សម្តេចក្រឡាហោមសម្ពោធសមិទ្ធិផលស្នងការនគរបាលរាជធានីដែលសង់មិនប្រើលុយរដ្ឋ!
27-March-2024 / សេដ្ឋកិច្ច
ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នាព្រឹកថ្ងៃទី៨ ខែកញ្ញា ឆ្នាំ២០២២កាត់ខ្សែបូដាក់ឱ្យប្រើប្រាស់ជាផ្លូវការនូវសមិទ្ធផលថ្មី របស់ស្នងការដ្ឋាននគរបាលរាជធានីភ្នំពេញដែលកសាងដោយមិនប្រើលុយរដ្ឋ។
លោកឧត្តមសេនីយ៍ឯក ស ថេត អគ្គស្នងការរង និងជាស្នងការ នៃស្នងការដ្ឋាននគរបាលរាជធានីភ្នំពេញ បានរាយការណ៍ថាចាប់ពីឆ្នាំ១៩៧៩ មន្ទីរនគរបាលក្រុងភ្នំពេញ ដែលប្រែក្លាយមកជាស្នងការដ្ឋាននគរបាលរាជធានីភ្នំពេញ មានទីតាំងស្ថិតនៅលើវិថីប៉ាស្ព័រ កែងផ្លូវលេខ១៥៤ ស្ថិតនៅ ក្នុងសង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។ ដោយពិនិត្យឃើញស្ថានភាពអគាររដ្ឋបាលដែលមានស្រាប់(សំណង់បានពីការដោះដូចទីតាំងខាងលើ) មានសភាពចាស់ទ្រុឌទ្រោមមិនអាចធានាដល់ការបំពេញភារកិច្ច និងបន្ទាប់ពីបានទទួលគោលការណ៍ឯកភាពនិងគាំទ្រពី សម្ដេចក្រឡាហោម លោកបានខិតខំ កៀរគរថវិកាពីសប្បុរសជននានាដើម្បីគាំទ្រដល់ការសាងសង់ រហូតនៅថ្ងៃទី៩ ខែឧសភា ឆ្នាំ២០១៩ សំណង់អគារចំនួន២ ត្រូវបានចាប់ផ្តើមសាងសង់។
សូមបញ្ជាក់ថាបើតាមសេចក្តីរាយការណ៍ប្រភពថវិកានិងការចំណាយអគាររដ្ឋបាល អគារសាលប្រជុំ រួមទាំងការបំពាក់សម្ភារៈបច្ចេកទេស ការរៀបចំហេដ្ឋា រចនាសម្ព័ន្ធជុំវិញអគារ បានចំណាយថវិកាសរុបចំនួនជាង ១៤លានដុល្លារអាមេរិក ដោយមិនបាន ប្រើប្រាស់ថវិការដ្ឋនោះទេ។ ថវិកាចំណាយទាំងនេះ មួយផ្នែកបានមកពីថវិការបស់អង្គភាពតាម រយៈការសម្រួលទីតាំងចំនួន២កន្លែង និងមួយផ្នែកទៀតបានមកពីការជួយឧបត្ថម្ភគាំទ្រពីសំណាក់សប្បុរសជនក្នុងនិងក្រៅប្រទេស ។
សម្ដេចក្រឡាហោម ស ខេង ឧបនាយករដ្ឋមន្ត្រី ក្នុងនាមសម្ដេចអគ្គមហាសេនាបតីតេជោ ហ៊ុន សែនបានសម្ដែងការកោតសរសើរដោយស្មោះចំពោះកិច្ចខិតខំប្រឹងប្រែង របស់អគ្គស្នងការដ្ឋាននគរបាលជាតិ និងស្នងការដ្ឋាននគរបាលរាជធានីភ្នំពេញ ក្នុងការបំពេញភារកិច្ចរបស់ខ្លួន លើការងាររក្សាសន្តិសុខ សណ្ដាប់ធ្នាប់ សាធារណៈនិងសុវត្ថិភាពសង្គមជូនប្រជាពលរដ្ឋនិងសង្គមជាតិ ប្រកបដោយស្មារតីទទួលខុសត្រូវខ្ពស់ ឆន្ទៈមោះមុត និងទទួលបានលទ្ធផលជោគជ័យជាបន្តបន្ទាប់ ជាពិសេស នៅថ្ងៃនេះយើងបានឃើញជាក់ស្ដែងទាំងអស់គ្នានូវអគារទំនើបនិងធំស្កឹមស្កៃ ដែលជាសមិទ្ធផលថ្មីមួយមិនធ្លាប់មាន ក្នុងប្រវត្តិរបស់ស្នងការដ្ឋាននគរបាលរាជធានីភ្នំពេញ ដោយសម្រេចបាននូវការសាងសង់អគារនេះទុកសម្រាប់បម្រើឱ្យផលប្រយោជន៍សាធារណៈ និងជាឧត្តមប្រយោជន៍ជាតិទាំងមូល។
សម្ដេចក្រឡាហោមបន្ថែមថា កងកម្លាំងនគរបាលជាតិត្រូវដើរតួនាទីជាកម្លាំងសហការផង និងជាកម្លាំងស្នូលផង។ ដើម្បីបំពេញតួនាទីនេះបានល្អ កងកម្លាំងនគរបាលជាតិរបស់យើងត្រូវតែធ្វើកំណែទម្រង់ និងធ្វើទំនើបកម្មជាចាំបាច់ឱ្យមានលក្ខណៈសម្បត្តិសមស្របដែលជាទីទុកចិត្ត មានភាពជឿជាក់ និងការពេញចិត្តពីសំណាក់ប្រជាពលរដ្ឋទូទៅ។ ហេតុនេះនៅពេលបំពេញ ភារកិច្ចទទួលខុសត្រូវរបស់ខ្លួន កងកម្លាំងនគរបាលត្រូវដើរតួនាទីជាអ្នកបម្រើប្រជាពលរដ្ឋ ពោល គឺមិនមែនដើរតួនាទីជាអ្នកត្រួតត្រា សំឡុត គំរាមកំហែង ប្រជាពលរដ្ឋឱ្យភ័យខ្លាចនោះទេ។ ជាសត្យានុម័ត កាលណាប្រជាពលរដ្ឋខ្លាចអាជ្ញាធរ ខ្លាចនគរបាល គាត់ពិតជាស្អប់យើង គេចមុខ ពីយើងនិងមិនសហការជាមួយយើងនោះទេ។ ដូចនេះ យើងត្រូវធ្វើឱ្យប្រជាពលរដ្ឋស្រឡាញ់ និងពេញចិត្តយើង ដើម្បីទទួលបានការគាំទ្រនិងកិច្ចសហការល្អពីគាត់ ព្រមទាំងធ្វើឱ្យ «ប្រជាពលរដ្ឋម្នាក់ក្លាយជានគរបាលម្នាក់»។
សម្ដេច បានផ្ដល់អនុសាន៍ណែនាំមួយចំនួនបន្ថែមទៀត ដល់អគ្គស្នងការដ្នាននគរបាលជាតិ គណៈបញ្ជាការឯកភាពរដ្ឋបាលរាជធានីភ្នំពេញ ស្នងការដ្ឋាននគរបាលរាជធានីភ្នំពេញ អធិការដ្ឋាននគរបាលខណ្ឌ រដ្ឋបាលខណ្ឌ រដ្ឋបាលសង្កាត់ និងប៉ុស្តិ៍នគរបាលរដ្ឋបាល បន្តលើកកម្ពស់ប្រសិទ្ធភាព និងគុណភាពក្នុងការផ្ដល់សេវាសាធារណៈគ្រប់ប្រភេទ ជាពិសេសសេវារដ្ឋបាល ដើម្បីទទួលបានជំនឿទុកចិត្តនិងការពេញចិត្តពីប្រជាពលរដ្ឋ។សម្ដេចបានណែនាំឱ្យ បន្តបង្ការ ទប់ស្កាត់ និងបង្ក្រាបរាល់បទល្មើស លួច ឆក់ ប្លន់ ល្បែងស៊ីសងខុសច្បាប់ និងបទល្មើសគ្រប់ប្រភេទ ដើម្បីធានាសុវត្ថិភាពជូនប្រជាពលរដ្ឋ បន្តយកចិត្តទុកដាក់ខ្ពស់និងអនុវត្តឱ្យបានម៉ឺងម៉ាត់ចំពោះការបង្ការ ទប់ស្កាត់ បង្ក្រាប បទល្មើសគ្រឿងញៀន ដែលកំពុងតែរីករាលដាលគ្រប់ទីកន្លែងក្នុងប្រទេសកម្ពុជាយើង ជាពិសេស ក្នុងដែនដីសង្កាត់និងខណ្ឌនានាក្នុងរាជធានីភ្នំពេញ។ បន្តរក្សាសណ្ដាប់ធ្នាប់សាធារណៈល្អបន្ថែមទៀតនៅតាមសង្កាត់និងខណ្ឌ ជាពិសេសពង្រឹងការអនុវត្តច្បាប់ចរាចរណ៍ផ្លូវគោកនិងលិខិតបទដ្ឋានគតិយុត្តិពាក់ព័ន្ធនានា ឱ្យមានប្រសិទ្ធភាព សំដៅកាត់បន្ថយអត្រារបួស ស្លាប់ ដោយគ្រោះថ្នាក់ចរាចរណ៍ឱ្យនៅក្នុងកម្រិតទាបបំផុត។
សម្ដេចបានជំរុញឱ្យបន្តបង្ការ ទប់ស្កាត់ និងបង្ក្រាបអំពើអនាចារ ការជួញដូរមនុស្ស ជាពិសេសស្ដ្រីនិងកុមារ អំពើហិង្សាក្នុងគ្រួសារនិងក្មេងទំនើង តាមសង្កាត់និងខណ្ឌនានាក្នុងរាជធានីភ្នំពេញ បន្តដោះស្រាយជម្លោះក្រៅប្រព័ន្ធតុលាការ ដែលកើតនៅក្នុងមូលដ្ឋានរបស់ខ្លួនប្រកប ដោយគុណភាពនិងប្រសិទ្ធភាព ដើម្បីចូលរួមចំណែកក្នុងការផ្ដល់សេវាយុត្តិធម៌ជូនប្រជាពលរដ្ឋ បន្តរក្សាអនាម័យស្អាត ដោះស្រាយបញ្ហាសំរាមនិងបញ្ហាលូស្ទះ រក្សាសោភ័ណភាព និងបរិស្ថានល្អ តាមសង្កាត់និងខណ្ឌនានាក្នុងរាជធានីភ្នំពេញ បន្តយកចិត្តទុកដាក់និងឆ្លើយតបឱ្យបានទាន់ពេលវេលាចំពោះគ្រោះមហន្ដរាយផ្សេងៗ ជាពិសេសអគ្គិភ័យ និងសហការជាមួយក្រសួងជំនាញក្នុងការបង្ការនិងទប់ស្កាត់រាល់ជំងឺឆ្លងរាត ត្បាតកាចសាហាវគ្រប់ប្រភេទ ឱ្យមានប្រសិទ្ធភាព។
សម្ដេចបានថែ្លងអំណរគុណយ៉ាងជ្រាលជ្រៅចំពោះ ឯកឧត្ដម លោកជំទាវ អ្នកឧកញ៉ា ឧកញ៉ា លោក លោកស្រីទាំងអស់ ដែលបានរួមចំណែកក្នុងការជួយឧបត្ថម្ភគ្រប់បែបយ៉ាង ដល់ការសាងសង់អគារនេះបានបញ្ចប់ដោយជោគជ័យ តាមផែនការនិងគម្រោងប្លង់ស្ថាបត្យកម្មដែលបានកំណត់ និងចាត់ទុកកាយវិការសប្បុរសនេះជាសក្ខីភាពឆ្លុះបញ្ចាំងឱ្យឃើញនូវវប្បធម៌ដ៏ល្អក្នុងការចែករំលែកធនធាន មនសិកាស្នេហាជាតិ ព្រមទាំងជួយលើកកម្ពស់កិត្យានុភាព ឧត្ដមភាព និងប្រសិទ្ធភាពការងាររបស់ស្នងការដ្ឋាននគរបាល រាជធានីភ្នំពេញ ស្របតាមការរីកចម្រើនយ៉ាងឆាប់រហ័សរបស់រាជធានីភ្នំពេញ ក្នុងយុគសម័យនៃការអភិវឌ្ឍលើគ្រប់វិស័យក្រោមដំបូលនៃសន្តិភាព។
