វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 4514 នាក់
ម្សិលមិញ 8227 នាក់
សរុប 14131395 នាក់
សៀមរាប ៖តារាចម្រៀងរ៉េបរិះដែលច្រៀងគន់បញ្ហាសង្គមនៅកម្ពុជាលោកគាសុគន្ធ នៅថ្ងៃទី២២ ខែធ្នូ ឆ្នាំ២០២០នេះ ត្រូវបានតុលាការខេត្តសៀមរាប សម្រេចផ្តន្ទាទោសឱ្យជាប់ពន្ធនាគារ១ឆ្នាំកន្លះតែនៅក្នុងគុក១ឆ្នាំពីបទ «ញុះញង់ឱ្យប្រព្រឹត្តបទឧក្រិដ្ឋជាអាទិ៍» តាមមាត្រា ៤៩៥ នៃក្រមព្រហ្មទណ្ឌ។ឯយុវជន ឡុង ពុទ្ធារ៉ា ដែលជាដៃគូចម្រៀង ជាមួយ គា សុគន្ធ វិញ ត្រូវបានតុលាការសម្រេចឲ្យជាប់ពន្ធនាគារ៥ខែ ដោយសារតែជាអនិតិជន។ លោក នូ វាសនា សម្រេចឲ្យ ឡុង ពុទ្ធារ៉ា អនុវត្តទោស៣ខែ នៅសល់២ខែទៀត ព្យួរទោស។
យុវជនទាំង២នាក់ ឈ្មោះ គា សុគន្ធ អាយុ២២ឆ្នាំ និង ឈ្មោះឡុង ពុទ្ធារ៉ា អាយុ១៧ឆ្នាំ ត្រូវបានសមត្ថកិច្ចខេត្តសៀមរាប ចាប់ខ្លួនកាលពីថ្ងៃទី៨ ខែកញ្ញា ឆ្នាំ២០២០នៅផ្ទះរបស់គេទល់មុខប្រាសាទអង្គរវត្ត ក្នុងសង្កាត់គោកចក ក្រុងសៀមរាប ក្រោយពីពួកគេច្រៀងចម្រៀងរ៉េប បង្ហោះតាមបណ្ដាញសង្គមរៀបរាប់ពីការឈឺចាប់រឿងអយុត្តិធម៌សង្គម សេដ្ឋកិច្ច ធ្លាក់ចុះពលរដ្ឋចំណាកស្រុកបញ្ហាព្រំដែន និងសង្គមជាតិទន់ខ្សោយ ជាដើម។
ឈ្មោះគា សុគន្ធ ម្ចាស់បទចម្រៀងរ៉ែប «ដីខ្មែរ» ត្រូវបានតុលាការចោទប្រកាន់ និងបញ្ជូនទៅឃុំខ្លួនក្នុងពន្ធនាគារខេត្តសៀមរាប កាលពីថ្ងៃទី៥ ខែកញ្ញា ក្រោយពីជនរូបនេះ ច្រៀងបង្ហោះតាមបណ្ដាញសង្គម រិះគន់បញ្ហាសង្គម។ យុវជន គា សុគន្ធ អាយុ ២២ឆ្នាំ មានមុខរបរជាងថតរូប និងវីដេអូ ក្នុងពិធីមង្គលការ និងវិធីផ្សេងបុណ្យផ្សេងៗក្នុងខេត្តសៀមរាប។ ជនរូបនេះ តែងតែនិពន្ធបទចម្រៀង និងច្រៀងដោយខ្លួនឯង បង្ហោះក្នុង យូធូប (Youtub) និងបណ្ដាញសង្គម រិះគន់បញ្ហាសង្គម។ វីដេអូចម្រៀង ដែលលោកបង្ហោះជាលើកចុងក្រោយ មានចំណងជើងថា «ដីខ្មែរ» ដែលមានមនុស្សចូលទស្សនាច្រើន និងមានការចែករំលែកយ៉ាងច្រើនតាមបណ្ដាញសង្គមហ្វេសប៊ុក។
ករណីយ៍នេះលោក សឹង សែនករុណាមន្ត្រីអង្គការអាដហុកប្រាប់កាសែតថា ការឃាត់ខ្លួន និងចោទប្រកាន់ពលរដ្ឋ ដែលបញ្ចេញមតិតាមរូបភាពផ្សេងៗ ពីសំណាក់អាជ្ញាធរនេះ វាជាដំណើរការនៃការរឹតត្បិតសិទ្ធិសេរីភាពបញ្ចេញមតិនៅក្នុងសង្គម។ «យើងឃើញថា មួយរយៈចុងក្រោយនេះ រដ្ឋាភិបាល ហាក់ដូចជាមានការធ្វើទុក្ខបុកម្នេញលើសកម្មជនដែលប្រើប្រាស់នូវបណ្ដាញសង្គម ក្នុងការបញ្ចេញមតិហ្នឹង ដោយសារមានស្ថានភាពតានតឹងមែនទែន រហូតមានការចាត់វិធានការតាមផ្លូវច្បាប់ ដែលធ្វើឲ្យអ្នកដែលមានទឹកចិត្តចង់ចូលរួមធ្វើការរិះគន់សង្គម ឬក៏រិះគន់ទៅលើរដ្ឋាភិបាលហ្នឹង គឺចាប់ផ្ដើមមានការថមថយ មានការភ័យខ្លាច ដោយសារការចាត់វិធានការជាបន្តបន្ទាប់ ពីរដ្ឋាភិបាលនេះឯង»។
តែអ្នកនាំពាក្យក្រសួងយុត្តិធម៌ និងជាអនុប្រធានគណៈកម្មាធិការសិទ្ធិមនុស្សកម្ពុជា លោក ជិន ម៉ាលីន អះអាងនាពេលកន្លងមកថា អាជ្ញាធរអនុវត្តលើអ្នកប្រព្រឹត្តខុសច្បាប់ ដោយមិនប្រកាន់និន្នាការឡើយ។«ការឃាត់ខ្លួន ការចោទប្រកាន់(សកម្មជនសិទ្ធិមនុស្ស) មិនមែនដោយសារពួកគាត់ធ្វើសកម្មភាពការពារសិទ្ធិមនុស្សទេ គឺដោយការធ្វើបំពានច្បាប់ មានមូលដ្ឋាន បង្កើតទៅជាបទល្មើស»។