វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 6414 នាក់
ម្សិលមិញ 5304 នាក់
សរុប 14145940 នាក់
ខេត្តកំពង់ស្ពឺ ៖ ក្រោយ<ព្រឹត្តិការណ៍ ២០កុម្ភៈ> កម្ពុជារកឃើញអ្នកពាក់ព័ន្ធក៏ ដូចជាអ្នកឆ្លងជំងឺកូវីដ ១៩ ជាបន្តបន្ទាប់ពីមួយថ្ងៃទៅមួយថ្ងៃ។ រយៈពេលតែ ៦ថ្ងៃកន្លងមកនេះ កម្ពុជារកឃើញអ្នកឆ្លងរហូតទៅដល់ ២៣៤នាក់ ជាបរិមាណមួយ ដែលធ្វើឲ្យក្រសួងសុខាភិបាលមានការព្រួយបារម្ភជាខ្លាំង ព្រមទាំងបានដាស់តឿនឲ្យប្រជាជនទាំងអស់នាំគ្នាអនុវត្ត ៣ការពារ និង ៣កុំឲ្យបានខ្ជាប់ខ្ជួន។
សម្រាប់ការត្រៀម កាលពីរសៀលថ្ងៃទី ២៦ ខែកុម្ភៈ ឆ្នាំ២០២១នេះ ទំព័រហ្វេសប៊ុក កំពង់ស្ពឺខ្ញុំ បានសរសេររៀបរាប់យ៉ាងក្បោះក្បាយថា៖នៅមជ្ឈមណ្ឌលអភិវឌ្ឍន៍ជនបទកម្ពុជា-កូរ៉េ ស្ថិតនៅក្នុងភូមិផ្គង់ សង្កាត់ច្បារមន ក្រុងច្បារមន ខេត្តកំពង់ស្ពឺ ត្រូវបានថ្នាក់ដឹកនាំក្រសួងអភិវឌ្ឍន៍ជនបទ ផ្តល់ជាទីតាំងសម្រាប់ការព្យាបាលផង និងការធ្វើចត្តាឡឺស័កផង ព្រោះថាទីតាំងនេះមានលក្ខណៈអំណោយផលក្នុងការគ្រប់គ្រង ខ្យល់អាកាសល្អ ពិសេសមានចំងាយសមស្របពីភូមិប្រជាជន។ ឯកឧត្តម វ៉ី សំណាង អភិបាលខេត្តកំពង់ស្ពឺ ដែលជាប្រធានគណៈកម្មការប្រឆាំងកូវីដ១៩ខេត្តកំពង់ស្ពឺ ក៏បានសរសើរទីតាំងនេះមានលក្ខណៈអំណោយផលក្នុងការព្យាបាលជំងឺកូវីដ១៩ ពីព្រោះមានប្រព័ន្ធទឹក ភ្លើងល្អ កន្លែងហាត់ប្រាណ ពិសេសបន្ទប់ស្នាក់នៅដែលមាន លក្ខណៈអំណោយផលងាយបំពាក់សម្ភារៈ និងងាយអនុវត្តបច្ចេកទេសព្យាបាលជំងឺរបស់ក្រសួងសុខាភិបាល ជាងទីតាំងបំរុងទុកផ្សេងៗក្នុងខេត្ត។
ទីតាំងនេះដែរ ត្រូវបានថ្នាក់ដឹកនាំកំពូលនៃក្រសួងសុខាភិបាលរួមមាន ឯកឧត្តមសាស្ដ្រាចារ្យ ម៉ម ប៊ុនហេង លោកជំទាវ យស់ សម្បត្តិ និងលោកជំទាវវេជ្ជបណ្ឌិត ឱ វណ្ណឌីន ព្រមទាំងសហការី បានអញ្ជើញចុះពិនិត្យមើលទីតាំងនេះកាលពីពេលថ្មីៗកន្លងទៅនេះផងដែរ។ យ៉ាងណាក៏ដោយ សូមបងប្អូនកុំមើលស្រាលស្ថានការណ៍ ហើយប្រកាន់យកវិធាន ៣ការពារ(ពាក់ម៉ាស់ លាងដៃ រក្សាគម្លាត) និង ៣កុំ (កុំទៅកន្លែងមនុស្សច្រើន កុំនៅកន្លែងបិទជិត កុំប៉ះពាល់គ្នា) ដើម្បីចៀសវាងការឆ្លងជំងឺកូវីដ១៩ ទ្រង់ទ្រាយធំក្នុងសហគមន៍៕