វីដេអូ
តាមដានសង្គម
ចំនួនអ្នកទស្សនា
ថ្ងៃនេះ 5348 នាក់
ម្សិលមិញ 5378 នាក់
សរុប 14084641 នាក់
ភ្នំពេញ៖ លោកប៉ាទ្រិកមុហ្វី( Patrick Murphy) ឯកអគ្គរដ្ឋទូតសហរដ្ឋអាមេរិក ប្រចាំព្រះរាជាណាចក្រកម្ពុជា បានមកជួបលោកកឹមសុខានៅគេហដ្ឋាន។លោកកឹមសុខាបានដឹងតាមហ្វេសប៊ុកថា៖នេះជាជំនួបរបស់ខ្ញុំ ក្នុងចំណោមជំនួប៥លើក ក្នុងរយៈពេលប្រមាណមួយឆ្នាំនៃបេសកកម្មរបស់គាត់នៅកម្ពុជា។ ក្នុងជំនួបដែលមានការចូលរួមពីសហការីបន្ទាប់គាត់ពីររូបទៀតផងដែរថ្ងៃនេះ ក្រៅពីការសួរសុខទុក្ខ យើងក៏បានសំណេះសំណាល ពិភាក្សាគ្នាអំពីបញ្ហាសិទ្ធិមនុស្ស សេដ្ឋកិច្ច សង្គម ជាពិសេសយើងផ្តោតលើផលប៉ះពាល់ដោយសារជម្ងឺរាតត្បាត កូវីដ-១៩ បញ្ហាគ្រោះទឹកជំនន់ និងការពង្រឹងកិច្ចសហប្រតិបត្តិការណ៍រវាងសហរដ្ឋអាមេរិក និងកម្ពុជាផងដែរ។
លោកកឹមសុខាថា៖ក្នុងឱកាសនោះដែរ ខ្ញុំក៏បានថ្លែងអំណរគុណសហរដ្ឋអាមេរិក និងប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ស្តីពីកម្ពុជា ២៣តុលា១៩៩១ ដែលបានផ្តល់ជំនួយដល់រាជរដ្ឋាភិបាល និងប្រជាពលរដ្ឋខ្មែរយ៉ាងសន្ធឹកសន្ធាប់លើវិស័យនានា រហូតមកដល់សព្វថ្ងៃនេះ។ឯកឧត្តមឯកអគ្គរដ្ឋទូត ក៏បានកោតសសើរនូវជំហរ និងសកម្មភាពរបស់ខ្ញុំ ដែលមានការអត់ធ្មត់ ការចូលរួមសកម្មភាពនានាក្នុងសង្គមសេដ្ឋកិច្ច បរិស្ថាន សាសនាជាដើម ទោះមិនទាន់មានសេរីភាពពេញលេញក៏ដោយ ជាពិសេសសកម្មភាពចុងក្រោយ ក្នុងការជួយដល់ប្រជាពលរដ្ឋដែលរងគ្រោះដោយទឹកជំនន់។
ក្នុងករណីជំនួយមនុស្សធម៌នេះ តាមរយៈឯកឧត្តមឯកអគ្គរដ្ឋទូត ខ្ញុំក៏បានផ្ញើនូវសេចក្តីថ្លែងអំណរគុណ និងកោតសសើរចំពោះបងប្អូនខ្មែររស់នៅសហរដ្ឋអាមេរិក ដែលមានចិត្តសប្បុរសធម៌បានផ្តល់នូវជំនួយជាស្បៀង និងសម្ភារៈ ឲ្យខ្ញុំយកទៅចែកជូនដល់ប្រជាពលរដ្ឋខ្មែរដែលរងគ្រោះដោយទឹកជំនន់នៅកម្ពុជា ដោយសារបងប្អូនសប្បុរសជនទាំងនោះ មានជំនឿ និងគាំទ្រនូវគុណតម្លៃ និងគោលជំហរអហិង្សា និងការលះបង់របស់ខ្ញុំ ដើម្បីប្រជាពលរដ្ឋខ្មែរ កន្លងមក បច្ចុប្បន្ន និងទៅអនាគត។មានការកត់សម្គាល់ថាទោះជាជាប់ទិសក្បត់ជាតិដែលមិនទាន់កាត់ទោសតែតុលាការបានបន្ធូបន្ធយឲ្យលោកកឹមសុខាបានចូលរួមធ្វើបុណ្យកឋិនទាន និងចុះជួបចែកជំនួយសប្បុរសធម៌ ជូនប្រជាពលរដ្ឋដែលរងគ្រោះដោយទឹកជំនន់ដែលក្នុងនោះចូលលុយ៥ពាន់ដុល្លារជាមួយរាជរដ្ឋាភិបាលផងដែរ។