ក្រុមហ៊ុន ហាន់ស៊ីង(HanShin) ធ្វើផ្លូវជាតិលេខ៥ ពីកំពង់ឆ្នាំង-ខេត្តពោធិ៍សាត់ ជិត៣ឆ្នាំហើយ ដូចជាគ្រាន់តែស្ទាបៗប៉ុណ្ណោះ!!
21-September-2026 / ព័ត៌មានជាតិ
កំពង់ឆ្នាំង៖ក្រុមហ៊ុន ហាន់សុីង(HanShin) នេះដេញថ្លៃលើគម្រោងស្ថាបនាឡើងវិញនូវផ្លូវជាតិលេខ៥ ពីខេត្តកំពង់ឆ្នាំង ដល់ធ្លាម្អមខេត្តពោធិ៍សាត់ បានក្នុងទឹកប្រាក់ជាង៨០លានដុល្លារអាមេរិក ។តែ មកទល់ពេលនេះ ជិត៣ឆ្នាំទៅហើយ ការដំណើរការសាងសង់ស្ថាបនា ហាក់មិនទៅមុខ ទុកអោយនៅមេម៉ាយ បង្កផលលំបាកយ៉ាងខ្លាំងដល់ប្រជាពលរដ្ឋរស់នៅតាមដងផ្លូវជាតិ។
ក្រុមហ៊ុនបានប្រើគ្រឿងចក្រកាយដី រួចទុកចោលរាប់ខែ បណ្តាលអោយបង្កជារណ្តៅជ្រៅៗ ពំនូក ធ្វើអោយប្រជាពលរដ្ឋជួបបញ្ហាខ្លាំងក្នុងការបើកម៉ូតូ កង់ ឡាន បរទេះគោ-ក្របី ចូលផ្ទះ និងបង្កគ្រោះថ្នាក់ចរាចរណ៍ជាដើម។ អ្នកធ្វើដំណើរលើកំណាត់ផ្លូវជាតិលេខ៥ រអ៊ូរទាំ ពីការស្ថាបនានេះ ធ្វើអូសបន្លាយពេល សំបូរដោយគំហុក ហុយ បើកកាត់ម្តងៗ។
កម្មករ ក៏ដូចជាក្រុមការងារបានបង្ហើបថា៖ ក្រុមហ៊ុន ហាន់សុីង(HanShin) ខ្វះលក្ខណះសម្បត្តិគ្រប់គ្រាន់ សំខាន់គ្រឿងចក្រ សំភារៈ ជាមធ្យោបាយដំណើរការឱ្យការស្ថាបនាផ្លូវ ដែលខ្លួនដេញថ្លៃបាន ។ ជាទម្លាប់ក្រុមហ៊ុននេះ បាន(សាប់បន្ត) ម៉ៅការបន្តឱ្យក្រុមហ៊ុនតូចៗជាច្រើន ហើយក្រុមហ៊ុនខ្លះធ្វើមិនទៅមុខ ខ្លះទៀតរត់ចោល ខណៈម៉ៅការមិនចំណេញ បង្កើតជាការរាំងស្ទះការងារជាហូរហែ។
កម្មករនិយាយថា៖ ក្រុមហ៊ុន ហាន់សុីង(HanShin) ធ្វើផ្លូវជាតិលេខ៥ ពីកំពង់ឆ្នាំង-ខេត្តពោធិ៍សាត់ នេះមានក្រុមហ៊ុនប្លែកៗមកម៉ៅការ តែមិនចាំថាក្រុមហ៊ុនណាធ្វើពិតប្រាកដ ចេញមួយចូលមួយ និងគ្រឿងចក្រ រថយន្ត ជាដើម ដាក់ឱ្យដំណើរជាចន្លោះៗ គ្រាន់តែឱ្យល្អមើល ថាក្រុមហ៊ុនធ្វើការស្ថាបនាជាប់ជាប្រចាំតែប៉ុណ្ណោះ។
សូមរំលឹកថា៖ ក្រុមហ៊ុន ហាន់សុីង(HanShin) ស្ថិតក្នុងបញ្ជីខ្មៅរបស់ក្រសួងសាធារណការ និងដឹកជញ្ជូន បន្ទាប់ពីស្ថាបនាផ្លូវជាតិលេខ ២១ ពីតាខ្មៅទៅ ស្រុកកោះធំ កន្លែងខ្លះគ្មានគុណភាព មិនតាមស្តង់ដារ ប៉ុន្តែក្រុមហ៊ុន ហាន់សុីង(HanShin) នៅតែមានលក្ខណះពិសេស អាចចូលមកដេញថ្លៃបានគ្រោងស្ថាបនានូវផ្លូវជាតិឡើងវិញជាបន្តបន្ទាប់ទៅវិញ..!?។
ពាក់ព័ន្ធករណីនេះ លោក គង់ វិមាន អ្នកនាំពាក្យក្រសួងសាធារណការ និងដឹកជញ្ជូន មិនបកស្រាយប្រាប់អង្គភាព....ឱ្យលម្អិតទេ តាមទូរស័ព្ទនៅព្រឹកថ្ងៃទី២១ ខែកញ្ញា ឆ្នាំ២០២០ ដោយលោកបញ្ជាក់ថា កំពុងមានធុរៈការងារច្រើន ហើយបង្វែឱ្យទៅសួរ លោក ឈឹម ផល្លា ប្រធាននាយកដ្ឋានផ្លូវថ្នល់ ព្រោះគាត់ជាអ្នកកាន់ការងារនេះផ្ទាល់។ ដោយឡែកលោក ឈឹម ផល្លា បានប្រាប់ថា៖ ការស្ថាបនាផ្លូវខាងលើ គេបានដំណើរការធម្មតា ចំពោះការយឺតយ៉ាវ ដោយសារស្ថានភាពការរាតត្បាតនៃជំងឺកូវីដ-១៩ និងចំពេលរដូវភ្លៀងធ្លាក់ផង។
លោកថ្លែងថា ទោះជាពេលនេះយឺតបន្តិចមែន តែមិនឱ្យហួសតាមការកំណត់រយៈពេលនៃដំណើរការស្ថាបនាឡើយ។ ពាក់ព័ន្ធនិងបញ្ហាខ្លះមានការបង្កគ្រោះថ្នាក់ចរាចរណ៍ដោយសារកង្វៈខាតផ្លាកសញ្ញាចរាចរណ៍ លោកបកស្រាយថា៖ បញ្ហានេះខ្ញុំគិតថា គេបានរៀបចំត្រឹមត្រូវហើយ ប៉ុន្តែខ្ញុំទទួលស្គាល់ថា មានកន្លែងខ្លះចន្លោះប្រហោងលើចំណុចនេះ ដូច្នេះខាងខ្ញុំបន្តយកចិត្តទុកពិនិត្យអោយបានដិតដល់ ហើយការធ្វើដំណើរបើកបរយឺតយូរ តាមផ្លូវលំបាកខ្លះ ដូចជាយើងដឹងស្រាប់ហើយមានឡានច្រើន និងផ្លូវកំពុងស្ថាបនា ។
ជុំវិញករណីថាកន្លងមក ក្រុមហ៊ុន ហាន់សុីង(HanShin) ស្ថិតក្នុងបញ្ជីខ្មៅរបស់ក្រសួងសាធារណការ និងដឹកជញ្ជូន បន្ទាប់ពីស្ថាបនាផ្លូវជាតិលេខ ២១ ពីតាខ្មៅទៅ ស្រុកកោះធំ កន្លែងខ្លះគ្មានគុណភាព មិនតាមស្តង់ដារ ហើយបើស្ថាបនាផ្លូវជាតិលេខ៥ ពិនិត្យឃើញថា មានកំហុសបែបនេះទៀត តើគួរអនុញ្ញាតឱ្យ (HanShin)ចូលដេញថ្លៃទៀតទេ..? លោកថារដ្ឋមន្ត្រីបានពិនិត្យត្រឹមត្រូវហើយ!។ សូមបញ្ជាក់ថា៖ ក្រុមហ៊ុន (HanShin) នេះពិតជាបានធ្វើផ្លូវយឺតយូរមែន បើសិក្សាពីតថភាពជាក់ស្តែង ដូច្នេះគួរខាងក្រសួងពន្លឿន ហើយខាង(ចៃកា)ពិនិត្យជាក់ស្តែងពីសកម្មភាពស្ថាបនានេះផងកុំម៉ាៗចឹងពេក។
