សម្តេចសង្ឃនន្ទង៉ែតយកវត្តវិហារសសរ១០០មកគ្រប់គ្រងនិងតែងតាំងព្រះតេជគុណ អេង ផល្លា ធ្វើជាព្រះចៅអធិការវត្ត ឡើងវិញ បង្កការក្តៅក្រហាយ!
20-March-2025 / ព័ត៌មានជាតិ
ខេត្តក្រចេះ៖ព្រះសេរីសម្ភារ៍ អេង ផល្លា ត្រូវបានសម្តេចព្រះសង្ឃនាយក នន្ទ ង៉ែត នៃព្រះរាជាណាចក្រកម្ពុជាសម្រេចប្រគល់តំណែងជាចៅអធិការវត្តព្រះវិហារសសរ១០០ឡើងវិញនាព្រឹកថ្ងៃទី១៨ ខែមករា ឆ្នាំ២០២១ ក្រោមអធិបតីភាពព្រះឃោសធម្ម លន់ សុគន្ធា អនុប្រធានលេខាធិការដ្ឋានគណៈសង្ឃនាយក ដើម្បីដឹកនាំគ្រប់គ្រង និងទទួលខុសត្រូវសាជាថ្មីរាល់ភារកិច្ចទាំងឡាយ លើការងារសាងសង់ ការងារសាលាពុទ្ធិកសិក្សាក្នុងវត្ត អប់រំភិក្ខុសាមណេរឲ្យស្ថិតនៅក្នុងធម៌វិន័យ និងថែរក្សាពេលកភ័ណ្ឌ និងគរុភ័ណ្ឌក្នុងវត្តចាប់ពីខែមករា ឆ្នាំ២០២១ឡើងវិញបន្ទាប់ពីដកបានមួយដង្ហើមចង្រឹត ។
ការតែងតាំងព្រះតេជគុណ អេង ផល្លា ឲ្យធ្វើជាព្រះចៅអធិការវត្តវិហារធំសសរ១០០ ស្ថិតក្នុងស្រុកសំបូរ ខេត្តក្រចេះ ឡើងវិញ បន្ទាប់ពីបានផ្ទុះអធិករណ៍ពាក់ព័ន្ធការចាត់ចែងថវិកាវត្ត បានធ្វើឲ្យមានការតវ៉ា និងការមិនពេញចិត្តពីសំណាក់ប្រជាពុទ្ធបរិស័ទចំណុះជើងវត្ត ព្រមទាំងគណៈកម្មការ និងអាចារ្យវត្ត។
កាលពីអំឡុងខែសីហា ឆ្នាំ២០២០ ប្រជាពុទ្ធបរិស័ទ បានការតវ៉ា និងសុំឱ្យដកតួនាទីព្រះចៅអធិការវត្តវិហារសសរ១០០ ពីព្រះតេជគុណ អេង ផល្លា ដោយពួកគេបានលើកឡើងថា ព្រះអង្គបានប្រើប្រាស់ថវិកាជាបច្ច័យវត្តខ្វះតម្លាភាព និងប្រើសម្រាប់កិច្ចការផ្ទាល់ខ្លួនជាដើម។
កាលនោះ សម្តេចសង្ឃនាយក នន្ទ ង៉ែត បានសម្រេចបញ្ចប់មុខតំណែងព្រះតេជគុណ អេង ផល្លា ពីចៅអធិការវត្តព្រះវិហារធំសសរ១០០ និងបានព្យួរតួនាទីពីអនុគណស្រុកសំបូរថែមទៀត។បន្ទាប់ពីហេតុការណ៍ស្ងប់ស្ងាត់មួយរយៈ នៅថ្ងៃទី៨ ខែមករា ឆ្នាំ២០២១ស្រាប់តែលេចចេញការតែងតាំងថ្មីពីសំណាក់សម្តេចសង្ឃនាយក នន្ទ ង៉ែត ដោយឱ្យព្រះតេជគុណ អេង ផល្លា ឡើងធ្វើជាព្រះចៅអធិការវត្តវិហារសសរ១០០វិញ។
ការសម្រេចនេះ បានធ្វើឱ្យអាចារ្យ គណៈកម្មការវត្ត និងប្រជាពុទ្ធបរិស័ទចំណុះជើងវត្តវិហារសសរ១០០ កើតការមិនសប្បាយចិត្ត និងផ្ទុះការតវ៉ាជាថ្មីផងដែរ។ អាចារ្យ គណៈកម្មការ និងប្រជាពុទ្ធបរិស័ទ បានជួបជុំគ្នាតវ៉ាជាថ្មីនៅព្រឹកថ្ងៃទី១៧ ខែមករា ឆ្នាំ២០២១នេះ។ប្រជាពុទ្ធបរិស័ទចំណុះជើងវត្ត បានអះអាងថា ព្រះតេជគុណ អេង ផល្លា មិនមែនជាកូនចៅប្រជាពុទ្ធបរិស័ទនៅក្នុងស្រុកសំបូរនោះទេ។ព្រះអង្គត្រូវបានគេរៀបចំឱ្យទៅធ្វើជាព្រះចៅអធិការវត្តវិហារសសរ១០០ នៅឆ្នាំ២០១៦។
លោកតា សោ ម៉ុន អាចារ្យទី១វត្តវិហារសសរ១០០បានឲ្យកាសែតដឹងថា ការដែលអាចារ្យ គណៈកម្មការ និងពុទ្ធបរិស័ទ ផ្ទុះការតវ៉ានេះព្រោះតែព្រះតេជគុណ អេង ផល្លា ក្រោយមកកាន់តួនាទីជាចៅអធិការវត្តបានបំផ្លាញសមិទ្ធផលប្រវត្តិសាស្ត្រមួយចំនួននៅក្នុងវត្តហើយសម្រេចការងារផ្សេងៗដោយអត្តនោម័តគ្មានការពិគ្រោះយោបល់ជាមួយគណៈកម្មការ ឬអាចារ្យវត្តនោះឡើយ។ ក្រៅតែពីការបំផ្លាញសមិទ្ធផលប្រវត្តិសាស្ត្រក្នុងវត្ត និងចាត់ចែងការងារផ្សេងៗដោយអត្តនោម័តហើយនោះ នៅមានរឿងចាត់ចែងថវិកាបច្ច័យរបស់វត្ត ខ្វះតម្លាភាព និងគ្មានព័ត៌មានច្បាស់លាស់ផងដែរ។
លោកតាអាចារ្យរូបនេះ បន្ថែមថា បច្ច័យដែលវត្តទទួលបានត្រូវបានព្រះតេជគុណ អេង ផល្លា យកទៅគ្រប់គ្រង និងចាត់ចែងដោយអង្គឯង។មិនតែប៉ុណ្ណោះក្នុងមួយឆ្នាំៗវត្តអាចរកបច្ច័យរហូតដល់ទៅ ៣០ម៉ឺនដុល្លារស្រាប់តែចុងក្រោយបែរជាត្រូវជំពាក់បច្ច័យកសាងក្នុងវត្តរហូតដល់ទៅជាង៣០ម៉ឺនដុល្លារវិញ។ បើតាមលោកតា សោ ម៉ុន នេះជាភាពមិនប្រក្រតីមួយលើការចាត់ចែងថវិកាវត្ត។លោកតា សោ ម៉ុន ៖«ក្នុងមួយឆ្នាំបច្ច័យដែលរកបានប្រហែល ៣០ម៉ឺនដុល្លារ បើយើងសរុបទាំងអស់ជាមធ្យមគឺលោកគ្រប់គ្រងបច្ច័យដោយខ្លួនឯង អត់មានឱ្យគណៈកម្មការថែរក្សាទេ»។
លោកតា សោ ម៉ុន បានអះអាងថា លោកតា ព្រមទាំងគណៈកម្មការ ប្រជាពុទ្ធបរិស័ទចំណុះជើងវត្ត គឺមិនព្រមទទួលព្រះតេជគុណអេង ផល្លា ឱ្យធ្វើជាចៅអធិការវិញនោះឡើយ។លោកតាអាចារ្យទី១ នៃវត្តវិហារសសរ១០០ បានអះអាងជំហររបស់ខ្លួនយ៉ាងដូច្នេះ «យើងខ្ញុំទាំងអស់គ្នាមិនព្រមឱ្យលោកមកវិញ។ តើលោកមកវិញបានប្រយោជន៍អី? បើនៅលើកមុនគ្រាន់តែបំផ្លាញសមិទ្ធផលរបស់គេហ្នឹង គឺអស់ច្រើនណាស់ទៅហើយ ហើយនៅជំពាក់លុយគេទៀត។ ឥឡូវនេះចង់មកវិញធ្វើអីទៀត មកបំផ្លាញរបស់គេតទៅទៀត ឬយ៉ាងម៉េច?។ នេះហើយជាហេតុដែលយើងខ្ញុំមិនសុខចិត្តឱ្យលោកមកវិញ»។
ព្រះឃោសធម្ម លន់ សុគន្ធាដែលមកប្រកាសតែងតាំងលោកសង្ឃអេងផល្លារឡើងវិញ មានសង្ឃដីការថា គណៈសង្ឃនាយកបានសម្រេច តែងតាំងព្រះសេរីសម្ភារ៍ អេង ផល្លា ឲ្យទៅដឹកនាំគង់នៅវត្តព្រះវិហារធំ គឺដូចមាននៅក្នុងសេចក្តី នៃសង្ឃប្រកាស បានចែងច្បាស់អំពីការដាក់ ព្រះវិហារសសរ១០០ ឲ្យស្ថិតនៅក្រោមការគ្រប់គ្រងរបស់គណៈសង្ឃនាយក នៃព្រះរាជាណាចក្រកម្ពុជា រហូតដល់ទទួលបាននូវភាពប្រក្រតី និងស្ថិរភាពល្អ គណៈសង្ឃនាយក និងប្រគល់វត្តនេះជូនដល់គណៈសង្ឃមូលដ្ឋាន ខេត្តក្រចេះគ្រប់គ្រងវិញ។សម្ដេចព្រះឃោសធម្ម លន់ សុគន្ធា ស្នើសូមឲ្យសូមព្រះសង្ឃ គណៈកម្មការចារ្យ និងពុទ្ធបរិស័ចំណុះជើងវត្ត អាជ្ញាធរគ្រប់លំដាប់ថ្នាក់ទាំងអស់ ត្រូវសិក្សាស្វែងយល់អំពីការដាក់វត្តនេះឲ្យស្ថិតនៅក្រោមការគ្រប់គ្រង របស់គណៈសង្ឃនាយក នៃព្រះរាជាណាចក្រកម្ពុជា។
.jpg&h=97&w=146)
