត្រាច មានចម្ងាយប្រហែលជា ២ គីឡូម៉ែត្រពីទីតាំងកើតហេតុ ដើម្បីធ្វើកោសល្យវិច្ច័យ មុនធ្វើការដឹកសាកសពចេញទៅប្រទេសថៃ ក៏ដូចជាតាមតំបន់គោលដៅនានា ។
មកទល់ម៉ោង ៧យប់ ថ្ងៃទី២៩ ខែធ្នូ ឆ្នាំ២០២២នេះ ប្រតិបត្តិការរុករក និងសង្គ្រោះជនរងគ្រោះ ដោយអគ្គិភ័យឆាបឆេះអគារកាស៊ីណូនៅក្រុងប៉ោយប៉ែត ខេត្តបន្ទាយមានជ័យបានផ្អាកមួយអន្លើសិន ដោយសារយប់ងងឹតពិបាករុករក និងអគារមានកម្ពស់ខ្ពស់ និងច្រើនបន្ទប់ពេក។ប្រតិបត្តិការនឹងចាប់ផ្តើមបន្ត នៅវេលាម៉ោង៧ព្រឹកថ្ងៃស្អែកជាបន្តទៀត។លោក អ៊ុំ រាត្រី អភិបាល នៃគណៈអភិបាលខេត្តបន្ទាយមានជ័យ បានថ្លែងថា, កម្លាំងអន្តរាគមន៍កម្ពុជា និងថៃ កំពុងដុតដៃដុតជើងធ្វើការសង្គ្រោះមនុស្សដែលជាប់គាំងក្នុងអគារបានជាបន្តបន្ទាប់ និងគ្រប់គ្រងស្ថានការណ៍ ចំពោះអ្នករបួស ស្លាប់ និងទំហំនៃការខូចខាត នៅមិនទាន់ប៉ាន់ប្រមាណបាននៅឡើយ ។អភិបាលខេត្តស្រះកែវប្រទេសថៃ និងអភិបាលខេត្តបន្ទាយមានជ័យប្រទេសកម្ពុជា ក៏បានជួបប្រជុំគ្នា ដើម្បីសហការរុករកអន្តរាគមន៍ ជួយសង្គ្រោះជនរងគ្រោះ ។ ប៉ុន្តែប្រតិបត្តិការត្រូវបានសម្រាក បន្ទាប់ពីយប់មានការលំបាក ហើយនិងបន្តសកម្មភាពការងារនៅព្រឹកថ្ងៃស្អែក។